Éxodo 14 - Biblia Yanowamö

Modu u casö jamö bä lä miblaofälöno wei tä a̦

¹ Ö̦jö däjä abinaja Jeobaa a cuma, Moisesi nija.

² —Isaeli ebä lä cui, wa bä fa yömölanö, wa bä mö ca̦i yabaö co̦fälöbä. Biyalodoteli bä lä bälöle tä mashi jamö wamacö miofälöbä, Basefonoteli bä lä bälöle tä mashi jamö. Ö̦jamö lä, modu u casö jamö, Midoloteli bä lä bälöle tä möamo ja, wamacö bälöblaofälöbä.

³ Ejidoteli bada a lä cuinö, abinaja Isaeli wama ecö nofi nia malä tabou wei. “Quijamö bä shoqueadii showaa bäa. Tä ulifi lä bloque wei jamö bä shi wa̦lile cätä”, wamacö nofi nia tabou.

⁴ Ö̦jö däjä, bada ya bufi nia jifudamaö, wamacö nosi däbou co̦ofälöbeje. Ö̦jö däjä, bada a ma cui, cama ebä bluca lä toujole bä ma cui, ya bä nö jödödöwä fa blemalalönö, ya nofi nia doablamou. Inaja ya cublaliyo ja, camiyä Jeobaa ya lä cui, Ejidoteli bänö wale nö nia lojode ö̦jöböaöje —a Jeobaa cuma. Yai Bada a lä cuno weinaja, inaja bä cuaaö showaoma. Bä mö yabaö co̦ofälöma.

Ejidoteli bänö bä nosi lä dälefälöno wejei tä a̦

⁵ Ejidoteli bada a lä cuinö, Isaeli ebä lä doculayono wei tä a̦ fa ji̦lilänö, a bufi shomidou co̦layoma. Cama bada a ma cui, cama ebä lä yädämabono wei bä ma cui, bä bufi shomidou fa co̦lunö, abinaja bä nowa tayolayoma. —¿Wedi bäma tä li taö dicoo cufe? Isaeli ebä lä cui, bämacö nosie juamobä bä ma cui, ¿wedi tä tabä bäma bä li docua dicomalei cufe? —bä nowa tayolayoma.

⁶ Ö̦jö cudeenö bada a lä cuinö, cama läläamodima ecö blacämaö fa bufinö, cama ebä wayu ca̦i nocamalema.

⁷ Läläamodima 600 täbä dodijidawä lä yaiblamono wei täbä ca̦i blacämaö bufii showadaoma. ¿Ö̦jö tawä? Ejido jamö ai täbä läläamodima lä cublai bä bluca fa ajedeblamalönö, cama ai ebä bada nija täbä jöbödaö cuaama, bä befi ca̦i läläafälöbä.

⁸ Ö̦jö däjä, Jeobaanö Ejidoteli a bufi bada fa jifudamalönö, Isaeli ebä bufi ca̦i lojode docua ma waiquilayofälöno wei jamö, bä nosi däa jäa showalefälöma.

⁹ ¿Ö̦jö tawä? Ejidoteli a badanö, cama ebä bluca fa toujublamalönö, bä nosi däa jäa showalefälömaje. Läläamodima bä ja, ai bä befi ca̦i bluca lälälayoma. Cabayo bä jamö ai bä befi ca̦i bluca läläaö mö feduoma. Bei bä mamicö ja, ai bä aa mö fedua showalayoma. ¿Ö̦jö tawä? Modu u casö jamö Isaeli ebä lä miofälöno wei jamö, bä nabä blacäö juomaje. Biyalodoteli bä yafibö ajede jamö bä blacälayoma, Basefonoteli bä lä bälöle tä mashi jamö.

Isaeli ebä nö quilili lä bleaano wei tä a̦

¹⁰ Bada a lä cuinö, cama ebä ca̦i lä blacälayono wei däjä, Isaeli ebänö tä möö fa cuaajenö, bä quilia fe balojolaliyoma. “¡Joo yai!”, bä bufi cudaliyoma, “¡Ejidoteli bä wayu juu jäa lä cuimi!” Jeobaa nija bä nofi nia ojode fa tablamonö bä a̦ fablaloma.

¹¹ Moisesi nija bä ca̦i jölama. —Cafänö ¿wedinaja yamalecö yai nia fa taamanö, Ejido jamö yamalecö li co̦a dicoblalema? Ejido jamö bä nomawä didiobä tä cabä cuami yalo, “Ulifi bloque jamö ya bä yai nomablamabä”, ¿bei yamalecö nofi li taboma daanö?

¹² Ö̦jamö yamacö da cuoblei däjä, cafä nija yamacö cuu mada showadaoblei. “Inaja yamalecö taamaö bashio dijä. Eja, Ejidoteli bä nija yamacö nosiemamou bädaobä”, yamacö mada cublei. Ei tä ulifi lä bloque wei jamö yamacö nomaö mlai ja, Ejidoteli yama bä nosie juaö showao fa cunoja, tä nö shino doblaobö wei —bä cuma.

¹³ Abinaja Moisesinö bä nowa taö mö feduoma. —Wamacö quilili shifilimou mlai ja, bä da cuicu. Fei däjä Jeobaanö bämalecö nia lä bayeliblaö wei tä da möje. Bämalecö bayeliblaö weicätä. ¿Ö̦jö tawä? Ejidoteli wama bä ajedou lä dablale, wama bä nia dablaö co̦daaimi.

¹⁴ Cafä wamacö ishou mlai, Jeobaa a nia ishou baläläo. Cafä wamacö lä cui, yanöcöwä wamacö cuobä, ö̦jö lä —bä nowa tama.

Jeobaanö bä bufi lä lofodomabono wei tä a̦

¹⁵ Moisesi nija abinaja Jeobaa a cuma. —Bei, bei. ¿Wedi tabä jai wa nö bayeliblamobimi bei wa wa̦ li ji̦limou cuaaö dicoo? Isaeli lobe ebä jumaö co̦o da bufi.

¹⁶ Fii wa defi lä bole, modu u jamö defi yalejea da tadalö. Ö̦jamö wa defi dodobolanö, modu uca da yacläblamalö, wejediwä tä jamö Isaeli wama ecö bucaduobä.

¹⁷ ’Ejidoteli ya bä bufi nia jifudamaö —a cuma—. Modu u ma cui jamö wamacö nosi däbou showaofälöbeje. Ö̦jö däjä, ya bä nö nia bluca bleaamaö. Bada a ma cui, cama ebä ca̦i bluca lä toujole bä ma cui, läläamodima täbä ja, ebä befi ca̦i lä läläaö wei bä ma cui, cabayo bä jamö ebä befi ca̦i lä läläaö wei bä ma cui, ya bä nö yai jödödöwä lä bleaamale däjä, camiyä ya nofi nia yai doablamou.

¹⁸ Ö̦jö däjä, bada a ma cui, läläamodima täbä ja ebä befi ca̦i lä läläaö wei ebä ma cui, cabayo bä jamö ebä befi ca̦i lä läläaö wei ebä ma cui, ya bä nö yai lä bleaamale däjä, Ejidoteli bä bufi nia jaducublou. Camiyä ya nofi yai doablamou ja, Jeobaa ya lä cui, wale nö nia lojode ö̦jöböaöje —a Jeobaa cuma.

¹⁹ Ö̦jö däjä, Yai Bada etä a̦jele lä cui, Isaeli ebä lä toujono wei bä nija tä juu lä balöano wei tä lä cui, a nojablou nomöjölayoma. Ölajashi a bada comadiwä lä cui, a juu lä balöano wei a lä cui, a nojablou fa majölonö, bä balalubou nomöjöoma.

²⁰ ¿Ö̦jö tawä? Isaeli ebä lä toujono wei bä juu cuaaö showao däjä, Ejidoteli bä toujou mö lä feduono wei, bä juu jäimama. Bä juu lä jäimi jamö, ö̦jö a ölajashi lä cui a fa lädalunö, a mö suble läaliyoma. Ö̦jö däjä, didi tä lä cuono wei tä balöcö jamö, tä mö wacacao ayaoma. Inaja tä cuoma cudeenö, Isaeli ebä nija bä blacäö doblonomi jaluwä.

Modu u möamo ma cui jamö bä wejediwä lä jayubaliyono wei tä a̦

²¹ Ö̦jö däjä, modu u jamö Moisesi boco fa dodoicunö, Jeobaanö wadoli a bada shömölema. Motoca a lä faö wei jamö wadoli a fa cuaaimanö, modu möamo u lä cui, u jaimaö fe jaluma. Modu u ma cui ja, mashita a wejediblaö fe fa jalulonö, mau u yacäblamalema.

²² Modu u möamo ma cui jamö, Isaeli ebä wejediwä jayubaliyoma. Bä bucaduobä jamö, ai tä mashi ma cui jamö, ai tä mashi mö feduwä ma cui jamö, u ösöa mö fa fedudublalunö, jai yafi a balöcö cuwä jamö, bä jayuquefälöma.

²³ Ejidoteli bänö bä nosi däbofälöbeje, modu u ma cui ja, bä itoa jäa nomöjöbaliyoma. Cabayo bä jamö, bada ebä befi ca̦i lä läläano wei bä ma cui, läläamodima bä ja bä befi ca̦i lä läläano wei bä ma cui, bä bluca itoa jäa nomöjöbaliyoma.

²⁴ Tä mö jaluimaö däjä, Jeobaa a lä cuinö Ejidoteli bä möö mö wädäama. Ölajashi feyaca jamö, cowa wacö shi̦i lä cuono wei jamö culanö, bä möö fa cuaanö, Ejidoteli bä bluca lä toujono wei bä nö bleaamama.

²⁵ Bä befi ca̦i lä läläano wei jamö, mashita a fa äbäjäblamalönö, läläamodima bä mamicö fa dalonö, bä läläblonomi. Ö̦jö däjä, Ejidoteli bä fa quililalunö, abinaja bä nowa tayoma. —Bei, bei, bei. Bämacö da docufälö. Isaeli ebä nija bämacö dobloimi waiquia a lä cule. Jeobaa a ishou baläläo ja, Ejidoteli bämalecö nö bleaamaö —bä nowa tayoma.

Modu unö Ejidoteli bä lä shäyäjäabodayono wei tä a̦

²⁶ Ö̦jö däjä, abinaja Jeobaa a cuma, Moisesi nija. —Modu u jamö mau u fe dibäblou co̦obä, boco dodoa da co̦icu. Ejidoteli bä ma cui, cama bä befi ca̦i lä läläaö wei etäbä ma cui, cabayo jamö bä lä dicläo wei bä befi ma cui, mau unö bä fe bluca shäabä, boco da dodoicu —a cuma.

²⁷ Einaja a fa cunö, modu u jamö Moisesi boco fa dodoicunö, modu u lä cuono weinaja u cublou co̦a fenalayoma. Ejidoteli bä lä cuinö, u quei fa dalalöjenö bä ma docuno wei ma cui, Jeobaanö modu u fa jujeblalönö, bä shäyäjäabodayoma.

²⁸ Mau u co̦cablou lä co̦layono wei däjä, läläamodima bä ma cui, cabayo bä jamö bä befi ca̦i lä läläano wei bä ma cui, bada ebä bluca lä toujono wei bä ma cui, mau unö bä bluca badädäbalema. Modu u jamö Isaeli ebä nosi bluca lä däbono wejei bä nija, moli ma cui a feiblou buonomi.

²⁹ Ö̦jö ma cui, modu u ma cui ja, mashita a wejediwä jamö Isaeli ebä bucadubaliyofälöma. Ai tä mashi ma cui jamö, ai tä mashi mö feduwä ma cui jamö, u ösöa mö fa fedudublalunö, jai yafi a balöco cuwä jamö bä jayuquefälöma.

³⁰ ¿Ö̦jö tawä? Jeobaa inaja a fa cuaanö, Ejidoteli bä nija Isaeli ebä jujeblamalema. Isaeli ebä lä cuinö, modu u casö jamö Ejidoteli bä bluca nomawä dalalemaje.

³¹ Jeobaanö, Ejidoteli bä nö bleaamaö fe lä balojoono wei tä dalalemaje, Isaeli ebä lä cuinö. Ö̦jö tä fa dalalöjenö, Jeobaa nija bä quilima. A nofi mölabomaje. Ö̦jö a nosie lä juano wei a Moisesi ma cui, ö̦jö a nofi ca̦i mölabou mö feduomaje.