Éxodo 19 - Biblia Yanowamö

Jeobaa dodijidawä a wa̦ lä ji̦lileno wejei tä a̦

¹ Ejido jamö Isaeli ebä lä jocälayono wei, bä wayumö juu showao däjä, 2 belibo cäcö lublamalemaje. Ai a belibo faa lä co̦layono wei däjä, ö̦jö tä mö jalu showawä ja, Sinai cäcö lä ublale jamö bä waloquema, tä ulifi lä bloque wei jamö.

² Ö̦jö däjä, Lefidimi jamö bä lä jocälayono wei, Sinai tä ulifi bloque jamö bä waloa nomöjöquema. Ö̦jö tä ulifi bloque jamö, Sinai cäcö ajede jamö Isaeli ebä fa yanöcöicunö, bä bälöblaquema.

³ Ö̦jö däjä, Yai Bada nija a icuobä, bei macö jamö Moisesi a dubefälöma. Bei macö jamö Jeobaa a culanö, a wa̦ bädaledayoma. Abinaja a cuma, Moisesi nija. —Jacobo ebä nija, Isaeli ebä lä cui nija, wale a̦no da wäyä. Wa bä nowa nia taö.

⁴ Camiyänö, Ejidoteli ya bä nö da bleaamablei, wama tä daa waiquilalema. Eja, camiyä nija wamacö cuobä, bämacö lä ajedamabole wama tä ca̦i daö. ¿Ö̦jö tawä? Mojomö bänö bei bä jumabö ja, cama bä ijilubö ebä fa lomabojenö, bä bälaö lä cuaaö wejeinaja, camiyänö ma cui, eja bämacö malä bälabayofe.

⁵ ’Bei —a cuma—. Wamale a̦ ji̦liaö ja, bämacö nowa lä taö wei tä ja wamacö ca̦i cadidou ja, bämacö nofi nia yai ibabou. Jödödö täbä bluca lä cublai, iba lä täbä ma waiquii ma cui, cafä wamacö nija ya bufi mö nia shino blucao.

⁶ Cafä wamacö bluca lä cui, iba wamacö nia yaio. Camiyä nija wamacö ojodamou ja, bluca täbä bälöjöwä lä yaiblai wama bä nofi nia bäyäaö. ¿Ö̦jö tawä? Ei ya tä a̦ bluca lä wäyäle, Isaeli ebä nija wa tä a̦ fe dolemabä —a cuma.

⁷ Ö̦jö cudeenö Moisesi a itoa fa co̦lunö, Isaeli ebä bada lä cui bä nacamalema. Bä fa co̦camomalönö, Jeobaanö tä tamaö lä bufino wei tä a̦ bluca wäyäjäloma.

⁸ Isaeli ebä a̦ bluca juo showadaoma. —Jeobaa a lä cuno wei yama tä bluca taö wä —bä cuma. Ö̦jö däjä Jeobaa nija Moisesinö bä a̦no tama.

Jeobaa dodijidawä ebä cuobä Moisesinö bä lä tamabono wei tä a̦

⁹ Abinaja Jeobaa a cuu nomöjöoma. —Bei. Ölajashi a bada lä suble wei jamö ya culanö, cafä nija ya nia ajedeo. Cafä bäfä a̦ lä wayomaö wei, bluca bänö wale a̦ ji̦liabeje ya nia ajedou, cafä wa wa̦ nofi mölabobeje —a cuma. Isaeli ebä lä cuno wei, Moisesinö Jeobaa nija tä a̦ bluca wäyäma.

¹⁰ Ö̦jö däjä, abinaja Jeobaa a cuma, Moisesi nija. —Yanowamö täbä nijamö a dömöö da co̦ofälö. Fei däjä ma cui, fena ja ma cui, iba bä li dodijidawä cuobä, wa bä nia taamabou. Bei bä camishibö ma cui, bä nia yaluuje.

¹¹ Bolacabö tä mö fa dödölönö, bä nö daobä. Ö̦jö däjä, Sinai cäcö jamö camiyä ya nia itou. Bä mamo bluca showao däjä, ya nia itou.

¹² Sinai cäcö colo jamö bä ajedou mlaobä, wa tä nia jömaö cuaaö —a cuma—. Inaja wa cuaalanö, wa bä ca̦i nia wasöö. Wa bä nia moyawäblamaö, bei macö jamö bä duo mlaobä. Colo cäcö ma cui, cäcö nia ca̦i jubaö buomije. Ai a bädawä ma cuinö, cäcö colo jubaö buo ja, ö̦jö a lä cui, a nia nomamaö showadaoje.

¹³ Ö̦jö a lä cui, a jubaö mlajei ja, a nia blajawä niyablaöje. Maa mabä ma cuinö, shäläcawä bä ma cuinö, a nia blajawä shäöje. ¿Ö̦jö tawä? Yanowamö a ma cuinö, yalo a ma cuinö, cäcö colo lä jubaö wei a nia demi cuomi. Tä madofi lä jolamou wei tä a̦ ji̦lio nö lä dedeaö wei däjä, bei macö jamö bä nia shino ajedou —Jeobaa a cuma.

¹⁴ Ö̦jö cudeenö Moisesi a dömöa fa co̦balufälönö, Isaeli ebä nija a waloa co̦balecölöma. Jeobaa ebä dodijidawä cuobä, bä taamama. Cama bä camishibö ma cui bä yalumaö bufima.

¹⁵ Abinaja bä nowa ca̦i tama. —Bei. Bolacabö tä mö fa dödölönö wamacö nö daobä, dodijidawä wamacö nia jilao. Suwä bä nija bä ajedo dijä —bä nowa tama.

Sinai cäcö jamö Jeobaa a wawäa nö lä quililayono wei tä a̦

¹⁶ Bolacabö tä mö fa dödölönö, ö̦jö tä fena ja, bei macö jamö ya̦lu a wa̦ ca̦i bada tai taimou nö quiliama. A wa̦ bada tai taimou nö fa quiliicudunö, madula a wacö ca̦i blalölou coyocaö mö feduo showaodayoma. Ölajashi a ca̦i bada suble cuodayoma. Tä madofi lä jolamou wei tä a̦ ca̦i nö i̦cali dedeadayoma. Ö̦jö tä nö bluca quiliama yalo, bä cuo lä juono wei bä quilili blösö blösöblaloma.

¹⁷ Ö̦jö däjä, Yai Bada tä nia fa möjenö, bä lä bälöle jamö Moisesinö bä ca̦i fa sibolunö, bei macö bäfätä jämö, bä lululefälöma.

¹⁸ Sinai cäcö jamö Jeobaanö cowa wacö ca̦i itolayoma cudeenö, ö̦jö bä wa̦queshinö, cäcö fe bada fa̦yooma. Ö̦jö wa̦queshi bä bada ushujuwä tolucublamoma. Bei cäcö bada qui̦da qui̦damou nö quiliama.

¹⁹ Tä madofi lä jolamou wei tä a̦ cai̦ ji̦lio lä nacläaimaö wei, Moisesi a wa̦ falayoma. Ya̦lu a wa̦ jamö, Yai Bada a wa̦ nocalayoma.

²⁰ Sinai cäcö bololo jamö Jeobaa a fa itolunö, Moisesinö a mö baamadayobä a nacalema. A nacaö ja, Moisesi a dua co̦befälöma.

²¹ Jeobaanö abinaja Moisesi a nowa tama. —Wa itoa fa co̦lufälönö, bä wasöö da co̦o. Wa tä ulifi lä jömöqueno wei tä jamö bä jayublou mlaobä. Camiyä Jeobaa ya lä cule jamö, tä mödaö bashio bädaoje ja, bä mö bluca watäblou mlaobä.

²² Nofi bäyäalewä bä lä cui, camiyä nija bä nia ajedou yalo, dodijidawä bä cuobä cama bä nia ca̦i taamamou, camiyä Jeobaa ya lä cuinö ya bä nö bleaamaö dicoo mlaobä —a nowa taö ja a cuma.

²³ Moisesi abinaja Jeobaa nija a cuma. —Eja, Sinai cäcö jamö täbä juimi waiquiwä. Cafänö yamalecö wasöö mada waiquioblei. Abinaja wa cuma. “Täbä ajedou mlaobä, wa tä nia jömaö cuaaö. Wa cö nia ca̦i yaimabou”, wa mada cublei —a cuma.

²⁴ Abinaja Jeobaa a cuma. —Bei. A da itolufälö. Aaloni sho wafäcö dolecou co̦imabä. Ö̦jö ma cui, ai täbä jayuama dijä. Nofi bäyäalewä bä ma cui, bluca täbä lä bälöle täbä ma cui, Jeobaa ya lä cule jamö bä dolecoimabä wa bä nia jayublamaimi, ya bä nö bleaamaö mlaobä —a Jeobaa cuma.

²⁵ Ö̦jö cudeenö, Moisesi a itoa fa co̦lufälönö, Jeobaa a lä cuno wei tä ja, bä yömölalema.