Esdras 3 - Biblia Yanowamö

Jeobaa lija bä jaba yododaö lä co̦ono wei tä a̦

¹ Belibo 7 jamö, cama bä ulufibö jamö Isaeli bä ijilubö nodiwä bälöjou co̦o däjä, bä ojodamobä bä bufi shalilio waiquioma yalo, Jelusale jamö cama bä bluca yododoblaliyoma.

² Ö̦jö däjä, Yai Bada lija bä yalo lä dodoblamou wei bä maqueblamobä etäcö i̦tamaö co̦omaje, Isaele ebä lä cuinö tä lä bufiblano wejei tä Yai Bada lija. Josadaca bä ijilubö Josué e ma cui, cama nofi bäyäalewä ai ebä mashi ma cui, Saladiele bä ijilubö Solobabele e ma cui, ö̦jö ebä ca̦i mashi ma cui, ö̦jö bä bluca ojodamoma, ö̦jamö yalo bä ö̦shö dodoblaabeje. Jeobaa a wa̦ lä fuano wei a Moisesi lä cuinö tä a̦ lä oniblaleno weinaja showadawä.

³ Ö̦jamö bä lä bälöblai bä nö quili ma tano wejei ma cui, bä yalo lä dodoblamou wei bä maqueblamobä täcö taa lofotoa co̦quemaje. Ö̦jö däjä, fena däjä ma cui, weyade däjä ma cui, ö̦jamö Jeobaa lija yalo bä ö̦shö dodoblaamaje.

⁴ Yano bä jamö bä cublaalanö, Jeobaa lija bä iyaö ca̦i co̦camobä bä ca̦i cuaaö co̦oma, Moisesinö tä jaba tamaö lä bufino weinaja showawä. Inaja bä cuaalanö, yalo bä ö̦shö nia lä dodobono wejei bä dodobou cuaadimaje, bä cuaaö nodiablalobä, tä tamaö lä bufino weinaja showawä.

⁵ ¿Ö̦jö tawä? Yalo bä ö̦shö nia showadi lä dodobono wejeinaja, bä ca̦i cuaaö co̦oma. Belibo a cumou däjä bä nia yalo lä dodobono wejeinaja ca̦i. Jeobaa lija bä iyaö ca̦i co̦camobä tä nabä bluca lä shimano wei tä jamö, inaja showawä. Ai a bädawä lä cuinö, Jeobaa lija a yalo dodobou bufio däjä, bä jaba lä cuaano weinaja, inaja showawä bä cuaaö co̦oma.

⁶ ¿Ö̦jö tawä? Belibo 7 jamö, jaba tä mö jalu ja, Jeobaa lija yalo bä jaba ö̦shö dodobou co̦oma ma cujei, e yafi colo i̦tamanomi showaweje.

⁷ Ö̦jö cudeenö, maa mabä maquecaö lä daö wejei bä lija, blada bä jibäquemaje, bä ojodamobä. Fii fibä ja täbä tablaö lä daö wejei bä lija ca̦i. Canafali bä bälabeje, Sidonoteli bä ca̦i dobälemaje, Diloteli bä ca̦i. Nii bä ma cui ja, toubä lä coamou wei toubä ma cui ja, dabö dabö ubä ma cui ja, ö̦jö bä ja bä dobälemaje. Libano jamö canafali bä fa duyäjenö, modu bada u jamö bä befi ca̦i nia caläfälömaje, Jobeteli bä lijamö bä ca̦bobeje, Besiateli Silo a bada lä cuinö bä nowa lä tano weinaja showawä.

Jeobaa e yafi colo i̦tamaö lä co̦ono wejei tä a̦

⁸ Jelusale jamö bä waloa fa co̦bonö, lasha 2 a lalomalemaje. Ö̦jö däjä, belibo 2 jamö, Jeobaa etä yafi i̦tamaö co̦obeje, bä jaba queolaliyoma. Solobabele, Josué sho cäcöbä bada lä cuinö bä ca̦i cuböoma. Solobabele a lä cui, Saladiele bä ijilubö e cuoma. Josué a lä cui, Josadaca bä ijilubö e cuo mö feduoma. Cama ebä bluca cuo mö lä feduono wei, nofi bäyäalewä bä cuoma, Lewi nodiwä ai ebä ca̦i. Shomi täbä ulufibö jamö bä lä bälaquedayono wejei, bä waloa lä co̦beno wei, ö̦jö bä ca̦i bluca. Jeobaa etä yafi tablabeje jamö bä bada läobä, Lewi ebä yailemaje, lasha 20 a famaö lä jayuano wejei bä lä cui.

⁹ Yai Bada etä yafi tablabeje jamö bä nia bada lä läono wei, ei bä li cuoma. Josuénö cama ebä ca̦i cuoma. Bä ijilubö ebä ma cui, cama ai bä mashi ma cui, ö̦jö lä bä ca̦i cuoma. Camiele a lä cuinö, cama bä ijilubö ebä ca̦i cuo mö feduoma. Ö̦jö Judawä ebä li nodiwä cuoma. Enadada a lä cuinö, cama ebä ca̦i cuo mö feduo showaoma. Bä ijilubö ebä ma cui, cama ai bä mashi ma cui, ö̦jö Lewi ebä bluca cuoma.

¹⁰ Jeobaa etä yafi colo lä tano wejei däjä, Jeobaa a nofi doablabeje, nofi bäyäalewä bä wawälayoma. Amowa tä a̦ tabeje, sibä showadi lä yaiono wei sibä ja bä didilanö, amowa fibä lä jolano wejei täbä ca̦i wawäolaliyomaje. Lewi nodiwä ai ebä lä cuinö, Asafa bä ijilubö ebänö amowa fibä lä shäda shädamaö wejei bä ca̦i wawäa mö fedua showalaliyomaje. Inaja bä cuaama, Isaeli ebä bada David a lä cuinö bä nowa jaba lä tano weinaja showawä.

¹¹ Ö̦jö ai bänö Jeobaa a nofi fa doablajenö, cama ai ebä mashi lä cui, Jeobaa lija bä bufi a̦fa doblalou wäyämolanö, bä a̦ nocablaliyoma. Abenaja bä amowabö a̦ cuma. ¡Jeobaa a nofi da doablaje, a malä doblale! Täbä nofimaö shi lä wa̦lii wei a malä cui. ¿Ö̦jö tawä? Jeobaa etä yafi colo taö co̦omaje yalo, Jeobaa a nofi doablamaje. Ö̦jö däjä, Isaeli bluca ebä a̦ shi dolayoma.

¹² Jeobaa dude etä yafi colo taö co̦o fa dalalöjenö, bä bufi doblalolanö ai bä a̦ shi bluca dolayoma ma cui, ai bä mö feduwä lä cui, bä wa̦lobada i̦cali ö̦cöa mö fedulayoma. Jeobaa jaba etä yafi damaje cudeenö, nofi bäyäalewä ai bä ma cui, Lewi nodiwä ai ebä ma cui, bä ca̦i lä cuono wejei ai bä ca̦i bada ma cui, bä ö̦cöma. “Yama tä nia yafi möö co̦daaimi”, bä bufi jaba cuma yalo, tä yafi colo dablaö co̦oje däjä, bä bufi lä jalujublalodino wei tä nowa ja, bä ö̦cöma.

¹³ Bä a̦ bluca faö fa showadaonö, bufi doblalolanö bä a̦ shi lä dono wei bä a̦ ma cui, bä bufi wajäalanö bä lä ö̦cöno wei bä a̦ ma cui, bä a̦ ji̦liayou doblonomi. I̦cali bä a̦ shi malä dono wei. Blajai jamö ma cui bä a̦ ji̦liodayoma.