2 Timoteo 2 - Biblia Yanowamö

Bada tä bufi doblamabobä tä a̦

¹ ¿Ö̦jö tawä, U̦asi? Jesucristo lija wa yädäa yalo, showadi wa nofi nia ojodabou. Ö̦jö cudeenö, a bufi shi̦lo da lofotoicu, ö̦jö lä.

² Ya bä bluca da yömölablei däjä, cafänö wale a̦ mada ji̦liablei. Ö̦jö ya tä a̦ da wäyäblei, ai bä lija wa tä a̦ nia wäyäö fe dolemou, bä nia yai lä bejedimou wei bä lä cui bä lija. Tä a̦ wäyäö fe dolemou nomöjöobeje, bä yai lä cui bä lija.

³ Wayu bä fuu däjä bä nö bleaaö ma cui, bä fuu fe lä yadio weinaja, cafä a ca̦i da cuaa, camiyä yamacö lä cuaaö weinaja showawä. Jesucristo a showawänö wa ca̦i malä fuole.

⁴ Sodado bä wayu itou däjä, shomi tä jamö bä nia yabäcamou lä mlainaja, cafä wa ma cui wa nia cuaaö. ¿Ö̦jö tawä? Bä ca̦i lä fuu wei a bada lä cui, ö̦jö a bufi yai doblamabou bufi doblaoje yalo, shomi tä jamö bä yabäcamoimi. Inaja showawä, cafä wa ca̦i lä fuole wa bufi ca̦i doblamabou cuo mö feduobä.

⁵ Inaja showawä, bä lofote wabayobä jamö ma cui, “Ei a shi̦lo yai lofote”, bada bä nia cuu si ijejeomi. Tä nabä yai lä shimamou wei jamö a cadidoimi ja, a wa̦fa nia wäamoimi. Camiyä bämacö ma cui, bämacö cadidoimi ja bämacö nia dobämoimi.

⁶ Ficali ca jamö ma cui, ö̦jamö a yai lä ojodamou wei a lä cui, nii döano bä ja a iyaö balöobä a waiquiwä. A mojimo dijä, ö̦jö lä.

⁷ ¿Ö̦jö tawä, Timoteo? Ya lä cufe tä ja, a bufi yai da daeo. Wa bufi jaducämabou jödödöobä, Bada tä malä cule.

⁸ Jesucristo a nofi yai da jaducäbo. A demi jocädou co̦layoma, ¿ö̦jö tawä? David nodiwä ö̦jö a waiquiwä, ya etä a̦ dodijidawä wäyäö ja, ya lä cuu weinaja showawä.

⁹ Ö̦jö ya tä a̦ dodijidawä lä wäyäö wei tä nowa ja, wale nö bleaamaö lä culajei. Wale bococu o̦cabouje, bä nofi yai lä jushuaö wei bä bococu o̦cabou lä cuaaö wejeinaja showawä. Ö̦jö ma cui, Yai Bada etä a̦ o̦cao daomi.

¹⁰ Ö̦jö cudeenö, tä cublou ma bädale ma cui ja, Yai Bada tänö bä lä yaibole bä bayeliblamobä, ya nö wa̦lojaö fe yadio. Jesucristo lija bä fa fucäamonö, bä yai doblaodayobä.

¹¹ Ei tä a̦ bejedi, tä a̦ nofi mölabobeje cä tä a̦. Ö̦jönö bämalecö ca̦i nomalayoma ja lä, ö̦jönö bämalecö nia ca̦i ba̦limi cuo.

¹² Bämacö nö wa̦lojaö fe yadio ja, ö̦jö lä showawänö bämalecö nia ca̦i bada läo. Bäma a nofi mojodubou dicoo ja, camiyä bämacö ma cui, bämalecö nofi nia mojodubou mö feduo.

¹³ Bämacö ai däjä cadidou ma mlai ma cui, a wa̦ nia cadidou showao fe yadio. A wa̦ shominajaaö majöobä a malä mlai.

Yai Bada a bufi doblamabobeje tä a̦

¹⁴ Ei ya wa̦ lä cui ja, bä bufi da jaducäblamalö. Bä a̦ wasöö da dodijio. Bada tänö wa ca̦i malä cule. ¿Ö̦jö tawä? Tä a̦ lä wäyämamou wei tä a̦ ja, bä a̦ lämou da wasö. Bä a̦ lä lämou wei bä a̦nö, täbä nia bayeliblamoimi. Täbä bufi nia shi̦lo yai wa̦lidiblou.

¹⁵ ¿Ö̦jö tawä, Timoteo? A nö da wa̦lojoicu, ö̦jö lä, Yai Bada lija wa icuo däjä wa wa̦fa dodijidawä tadayobä. Yai Bada lija dodijidawä wa nosiemamou ja, wa etä a̦ bejedi wäyäö shalilio ja, wa bufi quilijobä tä nia cuomi.

¹⁶ Ö̦jö bä a̦ lä lämou wei jamö a icuo dijä. Ö̦jö bä a̦nö, Yai Bada lija täbä ajedou mlai ja, täbä yai blajaö majöofälöö.

¹⁷ Walacasi tä wayunö täbä sicö jodei lä cuaaö weinaja, ö̦jö bä a̦nö täbä bufi wa̦lidiwä taamaö cuaafälööje. Ö̦jö bä a̦ shi̦lo lä lämou wei bä lija, Imeneo, Filedo sho cäcöbä coyocoblou dicoa lä cule.

¹⁸ Bejedi tä a̦ ja cäcöbä jaba ma cuono wei ma cui, cäcöbä a̦ shominajaaö majöa. Abenaja cäcöbä jo̦wa cuu majöa. “Ma, bämacö nia demi jocädou co̦omi. Ai bä demi jocädamaö co̦a lä waiquilayono wei, ö̦jö waiquiwä”, cäcöbä jo̦wa cuu dicoo. Einaja cäcöbä cuu fa dicoonö, ai bä lä cuinö, Jesucristo a nofi mölabou ma waiquiono wejei ma cui, a bufiblaimi majöweje.

¹⁹ Ö̦jö ma cui, Yai Bada tänö cama ebä lofotomabou fe yadio, dodafi bänö yano bä lofotobou lä culajeinaja showawä. Abenaja etä a̦ oni cuu. Bada tänö cama ebä daö waiquiwä. Einaja tä a̦ cuu. Abenaja ca̦i. Bada ebä a̦fa lä jilou wei bänö, wa̦lidiwä tä taö mladobeje, ö̦jö bä li waiquiwä.

²⁰ Einaja tä a̦ cuu. ¿Ö̦jö tawä? Bä nö lä madofibö wei bä lä cuinö, yafi dodijidawä bä tabouje. Ö̦jamö täbä didibobeje etäbä ca̦i madofi bluca cua. Olo bä ja ai täbä. Blada bä ja ai täbä. Fii fibä ja ai täbä. Jaboca shibä ja ai täbä. Bä nii babobeje, ai täbä dodijidawä tabouje. Canosi bä didiabeje, ai täbä ca̦i wa̦lidiwä tabou mö feduoje.

²¹ Cama e yafi a bada lä cui, ö̦jö a bayeliobä etäbä bluca. Cafä wa ma cui, wa̦lidiwä tä ja wa aumamou ja, jai Yai Bada etä madofi wa e nia dodijidawä cuo, cama etä yafi jamö. Wa e nia yaio. Cama e yafi a bada lä cui, ö̦jö a bayeliobä wa wa̦ nia fuaö. Dodijidawä tä ja, showadi wa e noshi nia shi̦lo ö̦jödao.

²² ¿Ö̦jö tawä? Fiya bä bufi waiyou si lä ijejei tä lä cui, tä da wailö. Wa nia lä bejedimou wei tä lä cui, ö̦jö tä nabä yai da cadido, Jesús wa nofi nia lä mölabou wei tä ca̦i. A bufi da nofio. Bufi yanöcöwä a da cuo. Bä bufi lä bejedimou wei bä lä cui, inaja bä cuaalanö Yai Bada tä lija bä nö bayeli malä nacao wei.

²³ Täbä a̦ fabä tä cua ma mlai ma cui, täbä a̦ mojodi li faö bädao bashio ja, a wa̦ yädäo dijä. Täbä bayeliblamobä täbä a̦mi. Täbä a̦fa nia shi̦lo yai tayou. Wa tä malä dale.

²⁴ Bada wa wa̦ nia lä fuaö wei wa lä cui, wa wa̦ läablalobä wami. Dodijidawä wa bä ca̦i bluca cuobä wa. Bufi moyawälanö wa bä bufi yai jaducäblamabä, ö̦jö wa. Wa bufi nofio fe yadiobä wa.

²⁵ Cafä lija bä a̦ lä lämou wei bä lä cui, bufi oquelanö wa bä bufi nia cadidamaö. Cuwi. Yai Bada tänö bä bufi mö yabajadamaö co̦o ja, tä a̦ lä bejedi wei tä a̦ daa ja̦tolalei fa cujei.

²⁶ Fecula bada a wa̦ nia fa fuamonö, bä ma fuwämamolayono wei ma cui, ö̦jö däjä bä fujeblamoa ja̦toa co̦layou fa cui.