2 Timoteo 3 - Biblia Yanowamö

Täbä nia obi lä cuaaö wei tä a̦

¹ Ö̦jö ma cui, Yai Bada tänö täbä nia lä jimaö wei tä cublou bufio däjä, täbä nia yai dobloimi. Wa tä dabä ya wa̦.

² Ai täbä nofimaö mlajei ja, cama täbä nia nofimamou ayao. Blada bä nofi nia yaibouje. Cama bä a̦fa nia wäamou. “Camiyä yai”, bä bufi nia shi̦lo cama cuu. Täbä a̦fa nia taöje. Bä fö̦ö e ma cui, bä nöö e ma cui, bä a̦ nia fuaimije. Täbä bufi nia ca̦i dobladoimi. Yai Bada tä ma cui tä nö nia waiblaöje.

³ Nofimou tä lä cui tä nia ca̦i daimije. Bä bufi nia asiomi. Täbä a̦fa nia shi̦lo wayoaöje. Bä nia wasöomi. Bä nia waiteliblou. Dodijidawä tä lä cui tä nofi nia wa̦libouje.

⁴ Täbä nia ca̦i nomojolimou. Bä cuaaö bufi lä doblao wei tä ja, bä bufi daeo balöo mlai ja bä nia quedou showadao. Cama bä nofi nia doo. Cama bä cuaaö bufi lä doblao wei tä nofi shi̦lo yaibouje yalo, Yai Bada tä nia nofimaö dobloimije.

⁵ Yai Bada tä nia jo̦wa ma daö wejei ma cui, cama bä nofi lä jushuaö wei tänö, Yai Bada etä lofote nia dablamaimije. Ö̦jö bä lä culenaja bä lä cui, bä ajedemabo dijä, Timoteo.

⁶ ¿Ö̦jö tawä? Bä doblou malä mlai. Ö̦jö bä lä cui, abenaja ai bä li cuaaö. Ai täbä yafibö jamö bä waloo fe fa yadionö, suwä bä bufi dao lä mlai bä lä cui bä jole damaöje. Ö̦jö bä suwä lä cui, wa̦lidiwä tä lä taö wejei tänö, bä bufi nö doblobimi waiquiwä. Bä bufi taamamou si ijejewä.

⁷ Bä a̦ faö lä bädao wei bä ma cui, bä a̦ bluca ji̦liaö showadaoje. Ö̦jö ma cui, showadi bä a̦ bluca ma ji̦liablalaö wejei ma cui, tä a̦ bejedi dablaimi fe yadioje.

⁸ Bejedi tä a̦ cua ma cule, ö̦jö bä jole suwä lä damaö wejei bä lä cui, bä a̦ lämou. Moisesi däjä, ai cäcöbä a̦ läablalou lä balöono weinaja showawä. Jane ai a wa̦fa cuoma, Jable ai a wa̦fa cuo mö feduoma. ¿Ö̦jö tawä? Inaja miji bä lä cui bä cuaaö showawä. Wa̦lidiwä tä ja bä bufi shi̦lo cuo. Jesucristo bufilewä bä a̦fa ma jilou wei ma cui bä jolemou.

⁹ Ö̦jö ma cui, ö̦jö bä lija täbä nia mölaö nö dedeaimi. Bä lä jolemou wei tä lä cui, bluca täbä lija etä nia wawädoblou. Moisesi däjä ö̦jö cäcöbä jolemou lä damolaliyono weinaja showawä.

¹⁰ Cafänö wale daö waiquiwä, ¿ö̦jö tawä? Ya bä lä damaö wei tä ma cui, ya showadi lä cuaaö wei tä ma cui, ya tä nabä lä cadidou wei tä ma cui, wale daö. Ya bufi lä yanöcöo wei tä ma cui, ya bufi lä nofio wei tä ma cui, ya cadidou fe lä yadio wei tä ma cui, ö̦jö wa tä bluca daö.

¹¹ Wale lä yabäcano wejei tä ma cui, wa tä ca̦i daö, ya nö lä bleaano wei. Adioquia jamö ma cui, Iconio jamö ma cui, Lita jamö ma cui, ¡bejedi lä wale nö bleaamamaje! Ö̦jö ma cui, Bada tänö showadi wale nowamaö cuaama.

¹² ¿Ö̦jö tawä? Jesucristo lija bä bluca lä yädäo wei bä ma cui, inaja showawä bä nö nia bluca bleaamaö cuoje, Yai Bada a bufi doblamabou bufi lä doblao wejei bä lä cui.

¹³ Inaja bä taamalajenö, wa̦lidiwä tä lä taö wejei tä ja, bä bufi nia shi̦lo balaö. Jesucristo bufilewä bä a̦fa jole lä jilou wei bä ma cui, ö̦jö bä bufi ca̦i nia balaö mö feduo showao. Ö̦jö bä bluca lä cui, jolemou tä a̦ ja cama bä mölaö fa dicoonö, inaja showawä täbä nia ca̦i mölamaö cuo mö feduoje.

¹⁴ Ö̦jö ma cui, Timoteo. Cafä lija yama tä a̦ lä wäyäno wei, wa tä a̦ bejedi lä bufibole tä a̦ lä cui, ö̦jö tä a̦ nofi shi̦lo yai da cadidibo. Yamalecö malä dale. Camiyä yamacö a̦nö wa bufi malä jaducäblaliyono wei.

¹⁵ Oshe wa cuo showao däjä ma cui, Yai Bada wa tä a̦ oni daö malä showadaono wei. ¿Ö̦jö tawä? Wa bufi jaducäblobä, ö̦jö täbä a̦ oni waiquiwä, Jesucristo wa nofi fa mölabonö wa fucäamobä.

¹⁶ Ö̦jö Yai Bada cä tä a̦ oni lä cui, bäma tä a̦ nofi mölabobä tä a̦. Yanowamö täbä a̦mi. Cama ebä lijamö cama Yai Bada tä Bufino bei tä a̦ bädamaö fa cuaanö, etä a̦ oniblamaö bufima. Bäma täbä damabä, ö̦jö tä a̦ waiquiwä. Bäma täbä wasöbä ma cui, bäma täbä cadidamabä ma cui, ö̦jö lä tä a̦ showawä. Täbä yai bejedimobä, bäma täbä bufi nia lä taamaö wei, ö̦jö tä a̦ showawä.

¹⁷ Yai Bada tä a̦ lä fuaö wejei bä lä cui, ebä bufi yai jaducäblobä. Dodijidawä tä bluca lä cui tä taö dablobeje.