2 Samuel 2 - Biblia Yanowamö

Judawä ebä lä cuinö David a lä lämaqueno wejei tä a̦

¹ Saulo a nomaa fa waiquilönö, Davidnö Jeobaa a wa̦lii juoma. —Fei däjä ¿iba Judawä nodiwä ai bä lijamö ya co̦obä tawä? —Awei, wa co̦obä lä —Jeobaa e cuma. Abenaja David a cuu nomöjöoma. —¿Wediteli bä lijamö ya yai fubä? —Eblonoteli bä lijamö —a Jeobaa cuma.

² Ö̦jö cudeenö, ö̦jamö Davidnö bä suwäbö cäcöbä ca̦i fuma. Bä suwäbö ai e lä cui, Jeseleleteliyoma a wa̦fa Ainoama cuoma. Ai e mö feduwä lä cui, Camelateliyoma Abicai a wa̦fa cuo mö feduoma. Ö̦jö a lä cui, Nabala bä suwäbö e jaba cuoma ma cui, a yamiblaliyoma.

³ Davidnö cama ebä ca̦i lä cuono wei ebä ca̦i lulubou showaoma, cama ebä ca̦i bluca mö feduwä showadawä sho. Eblonoteli bä lijamö bä fa waloicunö, ö̦jamö ai bä bälöaliyoma. Bä bälöo lä siboblamono wei jamö, ai bä bälöo mö feduoquema.

⁴ Ö̦jö däjä, David lijamö Judawä ebä fa co̦camoblaayolunö, cama bä lija a bada läobä a tablamalemaje. Bada a nö ö̦jöböamobä, täbä lä jölöcamou wei toubä dabönö a jölöcölemaje. Calaada tä jamö Jabesiteli bä lä bälöle bänö, Saulo dodijidawä a nomawä lä didiqueno wejei tä ja, David a yömölalemaje. A fa yömölalöjenö,

⁵ Jabesiteli bä lija a wa̦no wäyämobä, Davidnö bä shimöa showadalema. Abenaja bä nowa tamaje. —David bada a lä cui yama a wa̦no taö lä cule. Wama a nofi lä badabole a lä cui lija, wamacö bufi cadidilanö wama a co̦a fe yadilema yalo, bada a bufi doblalou. Dodijidawä Saulo wama a didiquema yalo, Jeobaa lija wamacö bayeliblamobä wamacö jo̦wa.

⁶ Inaja wamacö cuaama cudeenö, Jeobaa lija wamacö showadi nofimamobä wamacö jo̦wa. David a ma cuinö, inaja Saulo wama a taamama yalo, dodijidawä wamacö nia ca̦i tamabou.

⁷ ’¿Ö̦jö tawä? —bä cuma—. Fei däjä bä bufi da lofotoicu. Bä nö da wa̦lojoicu. Wama a nofi lä badabono wei a cuami ma cui, David bada a läo nomöjöobä a malä cule. Judawä nodiwä yama ecönö bada yama a malä tablamaleno wei. ¿Ö̦jö tawä? Einaja badanö yamalecö tamaö bufima —bä cuma.

Isaeli ebä lä shelelelaliyono wei tä a̦

⁸ Bei. Nelo bä ijilubö Anelo e̦ afa lä cui, Saulo ebä wayu lä lulubono wei a lä cui, abenaja a cuaama. Saulo a lä shäleno wejei däjä, bä ijilubö Ibosei a nofi mölabou waiquilanö, Maanaimi jamö a lululefälöma.

⁹ Bada a cuo juo nomöjöobä, wawädowä a tablamaö showadalayoma. Calaadateli bä ma cui lija, Jesuliteli bä ma cui lija, Jeseleleteli bä ma cui lija, Eflaini ebä ma cui lija, Bejamino ebä ma cui lija, ö̦jö Isaeli ebä bluca lija a bada cuobä, a tablamalema.

¹⁰ Lasha 40 a famaö waiquio däjä, Saulo bä ijilubö Ibosei bada a jaba läo nomöjöoma. A bada cua waiquilanö, lasha 2 a faa co̦malema. Ö̦jö ma cui, Judawä ebänö Ibosei a wa̦ ji̦lianomije. David lija ö̦jö bei bä shi̦lo li nosiemamoma.

¹¹ ¿Ö̦jö tawä? Judawä ebä lija, Eblono jamö David a bada läo showalanö, lasha 7 a famalema. Ai a lasha famaö co̦obä a bäshäcublamalema.