Éxodo 15 - Biblia Yanowamö

Jeobaa nijamö amowa tä a̦ lä yädämaqueno wejei tä a̦

¹ Ö̦jö däjä, Moisesi a ma cuinö, Isaeli ebä ma cuinö, amowa tä a̦ ja, Jeobaa a nofi doamaje. Abinaja bä amowabö a̦ cuma. Jeobaa nijamö amowa ya tä a̦ yädäamaö lä cule. A nofi doablamobä a. Ö̦jö a shino lojode ayawä. ¡A nö mada wa̦lojablei! Cabayo bä ja, bä befi ca̦i lä läläano wei bä lä cui, modu unö, bä befi ca̦i bluca shäyäjäabodayoma.

² Camiyä ya e nö ca̦i wa̦lojaö mö feduobä, Jeobaa a. Cama nijamö amowa ya tä a̦ yai yädäamabä a dodijiwä. Ya bayeliblamobä, ö̦jö a cublou waiquia lä cule. Yai Bada a lä cui, ö̦jö ya bufiblabä a, ya nofi yai dobobä. Fayä nija Yai Bada a lä bufiblamono wei a lä cui, ö̦jö ya wa̦fa doblao wäyäbä, a waiquiwä.

³ Jeobaa a wayu lä juu wei jamö, ¡showadi a waitelimou dodijio! Jeobaa a wa̦fa lä cule.

⁴ Ejidoteli bada ebä läläamodima ma cui, ebä wayu lä toujublaliyono wei bä bluca ma cui, modu unö, bä shäyäjäabodayoma. Cama bada ebä dodijidawä ma yaiblamono wei ma cui, modu Wacä unö, bä fe bluca baoblaliyoma.

⁵ Modu unö bä bluca badädäbalema. U o̦qui lä dodijii jamö, maa mabä dalou lä cuaafälöö weinaja, bä dalou cuolaliyoma.

⁶ Cafä Jeobaa wa lä cui, wa lojode nö quiliaö. Cafä wa lä doblale, wa nö shino wa̦lojaö dodijiwä. Cafä Jeobaa wa lojode lä cuinö, bä nö lä nabämou wei wa bä shäö nö quiliaö.

⁷ Cafä wa nö lojode lä quiliaö wei wanö, wa nö wa̦lojaö lä dodijio wei wa lä cuinö, bä nö lä nabämou wei, showadi wa bä mö watäblaö showadao. Wa yai jushuo däjä, wa ishou showadaobä wa. Moimoima a shi̦liquio däjä, a wacö waumodou lä culenaja, yedu wa bä waicaö showadaquei.

⁸ Cafä wa fö̦shöacönö wa u fa jolashiblalönö, ¡u ösöwä mö fedudublaliyoma! Modu u ma cui, jai wa u i̦tamafälöma u cublaliyoma. Jai u jifuwä u fa cublalunö, u bada i̦taoma.

⁹ A nö lä nabämou wei, cama a nofi li doablamou ja, abinaja a jole li cuma. “Ya bä nosi fa däläfälönö, ya bä nabä blacälayou. Cama bänö täbä bluca lä tabou wejei, ya täbä fa däalalönö, ya täbä nia shelelaö. Camiyänö ya bä taamaö bufi lä doblao weinaja, ya bä nia li taamaö. Iba sibala namo mö feduduwä ya fa julijilänö, ya bä mö nia watäblaö”, a jole cuma.

¹⁰ Wa u fa jolashiblalönö, wa bä fe badädämabalema. Jude tä lä cui, tä fe bao lä culenaja, modu u bada lä yudujou wei unö, wa bä tablamaö showadalayoma.

¹¹ Jeobaa wa lä cui, täbä lä bufiblamou wei täbä nijamö, cafä wa lä culenaja ai tä cuami. Tä cuami waiquiwä. Cafä wa lä doblao wei, wa yami yaia. Tä nö quili tamobä tä ma cui, tä nofi doablamobä tä ma cui, ai tä cuami waiquiwä. Täbä nö lä quilijii, cafänö wa täbä shino yai wawämaö daö ayawä.

¹² Cafä wa boco fa yalejedalunö, jai mashita aca jamö bä comi quebefälöma, bä cublaliyoma.

¹³ Wa bä lä co̦leno wei bä lä cui, showadi wa bä nofimaö cudeenö, dodijidawä wa bä lulubou co̦oma. Cafä dodijidawä wa lä cuo wei jamö, wa tä lä yaibole jamö, cafä wa lojodenö wa bä lulubou cuaaimama.

¹⁴ Wa lä cuaafe tä ja, bä bluca lä bälöblai bä moyawe waiquiwä. Bä ca̦i quilii fe balojowä. Filideo bä lä cui, bä nö quilili bleaaö.

¹⁵ Edomöteli bä bada ma cui, bä bufi jo̦lijiblalou lä cule. Moaba ebä bada ma cui, quili quili tänö bä blösö blösömou. Canaanateli bä bluca ma cui, bä bufi nö wa̦lobloimi waiquiwä.

¹⁶ Bä quilii fa showadaonö, bä bufi nö beblalou. Wa boco da yalejedalui däjä, wa lojode fa dalalöjenö, mamicai afä bä nia fa jayuamajenö, bä a̦ faö mlai ja bä bälöblawä. Afä wa bä lä co̦leno wei bä jayuaö showao mlao däjä, jai maa ma mamicai bladia lä culenaja, bä yanöcöwä cublawä.

¹⁷ Jeobaa wa e lä cuinö, afä bä lulubou cuaaö da showaofälö, wa tä balöcö lä yaileno wei jamö wa bä bälöa lojodomabobä, cafä wa yai lä cule jamö. Cafä Jeobaa wa lä cui nija bä nö bayeli nacaobä, afä wa tä yai yafi lä yaileno wei jamö.

¹⁸ Jeobaa wa lä cui, cafä wa yai nosiemou shi wa̦libä, ö̦jö wa.

¹⁹ Einaja bä amowabö a̦ cuma. ¿Ö̦jö tawä? Ejidoteli bada a lä cui, cama läläamodima ebä ja, bä befi ca̦i lä läläano wei bä ma cui, cama cabayo ebä ja bä befi ca̦i läläaö mö lä feduono wei bä ma cui, modu u jamö bä fa itobalunö, Jeobaanö bä nö malä blemalaleno wei. Modu unö, bä fe baoblalema. Ö̦jö ma cui, modu u möamo ma cui jamö, wejediwä tä jamö Isaeli ebä bucadubaliyoma.

Suwä bänö Jeobaa a nofi lä doablano wejei tä a̦

²⁰ Ö̦jö däjä, Aaloni bei amiyobö e amowamobä a wawäblaliyoma, Jeobaa a wa̦no wäyälewä a suwä lä cui. María a wa̦fa lä cule. Täbä a̦ madofi lä jutäö wejei cama etä fa dälänö, ai bä suwä lä cui, cama nija bä a̦ bluca wawäblou mö fedulayoma. Madofi täbä a̦ jutäbeje, bä däa mö fa fedualalöjenö, bä a̦ ca̦i blaöama.

²¹ Ö̦jö bä nija, Maríanö amowa a wa̦ colo jaba tama. Abinaja a amowabö a̦ cuma. Jeobaa nijamö amowa ya tä a̦ yädäamaö lä cule. A nofi doablamobä a. Ö̦jö a shino lojode ayawä. ¡A nö mada wa̦lojablei! Cabayo bä jamö bä lä läläano wei bä ma cui, modu unö, bä befi ca̦i shäyäjäabodayoma.

Mala tä jamö mau ubä coamou lä wa̦lidiono wei tä a̦

²² Ö̦jö däjä, modu Wacä u casö jamö Isaeli ebä lä cuono wei, Moisesinö bä shu̦lucou bufima, bä ca̦i jocäö co̦ofälöbä. Shulu tä ulifi lä blocoono wei jamö bä fa culofälönö, mau u dablaö showao mlaoje däjä, 3 bä miquefälöma.

²³ Mala tä ulifi jamö bä waloquema ma cui, ö̦jamö lä mau ubä lä cuono wei ubä coamou wa̦lidioma. Ubä coamou co̦wamioma cudeenö, Mala tä a̦fa ulifi jilaquemaje.

²⁴ Ö̦jö däjä, bä amishili fa jushuonö, Moisesi a wa̦fa tamaje. —¿Wedi jamö ubä ja yamacö amishi yai li co̦obä?

²⁵ Einaja bä lä cuu wei, Moisesinö bä a̦ fa ji̦lilänö, Jeobaa nija lobe a nö bayeli nacao showadaoma. A nö bayeli nacao cudeenö, Jeobaanö fii defi nabä shömöquema. Ö̦jö defi fa dälönö, mau u jamö defi shäyäblaquema. Defi fa shäyäblacönö, mau u coamamou dodijidablaliyoma. Ö̦jamö Jeobaa a wa̦ nö wäquema. Showadi bä nia cuaaö lä nodiablalono wei, tä nabä shömöquema. A wa̦ nia juamamou fa dablamonö,

²⁶ abinaja bä nowa tama. —Camiyä Jeobaa wamale lä bufiblaö wei ya lä cuinö, bämacö nowa taö a lä cule. Showadi wamale a̦ ji̦liaö ja, bamacö nö nia bleaamaimi. Ya tä tamaö lä bufii wei, dodijidawä wama tä taö ja, ya tä nabä lä shömaö wei tä ja wamacö cadidou ja, bämacö nö nia bleaamaimi. Inaja wamacö cuaaö ja, Ejidoteli ya bä jalili lä taamano weinaja, cafä wamacö nija ya tä wayu waloamaö mlaicätä. Jeobaa ya malä cui, bämacö lä jalomaö wei —Jeobaanö bä nowa tama.

²⁷ Ö̦jö däjä, Elimö jamö bä waloa majöquema. Ö̦jamö ubä fe lä jojoblamono wei 12 ubä cuoma. Jai yei sibä cuwä, 70 sibä ublajaoma. Ö̦jö ubä bluca fe lä jojoono wei jamö bä bälöblaquema.