2 Reyes 24 - Biblia Yanowamö

¹ Joasima a bada läo däjä, Babiloniateli bada a wayu waloquedayoma, Nabucudono a wa̦fa bada lä cuono wei. Joasima a nö wa̦lojaö fa mlacunö, ö̦jö lija a co̦cablou majödalayoma. Ö̦jö lija a nosiemamou showao däjä, lasha 3 a fa famalönö, a bufi shominajaaö majöoma. A nosie fuaö mladaliyoma.

² Ö̦jö däjä, shomi täbä madofibö lämaö lä cuaano wejei bä lija, Jeobaanö Joasima a nabä shimöquema. Cadeoteli bä ma cui, Siliateli bä ma cui, Moabateli bä ma cui, Amonoteli bä ma cui, Judawä ebä mö ulufi watäblabeje, ö̦jö bä bluca wayu shimölema, cama a wa̦ fuamobä bä lija, Jeobaa a wa̦no wäyämou bufio ja, a lä cuno weinaja showawä.

³ ¿Ö̦jö tawä? Judawä tä ulufi lä wa̦liano wejei, ö̦jö Jeobaa a mayo cuo dodijioma. Manasesi a bada doblou lä mlaono wei tä nowa cuoma. A nofi shi̦lo bada jushuadima. Judawä ebä shomi jamö taa showadamalema, ö̦jamö lä bä dablou co̦o mlaobä.

⁴ Nowa mlai ja, Joasimanö bluca bä nö i̦yä ca̦i blemalalema. No mlai ja a ishodii lä buono wei tänö, Jelusale shabono a lä cui, jai a i̦yä jödödöblamalema a shabono tablamalema. Inaja a cuaama cudeenö, Jeobaa a bufi lädonomi.

⁵ ¿Ö̦jö tawä? Inaja Joasima a bada cuaama. A lä cuaano wei ai tä a̦ bluca onibouje. Judawä ebä lija bä bada bälöo lä dodijio wei bä a̦fa wäyämobä sibä oni jamö, tä a̦ bluca coyocoa.

⁶ Ya̦cumö Joasima a bufi mladaliyoma, cama bä nö badabö lä culaliyono weinaja showawä. Ö̦jö däjä, bä ijilubö Joaquini e bada läo juo majöoma.

⁷ Ejidoteli bada a lä cui, ö̦jö a wayu fuu co̦daanomi. Babiloniateli a bada lä cuinö, ai etä ulufi däa läa fa waiquilänö a malä yanöcömabono wei. Ejido u lä cui, Euflade u ca̦i lä cui, ö̦jö ucubä möamo jamö, jödödöwä tä ulufi däa lälema.

Judawä ebä lija Joaquini a bada lä läono wei tä a̦

⁸ Joaquini a lä cui, lasha 18 a faa waiquimaleno wei ja, bada a cublaliyoma. Jelusale jamö Judawä ebä ca̦i bälölanö, belibo 3 bä mladamalema. Bä nöö Neuda e a̦fa cuoma. Jelusaleteli Enadana ö̦jö bä tää e cuoma.

⁹ Joaquini a bada lä cuinö, Jeobaanö tä tamaö nofi lä wa̦libou wei tä taö dicooma, bä fö̦ö enö tä bluca taö lä balöono weinaja showawä.

¹⁰ Ö̦jö däjä, Babiloniateli bada a lä cuinö, Jelusale jamö cama wayu ebä shimölema, a nosie lä fuano wejei bä lä cui. Bä shabonobö fe fa̦yoblalemaje.

¹¹ A shabono fe fa̦yobou showaoje däjä Babiloniateli bada a wayu walobaliyoma, Nabucudono a wa̦fa bada lä cuono wei.

¹² Babiloniateli a nö shi̦lo bada wa̦lojaö fa ayaonö, ö̦jö lija Joaquini a jibämoa showadaquema. Cama a ma cui, bä nöö e ma cui, a nosie fuamobä bä ma cui, cama bada ai bä lä yädämabono wei bä ma cui, cama yafi e yai jamö bä bada lä lämabono wei bä ma cui, Babiloniateli a bada lija ö̦jö bä bluca jibämoa showadaquema. ¿Ö̦jö tawä? Babiloniateli a bada läo showao däjä, lasha 8 a fa famalönö, Joaquini a dälefälömaje.

¹³ Jeobaa etä yafi jamö täbä madofi nowa lä blucaono wei täbä ca̦i fa dolalönö, cama etä ulufi jamö täbä ca̦i bluca co̦layofälöma. Bada tä Joaquini e yafi jamö täbä madofi nowa lä blucaono wei, inaja showawä. Isaeli ebä ca̦i lä bälöono wei, Salomo a bada lä cuinö, ö̦jönö olo bä ja ai täbä bluca madofi tablalema, Jeobaa e yafi jamö täbä cuobä. ¿Ö̦jö tawä? Ö̦jö täbä ma cui, täbä ca̦i fa dolalönö täbä bluca bafedilalema, Jeobaanö tä a̦fa wäyäö lä balöono weinaja showawä.

¹⁴ Ö̦jö däjä, Jelusaleteli bä bluca fa däalalefälöjenö, cama etä ulufi jamö bä ca̦i culayomaje. Bada bä ma cui, bä shäyou däjä bä nö yai lä wa̦lojano wei bä ma cui, wayu bänö ö̦jö bä bluca däalalefälömaje. Täbä madofi yai dodijidablabeje bä bufi lä daono wei bä ma cui, duo shibä ja täbä madofi taö lä dano wejei bä ma cui, moli ma cui a feiblonomi. Bä lä däläfälöno wejei, 10.000 bä bluca lululefälömaje. Bä nö yai fo̦li lä bleaano wei bä shi̦lo feiblamalemaje.

¹⁵ ¿Ö̦jö tawä? Ö̦jö bada a lä cuinö, Babilonia jamö Joaquini a lululefälöma, bä nöö e ca̦i, bä suwäbö ebä ca̦i. Bä bada lä yädämabono wei bä ma cui, bä ca̦i lä cublamono wejei bä mö feduwä ma cui, Jelusale jamö bä culanö Babilonia tä ulufi jamö bä bluca lululefälöma.

¹⁶ Babiloniateli a bälöo lä dodijio wei a lä cuinö bä fa däamalalönö, cama tä ulufi jamö bä bluca ca̦i co̦layofälöma. Bä shäyou däjä bä nö lä wa̦lojano wei, 7.000 bä ca̦i fuma. Täbä madofi yai dodijidablabeje bä bufi lä daono wei bä ma cui, duo shibä ja täbä madofi taö lä dano wejei bä ma cui, ö̦jö 1.000 bä cuo mö feduoma. Ö̦jö bä bluca lofote cuoma. Bä nia lä shäyou wei däjä, ö̦jö bä wayu fubä bä li cuoma.

¹⁷ Ö̦jö däjä, a bada läo majöo juobä, Babiloniateli bada anö Joaquini a lä fö̦mole a lä cui, a bada daquefälöma. Madania a wa̦fa cuoma ma cui, Sedequia a wa̦fa jilaa majöquema.

Sedequia a läo lä nomöjöono wei tä a̦

¹⁸ Ö̦jö Sedequia a lä cui, lasha 21 a faa fa waiquimalönö, a bada cublaliyoma. Jelusale jamö bä ca̦i lä bälöono wei däjä, lasha 11 a faa co̦malema. Bä nöö Amudala e a̦fa cuoma, Libinateli Jelemia bä tää e lä cui.

¹⁹ Jeobaanö tä tamaö nofi lä wa̦libou wei, showadi tä taö dicooma, bä fö̦ö Joasima e lä cuaano weinaja showawä.

²⁰ Jeobaa a jushuoma yalo, Jelusaleteli bä ma cui, Judawä jamö bä lä bälöono wei bä ma cui, ö̦jamö lä bä dablou co̦o mlaobä, ya̦cumö bä malä joyaleno wei. Ö̦jö däjä, Sedequia a lä cuinö, Babiloniateli a nosie bada fuaö mladaliyoma.