3 Juan 1 - Biblia Yanowamö

Cayo a wa̦fa dodijaö lä tano wei tä a̦

¹ Cafä Cayo nija ei ya tä a̦ oni shömaö lä cule, bejedi lä bäfä lä nofimaö wei wa lä cui nija. Eja Jesucristo ya ebä ca̦i lä yododaö wei ya lä cuinö ya tä a̦ oni shömaö lä cule.

² Cafä bäfä lä nofimale. Yai Bada nija bäfä bayelimaö talei, dodijidawä wa tamabobä. Wa jaliliblou mlai ja, wa ca̦i demi cuobä ya wa̦ ca̦i faö, bei wa bufi yai lä doblalenaja showawä.

³ Eja Jesucristo ai ebä waloa fa majöiquiyonö, wa lä bejedimou wei wa wa̦fa wäyäöje ja, ya bufi doblalou fe balojooma. Bejedi tä a̦ lä cui showadi wa tä a̦ nofi jo̦wa cadidibou malä cui.

⁴ Ijiluyä ya bä a̦fa bejedimou ji̦liaö däjä, bei ya bufi yai doblalou dodijio lä talei.

⁵ Bäfä lä nofimale. Jesucristo wa ebä bayeliblaö ja, bejedi lä wa dodijaö. Wa cadidou. Wa bä daö balöono ma mlai ma cui, ö̦jö wa bä jo̦wa lä bayeliblaö wei tä yai dodijidawä fe balojowä.

⁶ Wa bä lä bayeliblano wei bä fa co̦blalunö, äyämö Jesucristo ebä lä yododaö wei jamö wa wa̦fa wäyäö co̦ojolomaje. Mijamö bä jayuaö co̦o däjä inaja a shino da cuaa, Yai Bada wa tä bufi doblamabobä.

⁷ Jesucristo a wa̦no wäyäbeje bä juu malä cuaaö wei. Jesucristo ebä lä mlai bä nija bä bayeliblou malä mlai.

⁸ Ö̦jö cudeenö, inaja bä lä cuaaö wei bäma bä yai bayeliblabä bämacö, bejedi tä a̦ wäyäö cuaabeje jamö bämacö yädäablalou cuaabä.

Cäcöbö a̦fa wäyäö lä bolacaono wei tä a̦

⁹ Mijamö Jesucristo wama ecö ca̦i lä yododaö wei wamacö nija ya tä a̦ oni shömölema ma cui, Diodefe a lä cuinö wale a̦ jo̦wa ji̦liaö moji. “Ö̦jönö yamalecö shino yai yömölabä”, wale nofi jo̦wa taboimi. Cama a wa̦ jo̦wa shino ji̦liamou bufi doblao dicoo.

¹⁰ Mijamö ya waloo bädao ja, cama a lä cuaaö wei ya tä a̦ nia wawämaö. Wale a̦fa jo̦wa wayoadii cudeenö. Ö̦jö ma cui, “Inaja lä waiquiwä”, a bufi cuu mlai, abinaja a ca̦i jo̦wa cuaaö dicoo. Jesucristo etä a̦ wäyäbeje bä fama ma juu wei ma cui, bä dodijidawä co̦blamaimi. Bä waloamaö bufi lä doblao wejei bä ca̦i wasöö. Bä bälömabou fe blacäjouje ja, Jesucristo ebä yododabä jamö bä ca̦i lomabou co̦daaimi.

¹¹ Bäfä lä nofimale. Wa̦lidiwä tä lä taö wejei bä owäma dijä. Bä lä dodijaö wei bä shino yai da owäma. Bä lä dodijaö wei bä lä cui, ö̦jö Yai Bada bei ebä li waiquiwä. Bä doblou lä mlai bä lä cuinö, Yai Bada tä daimije.

¹² Demedio a lä cui, bluca bänö ö̦jö a wa̦fa shino yai dodijaö wäyäöje. Bejedi tä a̦ jamö ö̦jö lä a cua wawädoa. Camiyä ya ma cuinö, ya wa̦fa ca̦i dodijaö taö. Bejedi lä ya wa̦. Cafänö wale bejedimou daö.

¹³ Cafä nija ya tä a̦ wäyäbä ya tä a̦ bluca ma tabole ma cui, ya tä a̦ oniblaö bufiomi.

¹⁴ Bäfäcö dablayou fa jaödaonö, dodijidawä bäfäcö a̦ yai wayobä.

¹⁵ Bei. Yai Bada tänö showadi wa bayeliblabä. Wa bufi shino yanöcömabobä. Eja wa lä nofimaö wejei bä bluca lä cui, cafä nija bä a̦fa ca̦i wäyämamou bufi doblaa lä cule. Mijamö ya bä lä nofimale bä bluca lä cui nija wale a̦fa ca̦i wäyäö da cuaa.