Deuteronomio 34 - Biblia Yanowamö

Moisesi a bufi lä mlaqueno wei tä a̦

¹ Moaba ebä ulifibö lä yalöi jamö a culanö, Nebo cäcö jamö Moisesi a fa dubofälönö, Bisica cäcö bololo jamö a waloquedayoma, Jelicoteli bä lä bälöle tä mashi jamö. Ö̦jamö Moisesi a cuodayou däjä, tä ulifi möö cuaama. Calaadateli bä ulifibö blajawä lä blaono wei tä ma cui, Dani ebä ulifibö blajawä blao mö lä feduono wei tä ma cui, tä ulifi lä möamöono wei tä ma cui, Jeobaanö tä ulifi mömaö jödödou cuaama.

² Nefitali ebä ulifibö blajawä lä blale tä jödödöwä dablamama. Eflaini ebä ulifibö ma cui, Manasesi ebä ulifibö ma cui, ö̦jö bä ulifibö bluca dablamaö cuaaö mö feduo showaoma. Judawä ebä ulifibö ma cui, modu bada u casö jamö tä ulifi dablamaö fe wädöo showaoma, motoca a mö weyaaö lä cuaafälöö wei jamö u modu lä blale jamö.

³ Neque tä ulifi ma cui, Jelico tä yalö lä möamobe tä ma cui, ö̦jö tä bluca dablamaö showaoma. Ö̦jö Jelicoteli bä lä cui, desibä bluca lä cublamono wei jamö bä bälöblamou cuaama. Yai Bada tänö ö̦jö tä ulifi lä yalöi tä jömaö fa cuaanö, Soalateli bä bälöo lä jödödöono wei jamö, tä ulifi blajawä dablamaö fe wädöodayoma.

⁴ Abinaja Bada tänö Moisesi a nowa taö ja a cuma. —Fei wa tä ulifi lä dablale, ya tä a̦fa ulifi jaba lä wäyäno wei, ö̦jö fei cätä. Ablaamö ma cui nija, Isaacö ma cui nija, Jacobo ma cui nija ya wa̦ nö wäo ja, abinaja ya bä nowa tama. “Afä bä bälöo lä nodio wei bä nija ya tä ulifi nia jöböaö”, ya bä nowa tama. ¿Ö̦jö tawä? Ö̦jamö lä cafä wa nia yai waloo ma mlai ma cui, bei wa mamocu yainö wa tä dablabä, ya tä mömaö balöa lä cule —a Jeobaa cuma.

⁵ ¿Ö̦jö tawä? Jeobaa a nosie juamobä Moisesi a lä cui, Moaba ebä ulifibö jamö a bufi mlaquema, Jeobaa a lä cuno weinaja showawä.

⁶ Moaba ebä ulifibö yalö lä möamobe jamö Jeobaanö a didiquema, Bebeoloteli bä lä bälöle tä mashi bucadu jamö. Ö̦jö ma cui, “Ö̦ja a didia dao”, bä bufi cuimi. Jaba däjä ma cui, fei däjä ma cui, täbä bufi ca̦i cuimi showawä.

⁷ ¿Ö̦jö tawä? Moisesinö lasha 120 a famaö waiquio däjä, a bufi mlaquema. A wa̦lobada ma cui mamocu wacacao showaoma. A fiyao däjä a lojode lä cuono weinaja a lojode cuo showaoma.

⁸ Ö̦jamö, Moaba ebä ulifibö lä yalöbe jamö, Isaeli ebä lä cuinö Moisesi a nomöa bouje ja, 30 tä mö didi tablamalajenö bä öcöma. Ö̦jö däjä, a nomöa nia lä bono wejei etä waicoma.

⁹ Nuni bä ijilubö Josué e lä cui, Jeobaanö a bufi bayeliboma cudeenö, bufi dao a taboma. Ö̦jö nija Moisesi imicö maqueo malä wawädoono wei. Ö̦jö cudeenö Isaeli ebä lä cuinö, dodijidawä Josué a wa̦ juamaje. Jeobaanö Moisesi a nowa lä tano weinaja bä cuaaö cadidioma.

¹⁰ ¿Ö̦jö tawä? Isaeli ebä nija Jeobaa a wa̦no wäyälewä ai bä wawäblou ma nodiono wei ma cui, Moisesi a yai lä cuono weinaja, a dablamou co̦daanomi. Jeobaanö Moisesi a wa̦ wawädowä wayomaö lä cuaano weinaja a dablamou co̦daaö fa mlacunö, fei däjä ma cui a dablamoimi malä showai.

¹¹ Ejido jamö Jeobaa a nö lojode ö̦jöböamabä, Moisesi bejedi lä a nö quiliaö dodijioma. Ejidoteli bada a nö bleaamaö lä cuaano weinaja ma cui, cama ebä nö ca̦i bada bleaamaö mö lä feduono weinaja ma cui, bä ulifibö wa̦liaö lä showadaono weinaja ma cui, inaja ai bä cuaaö mlai ja, Moisesi a shino yami cuaaö ayaoma.

¹² Isaeli ebä ca̦i lä cuono wei däjä ma cui, Moisesi a nö shino wa̦lojaö fe balojooma. Bä mamo bluca showao däjä, a lojode dablamodima. A lä cuaano wei tä ja, a nö quiliadii cuaaö fe balojooma.