2 Samuel 12 - Biblia Yanowamö

David a wa̦fa lä tano wei tä a̦

¹ Jeobaa a lä cuinö, David lija Nadana a shimaö co̦oma. A fa waloicunö, abenaja David lija a cuma. —Bei. Wale a̦ da ji̦lilä. Ai bä shabonobö jamö, bolacabö cäcöbä cuoma. Ai a lä cui, a nö madofiböoma. Ai a mö feduwä lä cui, fo̦li a cuoma.

² ¿Ö̦jö tawä? A nö lä madofibö wei a lä cuinö, oweja bä bluca tamabou cuaama. Baca bluca bä ca̦i tamabou cuaaö mö feduoma.

³ Ö̦jö ma cui, a lä fo̦li wei a lä cuinö, moli a shi̦lo yalo wai fa lululänö, a taboma. Oweja a wai suwä cuoma. A badamaö ja, bä ijilubö ebä ca̦i lä cule jamö a ca̦i cuoma. Cama a iyaö däjä, bä nii shee lä jäblou wei bä ja, a iyamama. Cama caö efesi showawä ma cui ja, a amishi co̦amama. Cama a mio ca̦i lä maqueo wei jamö ma cui, a yacaboma. Bä tää ebä nofimaö lä culajeinaja, a wai oweja nofimaö cuoma.

⁴ ’¿Ö̦jö tawä? —a cuma—. Bei. A nö lä madofibö wei a lä cui lija, fama a yafilayoma. A fama iyamabä, cama oweja ebä ma blucaono wei ma cui, bä noshi umlaboma. Baca ebä ca̦i blucao mö ma feduono wei ma cui, inaja showawä. Moli a ma cui a shäö bufionomi. Ö̦jö ma cui, a lä fo̦li wei e wai oweja däa fa lälönö, ö̦jö e shi̦lo shälema. A fama lä bälömabou wei a iyabä a löböblalema —Nadana a cuma.

⁵ Ö̦jo̦ tä a̦ fa ji̦lilänö, David a jushudaliyoma. Nadana lija abenaja a cuma. —Ya wa̦ wawädoo da showadao. Jeobaa a malä cule, a demi cua shi lä wa̦lile a lä cui. Inaja a cuaaö lä dicoono wei, a shämobä bei a waiquiwä.

⁶ Oweja a wai shäa lä läleno wei a nowa nia co̦amaö. Inaja a cuaama yalo, a lä fo̦li wei a nofi ca̦i ojodabou fa mlacunö, ö̦jö oweja a nowa lä cui ja, ai ya tä nowa nia yädäblamaö. Oweja moli a ma läleno wei ma cui, 4 bä nowa nia co̦amaö —David a cuma.

⁷ Ö̦jö däjä, abenaja Nadananö David a nowa taö cadidioma. —Ei ya tä a̦ lä wäyäfe, cafä bei wa waiquiwä. Jeobaa ya wa̦no taö lä cule, Isaeli bäma ecönö bäma a lä bufiblale. Isaeli ebä lija wa bada cuobä, täbä lä jölöcamou wei toubä dabönö wa jölöcamaö bufima. Saulo lija wa bayeliblaö läoma.

⁸ Afä a bada bälöo lä dodijiono wei e yafi jamö, cafä wa bälömabou nomöjöa lä cule. Bä suwäbö ebä ma cui, cafä lija Jeobaanö bä jibäama. Judawä ebä lija wa nosiemobä, bä noshi bluca ca̦i ö̦jödaboma. Isaeli ai ebä bluca mö feduwä lä cui, inaja showawä. Wa dobäa ma waiquileno wei ma cui, “Ai ya tä bufii co̦o”, wa cuu fa cunoja, wa nö dobäa co̦lebö wei.

⁹ ’¿Ö̦jö tawä? —a cuma—. ¿Wedi tabä Jeobaa wa wa̦ li waia dicolema? ¿Wedi tabä tä tamou nofi lä wa̦libou wei wa tä taö dicooma? Afä wa nia fa tabonö, idida a bada Ulia lä cui, ö̦jö bä suwäbö wa e däa lälema. Bä shäyobä jamö cafänö wa shäa lämalema, Amonoteli bä lija.

¹⁰ Inaja wa cuaama yalo, afä bä nia yabäcaö shi wa̦lii juoje. Jeobaa wa nofi wa̦liboma cudeenö, afä wa tabobä, idida Ulia bä suwäbö wa däa lälema yalo, inaja wa nia taamaö.

¹¹ ’Jeobaa ya wa̦no taö co̦a lä cule —a cuma—. Cafä wa nofi wa̦libobeje, Jeobaanö afä bä nia tablamaö. Cafä wa mamo showao däjä, afä a cadidiwä lija suwäböfä bä noshi nia ö̦jödabou. Motoca shi̦i wacacaobä jamö, suwäböfä bä lä cui lija a nia maqueo wawädowä.

¹² ¿Ö̦jö tawä? Cafä wa lä cuaano wei wa tä taö ma ja̦toono wei ma cui, motoca shi̦i wacacaobä jamö, Jeobaanö tä nia taamaö. Isaeli bluca ebä lä cuinö tä nia dablaöje —a cuma.

¹³ —Bejedi lä Jeobaa lija ya doblonomi —David a cuma. Ö̦jö däjä, abenaja Nadananö a nowa tama. —Jeobaanö afä tä nowa mladamaö waiquia lä cule. Wa nia nomamaimi.

¹⁴ Ö̦jö ma cui, wa lä cuaale tänö, Jeobaa wa nö waiblaö dodijioma yalo, ijilufä a nia shi̦lo nomaö —a nowa tama.

¹⁵ Ö̦jö däjä, Nadana a faa fa co̦lufälönö a co̦a co̦layoma. Cama e yafi jamö a cuo co̦o däjä, Jeobaa a ishou juoma. Ulia bä suwäbö e lija, Davidnö a ijilu lä taqueno wei, a jaliliblamalema.

¹⁶ Davidnö Jeobaa lija bä ijilubö e nö bayeli nacadima. A ca̦i iyanomi. A miobä yano jamö a ma fablaano wei ma cui, a bladio fe jaluu bädaoma.

¹⁷ Bä bada ca̦i lä cuono wei bänö, David a ublamaö co̦obeje bä icuoma ma cui, a noshi umlaoma. Ai bä iyaö däjä a ca̦i iyanomi.

¹⁸ Ö̦jö däjä, 7 tä mö jalu fa cublalunö, bä ijilubö e nomalayoma. A wa̦ fuamobä bä lä cuinö a yömölaö quilimaje. Abenaja bä nowa tayoma. —Bä ijilubö a demöo showao däjä bäma a wa̦ ma wayomano wei ma cui, bämalecö a̦ fuano malä mlai. Bä ijilubö bäma e a̦fa wäyäö däjä, bejedi lä a bufi nö nia bleaaö. Cuwi, cama a famimamou ja̦too fa cui —bä nowa tayoma.

¹⁹ Ö̦jö ma cui, a wa̦ fuamobä bä washumou fa dalalönö, David a bufi möblaliyoma. Bä ijilubö e lä nomalayono wei tä daö showadaoma. Abenaja e cuma. —¿Ijiluyä lija tä wa̦lidiblaliyoma tawä? —Awei —bä cuma—. A nomaa dicolayoma.

²⁰ Ö̦jö däjä, David a lä blaono wei jamö a fa jocädalunö, a ublaa co̦layoma. A fa ya̦lömolunö, täbä lä jölöcamou wei toubä dabönö a jölöcömoa co̦layoma. Ö̦jö däjä, cama ai esibä ja, a didio nomöjöoma. Ö̦jö däjä, Jeobaa etä yafi jamö a fa falönö, mashita jamö a möfe fa deiblalunö, a wa̦fa Bada doblao tama. Ö̦jö däjä, cama e yafi jamö a co̦a co̦layoma. A iyabä nii bä nacaö ja, ebä baaquemaje. Dodijidawä a iyama.

²¹ Ö̦jö däjä, a wa̦ fuamobä bä lä cuinö a wa̦limaje. —Wa lä cuaale tä ja, yamacö bufi wedinajamou. Ijilufä a demi cuo showao däjä wa iyaö mlai ja wa nomöa shi̦lo da bodiblei. Fei däjä wa yai ö̦cöbä tä ma cui, wa fa jocädalunö, bei wa li iyaö showablaquei. ¿Wedinaja tawä? —bä cuma.

²² Abenaja David a cuma. —Ijiluyä a demöo showao däjä, ya wabäo fe yadioma. Ya iyaö mlai ja ya ö̦cödima. Abenaja ya bufi mada cublei. “Cuwi. Jeobaanö wale nofi ojodadaö ja̦too fa cui, ijilu a demi cuo fe yadiobä”, ya bufi cuma.

²³ Ö̦jö ma cui, fei däjä a cuami dicowä waiquiwä. Ya iyaö mlaobä fei däjä tä cuami. Ya iyaö lä mladou wei tänö a nia demi cuo co̦daaö malä mlai. Cama lijamö ya cuobä ya nia obi fuu ma cui, cama eja a nia waloo co̦o malä mlai —a cuma.

²⁴ Ö̦jö däjä, bä suwäbö Besabei e bufi nia fa lofotoblamanö, Davidnö dodijidawä a wa̦ wayomama. Cäcöbä yanöcöblou fa co̦lonö, bä suwäbö sho cäcöbö yacao co̦oma. Ö̦jö däjä, a shibönaböa fa co̦lunö, bä ijilubö ai e tablaö co̦layoma. Salomo a wa̦fa jilaböquema. Jeobaanö ö̦jö a yai nofimaö fe balojooma.

²⁵ David lija Jeobaa a wa̦no wäyämou showadaobä, a wa̦no wäyälewä Nadana a lä cui, a shimöa co̦lema. Ö̦jö däjä, Jeobaa a lä cuno wei tä nowa ja, bä ijilubö Jedidia e a̦fa ca̦i jilaa majöquema.