Éxodo 10 - Biblia Yanowamö

Sequi sequima bä lä shömano wei tä a̦

¹ Ö̦jö däjä, Moisesi nija abinaja Jeobaa a cuma. —Bada a lä cui nijamö a lucäö da co̦ofälö. Cama a ma cui nija, cama ebä lä yädämabou wei bä ma cui nija, tä nö lä quilijii ya tä bluca wawäblamaö bufio yalo, ya bä bufi malä lojodomabole.

² ¿Ö̦jö tawä? Ijilufä bä ma cui nija, fääshäfä bä ma cui nija, ya lä ishole wa tä a̦ nia wäyäö nodiablalou. Ejidoteli ya bä lä yabäcaö wei tä a̦ ma cui, ei ya nö lä quiliaö wei tä a̦ ma cui, tä a̦ wäyämou nodiablalobä. Fei däjä ma cui, obi ma cui, camiyä Jeobaa ya lä cui, wamale nö Bada ö̦jöböabä —a cuma.

³ Ö̦jö cudeenö bada a nija Moisesi, Aaloni sho cäcöbö lucäa fa co̦lufälönö, abinaja a nowa taböma. —Jeobaa a lä cui, ebleo yamacö nija a lä bufiblamou wei a lä cui, ö̦jö yafä a wa̦no taö co̦a lä cule. Wa möfe boobä wa ma cui, ¿wedi tä tabä wa fe li blacäjou showawä? ¡A lojode da dalalö! Cama ebä shömaö da co̦o, a nofi co̦camoabeje.

⁴ Cama wa ebä noshi umabou dicoo ja, fena ja afä tä ulifi jamö sequi sequima bä nia wawämaö dodijio.

⁵ Ö̦jö bä fa jödödöblalunö, mashita a nia dabloimi. Bleyula bänö täbä cau lä feiblamaleno wei, ö̦jö täbä nia waicaö jödödöoje. Cafä wamacö ulifibö jamö fii bluca fibä lä cublai, fibä mö nia watäblaöje.

⁶ Afä yafi bä ma cui, ö̦jö bä nia jödödöblou. Afä wa bä bluca lä yädämabou wei bä yafibö ma cui, Ejidoteli bluca bä yafibö ma cui, bä nia jödödöblaöje. Wamacö nö badabö jaba lä bälöono wei däjä, ö̦jö tä nö lä quilijii tä jaba dablaö fa mlacujenö, tä dablaimi ma showajei ma cui, ei däjä wama tä nia yai dablaö —bada a nowa fa tabönö, Moisesi a mö yabadou fa showadalonö, a aa co̦layofälöma.

⁷ Ö̦jö däjä, bada a nija bä lä yädäono wei, bä a̦ faö juoma. —Ei a lä cuinö yamalecö nö bleaamaö nö mladobimi. Tä lä bufiblaö wejei tä Jeobaa lä cui, dodijidawä tä nofi co̦camoabeje, wa̦lo bä shömöa da jaödaalö. Ejido tä ulifi wa̦lia lä waiquile, ¿bei wa tä dablaimi showawä? —bä cuma.

⁸ Ö̦jö cudeenö, Moisesi, Aaloni sho, cäcöbö co̦a fa co̦lujenö, bada a nija cäcöbö icua fa co̦macöjenö, abinaja cäcöbö nowa tama. —Bei. Jeobaa wama tä lä bufiblaö wei wama tä nofi co̦camoabä, bä da alufälö. ¿Wedi jamö täbä lä cui, bei täbä li yai juu dodijiobä, ö̦jö lä?

⁹ Abinaja Moisesi a cuma. —Oshe bä ma cui, bada bä ma cui, camiyä yamacö ijilubö ma cui, tääbö ma cui, bluca yama bä ca̦i nia juu. Baca bä ma cui, oweja bä ma cui, ö̦jö yamacö yalobö ca̦i nia juu. Jeobaa nija yamacö nia iyaö ca̦i malä co̦camou wei —a cuma.

¹⁰ —Inaja mlaicätä —bada a cuma—. Bämacö nia bluca shömaimi. Wamacö a̦ shomiaö waiquiwä. “Jeobaanö dodijidawä yamalecö ca̦i juu weicätä”, wamacö bufi jole ma cuu wei ma cui, wamacö ijilubö ca̦i jufälöö mlaicätä.

¹¹ ¿Ö̦jö tawä? Wamacö nia bluca juimi waiquiwä. Cafä wa̦lo wamacö shino. Jeobaa wama tä nofi co̦camoabä. Inaja wamacö cuaaö bufi malä doblao wei —bada a fa cunö, cäcöbö i̦cali ja̦ia siboa showalemaje.

¹² Ö̦jö däjä, abinaja Jeobaa a cuma, Moisesi nija. —Bei. Boco da yalejedalu. Ejido wa tä ulifi jömaö fa cuaanö, sequi sequima wa bä wawämabä. Ejidoteli bä ulifibö wa̦liaö showadaobeje. Bleyula bänö bä bluca cau lä feiblamaleno wei bä lä cui, ö̦jö bä mö watäblabeje —a cuma.

¹³ Ö̦jö cudeenö, Ejido tä ulifi jamö Moisesinö fii e defi dodoblaö fa cuaanö, Jeobaanö wadoli a bada shömölema, sequi sequima bä yaläimabä. Motoca a lä faö wei tä mashi jamö wadoli a bada fa juimanö, a fe wadoli dödölayoma. Inaja tä wadolimou cuaaö showao däjä, tä mö jalua co̦layoma. Sequi sequima bä comi yafia waiquimaleno wei ja, tä mö wacacadaliyoma.

¹⁴ ¿Ö̦jö tawä? Ejido tä jödödöwä jamö sequi sequima bä waloo nö jädäblou fa cuaanö, Ejidoteli bä ulifibö jödödöblalemaje. Sequi sequima comi shi̦co bä bada yäläblou nö quiliaö cuaama. Inaja bä jaba cuaano ma mlai ma cui, inaja bä nia ca̦i obi cuaaö co̦o ma mlai ma cui, öjö däjä, moli bä li dablamoma.

¹⁵ Tä ulifi malä jödödöblaleno wejei. Ö̦jö bä comi läoma cudeenö, tä mö luwäblaliyoma. Tä ulifi wa̦lia showalemaje. Nii sibä ma cui, fimo fimo bä ma cui, bleyula bänö bä shee lä jäblamaleno wei, sequi sequima bänö bä mö bluca watäblaö nomöjölayomaje. Na moli jena ma cui, jena liyä shadionomi bädawä. Fii fibä ma cui, nii sibä ma cui, Ejido tä jödödöwä jamö ma cui, täbä cuonomi fe balojowä.

¹⁶ Ö̦jö däjä bada anö Moisesi, Aaloni lobe cäcöbö nacaa jaödaa co̦lema. Abinaja a cudou mö balayoma. —Ya dobloimi waiquiwä. Jeobaa wama a lä bufiblaö wei ya wa̦ ji̦lianomi. Cafä wafäcö ma cui, bäfäcö a̦ ca̦i ji̦liblanomi.

¹⁷ ¿Ö̦jö tawä? Ö̦jö cudeenö, camiyä nija ei ya lä cuaafe tä ja, ei moli däjä, cäcöbö bufi da asiicu. Jeobaa wama a lä bufiblaö wei nija, wale nofi ojode tablamaböö da bufi, ei bä sequi sequima lä cuinö yamalecö ofili nomablamaö showadao mlaobeje —a cuma.

¹⁸ Ö̦jö cudeenö, bada e yafi jamö Moisesi a faa fa co̦lufälönö, Jeobaa nija bä nö bayeli nacaö co̦oma.

¹⁹ Ö̦jö däjä, wadoli a bada lä cui, Jeobaanö a mö yabaa co̦malema. Tä mö weyaö lä cuaaö wei jamö a wadoli cuaaö fa nomöjöimanö, sequi sequima bä bluca yaläa fa jayuläfälönö, modu Wacä u jamö bä comi quea showamabalema. Ejido tä jödödöwä jamö ma cui, moli ma cui, a sequi sequima feionomi.

²⁰ Ö̦jö ma cui, Jeobaanö bada a bufi fa lojododamalönö, Isaeli ebä shömanomi co̦wä.

Tä mö bada didi lä sublamabono wei tä a̦

²¹ Ö̦jö däjä, abinaja Jeobaa a cuma, Moisesi nija. —Boco yalejedou da co̦lo, Ejido tä ulifi jamö tä mö dödöbä. Tä mö didi sublao nö quiliobä —a cuma.

²² Ö̦jö cudeenö, Moisesi boco yalejedou fa co̦lonö, Ejido tä jödödöwä jamö tä mö dödöblaliyoma. Tä mö fa dödölönö, 3 tä mö didi ma cublaliyono wei ma cui, tä mö didi sublao showaoma.

²³ Bä dayonomi. Yafi bä jamö bä didi cublamou showao däjä, 3 tä mö didi cublaliyoma. Inaja tä ma cuono wei ma cui, Isaeli ebä lä bälöle jamö tä mö shino jaluo ayaoma.

²⁴ Ö̦jö däjä, bada a lä cuinö Moisesi a fa nacamalänö, abinaja a cuma. —Bei. Bä da alufälö. Dodijidawä Jeobaa wama tä nofi co̦camoabä, ijilufä bä ca̦i da alufälöje. Eja, wamacö yalobö shino cuo juo däjä, ijilufä wama bä ca̦i jubä. Baca bä ma cui, oweja bä ma cui, ö̦jö wama bä shino daafälöbä —a cuma ma cui,

²⁵ Moisesi a wa̦ läoma. —Ma. Yalo bä ma cui, wa bä ca̦i shömabä. Jeobaa yama a lä bufiblaö wei, dodijidawä yama a nofi co̦camoaö ja, ö̦jö yama bä yalo ajedebou showaobä. Ö̦jö nija yama bä yalo shäbä, yama bä yalo ö̦shö ca̦i dodobobä, ö̦jö bä li.

²⁶ Camiyä yamacö yalobö lä cui, bä nia daamoimi. Moli ma cui yama a ca̦i nia daaö buomi. Jeobaa yama a lä bufiblaö wei, dodijidawä yama a nofi co̦camoabä, ö̦jö bä li waiquiwä. Ö̦jamö yamacö waloo showao mlao däjä, “Ei täbä dodijiwä ja”, yamacö bufi nia cuimi dicowä —Moisesi a cuma ma cui,

²⁷ Jeobaanö bada a bufi fa lojododamalönö, bä shömanomi co̦wä.

²⁸ Ö̦jö däjä, abinaja bada a cuma, Moisesi nija. —¡Mijamö a da blajalö! ¡A da moyaweicu! Camiyä nija a icuo co̦daa dijä. Eja wa dablamou co̦o ja, wa nia shämou showadao —a cuma.

²⁹ —Ja̦o. Inaja lä waiquiwä —Moisesi a cudaliyoma—. Fei däjä bäfäcö wäyäcu dablayou co̦o ja yamocu.