2 Samuel 11 - Biblia Yanowamö

Besabei lija David a bufi lä waiyono wei tä a̦

¹ Motoca a jaba lomou co̦o däjä, bada bänö showadi wayu ebä ca̦i fuuje däjä, David a funomi. Jelusale jamö a cuo feyama. Bä wayu ca̦i fubä, Joaba a bada shimölema. David lija ai bä bada lä yädäono wei bä ma cui, Isaeli ebä bluca ma cui, Joaba lija bä wayu nocao showaoma. Bä lä shäyono wei däjä, Amonoteli bä nö bluca blemalalemaje. Labaateli bä nabä fuu nomöjöoje ja, bä shabonobö fe fa̦yoblalemaje.

^2-4 ¿Ö̦jö tawä? David a cuo lä feyano wei jamö, a weyade jocädaliyoma. A fa jocädalunö, cama yafi e bada feyaca jamö, a fuadalou feyacaojolayoma. Ö̦jamö a lä fuobijeli jamö tä möablalaö fa cuaanö, a yafi lä bebiblaono wei jamö, suwä a ya̦lömou dalalema. ¿Ö̦jö tawä? Suwä bä canalemoma, bä dodijidablou co̦obä bä lä tablamou weinaja, a suwä taamamoma. A suwä liyäjäo fe balojooma. A suwä wa̦liquiliobeje, bä shimölema. Abenaja ai a cuu co̦ojoloma. —Ö̦jö a suwä lä cui, Eliamö bä tää e. Besabei a wa̦fa cua lä cule. Idida a bada Ulia lä cui, ö̦jö bä suwäbö e —a cuma. ¿Ö̦jö tawä? Suwä a co̦abeje, Davidnö bä shimölema. A ca̦i fa waloicujenö, a öböa mö baa showadalema. Cäcöbä fa yacaonö, a suwä co̦a co̦layoma.

⁵ Ö̦jö däjä, a shibönabö fa damolalunö, a wa̦no wäyämobä David lijamö bä shimölema.

⁶ Davidnö a wa̦fa shibönabö fa ji̦lilänö, bä fe̦yalobö e nacamaö bufima, idida Ulia a bada lä cui. ¿Ö̦jö tawä? Joabanö bä wayu lä funo wei jamö, ai bä shimölema, Joaba lija a wa̦no wäyämobä. A wa̦no fa ji̦lilänö, David lija Ulia a shimöa mö yabaa co̦lema.

⁷ David lija Ulia a bada fa icuicunö, cäcöbä a̦ wayoma. Bä wayu lä funo wei bä lä cui, Davidnö bä dodijidawä wa̦lima. Joaba a ca̦i wa̦lima. Bä lä ishono wei bä nö ca̦i wa̦lojaö wa̦lii showaoma.

⁸ Ö̦jö däjä, abenaja Davidnö Ulia a nowa tama. —Bei. Afä yafi jamö a cua da balöicudu. Mamicö da yalömodu —a nowa tama. Ö̦jö däjä, bada tä yafibö jamö Ulia a faa co̦layofälöma. A faa fa co̦lufälönö, a dobäbä Davidnö etä shimöa jelema.

⁹ Ö̦jö ma cui, cama etä yafi jamö Ulia a funomi. Bada tä yafibö jamö bä lä fablaaö wei jamö a mio fe jaluma, David a wa̦ fuamobä ebä showadi miblaaö fe lä jaluno wei jamö.

¹⁰ Cama e yafi jamö Ulia a fuu lä mlaono wei, David lija tä a̦fa wäyäöje däjä, Ulia lija abenaja e cuma. —Wa blajawä malä funo wei. ¿Bei wa modawämi tawä? ¿Wedi tabä afä yafi jamö wa washimi jolou mlai, eja wa cudio fe jaluu dicooma? —e cuma.

¹¹ Ö̦jö däjä, abenaja Ulia a bada cuma, David lija. —Mlaicätä. Judawä ebä ma cui, Isaeli ai ebä bluca ma cui, bä lä ishole jamö yaa jenabä ja bä wejeblalou ja, bä nö beblalou lä cudi. Jeobaa a wa̦no oni didiobä tefi ca ma cui, ö̦jamö tefi ca ca̦i cua. Iba bada Joaba a ma cui, cafä bada wanö ai wa bä lä yädämabole bä ma cui, ulufi jamö ö̦jö bä nö ca̦i bluca bleaaö. Inaja bä nö bluca ma bleaale ma cui, ¿camiyä yami ya shi̦lo dodijaö ayaobä daanö? Mlaicätä. Ei ya wa̦ nö wäo cadidia lä cule. Iba yafi jamö ya dodijidawä iyaö ayaobä, ya malä mlai. Iba suwä sho yafäcö yacao fe jaluu ayaobä yami —a cuma.

¹² Ö̦jö däjä, abenaja David a cuma, Ulia lija. —Moli a fe dödöa da co̦lu. Fena ja bä shimaö cadidio weicätä —a cuma. Ö̦jö cudeenö, Jelusale jamö Ulia a bada yanöcöo showaoma. Ö̦jö tä fena ja ma cui, a cuo feyaö showaoma.

¹³ A iyabä, Davidnö a nacalema. Cäcöbä lä iyano wei däjä, shi wa̦limamodima ubä ja Davidnö a fe fa coamalönö, a shi̦ wa̦limalema. Ö̦jö däjä, a faa ma co̦layofälöno wei ma cui, bada David a wa̦ fuamobä ebä showadi miblaaö fe lä jaluno wei jamö, a maqueo bädaoma, cama e yafi jamö a funomi.

¹⁴ Ö̦jö tä fena ja, Ulia a bada fuu lä co̦le jamö, Joaba lija Davidnö tä a̦ oni shimölema.

¹⁵ Tä a̦ oni lä shimöleno wei jamö, abenaja David bei a cuma. Bä nö yai lä wa̦lojaö wei bä nabä queayou dodijiobä jamö, Ulia a da shimöcö. Ö̦jö däjä, a nofi lä bäyäbou wejei bä da bayäcäblamalö, a shämobä. A nomabä. Einaja tä a̦ oni cuma.

¹⁶ ¿Ö̦jö tawä? Joabanö wayu bä ca̦i lä cuono wei jamö, Labaateli bä fe fa̦yobomaje. Bä nö lä wa̦lojaö wei bä nabä queayobä jamö, Ulia a shimöa taquema.

¹⁷ Ö̦jö däjä, Labaateli bä fa wawäblalunö, Joaba ebä nabä quequemaje. David lija ai bä bada lä yädäono wei bä shämolayoma. Idida a ca̦i Ulia ma cui, ö̦jö a ca̦i shämoa mö fedulayoma.

¹⁸ Ö̦jö däjä, bä lä shäyono wei David lija tä a̦ wäyäjälayobä, Joaba a lä cuinö, ai a shimölema.

¹⁹ A lä shimöleno wei lija, abenaja a nowa tama. —Bämacö bluca lä shäyolufe, bada lija wa tä a̦ bluca nia wäyäö. Ö̦jö däjä,

²⁰ ö̦jö tä a̦ ja a jushudou ja, abenaja a cuu ja̦too weicätä. “¿Wedi tabä shabono jamö wamacö ajedou fe balojoo dicooma? ¿Ala nacö jamö culanö bä lä niyaö wejei wama tä daimi?

²¹ Inaja a cuaaö fa dicoonö, ¿wedi lija Jelobaala bä ijilubö Abimeleco a li shämoa balölayoma, ö̦jö lä? ¿Debesiteliyoma lija mlai daanö? Sibala bä namo lä taö wejei ma badanö, ala nacö jamö culanö a fe shäbalema. ¿Ö̦jö tawä? ¿Wedi tabä ala nacö jamö wamacö ajedou fe balojoo dicooma?”, a cuu ja̦too weicätä. Einaja David a cuu ja, abenaja cafä wa nia cuu mö feduo. “Idida a bada Ulia ma cui, ö̦jö a ca̦i shämolayoma”, wa nia cuu. ¿Ö̦jö tawä? —Joabanö a nowa tama.

²² ¿Ö̦jö tawä? Joabanö a lä shimöleno wei a aa showalayofälöma. David lija a fa co̦blalunö, Joaba a wa̦no bluca taö showadaojoloma.

²³ Abenaja a cuma, David lija. —Labaateli bä fa falalunö, cama bä nö wa̦lojaö fa ayaonö, ulufi jamö yamalecö nabä quequemaje. Ö̦jö ma cui, cama bä shabonobö jamö bä lä fablaaö wei jamö, yama bä yashua taa co̦lema.

²⁴ Ö̦jö däjä, ala nabä jamö bä culanö, shäläcawä bä lä showabou wejei bänö yamalecö niyalalemaje. Bada wa lija bä lä yädäle, ai bä ca̦i shäa dicolemaje. Idida a bada Ulia ma cui, ö̦jö a ca̦i shälemaje —a cuma.

²⁵ Ö̦jö däjä, Joabanö a lä shimöleno wei a lija, abenaja David a cuma. —Ei ya wa̦ lä cui, Joaba lija wale a̦no wäyäbä. Inaja tä ma cublaliyono wei ma cui, a bufi wa̦lidiaö fe balojoobä tämi. Täbä shäyou däjä, showadi ai täbä shämou malä cui. Labaateli bä nö bleaamaö fe yadiobeje, fei däjä bä nö yai wa̦lojabä. Inaja wa nowa fa tanö, Joaba a bufi da lofotoama —David a cuma.

²⁶ Ulia a lä shäleno wejei, bä suwäbö enö tä a̦ fa ji̦lilänö, e ö̦cöö juoma.

²⁷ A nomöa lä bou wejei etä fa waiconö, Davidnö a suwä nacamaö bufima. Cama lija a ca̦i fa fuimajenö, a däa cadidilema. Davidnö ijilu a lä taqueno wei a tablalema. Ö̦jö ma cui, David a lä cuaano wei tä ja, Jeobaa a bufi doblaonomi.