Éxodo 12 - Biblia Yanowamö

Jeobaa a nia waiteli lä jayuo wei tä nofi lä co̦camoano wejei tä a̦

¹ Ejido jamö Moisesi, Aaloni cäcöbö cua showalanö, Jeobaanö cäcöbö nowa taö ja abinaja a cuma.

² —Ei a belibo lä cui, wama a nofi jaducubobä ya wa̦. Wama bä belibo nofi lä jaducubou wei däjä, “Ei a lä cui jaba a”, wama a nofi tabou cadidiobä.

³ ¿Ö̦jö tawä? Ei ya lä cuu wei tä ja, Isaeli ebä bluca lä cui, wafä bä yömölaö showadaobä. Ei a belibo ja, 10 tä mö jalu lä cui däjä, yalo ocalo wama bä nia doaö cuaaö. Oweja bä ma cui, shibo bä ma cui, afä wama bä ca̦i lä cublai, yalo moli wama bä nia ocalo däadalaö cuaaö, afä wama bä ca̦i iyabä.

⁴ ’Oweja wama a mö watäaö showaobä, wamacö bolacami ja, bä bälöa lä jö̦cöle wama bä fa nacalänö, ö̦jö bä sho wamacö nia bluca iyaö —a cuma—. Ö̦jö wamacö lä cudalenaja, wama bä yalo cobea fa tablalönö, wamacö iyabä.

⁵ Ö̦jö wama bä yalo nia lä waö wei bä lä cui, tä wai jalili yädäa lä mlai wama bä waö cuaabä, bä lä liyäjäi. Wa̦lo wama bä nia shino waö. Moli a lasha lä famaleno wejei wama bä nia ocalo waö. Oweja bä ma cui, shibo bä ma cui, ö̦jö wama bä wabä.

⁶ Wama bä yalo fa däalalönö, wama bä ajedebou waiquilanö, 4 wama tä didi nia tablamaö. Ö̦jö däjä, 14 tä mö jalu lä cublole däjä, Isaeli cafä bluca wama ecö showadawänö, yalofä oweja wama bä nia weyade shäö cuaaö.

⁷ ’Yalo wama bä fa shäalalönö, ö̦jö i̦yä bänö, wamacö lä joleblou wei jamö bei wama yocabä nia ya̦lei —a cuma—. Deficö lä i̦tao wei deficö ma cui, defi lä maqueo wei defi ma cui, wama defibä nia ya̦lei. Yalo bä ja wamacö nia lä iyaö wei bä yafi jamö, ö̦jö bä i̦yäbönö, wamacö lä joleblou wei wama yocabä jödödöwä nia ya̦lei cuaaö.

⁸ ’Ö̦jö tä didi showawä ja, cowa wacö jamö wama bä yalo fa yablanö, wama bä walalei —a cuma—. Nii bä juluno lä mlai bä ja, na co̦wami jenabä ca̦i ja, wama bä nia defiaö.

⁹ Wiisibö ma cui, ö̦jö wama bä nia yalo liyä waimi, jalima ca̦i mlai. Bei febä ma cui, bei bä mamibä ma cui, bei shibä ma cui, cowa wacö jamö bä nia comi yablamou.

¹⁰ Ö̦jö tä fena ja, wama bä waö co̦obä, wama bä nia feiboimi. Ai bä yalo feiblou bädao ja, wama bä nia yablaö showadao.

¹¹ ’Abinaja wamacö nia cuaaö —a cuma—. Afä camishi bä ja wamacö didijiwä showai, wamacö mamicö ca̦i didijia showale, wama defibä nia ca̦i lä juu wei wama defibä ca̦i showabolanö, lobe wama bä nia yalo waö. Camiyä Jeobaa ya waiteli jayuabä tä malä cui.

¹² Ö̦jö tä didi showawä ja, Ejido tä jödödö jamö ya nia waiteli jayuaö malä cuaaö wei. Ya lä jayuaö wei däjä, ijilu jaba bä wa̦lo lä cublai, ya bä nia shäö cuaaö. Yalo bä ma cui, bei ijilubö jaba bä lä cui, inaja showawä. Ö̦jö däjä, Ejidoteli bä nija täbä jole jole lä bufiblamou wei täbä lä cui, ya täbä dobloimi fa damalalönö, ya täbä nö nia bleaamaö. Camiyä Jeobaa ö̦jö ya wa̦ waiquiwä.

¹³ ’Ö̦jö i̦yä i̦yä bä lä cui, wamacö lä cuo wei jamö bä yano nö ö̦jöböamobä, bä nia läblamou —a cuma—. Ö̦jö ya bä i̦yä i̦yä lä dablaö wei däjä, ya nia jayuaö showadao. Ejido ya tä ulifi wa̦liaö däjä, cafä wamacö shämobä tä wayu nia cubloimi.

¹⁴ Ei tä didi lä cui, showadi wama tä nofi jaducubobä tä mö didi. Obi ma cui, ei tä cublou co̦o däjä, Jeobaa wamale nofi co̦camoaö co̦lanö, showadi wamacö nia bluca iyaö. Ei ya lä cuu wei tä ja, wamacö bufi jaduculanö, showadi wama tä tabä. Cafä wamacönö ö̦jö wama tä taö fa balöonö, inaja showawä cafä wamacö nodiwä ma cuinö tä nia taö nodiablalouje —a Jeobaa cuma.

Nii bä juluno lä mlai bä nabä lä shömano wei tä a̦

¹⁵ Abinaja Jeobaa a cuu co̦oma. —Wamacö iyaö ca̦i lä co̦camou wei däjä, abinaja wamacö nia cuaaö. Nii bä juluno lä mlai bä ja, wamacö iyaö showao däjä, 7 wama tä mö didi nia tablamaö balöo. Wamacö jaba lä iyaö wei däjä, ö̦jö däjä showawä, cafä wamacö yafibö jamö julumamodima wama bä nia joyaö. ¿Ö̦jö tawä? Ö̦jö 7 wama tä didi lä taamafälöö wei däjä, ai a bädawä ma cuinö, nii juluno bä waö dicoo ja, Isaeli wama ecö nija a nia malä waimou wei.

¹⁶ ’Wamacö jaba iyaö ca̦i lä yododaö wei däjä, Jeobaa dodijidawä wamale nofi nia co̦camoaö —a cuma—. Ai 7 wama tä mö didi tablamaö fa co̦lonö, wamale nofi nia co̦camoaö co̦o. ¿Ö̦jö tawä? Wamale nofi jaba lä co̦camoaö wei däjä ma cui, wamale nofi co̦camoaö lä co̦o wei däjä ma cui, wamacö nia ojodamoimi. Wamacö iyabä, wama bä nia lä waö wei wama bä nia shino löbömaö.

¹⁷ ’Ö̦jö nii bä juluno lä mlai bä ja, wamacö nia iyaö ca̦i lä co̦camou wei tä lä cui, wamacö bufi jaduculanö showadi wama tä nia taö —a cuma—. Ö̦jö tä didi lä cui ja, Ejido jamö wamacö lä bälöblao wei bämacö bluca fa toujublamalönö, bämacö jödödöwä nia malä co̦aö wei. Ö̦jö cudeenö, wamacö bufi jaduculanö, showadi wama tä nia taö. Cafä wamacönö ö̦jö wama tä taö fa balöonö, inaja showawä cafä wamacö nodiwä ma cuinö tä nia taö nodiablalouje.

¹⁸ ’Jaba tä belibo lä cui ja, 14 tä didi fa cublalunö, nii bä juluno lä mlai bä ja, wamacö nia jaba dödöjöwä iyaö —Jeobaa a cuma—. Inaja wamacö cuaaö showao däjä, 21 tä didi fa cublalunö, nii bä juluno lä mlai bä ja, wamacö iyaö showao däjä, wamacö fe nia weyaö.

¹⁹ Ö̦jö 7 wama tä didi lä taamafälöö wei däjä, cafä wamacö yafibö jamö, nii julumamodima tä nia ca̦i cuomi dodijiwä. Ai a bädawä ma cuinö, nii juluno bä waö dicoo ja, Isaeli cafä bluca wama ecö lä cui nija a nia waimou. Cafä Isaeli wama ecö mashi a ma cui, shomi a lä coyocole a ma cui, inaja a cuaaö ja, a nia waimolayou.

²⁰ Ai a nii cua ma bädao wei a ma cui, julumamodima tä coyocoo dicoo ja, wama a nia waimi. Bluca wamacö lä cublai wamacö yanobö jamö ma cui, nii bä juluno lä mlai bä ja, wamacö nia shino iyaö —Jeobaa a cuma.

I̦yä i̦yä bänö bei yocabö ya̦lei lä cuaano wejei tä a̦

²¹ Ö̦jö däjä, Isaeli nodiwä ebä bada lä cui, Moisesinö bä fa nacamalänö, bä nosiemaö fe dolemoma. —Afä wama bä ca̦i lä cule wamacö iyabä, oweja bä ma cui, shibo bä ma cui, ö̦jö bä ocalo da yaiblalöje. Jeobaa a nia waiteli lä jayuo wei jamö wama a yalo nia lä waö wei, bä da shälöje.

²² Ö̦jö däjä, naa jenabä nabä lä shömaö wei wama jenabä fa cäalalönö, i̦yä i̦yä wama bä lä babodi bä ja, wama jenabä fa ca̦danö, ö̦jö bä i̦yä i̦yänö, wamacö lä cublai yocabä da ya̦lelöje. Deficö lä i̦tao wei deficö ma cui, defi lä maqueo wei defi ma cui, wama defibä ya̦lebä. Ö̦jö däjä, moli wamacö ma cui, tä mö jalu showaono mlai ja, wamacö nia siboimi.

²³ Ejidoteli bä shäö cuaabä, Jeobaa a nia waiteli malä jayuaö wei. Bei yoca jamö deficö lä i̦tao wei deficö ma cui jamö, defi lä maqueo wei defi ma cui jamö, i̦yä i̦yä bä dablaö däjä, a nia jayuo showadao. Cama a̦jele etä Waicalewä lä cuinö wamacö shäö mlaobä, cafä wamacö yanobö jamö a nia famaimi.

²⁴ ’Jeobaanö ei tä nabä lä shömaö wei tä lä cui, wama tä nofi nia cadidibou —Moisesi a cuma—. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, showadi wama tä nia taö. Cafä wamacönö ö̦jö wama tä taö fa balöonö, inaja showawä cafä wamacö nodiwä ma cuinö tä nia taö nodiablalouje.

²⁵ ’Cafä wamacö nija Jeobaanö tä ulifi nia lä jöböaö wei jamö wamacö waloo däjä, tä a̦fa ulifi wäyäö lä balöono wei jamö, ö̦jamö ma cui showadi wama tä nia taö.

²⁶ Wama tä lä taö wei tä ja, ijilufä bänö wamacö wa̦liije däjä,

²⁷ abinaja wama bä nowa tabä. “Jeobaa a waiteli lä jayuono wei bäma tä nofi jaducubobä, yalo yama a shäö. Ejido jamö Isaeli yama ecö lä bälöono wei däjä, camiyä yamacö yanobö jamö tä malä jayuqueno wei. Ejidoteli bä ma shäalaleno wei ma cui, Isaeli yama ecö lä cui, yamalecö nofi asiblalema.” Einaja ijilufä wama bä nowa tabä—Moisesi a cuma. Ö̦jö tä a̦ fa ji̦liläjenö, bä ayäyaimoma. Bä möfe bolanö, Jeobaa a wa̦fa Bada doblao tamaje.

²⁸ Ö̦jö däjä, Isaeli ebä aa fa showalönö, Jeobaanö bä taamaö lä bufino weinaja, inaja showawä bä cuaaö shalilioma. Moisesi, Aaloni cäcöbö nija Jeobaa a lä cuno weinaja showawä.

Ejido tä ulifi tabi lä feiqueno wejei tä a̦

²⁹ Tä bäshäcublou däjä, Jeobaa a ishoma. Ejido jamö bei ijilubö jaba ebä lä cublai bä bluca shäalalema. Bada a bälöo lä dodijiono wei a ma cui, bei ijilubö jaba e lä cui a nomalayoma. Bä fe lä labono wejei bä bädawä ma cui, bei ijilubö jaba ebä lä cui ebä ca̦i nomaa mö fedua showalayoma. Bä yalo lä tabono wejei bä ma cui, bei ijilubö jaba ebä ca̦i yalo nomaa mö fedua showalaliyoma.

³⁰ Bada a lä cui, a wa̦ ca̦i jocädou fe jalulayoma. Cama a ma cui, bä lä yädämabono wei bä ma cui, Ejidoteli bä bluca ma cui, bä a̦ bluca jocäcou cuaaö fe jaluma. ¿Ö̦jö tawä? Ejido jamö bä a̦ nacläama. Moli tä yafi bädawä ma cui, bä ö̦cöö lä mlai tä yafi cuono malä mlai.

³¹ Ö̦jö däjä showawä, bada a lä cuinö, Moisesi, Aaloni sho cäcöbö nacaa fe jalua fa showamalänö, abinaja cäcöbö nowa tama. —Bei, bei. Lobe, lobe. Fei däjä, camiyä yamacö nijamö wamacö nia cuomi. Cafä wafäcönö, Isaeli ebä bluca ca̦i aa da showabölö. Jeobaa dodijidawä a nofi da co̦camoaje, ö̦jö lä, wafäcö lä cuno weinaja showawä.

³² Cafä wamacö yalobö ma cui, afä oweja wama bä fa co̦alalunö, afä baca wama bä ca̦i fa co̦alalunö, bä ca̦i da alufälöje, wafäcö lä cuno weinaja showawä. Camiyä ya lä cui, Jeobaa nija wamale ca̦i da bayelima, ¿ö̦jö tawä? —a cuma.

³³ Ejidoteli bä lä cuinö bä shömaö shi jalimomaje. “Nomawä yamalecö bluca jilamabou waiquia lä culajei”, bä nofi tamamoma yalo, cama bä ulifibö jamö bä jayuamaö jaödaö co̦o bufimaje.

³⁴ Ö̦jö cudeenö, ji̦bä jumömabeje jamö ji̦bä liyä lä babono wejei, ji̦bä befi ca̦i liyä däa showalefälömaje. Ji̦bä juluu showao mlao däjä, ji̦bä däa fa showalöfälöjenö, bei olacö jamö acadafu cäcö lä lucäbono wejei cäcönö, ji̦bä befi ca̦i fa ja̦loblalöjenö, ji̦bä befi ca̦i yefiläfälömaje.

³⁵ ¿Ö̦jö tawä? Moisesinö Isaeli ebä nowa lä tano weinaja bä cuaaö waiquioma. Ejidoteli bä nija bä malä nacono wei. Olo bä ja, bä baushi lä tablamou wei bä ma cui, blada bä ja bä ma cui, ö̦jö bä baushi nacaa waiquialalemaje, camishi bä ca̦i.

³⁶ Isaeli ebä bayeliblabeje, Jeobaa a lä cuinö, Ejidoteli bä shi ö̦jödamabou waiquioma. Täbä lä nacaleno wejei täbä lä cui, täbä noshi bluca ö̦jödabomaje. ¿Ö̦jö tawä? Inaja bä cuaaö ja, Ejidoteli bä bluca blocoblamalemaje.

³⁷ Isaeli ebä lä cui, Lamesei tä ulifi tabi fa feicöjenö, Sucodo jamö bä waloa nomöjöquema. Bä lä julayofälöno wei bä blucao dodijioma. Wa̦lo jai 600.000 bä cuoma. Suwä bä ca̦i blucao mö feduo showaoma. Oshe bä ca̦i blucao mö feduoma.

³⁸ Shomi bä ma cui, bä ca̦i bluca fa co̦cablalunö, bä dolecofälöbä jamö bä yaubefälöma. Oweja bä ma cui, baca bä ma cui, ö̦jö bä bluca ca̦i yalo jumaje.

³⁹ Ejido jamö bä lä alayono wei däjä, liyä ji̦bä lä dälefälöno wejei ji̦bä fa löbölalöjenö, nii bä juluno lä mlai bä tablalemaje. Liyä ji̦bä juluu malä mlaono wei. Ejido jamö lobe bä shömaö fa showadaojenö, bä yanöcöablalobä tä cuonomi. Bä wayumö jufälöbä jamö bä iyafälöbä, bä nii ca̦i taö balöono malä mlajei.

⁴⁰ ¿Ö̦jö tawä? Lasha 430 a lalou jaöo mlao däjä, Ejido jamö Isaeli ebä bälöblao balöoma.

⁴¹ Ö̦jö lasha 430 a ya̦cumö fa famalöjenö, Jeobaa ebä bluca lä bälöblaono wei ebä fa toujublalunö, Ejido tä ulifi daquefälömaje.

⁴² Ö̦jö tä didi lä cui däjä, Ejido jamö Jeobaanö bä co̦abä, bä nofi tabou fe jaluma. Ö̦jö cudeenö, lasha a faö lä co̦le däjä ma cui, ai a faö lä co̦le jamö ma cui, ai a ja ma cui, ö̦jö tä didi cublou co̦o däjä, Isaeli ebä bluca lä cui, showadi, bä bufi jaduculanö bä nia bälöoma. Jeobaanö bä nofi lä tabono wei tä nofi mojodubou mlaobeje. Cama bänö ö̦jö tä nia taö fa balöojenö, inaja showawä cama bä nodiwä ma cuinö tä nia taö nodiablalomaje.

Jeobaa a waiteli lä jayuano wei tä nofi nia jaducubou lä nodiano wejei tä a̦

⁴³ Moisesi, Aaloni cäcöbö nija abinaja Jeobaa a cuma. —Ya waiteli lä jayuano wei, showadi wama tä nofi jaducubobä, abinaja wamacö nia cuaaö. Wamacö iyaö ca̦i co̦camou däjä, Isaeli e nodiwä lä mlai, a nö nia liyomi.

⁴⁴ Ö̦jö ma cui, afä wa tabou waiquiwä ja, cafä wamacö nosie juamobä, blada bä ja wama a luluaö waiquioma yalo, a nö liyo dao. Wama a mosi sicö joyamaö fa balöonö, a nö liyobä.

⁴⁵ A coyocoo lä buo wei a nö nia liyomi. Blada bä nowa ja, wamacö lä bayeliblaö wei a ma cui, ö̦jö tä ja wama a nia ca̦i iyamaimi.

⁴⁶ ’Wamacö lä iyaö wei jamö, ö̦jö tä yafi showawä ja, wama bä nia yalo waö —a cuma—. Bei ya̦jicö lä cui, moli ma cui wama a ya̦jicö ca̦i nia sibou buomi. Moli ma cui, wama u nia cäblaimi.

⁴⁷ Jeobaa ya waiteli lä jayuano wei wama tä nofi jaducubobä, Isaeli wama ecö blucanö, ö̦jö wama tä nia taö.

⁴⁸ ¿Ö̦jö tawä? —a cuma—. Shomi a lä cui, cafä wamacö nija a coyocoo ja, camiyä Jeobaa ya nija a iyaö co̦camou bufi doblao ja, abinaja wamacö nia cuaaö. Cama nija bä wa̦lo bluca lä yädäle bä mosi sicö joyamou balöobä. Inaja wama bä taamaö fa balöonö, ö̦jö lä däjä a nö liyo ja a icuobä. Ö̦jö däjä, cafä Isaeli wama ecö nofi tamamou lä culenaja, cama a ma cui, a nofi ca̦i nia tamamou cuo mö feduo. Ö̦jö ma cui, a mosi sicö joyamou lä mlai a lä cui, a nia iyaimi.

⁴⁹ Ya tä tamaö lä bufii wei, moli tä nia cuo. Cafä Isaeli wama ecö ma cui, cafä wamacö nija shomi a coyocoo lä bädao wei a ma cui, bluca wamacö showawänö, moli wama tä bluca tabä cätä —a cuma.

⁵⁰ Moisesi, Aaloni cäcöbö nija Jeobaanö tä tamaö lä bufino weinaja, inaja showawä Isaeli ebä bluca cuaama.

⁵¹ Ö̦jö tä lä dödöle tä mö jalu showawä ja, Ejido jamö Isaeli ebä bälöo lä yaiblamono wei, Jeobaanö bä jödödöwä co̦alalefälöma.