2 Timoteo 1 - Biblia Yanowamö

Pablo a wa̦fa lä wäyämou wei tä a̦

¹ Jesucristonö wale lä shimöleno wei, ei camiyä Pablo cä ya, Yai Bada tänö wale ca̦i shimaö fa bufinö. Yai Bada tänö täbä a̦fa ba̦limi lä wäyäö wei ya tä a̦ wäyäö, Jesucristonö täbä lä ba̦limiblamaö wei tä a̦ lä cui.

² Cafä Timoteo bä nofi lä ijilumale wa lä cui lija, ei ya tä a̦ oni shimaö, bä lä nofimale wa lä cui lija. Bei. Fayä Yai Bada lija wa shi̦lo bayeliblamobä, Bada tä Jesucristo lija ca̦i. Wa nofi shi̦lo ojodaboböbä. Showadi wa nofi ca̦i asiboböbä. Wa bufi shi̦lo ca̦i yanöcömaboböbä.

³ Cafä bä nö bayeli nacaö ja, Yai Bada ya wa̦ lä fuale lija ya bufi a̦fa doblalou wäyämou talei. Judio yamacö nö badabönö a wa̦ fuaö lä showaono wejei a lä cui lija. Bei ya bufi jamö ya tä wa̦lidiwä lämabou mlai ja, ö̦jö lijamö ya dodijidawä cua lä cule.

⁴ Wa da ö̦cöblei ya tä nofi jaducäbou yalo, didi däjä ma cui, jalu däjä ma cui, bä bufijaö. Bä wäyäcu dablaö co̦o däjä, ya bufi nia doblalou dodijio.

⁵ Bufi cadidilanö, Jesucristo wa nofi yai lä mölabou wei ya tä nofi ca̦i jaducäbou. Amiyäfä Loida a lä cuinö, ö̦jö a nofi mölabou balöoma, naafä Eunise a ca̦inö. Fei däjä cafä wa ma cuinö, wa nofi ca̦i lä mölabou wei ya tä ca̦i daö.

⁶ Bä nofi tabou waiquia cudeenö, bä bufi jaducäblamaö co̦a lä cule. Cafä lija ya imicö lä maqueono wei däjä, cama wa ebä bayeliblabä Yai Bada tänö wa dobäa cadidilema. A da ojodamo, ö̦jö lä.

⁷ Bämacö quilibä Yai Bada tä Bufi jibäamono malä mlai. Bämalecö nö yai wa̦lojomabobä a. Bämalecö bufi yai nofimabou. Bämacö wasöobä, bämalecö bufi yai taamaö.

⁸ Bada wa tä a̦fa nia lä wäyäö wei tä ja, a quili dijä, ö̦jö lä. Cristo tä a̦ nowa ja, wale fe ma labolajei ma cui, jai wale daimi a cublo dijä. Jesucristo yama tä a̦ dodijidawä wäyäö yalo, yamalecö nö ma bleaamalajei ma cui, a yädäo quili dijä. Yai Bada tä lofotenö a yai da yädäicu.

⁹ Ö̦jönö bämalecö fucälema. Cama bäma ecö dodijidawä yaiobä bämalecö nacalema. Bämacö fa dodijanö mlai. Ma, bämalecö cadidaö bufi fa doblaonö, bämalecö li cadidilema, bämalecö nofi ojodabobä. ¿Ö̦jö tawä? Mashita a tablaö showao mlao däjä, ö̦jö tä nabä cadidou showaoma. Bämacö nia lä bayeliblou wei, Jesucristo a nia shimaö showaoma.

¹⁰ Ya̦cumö tä bejedi fa wawäblalunö, bämalecö nia lä fucäaö wei a Jesucristo wawäblaliyoma. Ö̦jö a lä cuinö bämacö nia nomaö shi lä wa̦lijio wei tä joyalema. Jesucristo dodijidawä tä a̦ lä wäyämou wei tä a̦nö, dodijidawä bämacö nia yai lä cudio wei tä wawäa nomöjömalema. Bämacö nia ba̦limi lä cuo wei tä ca̦i.

¹¹ Jesucristonö wale shimabä wale yailema. Cama etä a̦ lä dodijidai tä a̦ ja ya bä yömölabä, ya bä ca̦i damabä.

¹² Inaja ya cuaaö cudeenö wale fe ma labou wejei ma cui, ya bufi quilijoimi. Ma. Ya bejedi lä bufibole a lä cui ya malä dale. Ya etä a̦ wäyäö cuaabä wale shimölema. Yai Bada tänö täbä jimabä etä cublou showao mlao däjä, cama etä lofotenö tä a̦ nia wäyämamou showao fe yadio. Ö̦jö ya tä daö.

¹³ Cafä lija ya tä a̦ lä wäyäno wei tä a̦ yai bejedi. Jesucristo wa nofi mölabolanö, wa bufi ca̦i nofilanö, tä a̦ nofi yai da cadidibo.

¹⁴ Ö̦jö tä a̦ lä bejedi wei tä a̦ ja, Yai Bada wa tä Bufi lä bälömabolenö wa dobäa waiquilema, wa tä a̦ wäyäbä.

¹⁵ Asia jamö bä Jesucristo bufilewä lä bälöblai bänö, wale waibou majöa lä culajei. Wa tä a̦ ji̦libole cätä. Fijelo a ma cuinö, Emojeni a ma cuinö wale waiböö majöa lä cule.

¹⁶ Onisifo a lä cuinö, showadi wale bufi shi̦lo lofotoamayoluu showao fe yadioma. Eja ya shi lä wa̦limabolajei jamö, duo shicö badanö wale ma o̦cabolajei ma cui, quilii mlai ja ö̦jönö wale fe waloo fe yadioyoluma. Inaja wale taamaö yalo, cama ebä ca̦i lä cui ya bä bluca bayelimaö talei, Yai Bada tänö bä nofi bluca ojodabobä.

¹⁷ ¿Ö̦jö tawä? Loma jamö a fa waloiquiyonö, wale dayäablalaö shi jalimoma. Ya̦cumö eja wale fe laa dalaleyoluma.

¹⁸ Efeso jamö wale showadi lä bayeliblano wei wa tä ca̦i daö waiquiwä. ¿Ö̦jö tawä? Ö̦jö cudeenö, Bada tä lija ö̦jö ya nö bayeli nacaö, Yai Bada tänö täbä jimabä etä cublou däjä, a nofi yai ojodabobä.