Apocalipsis 21 - Biblia Yanowamö

Dude tä bluca nia lä cublou wei tä a̦

¹ Ö̦jö däjä, judu dude ya mösö dalalema, bita dude a ca̦i. Jaba mösö lä cuono wei, bita a ca̦i jaba lä cuono wei, cäcöbö malä mladaliyono wei. Modu u ma cui, u cuonomi nomöjöwä.

² Jelusale dude ya tä shabono ca̦i itou dalalema, Yai Bada etä shabono lä yaile a lä cui. Yai Bada tä lä cule jamö a cuoma a itolayoma. Bä fe̦yalobö nija a moco cuobä a baushiblaö lä cuaaö wejeinaja a shabono baushi fa tablamolunö, inaja a cuoma.

³ Bada tä döcäobä etäcö jamö a culanö, ai tä a i̦cali falayoma. Abinaja ya cuu ji̦lilema. —¿Ö̦jö tawä? Fei däjä, yanowamö täbä nijamö Yai Bada tä nia bälöo. Ö̦jö bä nijamö a fa bälöalunö, cama ebä nia cublou cadidio. Cama Yai Bada tä showawänö bä nia ca̦i cuo.

⁴ Yai Bada tänö ö̦jö bä mabuubö nia bluca ya̦jöblaö. Bä nia nomaö co̦daaimi. Täbä nomöa nia boimije. Bä nia ca̦i ö̦cöimi. Bä nia ca̦i ninio co̦daaimi. Inaja tä bluca cuo lä balöono wei tä malä mladaliyono wei —a cuma.

⁵ Bada tä döcäobä etäcö jamö a lä döcäono wei, abinaja a cuma. —¿Ö̦jö tawä? Fei däjä dude ya täbä bluca tablamaö —a cuma. Abinaja a ca̦i cuma. —Ei wale a̦ da onicö. Tä a̦ nofi mölabobeje tä a̦. Tä a̦ bejedi —a cuma.

⁶ Abinaja wale nowa ca̦i tama. —Bei tawä. ¡Inaja lä waiquiwä! Camiyä jaba ya, jödödö ya ca̦i. Camiyä ya lä cuinö täbä jaba bluca cublaliyoma. Camiyä ya showawänö täbä jödödöwä waicou. Bä lä amishaö wei bä lä cui, no mlai ja ya bä amishi nia co̦amaö. Ba̦limiblamodima u fe lä jojole u ja, ya bä nia dobäö.

⁷ Bä nö wa̦lojaö lä ayao wei bä lä cui, dodijidawä bä cuobä ya bä nia dobäö. Cama bä nija ya nia bufiblamou. Ya bä nofi nia ijiluaö.

⁸ Inaja ö̦jö ya bä nia ma taamaö wei ma cui, ai bä lä cui ya bä nö nia bleaamaö ayao. Wale a̦ juaö lä quilii wejei bä ma cui, wale nofi mölabou fe yadio lä mlajei bä ma cui, bä shami nö lä quilii bä ma cui, täbä lä shäö wejei bä ma cui, bä lä joleblalou wei bä ma cui, fecula bä nija täbä nabä lä shömaö wejei bä ma cui, nö idubö täbä lä bufiblaö wejei bä ma cui, bä caficö a̦ lä jolemou wei bä ca̦i bluca ma cui, cowa wacö ca jamö bä queamabä bä li waiquiwä, cowa yaitawä nacli wacöbä lä waole jamö. Täbä nia nomablou lä co̦o wei, ö̦jö bei tä waiquiwä —wale nowa tama.

Jelusale dude tä shabono lä itou wei tä a̦

⁹ Ö̦jö däjä 7 toubä befi ca̦i lä däbono wejei bä a̦jele ai a lä cui a waloquema, wayu wayu 7 täbänö bä nö nia bleaamaö fa jödödöojenö, bä nia waicou lä showadaono wei bä ai a lä cui. Camiyä nija a wa̦ faö ja abinaja a cuma. —Jabo. Oweja a wa̦fa ocalo lä jilamou wei a lä cuinö, a suwä nia lä däaö wei wa möbä —a cuma.

¹⁰ Ö̦jö däjä Yai Bada tä Bufinö wale lojodobolanö, bei macö ösöwä jamö wale bälaquedayoma. Ö̦jamö ya fa bälacudunö, camiyä nija Jelusale a shabono dude damalalema, Yai Bada etä shabono lä yaile. Yai Bada tä lä cule jamö a cuoma ya itou dalalema.

¹¹ Yai Bada tä shi̦inö a bada shabono wacacaoma. Maa au mabä baushi nowa wai lä bluca wei mabä shi̦i faö lä culenaja showawä. A shabono mömou walalaoma.

¹² Ala nabä bada ösöwä fe fa̦yooma. Bä fablaabä, 12 yocabä lä cule jamö a̦jele 12 bä läoma. Bei yocabä lä cuono wei jamö, Isaeli bä ijilubö 12 ebä nija bä yaiablalou lä nodiablalono wei ebä a̦fa oni cublamoma.

¹³ ¿Ö̦jö tawä? Motoca a faö lä cuaaö wei tä mashi jamö, 3 yocabä cuoma. A lä queo wei tä mashi jamö 3 co̦daawä. A faö lä mlai jamö 3 ca̦i. A queo lä mlai jamö 3 co̦wä.

¹⁴ Ala nabä fe bada lä fa̦yoono wei nabä colo ja, maa 12 mabä bada bäfätäoma. Ö̦jö colo 12 mabä jamö, Jesucristonö bä lä shömöleno wei bei bä a̦fa oni cublamoma, Oweja a wa̦fa ocalo lä jilamou wei a lä cuinö.

¹⁵ Wale a̦ lä wayomano wei a a̦jele lä cuinö, jai shälacawä a ju̦loco cuwä tä showaboma, täbä labe lä wabaö wejei tä lä cui. Olo bä ja tä cuoma. Jelusale tä shabono labe wababä tä showaboma, ö̦jamö yocabä lä cublai yocabä ca̦i, ala nabä ca̦i.

¹⁶ ¿Ö̦jö tawä? A shabono blaucuwä lä culenaja a shabono fe wädöblamou cuwä. Jai shälacawä a ju̦loco cuwä tä lä däbono wei tänö, a shabono wabaö showadaoma. A shabono labao fe balojooma. Tä labe lä culenaja, tä blaucuwä cuo mö feduoma. Inaja showawä a ösöwä cuo mö feduo showaoma. ¿Ö̦jö tawä? Tä wabaö däjä tä fe bluca usucuoma.

¹⁷ Ala nabä ma cui, a̦jele anö nabä ösöwä wabaö nomöjöoma, showadi täbä wabaö lä cuaaö wejeinaja showawä. Nabä ösöwä fe balojooma.

¹⁸ Ala nabä lä cui, maa au mabä baushi nowa wai lä bluca wei mabä ja, nabä ala tablamoma. Shabono a yai lä cui, olo bä shino ja a fa cuonö, a mömou walalaoma.

¹⁹ Ala nabä fe bada lä fa̦yoono wei nabä colo ja, maa mabä baushi nowa wai lä bluca wei mabä blucanö, maa 12 mabä bada lä bäfätäono wei mabä baushioma. Jaba ma lä cui, mabä lä au wei mabänö ma baushioma. Ai ma nomöjöwä lä cui, mabä shi lä de̦lelei mabänö ma baushioma. Ai ma majöwä lä cui, mabä lä liyä wei mabänö ma baushioma. Ai ma co̦wä lä cui, mabä liyä mö lä jude wei mabänö ma baushioma.

²⁰ Ai ma nomöjöwä lä cui, mabä oni lä liyäjäi mabänö ma baushioma. Ai ma majöwä lä cui, mabä lä wacäjei mabänö ma baushioma. Ai ma co̦wä lä cui, mabä lä fla̦lajai mabänö ma baushioma. Ai ma nomöjöwä lä cui, mabä shi lä de̦lelei ai mabänö ma baushio mö feduoma. Ai ma majöwä lä cui, mabä lä fla̦le wei mabänö ma baushioma. Ai ma co̦wa lä cui, mabä fla̦lajawä lä fejeleshi wei mabänö ma baushioma. Ai ma nomöjöwä lä cui, mabä wacä lä fejeleshi wei mabänö ma baushioma. Jödödö ma lä cui, mabä ushujuwä mö lä jude wei mabänö ma baushioma. ¿Ö̦jö tawä? Colo mabä lä cui, 12 mabä cuoma.

²¹ Bei yocabä lä joleono wei yocabä 12 lä cui, dobä bä nowa au lä bluca wei bä ja, yocabä tablamoma. Dobä moli bä bada showawä ja, yocabä comadiwä cublamoma. Bä lä jublaaö wei bei yobä lä cui, olo bä shino ja yobä fa cuonö, yobä mömou walalaoma.

²² Ö̦jö a shabono ja, Yai Bada nija bä nö bayeli nacaobä ya yafi dablanomi. Ö̦jamö Bada tä lä bufiblamou weinö bä ca̦i cua malä waiquile, tä shino lojode lä ayai. Oweja a wa̦fa ocalo lä jilamou wei a ma cuinö, ö̦jönö bä ca̦i malä cule.

²³ Ö̦jamö bä lä bälöle bänö, motoca a nia bufijaimije. Belibo a ma cui, inaja showawä. Yai Bada tä shi̦inö tä bluca wacacamabou malä waiquii. Oweja a wa̦fa ocalo lä jilamou wei a lä cui, cowa wacöbä shi̦i cublamobä tä lä culenaja a ca̦i cua malä waiquii.

²⁴ Jelusale jamö tä shi̦i wacacawänö, bluca bä bälöblawä lä yaiblai bä ulifibö nia ca̦i wacacao mö feduo. Bita jamö bä bada lä cublai bänö, Jelusale jamö cama madofi ebä nowa lä bluca wei bä ca̦i nia walooje.

²⁵ Bei yocabä lä joleblou wei yocabä fe nia laomi. Tä mö jaluo däjä yocabä fe lao malä mlai. Ö̦jamö tä mö nia ca̦i dödöomi.

²⁶ Bä bälöblawä lä yaiblai bä lä cuinö, ö̦jamö etäbä madofi bluca lä dodijidai bä nia ca̦i juuje, etäbä madofi nowa lä bluca wei täbä ca̦i.

²⁷ Ö̦jö ma cui, ö̦jamö tä lä shami wei tä nia lucäimi. Yai Bada tänö tä nofi taö lä wa̦libou wei tä lä taö wejei bä lä cui, bä nia ca̦i faimi. Bä lä jolemou wei ca̦i mlai. Ba̦limi bä nia lä cudio wei, Oweja a wa̦fa ocalo lä jilamou wei esi oni ja bä a̦fa oni lä cule, ö̦jö bä nia shino faö ayao.