Éxodo 11 - Biblia Yanowamö

Jaba bä wa̦lo lä cublai bä nia lä shäno wei tä a̦

¹ Moisesi nija abinaja Jeobaa a cuma. —Bada a ma cui, Ejidoteli bluca bä ma cui, ya bä nö bluca bleaamaö co̦obä, moli tä cua showaa. Ö̦jö moli ya tä lä wawämale däjä, wamacö shömaö co̦o weicätä. Wamacö lä shömale däjä, lobe wamacö nia shömaö showadao.

² ’Bei —a cuma—. Isaeli wa ebä yömölaö showadaobä. Wa̦lo bä ma cuinö, suwä bä ma cuinö, Ejidoteli bä bälöa lä ajedele bä nija, baushi bä ja bä nacou balöobä. Olo bä ja bä baushi lä tablamou wei bä ma cui, blada bä ja bä ma cui, bä bluca baushi nacaö balöobeje.

³ Isaeli ebä bayeliblabeje, Jeobaanö Ejidoteli bä shi ö̦jödamaboma. Ö̦jö bädawä mlai, Moisesi a ma cui, a nö quili ca̦i tamou dodijioma. Bada a nija bä lä yädäono wei bä ma cuinö, Ejidoteli bluca bä lä cuono wei bä ma cuinö, “Ö̦jö bada bei a yaiwä”, a nofi bluca tabomaje.

⁴ Bada a nija abinaja Moisesi a cuma. —Bei. Jeobaa ya wa̦no taö co̦a lä cule. Ejido tä jödödöwä jamö a nia bäshäcuoladi jayuaö cuaaö.

⁵ Ejido jamö jaba bä lä cublai bä nia bluca nomablou. ¿Ö̦jö tawä? Bada wa lä nosiemole wa ma cui, ijilufä jaba a lä cui a nia nomaö. Bä nosie juamobä bä suwä lä ojodamou wei bä bädawä ma cui, bei ijilubö jaba ebä lä cublai bä nia ca̦i nomablou cuaaö. Ejidoteli wamacö yalobö ma cui, bei ijilubö jaba ebä lä cublai, bä nia ca̦i yalo nomaö.

⁶ Jödödöwä bä yafibö jamö wamacö a̦ nia dedeblamou cuaaö. Inaja bä a̦ jaba ji̦lio cuaano ma mlai ma cui, bä a̦ nia ca̦i obi ji̦lio cuaaö co̦o ma mlai ma cui, fei däjä tä nö nia quilijiblou.

⁷ ’Ö̦jö ma cui, Isaeli yama ecö nia shino yabäcamoimi —a cuma—. Yamacö yalobö ma cui, inaja showawä bä nia yalo yabäcamoimi cuo. Ji̦ima bä ma cui, bä a̦ nia ji̦lio bädaomi. Wamacö bufi jaducublobä, ö̦jö tä li. Jeobaa a lä cuinö, fe usucuwä bämalecö nia tamaboimi. Isaeli yama ecö lä cui, yamalecö nia ayamabou. ¿Ö̦jö tawä?

⁸ Cafä nija ei bä lä yädäle bä ma cui, camiyä nija bä bluca dömöa fa jaödabaliyonö, bä möfe bolanö, bä a̦ nia faö. Camiyä ma cui, ya bä bluca lä lulubole bä ma cui, yamacö bluca jubä, bä a̦ nia faö. Bä a̦ faö waicou däjä, iba ya bä ca̦i nia alayou —Moisesi a fa cunö, a jushuo ca̦i faa co̦layofälöma.

⁹ Ö̦jö däjä, abinaja Jeobaa a cuma, Moisesi nija. —Bada a lä cuinö wa wa̦ ji̦liaö mlaicätä. Ejido jamö tä nö lä quilijii ya tä balamaö bufio waiquiwä cudeenö, wa wa̦ nia ji̦liaimi —a cuma.

¹⁰ ¿Ö̦jö tawä? Moisesi, Aaloni sho cäcöbö lä cuinö, bada a nija tä nö lä quilijii tä bluca ma wawämaböno wei ma cui, Jeobaanö a bufi fa lojododamanö, Isaeli ebä shömanomi co̦wä. Cama a ulifibö ja, bä shi wa̦limabou showaoma.