Colosenses 3 - Biblia Yanowamö

Fedu jamö bämacö bufi cuobä tä a̦

¹ ¿Ö̦jö tawä? Cristonö wamacö demi ca̦i jocädou waiquilayoma ja lä, fedu jamö tä bluca lä cule tä ja, bä bufi shi̦lo yai da cuo. Ö̦jamö Yai Bada jayu boco mashi jamö, Cristo a dicäadayoa.

² Ö̦jamö täbä lä culadi täbä ja, bä bufi shi̦lo yai da daeo, bita jamö täbä lä cublai täbä ja mlai.

³ Cristonö wamacö ca̦i nomaa malä waiquilayono wei. Ö̦jö sho ba̦limi wamacö nia lä cuo wei, Yai Bada tänö a wawämaimi showawä ma cui,

⁴ Cristo a bädodayou däjä, inaja showawä cafä wamacö nia ca̦i bädou cuo. Ba̦limi bämalecö yai lä tablamaö wei, ö̦jö a. Cama a doblao lä culenaja, wamacö ca̦i nia doblao cuo mö feduo.

⁵ ¿Ö̦jö tawä? Yanowamö täbä showadi lä cuaaö weinaja wamacö cuaaö mö feduobä wamacömi. Bä cuaa dijä, ö̦jö lä. Wamacö nofi beshili jushublalobä wamacömi. Shami wama tä nia fuliimi. Wamacö bufi nia ca̦i waiyoimi. Wa̦lidiwä tä taö bufi doblao dijejä. Madofi täbä ma cui ja, wamacö bufi nia ca̦i waiyoimi. Bä bufi lä waiyou wei bä lä cui, Yai Bada a bufiblaö mlajei ja, shomi täbä ja bä bufi shi̦lo cuablalou dicoo.

⁶ Inaja täbä yanowamö cuaaö dicoo yalo, Yai Bada tä nö wa̦lowä lä jushudou wei tä nia wawäblou.

⁷ ¿Ö̦jö tawä? Wamacö mojodi bälöo showao däjä, inaja wamacö jaba cuaama.

⁸ Ö̦jö ma cui fei däjä, ei wama tä nia bluca mladamaö. Jushuo tä lä cui, täbä nö wa̦lowä lä jushudou wei tä ca̦i lä cui, täbä nofi lä wa̦libou wejei tä ca̦i lä cui, ö̦jö wama tä nia bluca mladamaö. Ai täbä a̦fa lä wayoaö wejei tä ca̦i lä cui, bä caficö a̦ shami lä faö wei tä ca̦i lä cui,

⁹ täbä lä joleblamaö wejei tä ca̦i lä cui, ö̦jö wama tä nia ca̦i bluca mladamaö. Yanowamö täbä bufi showadi lä cuaablalou wei, wama tä waia malä waiquileno wei. Wamacö jaba lä cuaano wei tä ca̦i.

¹⁰ Yai Bada lija, dude wamacö bufi tablamoa waiquilayoma. Cama a lä culenaja wamacö bufi cuo mö feduobä wamacö bufi malä jaducäamaimadi, cama wama a yai daö shaliliobä.

¹¹ Ö̦jö bäma ecö bluca waiquiwä cudeenö, moli bäma ecö mashi waiquiwä. Clesiateli bä ma cui, judio bä ma cui, bä mosi sicö lä joyamou wei bä ma cui, bä mosi sicö joyamou lä mlai bä ma cui, ö̦jö bäma ecö bluca. Shomi täbä ma cui, oni sibä daö lä mlajei täbä ma cui, täbä a̦ fuamobä bä lä tabou wejei bä ma cui, bä tabou lä mlajei bä ma cui, inaja showawä. Camiyä bämacö nofi yaimamobä bämacö mlai, bäma a nofi nia lä yaibou wei, ö̦jö Cristo a waiquiwä. Cama bäma ecö bluca lija a cua.

¹² Yai Bada tänö wamacö lä yaileno wei wama ecö waiquiwä. Ö̦jö wama ecö yaia. Cafä wamacö yai nofimaö. Ö̦jö cudeenö abenaja bä yai da cuaa. Bä nofi yai ojode da tayo. Dodijidawä bä ca̦i da cuoje. “Camiyä yai”, bä bufi cu dijä. Bufi oquewä bä yai da cuo. Bä bufi yai yanöcöo fe da yadio.

¹³ Täbä nofimaö fe da yadioje. Wamacö ma taamaö wejei ma cui, tä nowa tabo dijejä. Yai Bada tänö wamacö nofi lä asibono weinaja, cafä wamacö nofi asiboyou mö feduobä wamacö.

¹⁴ Abenaja bä shi̦lo yai da cuaa. Bä bufi yai da nofio, ¿ö̦jö tawä? Wamacö yai lä nofimayou wei tänö, dodijidawä wamacö nia shi̦lo yai cuo.

¹⁵ Jai moli wamacö dodijidawä cuobä, Yai Bada tänö wamacö bufi yanöcömabou. Wama bä bufi yanöcöwä ca̦i cuobä, wamacö nacama. Ö̦jö tä nabä shi̦lo yai da cadidoje. Yai Bada lija wamacö shi̦lo lä bayeliblamou wei tä ja, bä bufi a̦fa shi̦lo doblalou da wäyämo.

¹⁶ Cristo etä a̦ jamö, bä bufi yai shi̦lo da taamamo. Wamacö bufi jaducälanö bä da yömölayo. Bä ca̦i da wasöyo. Yai Bada tä ja wamacö bufi doblalanö, ö̦jö lija täbä a̦ amowa lä yädäblai täbä a̦ shi̦lo da taje. Nö badabö David etäbä a̦ ca̦i. Yai Bada tä Bufinö täbä a̦ lä bädamaö wei täbä a̦ ca̦i.

¹⁷ Wamacö cuaaö lä bädao wei tä ma cui ja, Bada tä Jesús wama a nofi jaducäbolanö, wamacö yai cuaabä. Wamacö a̦ faö lä bädao wei tä ma cui ja, inaja showawä wama a nofi nia shi̦lo jaducäbou cuo. Inaja wamacö cuaalanö, Bada tä Jesús a wa̦nö, Yai Bada bäma a nofi lä Fö̦ömale lija bä bufi a̦fa doblalou da wäyämo.

Dodijidawä cama bä bluca cuobä tä a̦

¹⁸ Bei. Bä suwäbö wama ecönö, fe̦yalofä bä a̦ da ji̦liaje. Bada wama ecö yalo, inaja wamacö cuaabä wama ecö waiquiwä.

¹⁹ Bä fe̦yalobö wama ecönö, suwäböfä bä yai da nofimaje. Dodijidawä bä ca̦i da cuoje, bufi jushujulanö mlai.

²⁰ Bä ijilubö wama ecö lä cuinö, naafä, faafä dodijidawä showadi bä a̦ shi̦lo da fuaje. Inaja wamacö cuaaö ja, Bada wama tä bufi nia malä doblamabou wei.

²¹ Bä fö̦ö wama ecö. Ijilufä wama bä lä wasöablalaö wei tänö, bä bufi nö bleaama dijejä, wama bä bufi wa̦lidiblamaö dicolo.

²² Bä nosie fuamobä wamacö lä tabou wejei wamacö lä cui lija ya wa̦ faö majöo. Bita jamö wamacö bälöo showao däjä, wamacö lä tabou wejei dodijidawä bä a̦ da fuaje. Bä mamo showao däjä shi̦lo mlai. Yanowamö täbä lija wamacö dodijidawä dablamobä ca̦i mlai. Bada tä Jesucristo lija wamacö fa quilinö, bufi cadidilanö wama bä a̦ shi̦lo yai fuabä.

²³ Tä nabä shimaö lä bädao wejei tä ma cui ja, dodijidawä wamacö ojodamobä. Jai yanowamö täbä lija mlai, jai Bada tä Jesucristo lija, bufi doblalolanö wamacö nö yai ojodamou cuaaö lä cuquebö weinaja showawä.

²⁴ Yai Bada tänö wamacö no nia ojode lä co̦amaö wei, wama tä malä dale. ¿Ö̦jö tawä? Cama ebä lija täbä nia lä jibäadayou wei täbä ja, cafä wamacö ma cui, wamacö nia ca̦i malä dobäö wei. Bada tä Cristo wama a nosie yai fuaö malä cui.

²⁵ ¿Ö̦jö tawä? Wa̦lidiwä talewä bä ma cui, cama etä nowa nia ca̦i co̦amamou. ¿Ö̦jö tawä? Bä lä dodijaö wei bä lä cui, bä nowa nia shi̦lo co̦amamou ayao malä mlai. Jödödöwä tä lä tamou wei tä ma cui, tä nowa nia co̦amamou.