2 Reyes 5 - Biblia Yanowamö

Sicö lä jodeono wei a lä jalomaleno wei tä a̦

¹ Siliateli sodado a wa̦fa bada Naamana cuoma. Wayu ebä ca̦i cuobä, bada a lä cuinö a lämaboma. Jeobaa a lä cuinö, Naamana a nö wa̦lojomabou yalo, bä shäyobä jamö, Siliateli bä nö ca̦i shi̦lo wa̦lojaö ayaoma. Ö̦jö cudeenö bada anö a nofi tabou fe balojooma. A ca̦i nofimaö dodijioma. ¿Ö̦jö tawä? Bä wayu fubä jamö a nö waiteli ma quiliano wei ma cui, täbä sicö lä jodemaö wei tä wayunö a nö bleaaö dicooma.

² Bei. Siliateli bä wayu lä funo wei jamö, Isaeli ebä lija a suwäjälö lä wayuleno wejei a lä cui, Naamana e yafi jamö a cuoma. Naamana bä suwäbö e bayeliblabä a tabomaje.

³ Abenaja a suwäjälö cuma, a lä tabono wei a suwä lija. —Shädayai. Samalia jamö Jeobaa a wa̦no wäyälewä a lä cule jamö, bada a cuo fa cunoja, sicö lä jodele tä nö mladamalebö wei —a cuma.

⁴ Naamana a lä cuinö, suwäjälö a wa̦no ji̦lilema cudeenö, bada a lija tä a̦ wäyäö nomöjöobä a lucälayoma. Bada a lija abenaja a cuma. —Isaeli ebä ulufibö jamö, yama a wai suwäjälö lä däleno wei, abenaja a suwäjälö cublaloma —a fa cunö, tä a̦ bluca wäyäma.

⁵ Abenaja Siliateli a bada cuma. —Ja̦o. Ö̦jamö wa fubä, ö̦jö lä. Isaeli ebä lä cui e bada lija ya wa̦fa wäyämobä, ya tä a̦ nia oniblaö —a cuma. Ö̦jö cudeenö, Naamana a lä cuinö, oni tä ca̦i fua showalayoma. Blada 30.000 bä ca̦i däläfälöma, olo 6.000 bä ca̦i. Bä lä didio wei 10 sibä lä dodijidai sibä ca̦i.

⁶ Isaeli ebä ca̦i bälöo lä dodijiono wei a lija, tä a̦ ca̦i oni co̦blaliyoma, Siliateli badanö tä a̦ lä oniblaleno wei tä a̦ lä cui. Abenaja tä a̦ oni cuma. Isaeli ebä lijamö wa bada lä läle wa lija, ya oni shimaö lä cule. Cafä lija ei tä a̦ ca̦i oni waloo däjä, ya wa̦ fuamobä a Naamana lä cui, wa nia daö. Sicö lä jodele wa tä mladamabä, ya shimaö lä cule.

⁷ Isaeli ebä lija a bada lä läono wei a lä cuinö tä a̦ oni fa doanö, a bufi jalujoma. A nö nia wajäwä fa ö̦jöböamonö, a lä didio wei si cacablalema. Abenaja a cuma. —¿Wedinaja a bufi li fa cunö, camiyä lija sicö lä jodele a li jalomamou bufio dicoa cule? ¿Camiyä Yai Bada ya tawä, yanowamö ya bä demiblamabä, ya bä ca̦i nomamabä? Tä da möje. Wale jushuo lulubou bufi doblao waiquiwä ja lä a wa̦ —a bada cuma.

⁸ Ö̦jö ma cui, Eliseonö tä a̦ ji̦lilema, Yai Bada e lä cuinö. Isaeli ebä lijamö a bada lä läo wei a bufi nö lä bleaano wei tä a̦ ca̦i ji̦lilema. Ö̦jö däjä, bada a lija a wa̦no wäyämobä e shimölema. Abenaja e cuyoluma. —Eliseo ya wa̦no wäyäö lä cule. Abenaja a cuu. Wa wajäblalobä tämi, wa lä didio wei wa si cacablabä. Naamana a lä cui, Eliseo lijamö a da shimölö. Isaeli bäma ecö lijamö Jeobaa a wa̦no wäyälewä a yai lä cule, tä dablabä —e cuma.

⁹ Ö̦jö cudeenö, Eliseo e yano jamö Naamana a fuma. Cabayo ebä ma cui, läläamodima ebä ma cui, ö̦jö ebä ca̦i fuu fa showadaonö, Eliseo lija bä lä fablaaö wei yoca jamö, bä ca̦i yanöcöquema.

¹⁰ Ö̦jö däjä Eliseo a wa̦no wäyäö mö baobä e shimöa mö baquema. Abenaja e nowa taö mö baoma. —Jodana u jamö wa fa dimöbalöfälönö, 7 a ya̦lömou da cublalu. Inaja wa cuaaö ja, wa ya̦jicö nia dodijidablou co̦o. Wa sicö lä jotemale tä wayu nia mlaaö —e cuma.

¹¹ Ö̦jö ma cui, Naamana a fa jushudalunö, a co̦o waiquilanö abenaja a cuma. —Uo. Dodijidawä wale nia waloamaö, ya nofi taboma. “Camiyä lija wawädowä a icua mö fa babonö, Jeobaa a lä bufiblale lija wale nö bayeli nacabä. Ya sicö lä jodele wale fubaö cuaalanö tä wayu mladamaö showadaobä”, ya bufi cuma. ’¿Ö̦jö tawä? —a cuma—.

¹² Eja, Isaeli ebä ulufibö jamö ubä mau ma bluca wei ma cui, ya ubä bufiimi. Damaco tä ulufi jamö, Abana cou, Falafala cou, ö̦jö ucöbä shi̦lo yai dodijidawä. Ya ya̦lömobä, ¿ö̦jö ucöbä nabä yai shimaö mlai, ya dodijidablou co̦obä? —a fa cunö, a nö li wa̦lowä jushuo mö ca̦i yabaa co̦layoma.

¹³ Ö̦jö ma cui, a nosie fuamobä ebä lä cui, bada a lija bä fa ajedeicunö, abenaja bä cuma. —Fabe. Jeobaa a wa̦no wäyälewä a lä cuinö, tä tamou si ijejewä lä mlai tä nabä shimaö fa cunoja, wa tä nö tabö wei, ¿ö̦jö tawä? “A da ya̦lömo, wa dodijidablou co̦obä”, wa nowa taö ja, ¿wedi tä tabä wa wa̦ li fuaö mlaquei? Ö̦jö bei tä tamou si ijejewä yaiwä —bä cuma.

¹⁴ Inaja bä cuu ja, Jodana u jamö a dimöa showabaliyofälöma. Ö̦jö u jamö, 7 a fe ojoblou cublaliyoma, Jeobaa e a̦ faö ja, a lä cuno weinaja showawä. Inaja a fa cublalunö, ijilu oshe bä sicö lä culenaja, sicö cublou showadalayoma. A dodijidablou co̦layoma.

¹⁵ Ö̦jö däjä, Jeobaa e lä cui lija a waloa co̦beyoluma, cama ebä ca̦i showawä ja. Eliseo lija a fa icubonö, abenaja e cuma. —Fei däjä ya bufi möblou lä cule. Ai täbä ulufibö lä cublai jamö mlai, Isaeli wama ecö lijamö tä bufiblamobä tä shi̦lo yai cua ayaa. ¿Ö̦jö tawä? Cafä wa nosie fuamobä ya lä cuinö bä nia dobäö mö feduo. Tä da dälö —e cuma.

¹⁶ Inaja a ma cuno wei ma cui, —Mlaicätä —Eliseo a cuma—. Ya wa̦ wawädoo da showadao. Jeobaa a malä cule, ya nosie lä fuaö wei a lä cui. Ya tä nia däaimi —a cuma. Naamana a wa̦ fe ma blacäjono wei ma cui, tä wailema.

¹⁷ Ö̦jö däjä, abenaja Naamana a cuu nomöjöoma. —Ja̦o. Wa tä nia däaimi waiquiwä ja lä, cafä wa nosie fuamobä ya lä cui lija, mashita a ja wale da dobälö, Jeobaa lija ya bä yalo dodoblamobä ya täcö i̦tamaö co̦jolobä. ¿Ö̦jö tawä? Bulo bolacabö cäcöbä lija bä mashita lä yefidamalenaja showawä. Cafä wa nosie fuamobä ya lä cuinö, täbä lä bufibolajei ai a lija, fei däjä yalo ya bä nia ö̦shö dodobou malä mlai, ö̦jö lija ya bä yalo nia shäö malä mlai. Jeobaa lija shi̦lo.

¹⁸ ’Ö̦jö ma cui, Limono a jole lä bufiblamou wei e yafi jamö, iba bada a fuu däjä, cafä wa nosie fuamobä ya lä cui, wale boco bolanö yafäcö nia fuu —Naamana a cuma—. Ö̦jamö a möfe bolanö a wa̦fa bada doblao tabä ya ca̦i fuu däjä, camiyä ma cui ya möfe nia boo mö feduo. Ö̦jamö ya möfe nia lä boo wei tä ja, Jeobaa a bufi wasömobä, ¿ö̦jö tawä? —a cuma.

¹⁹ —Inaja lä —Eliseo e cuma—. A bufi yanöcöwä ca̦i da co̦jamö —e fa cunö, a co̦layoma.