Éxodo 13 - Biblia Yanowamö

¹ Moisesi nija abinaja Jeobaa a cuma.

² —Isaeli wama ecö nija bä ijilu cublou lä balöo wei, iba bä li cuobä wa bä nia yaimabou. Yanowamö wamacö nija bä jaba lä cublou wei, iba cäbä. Wamacö yalobö ma cui nija, bä yalo jaba lä cublou wei, iba bä ca̦i —a cuma.

Nii juluno mlai ja bä nia iyaö ca̦i lä co̦camono wei tä a̦

³ Jeobaa a lä cuinö, Moisesi nija tä a̦ wäyäö fa balöonö, Isaeli ebä nija Moisesinö tä a̦ wäyäö fe dolemoma. Tä a̦ wäyäö ja, abinaja e cuma. —Ei tä jalu lä cui, showadi wama tä nofi jaducubobä cätä. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, wama tä nofi jalu jaducubou showaobä. ¿Ö̦jö tawä? Ejido jamö wamacö nö lä bleaamano wejei jamö, wama tä ulifi lä daqueno wei däjä, ö̦jö ei bei tä mö jalu. Jeobaa a lojodenö wamacö malä co̦leno wei. Ö̦jö cudeenö, nii juluno wama bä nia waimi.

⁴ Ei tä mö jalu lä cui däjä, wamacö jocäfälöbä tä li, ei abibi a belibo lä cui däjä.

⁵ ’Wamacö nö badabö nija, Jeobaanö tä a̦fa ulifi lä wäyäno wei jamö wamacö ca̦i waloqueno wei ja, ö̦jamö lä, ei wama a nö belibo dabolanö, wamacö nia iyaö ca̦i co̦camou co̦o —a cuma—. Canaanateli bä ulifibö ma cui, idida bä ulifibö ma cui, amoleo bä ulifibö ma cui, ebeo bä ulifibö ma cui, jebuseo bä ulifibö ma cui, cafä wamacö bälöo nomöjöobä, a wa̦ nö wäo balöoma. Ö̦jamö lä, tä ulifi nö niji dodijiwä. Tä nö ca̦i ofimi.

⁶ ’¿Ö̦jö tawä? —a cuma—. Wamacö iyaö ca̦i lä co̦camou wei däjä, abinaja wamacö nia cuaaö. 7 tä mö didi cublou jaöo mlao däjä, nii bä juluno lä mlai bä ja, wamacö nia iyaö balöo. Ö̦jö däjä, 7 tä mö didi ja, Jeobaa wama a nofi yai co̦camoalanö, wamacö nia iyaö ca̦i co̦camou co̦o.

⁷ Ö̦jö 7 tä mö didi cublou jaöo mlao däjä, nii bä juluno lä mlai wama bä nia waö balöo. Inaja wamacö cuaaö däjä, nii juluno bä lä cui, cafä wamacö nijamö bä nia dablamoimi. Cafä wamacö lä bälöblai jamö, julumamodima moli tä ma cui tä nia ca̦i dablamoimi.

⁸ Ö̦jö däjä, ijilufä wama bä nia yömölaö. Abinaja wama bä nowa nia taö. “Ejido jamö culanö ya lä jocälayono wei däjä, Jeobaanö wale bayeliblalema yalo, ya tä taö lä cule”, wama bä nowa nia taö.

⁹ ’Ejido jamö Jeobaanö wamacö lä co̦leno wei wama tä nofi jaducubobä, wamacö nia co̦camou ca̦i iyaö —a cuma—. Showadi Jeobaa wama a wa̦no bejedi yubodibä. Bei wamacö imicö damou lä culenaja, bei wamacö mamocu nofi ca̦i mojodumamoimi lä culenaja, wamacö lä bayeliblamono wei wama tä nofi nia mojodubou cuomi. Ejido jamö Jeobaa a lojodenö, wamacö malä co̦leno wei.

¹⁰ Ö̦jö cudeenö, wamacö bufi mojoduo mlaobä, ei tä nabä lä shömaö wei, wama tä nia showadi taö. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, showadi inaja wamacö nia cuaadii. Tä tamobä tä yai cublou däjä, ö̦jö däjä showawä, wama tä nia taö.

¹¹ ’Canaanateli bä ulifibö jamö wamacö bälöaö nomöjöobä, Jeobaanö wamacö nia lulubou, cafä wamacö nija a lä cuno weinaja showawä —a cuma—. Cafä wamacö ma cui nija, wamacö nö badabö jaba lä bälöono wei bä ma cui nija, a wa̦ nö wäo malä balöono wei. Ö̦jamö wamacö bälömaquei ja,

¹² bä ijilu cublou lä balöo wei bä lä cui, Jeobaa ebä cuobä, wama bä nia yaimabou. Cafä wamacö yalobö ma cui nija bei ijilubö jaba bä wa̦lo lä cui, Jeobaa nija wama bä yalo dodobobä, ebä nia yaio.

¹³ Yalo bulo bä nija bä jaba lä cublai, Jeobaa nija bä dodobobeje tä ma cule ma cui, oweja ocalo bä nia shino shämou läo. ¿Ö̦jö tawä? Oweja ocalo bä ja, bulo bä nowa nia co̦amamou. Oweja wama bä shäö läo bufiomi ja, cama bulo wama bä olafi nia cäblaö. Ö̦jö ma cui, yanowamö wamacö ijilubö jaba lä cublou wei bä lä cui, bä shämou mlai ja, showadi yalo bä ja, bä nowa nia shino co̦amamou.

¹⁴ ’¿Ö̦jö tawä? —a cuma—. Obi, ijilufä bänö wamacö wa̦liije ja, “¿Wedi tabä inaja wamacö li cuaaö?”, bä cuu ja, abinaja wama bä nowa tabä. “Wedi tabä mlai. Ejido jamö yamacö nö lä bleaamano wejei jamö, Jeobaa a lojodenö yamalecö co̦lema.

¹⁵ Bada a lä cuinö yamalecö noshi umabou fe lä yadiono wei däjä, Jeobaa a malä isholayono wei. Cama bä ma cui nija, cama bä yalobö ma cui nija, Ejido jamö bä jaba lä cublai Jeobaanö bä bluca shäalalema. Ö̦jö cudeenö, camiyä yamacö yalobö nijamö bä jaba wa̦lo lä cui, Jeobaa nija yama bä ö̦shö dodobou. Ö̦jö ma cui, ijiluyä wamacö jaba lä cui, wamacö shämou mlaobä yalo bä ja bämacö nowa shino coamaö”, wama bä nowa nia taö.

¹⁶ ’Wamacö co̦camou ca̦i lä iyaö wei tä lä cui, Jeobaa nija wamacö lä bayeliblamono wei wama tä nofi mojodubou mlaobä cätä —Moisesi a cuma—. Bei wamacö imicö damou lä culenaja, bei wamacö mamocu nofi mojodumamoimi lä culenaja, ö̦jö wama tä nofi ca̦i mojodubou mlaobä. Ejido jamö cama Jeobaa a lojodenö, bämalecö malä co̦leno wei.

Ulifi bloque tä casö jamö bä lä waloaliyono wei tä a̦

¹⁷ Bada a lä cuinö, ya̦cumö Isaeli ebä shömöa lä co̦leno wei däjä, Yai Bada tänö filideo bä ulifibö casö jamö bä ca̦i jayuanomi. Ö̦jö yo ma ajedeono wei ma cui, abinaja Yai Bada tä bufi cuma. “Filideo bä waitelimou fa dalalöjenö, Ejido jamö bä mö quilili yabaa co̦a dicolu”, a bufi cuma.

¹⁸ Ö̦jamö bä lulubou mlai, ulifi a lä bloque wei jamö bä ca̦i shoquea fa culofälönö, modu Wacä u jamö yo lä cui jamö bä lululefälöma. ¿Ö̦jö tawä? Isaeli ebä lä cui, Ejido jamö bä lä jocälayono wei däjä, moyawe bä ca̦i dolequebefälöma.

¹⁹ Moisesinö José bei ubä fa co̦alalöfälönö, ubä ca̦i alayoma. ¿Ö̦jö tawä? Josénö, Isaeli bei ijilubö ebä a̦ nö malä wäamano wei, bei a̦iyobö ebä lä cui. Abinaja a cuu balöoma. “Yai Bada tänö wamacö co̦abä wamacö fe nia walou. Ö̦jö däjä, wamacö ca̦i dolecou co̦ofälöbä jamö, wamale ubä ca̦i juufälöbä”, a cuu balöoma.

²⁰ Ö̦jö däjä Sucodo jamö bä shulucua fa co̦lunö, Etamö jamö bä bälöblaquema, ulifi a lä bloque wei tä casö jamö.

²¹ Bä lä jufälöno wei jamö, Jeobaa a lä cui, ölajashi a bada comadiwä jamö a juu balöalanö, jalu däjä bä lulubofälöma. Didi däjä ma cui, ö̦jamö cowa wacö shi̦i wacacawä cudio fe jaluu showaoma. Jalu däjä ma cui, didi däjä ma cui, bä juu fe yadio showaobä, inaja Jeobaanö bä lulubou ja, a cuaama.

²² Ölajashi a bada comadiwä lä cui, jalu däjä tä fa cudionö, showadi tä mömodima. Didi däjä ma cui, ö̦jamö co̦wa wacö shi̦i wacacawä cudio fa nomöjöonö, tä mömou fe jaludii showaoma.