Esdras 1 - Biblia Yanowamö

Besiateli Silo a badanö Jeobaa e yafi i̦tamaö co̦o lä bufino wei tä a̦

¹ Besiateli bä ca̦i lä bälöono wei, Silo a wa̦fa bada cuoma. A bada läo dudäo showao däjä, lasha moli a famaö showao mlai ja, Jeobaanö a bufi bada taamama. ¿Ö̦jö tawä? Jeobaa a wa̦no wäyälewä Jelemia lija, a wa̦no wäyämaö lä bufino wei a wa̦no bejedi cublobä, Besiateli Silo a bufi fa taamanö, a wa̦ nö bada wäoma. A wa̦ nö lä wäono wei a wa̦no ca̦i oniblamaö showaoma, cama ebä bluca lä bälöblai jamö, a wa̦no oni ca̦i fubeje. A wa̦ nö wäo ja, abenaja a cuma.

² —Besiateli Silo ya bada lä cui, wamale a̦ da ji̦li. Bluca bä bälöjöwä lä yaiblai bä lija ya bada läobä, Jeobaanö wale dobälema, Yai Bada tä fedu jamö lä culadinö. Jelusale jamö cama ya etä yafi tablamabä, wale nowa ca̦i tama, Judawä ebä ulufibö jamö.

³ ’Ö̦jö cudeenö, cafä Jeobaa wama ecö lä coyocoblai, afä wama a lä bufiblalenö wamacö ca̦i fa cuonö, Jelusale jamö wamacö fuu co̦obä, ö̦jö lä —a bada cuma—. Ö̦jamö, Judawä ebä ulufibö jamö wamacö fuu fa co̦onö, Jeobaa wama e yafi nia i̦tamaö co̦o, Isaeli wama ecö lija a lä bufiblamole e yafi lä cui. Wama a lä bufiblaö wei a lä cui, Jelusale jamö a malä cule.

⁴ ’Isaeli wama ecö shee lä jäblaliyono wei wamacö lä coyocole, wamacö nia bayeliblaöje —a cuma—. Wamacö bayeliblabeje ya wa̦ faö lä cule. Cafä wamacö lija, bä bälöa lä ajedele bänö wamacö bayeliblabeje. Blada bä ma cui ja, olo bä ma cui ja, madofi bä ma cui ja, baca bä ma cui ja, ö̦jö bä ja wamacö bayeliblabeje. Jelusale jamö Yai Bada etä yafi cuo co̦obä, ai täbä jibäaö yädämou bufi lä doblao wejei bä ma cui ja, wamacö ca̦i bayeliblaö showaobeje —Silo a bada cuma.

Jelusale jamö Isaeli ai ebä co̦a lä co̦layono wei tä a̦

⁵ Ö̦jö tä a̦ fa ji̦liläjenö, Judawä ebä bada ma cui, Bejamino ebä ca̦i bada ma cui, bä shu̦lucua showalayoma. Nofi bäyäalewä bä ma cui, Lewi nodiwä ai ebä ma cui, Jelusale jamö Jeobaa e yafi i̦tamaö co̦obeje Yai Bada tänö bä bufi lä taamano wei bä lä cui, ö̦jö bä bluca shu̦lucua showalayoma.

⁶ Bä bälöa lä ajedele bä blucanö, bä bayeliblamaje. Blada bä ja täbä lä tablamono wei täbä ma cui ja, olo bä ja täbä lä tablamono wei täbä ma cui ja, madofi ai bä ma cui ja, baca bä ma cui ja, täbä nowa lä blucaono wei ai täbä ma cui ja, ö̦jö täbä ja bä dobälalemaje. Ai täbä jibäaö yädämou bufi lä doblaono wejei täbä ca̦i bluca jibäaö showadaomaje.

⁷ Bada tä Silo ma cuinö, Jeobaa etä yafi jamö Nabucudononö täbä madofi lä dolaleno wei täbä wawäa co̦malalema. ¿Ö̦jö tawä? Jelusale jamö täbä fa dolalöfälönö, cama etäbä lä bufiblano wei etä yafi jamö täbä didia majöbejoloma. Ö̦jö täbä lä cui, Silonö täbä co̦alalema.

⁸ ¿Ö̦jö tawä? Besiateli a bada Silo lä cuinö, ö̦jö täbä wawäa fa co̦malalönö, Mididade lija täbä jibäquema, etäbä nowamabä. Täbä showadi nowamadii lä bufino wejei, ö̦jö e cuo waiquioma. Ö̦jönö täbä bluca wabaö fa balöonö, Judawä ebä lija a bada lä läono wei a Sebasala lija, täbä bluca jibäa majöquema. Ö̦jönö täbä nia nowamaö nomöjöoma.

⁹ Täbä nia lä nowamaö wei, abenaja täbä bluca cuoma. Täbä didibobeje, olo bä ja täbä bada lä tablano wejei, täbä 1.000 cuoma. Blada bä ja täbä bada tablamou mö lä feduono wei, 1.000 täbä cuo mö feduo showaoma. Amanafu wacä bä tablabeje, 29 täbä ca̦i.

¹⁰ Toubä coabeje, olo bä ja täbä wai tablaö mö lä feduono wejei, 30 täbä ca̦i. Blada bä ja täbä wai lä tablano wejei, 2.410 täbä cuo mö feduoma. Ai täbä bluca mö feduwä lä cui, 1.000 täbä cuo mö feduo showaoma.

¹¹ ¿Ö̦jö tawä? Täbä didibobeje täbä bluca lä cuono wei, olo bä ja täbä lä tablamono wei täbä ma cui, blada bä ja täbä tablamou mö lä feduono wei täbä ma cui, 5.469 bei täbä cuoma. Babilonia jamö bä lä bälaqueno wejei bä lä cui, bä shimöa lä co̦leno wejei däjä, Jelusale jamö Sebasalanö ö̦jö täbä madofi bluca ca̦i co̦a co̦layoma.