Colosenses 1 - Biblia Yanowamö

Pablo a wa̦fa lä wäyämou wei tä a̦

¹ Jesucristonö wale lä shimöleno wei, ei camiyä Pablo cä ya, Yai Bada tänö wale ca̦i shimaö fa bufinö. Bämacö ai Timoteo sho yafäcö cua lä cule.

² Colosa jamö Yai Bada wama ecö bluca lä bälöle wamacö lija ya tä a̦ oni shimaö, Cristo lija wamacö lä cadidou wei wama ecö lä cui lija. Bei. Fayä Yai Bada a lä cuinö, showadi wamacö shi̦lo bayeliblabä. Wamacö bufi shi̦lo yanöcömabobä. Wamacö nofi ca̦i shi̦lo ojodabobä.

Yai Bada lija Colosateli bä lä bayelimano wei tä a̦

³ Cafä bämacö bayelimaö ja, Yai Bada lija yamacö bufi a̦fa doblalou wäyämou talei, Bada tä Jesucristo bä Fö̦ö e lä cui lija.

⁴ Jesucristo wama a nofi jo̦wa lä mölabole, bämacö a̦fa malä ji̦libou wei. Yai Bada cama wama ebä bluca ca̦i jo̦wa nofimaö. ¿Ö̦jö tawä?

⁵ Yai Bada tänö wamacö nia lä dobädayou wei tä ja wamacö mölaö yalo, inaja wamacö jo̦wa li cuaaö. Ö̦jö wama tä a̦ bejedi ji̦lia waiquilema, Jesucristo wama tä a̦ dodijidawä lä ji̦lileno wei däjä.

⁶ Cafä wamacö lija tä a̦ ca̦i malä waloqueno wejei. Jödödöwä täbä lä bälöblai täbä ma cuinö tä a̦ ji̦liaö balaö lä cudujei. Tä a̦ ji̦liaöje yalo, bluca bä lä cublai Jesucristo ebä cublou lä cudi. Cafä wamacö ma cuinö, Yai Bada tänö täbä nofi lä ojodabou wei wama tä a̦ jaba fa ji̦lilänö, ö̦jö tä a̦ bejedi ja, wamacö bufi jaba fa jaducäblalunö, inaja showawä cafä wamacö ca̦i jo̦wa dodijaö balaö lä cuimadi.

⁷ Jesucristo tä a̦ ja, Ebafla lija wamacö damamoma. ¿Ö̦jö tawä? Ö̦jö a lä cui yama a nofimaö dodijio. Jesucristo lija camiyä yamacö ojodamou lä cuaaö weinaja, cama a ma cui a ca̦i ojodamou cuaaö mö feduo. Cristo a wa̦fa wäyäö cadidou dodijio talei. Cafä wamacö lija, ö̦jö yama a fa shimölönö,

⁸ wamacö a̦fa wäa co̦bejeloma. ¿Ö̦jö tawä? Yai Bada tä Bufinö wamacö jo̦wa yai nofiblamaö majöa lä cule.

⁹ Ö̦jö cudeenö, cafä bämacö wa̦no jaba lä ji̦lileno wei däjä, bämacö bayelimaö showaoma. Inaja showawä bämacö bayelimaö cuwä showawä. Yai Bada tänö wamacö bufi jaducämabobä yamacö a̦ faö, wamacö taamaö lä bufio wei wama tä daö jödödöblobä. Bufi dao wamacö yai cuobä.

¹⁰ Dodijidawä wamacö cuobä ya wa̦ faö. Bada tä Jesucristo bäma ecö lä cui, dodijidawä bämacö cuobä bäma ecö waiquiwä malä cui, Jesucristo bäma a bufi yai doblamabobä. Wamacö lä bayeliblayou wei tä lä cui, ö̦jö wama tä shi̦lo yai balamabä yamacö a̦ ca̦i faö. Yai Bada tä lä cui, wama tä ca̦i daö cadidiobä.

¹¹ Cama tä lofotenö wamacö nö yai wa̦lojomabobä. Ö̦jö tä lä doblale a shi̦lo yai lofote cua. Wamacö nö yai lä wa̦lojomabou wei däjä, wamacö bufi shi̦lo yai doblao fe yadiobä. Wamacö bufi ca̦i shi̦lo yanöcöwä cuo fe yadiobä.

¹² Inaja wamacö cuaalanö, bämacö lä Fö̦ömole tä lija wamacö bufi a̦fa shi̦lo doblalou wäyämobä. Cama ebä befi lä taboladi täbä ja bämacö dobämou mö feduodayobä, bämalecö malä tablamaleno wei, tä shi̦i lä wacalamiladi jamö.

¹³ Didi tä jamö tä bada lä läle tänö bämalecö tabou ma balöono wei ma cui, Yai Bada tänö bämalecö fujeblamaö majölayoma. Bä Ijilubö e yai lä nofimaö wei a Bada lä läle jamö, bämalecö yai taa majömaquema.

¹⁴ Ö̦jö lija bämacö nowa co̦molayoma. Bämacö doblou lä mlai, tä nowa bluca mladamalema.

Cristo lija bä yai lä bayeliblamou wei tä a̦

¹⁵ Bei bämacö mamocu yainö Yai Bada bäma a dablaö ma mlai ma cui, cama a lä owäbole a damalalema, bä Ijilubö e lä cui. Yai Bada tänö täbä jödödöwä lä tablaleno wei täbä ja, bä Ijilubö e Bada läa.

¹⁶ Fedu jamö ma cui, bita jamö ma cui, täbä wawädowä lä dablamou wei täbä ma cui, täbä dablamou lä mlai täbä ma cui, ö̦jö lä täbä lä cui, bä Ijilubö e lija, Yai Bada tänö täbä bluca tablamalema. A̦jele bä lä culadi bä ma cui, ai yai täbä bada lä lofote wei täbä ma cui, yanowamö täbä bada lä läblai täbä ma cui, ö̦jö täbä ca̦i tablaö mö fedua showadalayoma. Cama etäbä cuobä, cama lija täbä bluca tablamalema.

¹⁷ Ö̦jö täbä lä cui täbä cua showaa mlai ja, Yai Bada bä Ijilubö e cuo balöo showaoma. Cama a showawänö täbä bluca fuwäbou showaa lä cule.

¹⁸ ¿Ö̦jö tawä? Cama ebä lija, ö̦jö lä a Bada läo. Ö̦jö lä ebä bluca lä cui, cama bei lä fe waiquiwä, cama ebä dodijidawä cuobä. Ai bä demi jocädou balöa mlai ja, cama a shi̦lo demi jocädamaö balölayoma, ba̦limi a cudio shi wa̦libä. ¿Ö̦jö tawä? Jödödöwä täbä lä cublai täbä ja a Bada läobä, inaja a li tablamalema.

¹⁹ Bä Ijilubö e lija, cama Yai Bada tä owämobou bufi malä doblaono wei.

²⁰ Bä Ijilubö e showawä lija tä bluca cadejeblamaö bufi ca̦i doblao co̦oma, cama Yai Bada lija täbä nofio co̦obä. Bita jamö täbä bluca lä cule täbä ma cui, fedu jamö täbä bluca lä culadi täbä ma cui, Yai Bada lija täbä bluca dodijidawä ca̦i cuo co̦obä. Fii balitama tefi jamö, Cristo a i̦yä nö lä bleono wei tä nowa ja, Yai Bada tänö bufi yanöcöwä bämalecö ca̦i cua.

²¹ Cafä wamacö lä cui, Yai Bada tänö wamacö ajedebou balöonomi. Wa̦lidiwä showadi wama tä shi̦lo tama cudeenö, wamacö bufi nö nabämoma.

²² Ö̦jö ma cui, wamacö ajedeamaö co̦obä, bä Ijilubö e fa yanowamöblamalönö, a shämalema. ¿Ö̦jö tawä? Dodijidawä cama wama ecö yaiobä, a shämoa lälayoma. Wamacö a̦fa tamobä tä cua mlai ja, cama a lä cule jamö dodijidawä wamacö ublamabobä.

²³ Bufi lofotolanö, wama a wa̦ nofi mölabou showao däjä, inaja wamacö nia yai taamaö, wamacö bufi cadidou showao däjä. ¿Ö̦jö tawä? Wama tä a̦ dodijidawä lä ji̦lileno wei tä a̦ nofi da cadidileje, ö̦jö lä. Jödödöwä täbä lä bälöblai täbä ma cui lija tä a̦ wäyämamou waiquia lä cudi. Ö̦jö ya tä a̦ wäyäö cuaaö mö feduobä, camiyä Pablo ya ma cui ya e cublaliyoma.

Jesucristo ebä bayeliblabä Pablo a lä lämaqueno wei tä a̦

²⁴ Cafä bämacö lä bayeliblaö wei tä nowa ja, wale nö bleaamaö ma culajei, bufi doblalolanö ya nö li fei däjä bleaaö lä cule. Inaja showawä, cama ebä bayeliblabä, Cristo a ma cui a nö bleaaö malä balöono wei. ¿Ö̦jö tawä? Cama ebä lä cui, ö̦jö cama bei a. Camiyä ma cui, cama ya ebä bayeliblabä ya nö ca̦i bleaaö mö feduobä tä cua ja, ya nö bleaaö cuquei lä.

²⁵ Cafä judio wamacö lä mlai wamacö bayeliblamou mö feduobä, Yai Bada tänö camiyä wale lämaquema. Cafä wamacö lija, Yai Bada jödödöwä ya etä a̦ wawäblamabä, ö̦jö ya e.

²⁶ Täbä jaba lä bälöono wei täbä lija, Yai Bada tänö tä a̦ ma jo̦yabono wei ma cui, fei däjä cama ebä lija tä a̦ yai wawäblamalema.

²⁷ Ö̦jö tä a̦ jaba lä jo̦yaono wei tä a̦ lä cui, cama bluca ebä lija tä a̦ ya̦cumö wawäblamaö bufi doblaoma, judio bä lä mlai bä nia lä bayeliblamono wei tä a̦ dodijidawä lä cui. Ö̦jö tä a̦ lofote dodijiwä. Judio wamacö lä mlai wamacö lija, Cristo a Bufi nia lä bälöo wei, ö̦jö tä a̦ li waiquiwä. Cristo wama a Bufi tabou waiquia yalo, wamacö nia lä doblaodayou wei tä ja wamacö mölaö.

²⁸ Wawädowä, ö̦jö yama a wa̦fa shi̦lo yai wäyäö. Yamacö a̦ moyawälanö yama bä bluca wasöbou, yama bä bluca ca̦i yömölabou, Yai Bada lija bä nia lä icuo wei däjä, Cristo ebä bufi bluca jaducäwä ca̦i icuobä.

²⁹ Inaja ya bä nia fa taamanö, ya ojodamou. Cristo a lofotenö ya nö yai wa̦lojaö lä cule.