Éxodo 16 - Biblia Yanowamö

Moisesi nija bä ofili lä jushuono tä a̦

¹ Elimö jamö culanö, bä shu̦lucua fa co̦lonö, bä aa co̦layofälöma. Sini tä ulifi lä bloque wei jamö, Isaeli ebä bluca waloquedayoma, Elimö tä ulifi casö jamö, Sinai cäcö lä ublale tä möamo ja. ¿Ö̦jö tawä? Ejido tä ulifi tabi lä feiqueno wejei, bä juu showaofälöö däjä, moli a belibo mladamalefälömaje. Ai a belibo faa fa co̦malöjenö, ö̦jö a belibo luaaö lä bäshäcuaimi a jamö, 15 tä mö didi fa cublalunö, ö̦jamö lä bä bluca waloaliyoma.

² Ö̦jö tä ulifi bloque jamö, Isaeli ebä ofili fa jushuonö, Moisesi, Aaloni cäcöbö a̦fa tamaje.

³ Abinaja cäcöbö nowa tamaje. —¿Wedi tä tabä, ei tä ulifi lä bloque wei jamö yamalecö ca̦i li juu cule, ofi tänö yamalecö bluca shämaö buobä? Ejido jamö dodijidawä yamacö da cuoblei däjä, Jeobaanö yamalecö shäablaö showadao fa cunoja tä nö shino yai doblaobö wei. Ö̦jamö lä, yalo bä ma cui ja, nii bä ma cui ja, yamacö bluca iyaö dodijioma —cäcöbö nowa tamaje.

⁴ Ö̦jö däjä, abinaja Jeobaanö Moisesi a nowa tama. —Bei. Fedu jamö ya culanö, afä nii ya bä nia blälämaö. Showadi ya bä fa blälämadinö, bä sibou fa fenaonö bä nia doaöje. Ö̦jö nii ya bä nabä lä shömale bä ja, ya bä nia wabaö. Ya tä tamaö lä bufii wei tä ja, ya bä nia cadidou möö. ¿Ö̦jö tawä? ’Ö̦jö tä jalu showao ja bä iyabä, showadi nii bä nia doaö cuaaöje. Ö̦jö tä fena ja bä iyaö co̦obä, bä nia doaö co̦oje. Ö̦jö tä fena ja co̦wä, ö̦jö tä fena ja co̦wä.

⁵ Bä nii doaö cuaaö showaoje däjä, 5 bei tä mö didi nia tablamaö balöoje. Ö̦jö däjä, 6 tä mö jalu lä cublou wei däjä, ji̦bä bluca fa doabodujenö, ji̦bä bluca nia cobemaö showadaoje. Showadi bä nii doaö lä fenablou wejeinaja mlai, bä nia nii doaö bolacao showaoje, ö̦jö tä fena ja bä iyaö co̦obä —Jeobaanö a nowa tama.

⁶ Ö̦jö cudeenö, Moisesi, Aaloni sho cäcöbö lä cuinö, abinaja Isaeli ebä nowa bluca taböma. —Waija, motoca a quequeno wei ja, wamacö bufi nia möblou. Ö̦jö däjä, Jeobaa wama a nö nia Bada ö̦jöböaö. “Ejido jamö bämalecö lä co̦leno wei a lä cui, ö̦jö a cuoma”, wama a nofi nia tabou.

⁷ ’Jeobaa wama a wa̦fa da tablei, wamacö a̦ ji̦lilema. Ö̦jö cudeenö, fena ja Jeobaa wama tä shi̦i nia dablaö fenao. Camiyä yafäcö nija wamacö a̦ ma fano wei ma cui, cama nija wamacö yai jushuoma. Camiyä yafäcö nija wamacö jölabä tä malä mlai. Jeobaa cama yafä a wa̦no yai wäyäö mada cublei —bä nowa taböma.

⁸ Abinaja Moisesi a cuu co̦oma. —Yalo bä ja, wamacö nia weyade lä dobäö wei, Jeobaa a. Nii bä ja wamacö nia bädömaö lä fenao wei a lä cui, ö̦jö a showawä. Wama a wa̦fa da tablei, wamacö a̦ malä ji̦lileno wei. ¿Ö̦jö tawä? Camiyä yafäcö nija wamacö a̦ ma fano wei ma cui, cama Jeobaa nija wamacö yai jushuoma —bä nowa tama.

⁹ Ö̦jö däjä, Aaloni nija abinaja Moisesi a cuma. —Bei. Cafänö Isaeli wa ebä nia yömölaö. “Jeobaa nija bä da ajedeiquiyo”, wa bä nowa ta. “Wama a wa̦fa da tablei wamacö a̦ malä ji̦lileno wei”, wa bä nowa tabä —Aaloni nija Moisesi bei a cuma.

¹⁰ Isaeli ebä bluca nija Aaloni a wa̦ faö showalanö, ulifi bloque jamö tä fa mödalöjenö, yedu, ölajashi a jamö, Jeobaa a shi̦i damoa showalaliyoma.

¹¹ Moisesi nija abinaja Jeobaa a cudaliyoma.

¹² —Isaeli ebä lä cuinö yale a̦fa da tablejei, ya bä a̦ ji̦lilema. Ö̦jö cudeenö, wa bä nia yömölaö. “Waija, yalo wama bä nia weyade waö”, wa bä nowa ta. “Fena däjä, nii bä ja wamacö nia bädöblou fenao”, wa bä nowa ca̦i tabä. Einaja wa bä nowa nia taö. Ö̦jö däjä, “Jeobaa bäma a yai bufiblabä a”, wale nofi nia tabouje —a Jeobaa cuma.

Jeobaanö bä lä iyamafälöno wei tä a̦

¹³ Motoca a quequeno wei ja, bocolamö comi bä weyade waloquema. Bä bälöo lä cudaono wei tä ulifi jödödöblalemaje. ¿Öjö tawä? Ö̦jö tä fena ja, jemau jemau bänö tä ulifi jäläo fenaoma.

¹⁴ Ö̦jö jemau jemau bä fa wejelalunö, ö̦jamö lä yaitawä bei täbä jenasiwä jilamoma.

¹⁵ Isaeli ebä lä cuinö täbä fa möjenö, —¿Wedi bei täbä li?—bä nowa tayolayoma. Täbä daö balöono malä mlajei. Moisesinö abinaja bä nowa tama. —Wama täbä wabä, Jeobaanö wamacö nia lä dobäno wei täbä.

¹⁶ Abinaja Jeobaanö wamacö taamaö bufii. Wama täbä doaö bädao mlai ja, wama täbä waa nö lä talebö weinaja, wama täbä nia shino doaö cuo. ¿Ö̦jö tawä? Cafä wamacö yanobö jamö wamacö lä cudalenaja, inaja showawä wama täbä doabä. A nia lä iyaö wei a lä cui, yami a iyabä, moli ca̦ö fesi ja wama täbä fe nia lajodaö —Moisesinö bä nowa tama.

¹⁷ Inaja Isaeli ebä cuaaö showadaoma. Ai bänö, bluca täbä dolalemaje. Ai bänö, bolacadabö täbä däa bäabodayomaje.

¹⁸ Bä taamaö lä bufino wei tä ja, bä cadidou showaoma. Bluca täbä lä dolaleno wejei bä lä cuinö täbä feibonomije. Wi̦sibö täbä lä dolaleno wejei bä nija bä damonomi. Cama bänö täbä waa nö lä talebö wejeinaja, täbä doa fa talalöjenö, dodijidawä bä bluca iyama.

¹⁹ Abinaja Moisesinö bä nowa ca̦i tama. —Wajaquemi täbä wai ma cui, wama täbä nia shee tabou fe jaluimi —bä nowa tama.

²⁰ Ö̦jö ma cui, a wa̦ ji̦liblanomije. Ai bänö täbä shee tabou fe fa jalujenö, täbä moshabölaliyoma. Täbä ni ji̦talia fe jalulaliyoma. Inaja ai bä cuaaö fe yadioma cudeenö, Moisesi a jushudaliyoma.

²¹ ¿Ö̦jö tawä? Showadi täbä doaö fenaomaje. Täbä nö waa lä talebö wejeinaja täbä däaö cuaamaje. Ö̦jö ma cui, motoca a yo̦loloblou däjä, täbä fa äbäjälalunö, bou täbä cublaliyoma.

Sábado däjä bä nia lä yanöcöono wei tä a̦

²² Nii bä doaö fenao showaoje däjä, 5 tä mö didi tabomaje. Ö̦jö tä fena ja, showadi bä nii jocaö lä fenaono wejeinaja mlai, bä nii doaö bolacao showadaomaje. Cama a nia lä iyaö wei a lä cui, yami a iyabä, ca̦ö bolacabö fesicöbö ja täbä fe lajoblaö showadaoma. Ö̦jö däjä, bä lä cuaano wei tä a̦fa wäyäbeje, Isaeli ebä bada lä cui, Moisesi nija bä icuquema.

²³ Tä a̦ wäyäöje ja, abinaja Moisesi a cuu mö feduoma. —Awei. Ö̦jö waiquiwä —a cuma—. Inaja Jeobaanö wamacö taamaö malä bufino wei. Abinaja bä nowa ca̦i taö showaoma. —Fena ja, sábado däjä, wamacö ojodamou yanöcöblobä cätä. Wamacö yanöcöobä tä mö jalu lä cui, tä mö nia jalu yaio, Jeobaa wama tä nofi jaducubobä. Ai wama täbä nia lä yaaö wei täbä ma cui, ai wama täbä nia lä jaliaö wei täbä ma cui, fei däjä ö̦jö wama täbä nia jödödöwä löböblaö showadao. Fena ja ö̦jö wama bä nii waö co̦obä, wama bä ca̦i löbö tabou fe jalubä —bä nowa tama.

²⁴ Ö̦jö cudeenö, ai täbä mashi löbö tabou fe jalumaje, Moisesinö bä nowa lä tano weinaja showawä. Täbä ni ji̦taliaaö fe jalunomi. Täbä ca̦i moshaböonomi.

²⁵ Ö̦jö tä fena ja Moisesi a wa̦ falayoma. —Fei däjä wama täbä yai wabä. Jeobaa wama a nofi jaducubobä, ei tä mö jalu waiquiwä, wamacö yanöcöobä. Wamacö ojodamobä tämi. Fei däjä, sibo jamö nii wama täbä nia ca̦i blaa dablaimi.

²⁶ ¿Ö̦jö tawä? Showadi, 6 wama tä mö didi lä tablamaö wei däjä, wama täbä doaö co̦obä täbä nia cuo ma cui, wamacö yanöcöobä tä mö jalu ja, sábado däjä täbä nia cuomi —Moisesinö bä nowa tama.

²⁷ Ö̦jö ma cui, bä yanöcöobä tä mö jalu lä cublou wei däjä, ai bänö täbä doabeje, bä juu fe yadioma ma cui, täbä ca̦i blaa dablaö buonomije.

²⁸ Ö̦jö däjä, abinaja Moisesi nija Jeobaa a cuma. —Uo. Ya tä tamaö lä bufii wei tä ja, wamacö dobloimi. ¿Wamale a̦ ji̦liaö mlai, wamale a̦ waii shi wa̦lii waiquiwä daanö?

²⁹ Wamale a̦ da ji̦lilä. Wamacö ojodamou yanöcöblobä, cafä wamacö nija ei ya tä a̦fa jalu wäyäö mada waiquioblei, camiyä Jeobaa yanö. Ö̦jö cudeenö, 6 tä mö jalu lä cui däjä, bluca ya täbä jöböaö showadao, wamacö iyaö co̦obä. ¿Ö̦jö tawä? Sábado däjä wamacö nia yanöcöo. Yano bä jamö wamacö bluca fa cudionö, wamacö nia juimi —a Jeobaa cuma.

³⁰ Ö̦jö cudeenö, bä yanöcöobä tä mö jalu lä cublou wei däjä, bä ojodamou mlai, bä yanöcöoma.

Manaa bä befi ca̦i nia lä i̦tadiono wei tä a̦

³¹ Bei. Ö̦jö täbä nii wai lä bläläno wei täbä lä cui, manaa täbä a̦fa jilabomaje, Isaeli ebä lä cuinö. Nii bä jamö bä jenabä wai lä ca̦bou wejei mobä au lä culenaja, täbä au cuoma. Jai buu ubä coyocoa, täbä wamou cuoma.

³² Abinaja Moisesi a cuma. —Jeobaanö, ei bä ja, abinaja bämalecö taamaö bufii lä cule. Ca̦ö moli fesi ja, bäma bä fe fa lajoblalönö, bäma bä nia befi ca̦i tabodii. Ö̦jö däjä, camiyä bämacö ijilubö nodiwä lä cuinö, ö̦jö bä dablaöje ja, bä bufi nia jaducublou nodio. “Ejido jamö Jeobaanö bämacö nö badabö fa co̦lönö, ulifi bloque jamö bä iyamaö lä cuaafälöno wei däjä, ei täbä ja, bä iyaö dodijioma”, bä nofi nia tabou juoje —Moisesi a cuma.

³³ Abinaja a Moisesi ca̦i cuma, Aaloni nija. —Bei. Manaa bä didiobä tä da dälä. Ca̦ö moli fesi ja, wa bä lä liyäyale, ö̦jö tä jamö bä da didicö. Ö̦jö tä jamö wa bä fa tablalönö, Jeobaa a lä cule jamö wa bä talö befi ca̦i i̦taaö ajedeobä. Ö̦ja bä cudiobä —a cuma.

³⁴ Moisesi nija Jeobaanö tä tamaö lä bufino wei tä ja, Aaloni a cadidou showaoma. Bä didiodibä, Jeobaa a wa̦no oni befi ca̦i lä i̦tale jamö, bä befi ca̦i i̦taa ajedea showaquema.

³⁵ ¿Ö̦jö tawä? Inaja Isaeli ebä cuaama. Lasha 40 a ma famaleno wejei ma cui, bä lä jufälöno wei jamö, manaa bä ja bä iyaö cuaaö showaofälöma. Ulifi tä lä bloque wei tä tabi feiaö showao mlaoje däjä, ö̦jö bä ja, bä iyadima. Ya̦cumö, Canaana tä ulifi casö ja bä waloo däjä, bä waö mlalayomaje.