Esdras 6 - Biblia Yanowamö

Jeobaa etä yafi i̦tamaö lä waicono wejei tä a̦

¹⁴ Jeobaa etä yafi ja, Isaeli ebä lija bä bada lä cuono wei bä lä cui, dodijidawä bä bada ojodamou showaoma. Ajeo a ma cui, Ido bä ijilubö Sacalia a ma cui, ö̦jö Jeobaa a wa̦no wäyälewä cäcöbä a̦ showadi fa ji̦lijenö, bä bufi lofote ca̦i fa ojodamonö etä yafi jödödöblalemaje. Isaeli ebä lija Yai Bada tä lä bufiblamou wei tä lä cuinö etä yafi jödödöblamaö fa bufinö, etä jödödöblalemaje. Besiateli bada bä a̦ ca̦i showawänö. ¿Ö̦jö tawä? Jeobaa etä yafi jödödöblabeje, Silo a bada ma cuinö, Dalio a bada ma cuinö, Adajeje a bada ma cuinö, ö̦jö bä shominö tä nabä ca̦i shimamaje.

¹⁵ ¿Ö̦jö tawä? Besiateli bä lijamö Dalio a bada läo showao däjä, lasha 6 a fa famalönö, Jeobaa etä yafi yai jödödöblalemaje. Adala a belibo lä cui däjä, 3 tä mö jalu ja, bä waicoma.

¹⁶ A yafi lä jödödöblaleno wejei däjä, bufi doblalolanö Isaeli ebä lä cuinö a nofi yafi yododoamaje. Nofi bäyäalewä bä sho, Lewi nodiwä ai ebä sho, bä bluca cuoma. Shomi täbä ulufibö jamö bä lä bälaquedayono wejei, bä waloa lä co̦beno wei, ai bä bluca sho.

¹⁷ Yai Bada etä yafi lä cui, etä nofi yafi co̦camoaöje däjä, yalo bluca bä dodobomaje. Bä yalo dodobobeje, baca 100 bä shäalalemaje, oweja 200 bä ca̦i bada, 400 oshe bä ca̦i wai. Isaeli ebä lija tä nowa wa̦lidiwä lä cuono wei tä nowa bluca mladobä, shibo 12 bä ca̦i dodobou mö feduo showaomaje, Isaeli bä ijilubö 12 ebä nodiwä yaiablalou nodiaö lä cudalenaja showawä.

¹⁸ Ö̦jö däjä, Jelusale jamö Yai Bada lija nofi bäyäalewä bä ojodamou nomöjöadalou co̦obä, bä yaimaquemaje. Ö̦jamö Lewi ai ebä nia ojodamou shelelou mö lä feduono wei, bä ca̦i jimaö cadidio showaomaje, Moisesi etä a̦ oni lä cuu weinaja showawä.

¹⁹ ¿Ö̦jö tawä? Shomi täbä ulufibö jamö bä lä bälaquedayono wejei, bä waloa co̦aliyoma. Ö̦jö däjä, jaba a belibo jamö, 14 tä mö jalu ja, Jeobaa a waiteli lä jayuano wei tä nofi co̦camoaö co̦obeje, yalo bä shäö co̦omaje.

²⁰ Nofi bäyäalewä bä ma cui, Lewi nodiwä ai ebä ma cui, Jeobaa ebä dodijidawä cuobä, cama bä bluca showadawä taamamou malä waiquiono wei. Moisesinö tä tamaö lä bufino weinaja bä cuaaö waiquioma, bä dodijidawä cuobä. Ö̦jö cudeenö, Jeobaa a waiteli lä jayuano wei a nofi co̦camoaö co̦obeje, bä yalo shämaje. Shomi täbä ulufibö jamö bä bälaquemaje bä waloa lä co̦queno wei bä ma cui, cama nofi bäyäalewä ai bä mashi ma cui, cama bä showawä ma cui, ö̦jö bä bluca nowamöobä, bä yalo shämaje.

²¹ Shomi täbä ulufibö jamö Isaeli ebä bälaquemaje bä waloa lä co̦queno wei bä lä cui, ö̦jö bä yalo ja, bä iyama. Cama bä lijamö bä shomi lä coyocoblaliyono wei bä ma cui, ö̦jö bä ca̦i iyaö mö feduo showaoma. ¿Ö̦jö tawä? Jeobaa lija bä möfe bolanö a wa̦fa Bada doblao tabeje bä coyocoquema, Isaeli ebä lija a lä bufiblamono wei a lä cui lija. Bä shomi lä bälöjono wei bä lija, ö̦jö bä sheleleblaliyoma, cama etä wa̦lidiwänö bä wa̦lidiaö mö feduo mlaobä.

²² Nii juluno mlai a ja, bufi doblalolanö bä iyaö ca̦i co̦camoma. Bä iyaö ca̦i co̦camou showai ja, 7 tä mö didi tablamalemaje. Jeobaanö bä bufi malä doblamabono wei. ¿Ö̦jö tawä? Cama a showawänö, Asiliateli bada a Silo lä cui a malä nofiblamaleno wei, bä bayeliblabä. Isaeli ebä lija tä Yai Bada lä bufiblamono wei etä yafi tablaö co̦obeje.