Éxodo 17 - Biblia Yanowamö

Maa ma ja Moisesinö mau u lä famaleno wei tä a̦

¹ Isaeli ebä bluca wayumö juu fa cuaafälönö, Sini tä ulifi bloque jamö bä yanöcö jayuquefälöma. Jeobaa a wa̦nö, bä bälödou fa culofälönö, Lefidimi jamö bä bälöblaquema. Ö̦jö ma cui, öjamö bä lä cuqueno wei jamö bä amishi co̦obä, mau u cuonomi.

² Ö̦jö cudeenö, Moisesi a wa̦fa tamaje. —¡Mau ubä da jöbäbayo! Yamacö amishi co̦obä —bä cuma. —¿Wedi tä tabä camiyä wamale a̦fa li taö dicoo? —Moisesi a cuma— ¿Wedi tä tabä Jeobaa a ma cui, wama a li wabaö bufi doblao?

³ Ö̦jö ma cui, bä amishili fa jushuonö, Moisesi a wa̦fa tamaje. —Camiyä yamacö ma cui, yamacö ijilubö ma cui, yamacö yalobö ma cui, ¿amishi tänö yamalecö bluca nia fa nomamanö, Ejido jamö yamalecö li co̦lema tawä? —bä cuma.

⁴ Ö̦jö cudeenö, Moisesi lobe a nö bayeli nacao showadaoma. Abinaja a cuma, Jeobaa nija. —Camiyänö ¿wedinaja ei ya bä li taamabä? Maa ma bänö wale shaö bufi doblaa waiquia lä culajei —a cuma.

⁵ Abinaja Jeobaa a cuma, Moisesi nija. —Isaeli wa ebä fa nacaläfälönö, bada ai bä lä cui bä ca̦i da balöfälö. Nilo wa u lä shäqueno wei wa defi bolanö, wa jubä.

⁶ Camiyänö bäfä ca̦i nia cuo. Olebe cäcö lä cui jamö camiyä ya ublao balöo däjä, ö̦jamö cafä wa nia ca̦i ublao yädäo. Maa wa ma fa shäcönö, mau u nia faö, bä amishi co̦obä —a cuma. ¿Ö̦jö tawä? Isaeli ebä bada lä cui, bä mamo mötale ja, inaja showawä Moisesi a cuaama.

⁷ Moisesinö, ö̦jö tä a̦fa ca̦i ulifi jilaa showaquema. Isaeli ebä jölama cudeenö, Meliba tä a̦fa jilaquema. Jeobaa a ma cui, a wabamaje yalo, Masa tä a̦fa ulifi ca̦i jilaa showaquema. “¿Jeobaanö bämalecö ca̦i cua yailawä?”, bä jushuo ca̦i lä cuno wei tänö Jeobaa a wabamaje.