2 Timoteo 4 - Biblia Yanowamö

¹ Timoteo. Ei ya wa̦ lä fale, wale a̦ da ji̦lilä. Yai Bada tä ca̦i malä cule. Jesucristo a ca̦i. Cama ebä ca̦i dodijidawä cuobä, a nia bädou lä co̦oyoluu wei a lä cui. Bämacö demi lä showai bämacö ma cui, bä nomaa lä waiquilaliyono wei bä ma cui, bämalecö nia bluca lä jimaö wei, ö̦jö a.

² ¿Ö̦jö tawä? Yai Bada etä a̦ da wäyä. Tä a̦ ji̦liaö bufi ma doblao wejei ma cui, tä a̦ ji̦liaö bufio ma mlajei ma cui, tä a̦ yai wäyäö fe da yadio. Bä bufi taamaö fe da yadio. Bä da wasö. Bä da cadidama. Wa bufi shi̦lo yanöcölanö, Yai Bada tä a̦ ja, bä damaö fe da yadio.

³ Tä a̦ nia ji̦limamou shi wa̦lii malä mlai. Täbä dodijidawä cuobä tä a̦ waiquiwä ma cui, obi tä a̦ nia ya̦cumö ji̦lii mojiblouje. Cama bä cuaaö bufi lä doblao wei tä ja, bä nia yai cuaaö fa cadidionö, shomi bä a̦ nia shi̦lo ji̦lii majöoje, bä a̦ ji̦lii bufi lä doblao wejei bä a̦ lä cui.

⁴ Ö̦jö däjä, bejedi tä a̦ lä cui, tä a̦ nia ji̦liaimi majöweje. Nö badabö tä a̦ nia shi̦lo ji̦liaö bashio majöoje.

⁵ Ö̦jö ma cui, cafä wa lä cui, wa bufi shominajaaö mlai, a bufi shi̦lo yai da shaliliicu. Wa nö bleaabä tä cua ma cule, a bufi cadidia fe da yadiicu. Jesucristo tä a̦ dodijidawä da wäyädu. Cafä lija Yai Bada tänö tä tamaö lä bufii wei tä taö da jödödöo.

⁶ Wale nia shäö jaödaoje. Yai Bada lija täbä dodobouje däjä, toubä liyäyamou lä culenaja, inaja showawä ya i̦yäbö nia liyäyamou cuo. Ya co̦a jaödalayou.

⁷ Yai Bada tänö camiyä lija tä nabä lä shimöbeno wei tä ja, ya nö wa̦lojoablaloma. Tä tamaö lä bufino wei, ya tä jödödöblalema. Ya tä a̦ bufibou showale ei ya.

⁸ Ö̦jö cudeenö, Bada tä lä cui, showadi ya bufi doblamabou yalo, wale nia lä dobädayou wei tä tabou waiquia lä culadi. Täbä jimaö lä cadidio wei, ö̦jö a. Yai Bada tänö täbä jimabä etä cublou däjä, wale nia dobädayou. Camiyä bädawä mlai, bufi shi jalimolanö a itou nö lä dabolajei bä bluca ma cui, ö̦jö bä nia ca̦i bluca dobäö mö feduo.

Timoteo a yai lä nosiemaö wei tä a̦

⁹ U̦asi. Eja wale fe walou fe da yadioyo.

¹⁰ Demanö wale daa dicoquema yalo ya wa̦. Bita jamö tä bluca lä cule tä shi̦lo bufijaö fa dicoonö, Desalonicateli bä lijamö a culayoma. Clesede a ma cui, Calasia jamö a aa mö fedulayoma. Tito a ma cui, Damasiateli bä lijamö a fua mö fedulayoma.

¹¹ Lucanö wale shi̦lo ca̦i cua showaa lä cule. Marcos wa fa dayäanö, ö̦jö a ca̦i shi̦lo da fuima. Wale bayeliblaö ja, ö̦jö a malä dodijaö wei.

¹² Efeso täbä lijamö Diquico ya ca̦i shimölema.

¹³ Ya didiobä sicö lä cui, Doasi jamö ya sicö daquema. Äyämö wa fuimaö däjä, sicö da boima. Cabonö sicö tabou jäa. Oni sibä ca̦i. Yalo sibä ja tä a̦ oni lä cule, ö̦jö ya sibä yai bufii.

¹⁴ Alejado a lä cuinö, ö̦jönö wale nö shi̦lo yai bleaamaö dicooma, boo shibä ja täbä madofi lä tablaö wei a lä cuinö. A cuaaö lä dicoono wei etä lä cui, Bada tänö etä nowa nia co̦amaö.

¹⁵ Cafä wa ma cui, ö̦jö lija a da moyaweicu. Bäma tä a̦ lä wäyäö wei tä a̦ lä cui ja, showadi a wa̦ läablalou.

¹⁶ Bada bänö wale nabä jaba co̦camoaöje däjä, täbä a̦ lä faö wei bä a̦ ji̦liaö fa balöojenö, ö̦jö däjä camiyä wale a̦ nö ca̦i wäamaö bufimaje. Ya nofi bäyäo däjä, moli ma cui a wa̦ yädäonomi. Wale bluca daa dicoquemaje. Wale daquema ma cujei, Yai Bada lija ya etä nowa tamabou bufiimi.

¹⁷ Ya icuobä jamö, Bada tänö wale ca̦i cuo showaoma. Ö̦jönö wale nö wa̦lojomaboma yalo, Jesucristo ya etä a̦ wäyäö jödödöo fe yadio showaoma, judio bä lä mlai bä blucanö tä a̦ yai ji̦liaö walalaobeje. ¿Ö̦jö tawä? Inaja tä fa cuonö, wale shäö showadaobeje tä ma cuono wei ma cui, Yai Bada tänö wale nowamaö fe yadioma.

¹⁸ Tä wa̦lidiblou lä bädao wei tä ma cui ja, showadi wale nia nowamaö. Cama ebä ca̦i dodijidawä bälöodayobä jamö, dodijidawä wale nia waloamadayou. Ö̦jö a nofi shi̦lo doblao dobou shi wa̦liibeje. Inaja lä tä cuobä.

Jödödö tä a̦

¹⁹ Aquila lija wale a̦fa da wäyä, bä suwäbö Blisila lija ca̦i. Onisifonö cama ebä ca̦i lä cule bä lija ca̦i.

²⁰ Elato a lä cui, Colido jamö a cua jäa showaa. Miledo jamö Dofimo ya shimölema.

²¹ Maa a quei showao mlao däjä, eja a waloo balöo fe da yadio. Eubulo a lä cui, cafä lija ö̦jö a wa̦fa wäamou bufi doblaa lä cule. Budede a ca̦i. Lino a ma cui, Claudia a ma cui, Jesucristo ai ebä bluca ma cui, bä a̦fa wäamou bufi doblao.

²² Bei, U̦asi. Bada tänö showadi wa bufi bayelibobä. Wamacö nofi bluca ojodabobä.