2 Reyes 2 - Biblia Yanowamö

Wadoli a badanö Elia a däa mö lä nonobefälöno wei tä a̦

¹ Bei. Wadoli a ja, Jeobaanö Elia a co̦amaö bufima, fedu jamö a cuobä. Wadoli a ja, a nabä shimaö bufio däjä, Jicala jamö culanö Elia, Eliseo sho cäcöbä fuu cuaama.

² Eliseo lija abenaja Elia a cuma. —Äyämö a cua da jeicu, ¿ö̦jö tawä? Bedele jamö Jeobaanö wale shimaö fe malä dolemole —a cuma. —Mlaicätä —Eliseo e cuma—. Eja ya nia cuo juomi. Ya wa̦ wawädoo da showadao. Jeobaanö wale daö waiquiwä, a demi cua shi lä wa̦lile a lä cuinö. Cafänö ma cui wale ca̦i daö. Eja ya nia cuo juomi, cafä lija ya nia ajedeo showao —e cuma. Ö̦jö cudeenö, Bedele jamö cäcöbä fua co̦layofälöma.

³ Bedele jamö Jeobaa a wa̦no wäyälewä bä lä yaiono wei bä lä cuinö, Eliseo a nabä fuu mö baomaje. Abenaja a nowa tamaje. —Jeobaanö fei däjä afä bada a nia lä co̦aö wei, ¿wa tä daö tawä? —a nowa tamaje. —Ya tä daö lä —a cuma—. Wamicai bä da cuicu.

⁴ Ö̦jö däjä, Elianö abenaja Eliseo a nowa taö nomöjöoma. —Eliseo, eja a cua da jeicu, ¿ö̦jö tawä? Jelico jamö Jeobaanö wale malä shimale —a nowa tama ma cui, —Mlaicätä —Eliseo e cuu co̦oma—. Eja ya nia cuo juomi. Ya wa̦ wawädoo da showadao. Jeobaanö wale daö waiquiwä, a demi cua shi lä wa̦lile a lä cuinö. Cafänö ma cui wale ca̦i daö. Eja ya nia cuo juomi, cafä lija ya nia ajedeo showao —e cuma. Ö̦jö cudeenö, Jelico jamö cäcöbä walobaliyoma.

⁵ Jelico jamö Jeobaa a wa̦no wäyälewä bä lä yaiono wei bä lä cui, Eliseo lija bä fa ajedeiquiyonö, abenaja bä cuma. —Jeobaanö fei däjä afä bada a nia lä co̦aö wei, ¿wa tä daö tawä? —a nowa tamaje. —Ya tä daö lä —a cuma—. Wamicai bä da cuicu.

⁶ Ö̦jö däjä, abenaja Elianö a nowa tama. —Eja a cua da jeicu, ¿ö̦jö tawä? Jodana u jamö Jeobaanö wale malä shimale —a nowa ma tano wei ma cui, —Mlaicätä —Eliseo e cuu co̦oma—. Eja ya nia cuo juomi. Ya wa̦ wawädoo da showadao. Jeobaanö wale daö waiquiwä, a demi cua shi lä wa̦lile a lä cuinö. Cafänö ma cui wale ca̦i daö. Eja ya nia cuo juomi, cafä lija ya nia ajedeo showao —e cuma. Ö̦jö cudeenö cäcöbä fua co̦layofälöma.

⁷ Ö̦jamö Jeobaa a wa̦no wäyälewä bä lä yaiono wei, 50 bä ca̦i yaua showalayofälöma. Jodana u casö jamö cäcöbä ublao däjä, bei bä ublajao bayäcäoma.

⁸ Elianö sicö lä lucäbono wei sicö fa jayulänö, sicö fa cofublalönö, cofema sicönö u shäquema. U fa shäcönö, uca fa yacläafälönö, wejedi tä jamö cäcöbä jayuquefälöma.

⁹ Cäcöbö jayubaliyono wei ja, Elianö abenaja Eliseo a nowa tama. —Wale nia co̦aö. Wa yamiblou showao mlao däjä, camiyä lija a nacou da balöo, wa bayeliblamobä —a nowa tama. Abenaja Eliseo e cuma. —Jeobaa lija cafä wa bufi bayeliblamou fe ma balojoo wei ma cui, inaja bädawä mlai, ai showawä camiyä ya bufi yai bayeliblamou dodijiobä, ya tä bufii, ¿ö̦jö tawä? —e cuma.

¹⁰ Abenaja Elia e cuu mö feduoma. —Wa lä nacafe tä jibäamou si ijejewä ma mlai ma cui, ya lä co̦amou wei däjä, wale dablaö ja, wa lä cufenaja tä nia cublou. Wale dablaimi ja, tä nia shi̦lo cubloimi —e cuma.

¹¹ Cäcöbä a̦ wayou ca̦i fufälöö däjä, yedu cowa wacä lä cui jai läläamodima cäcö cuwä, jai cabayo bä cuwä wacä bä bädou showalayoma. Cäcöbä fubä jamö wacä bädou fa möamolonö, cäcöbä shedequeblaliyoma. Ö̦jö däjä, wadoli a badanö Elia a däa mö nonobefälöma.

¹² Eliseonö tä fa dalalönö, a wa̦ nacläaö showaoma. —¡Fabe, Fabemi! Isaeli ebä wayu befi ca̦i läläaö däjä, bä nö quiliaö lä culenaja, ¡inaja showawä cafä wa ca̦i cuoma! ¡Fabe, Fabemi! —a cuma. ¿Ö̦jö tawä? Elia a dablamou co̦daanomi. Ö̦jö däjä, Eliseo a nö nia wajäwä fa ö̦jöböamonö, a lä didio wei si cacablalema.

¹³ Elianö sicö showadi lä lucäbono wei sicö blao juobä ja, sicö däa fa jälänö, Jodana u jamö sicö ca̦i mö yabaa co̦layoma. Bei u casö jamö a ublaquema.

¹⁴ Ö̦jö däjä, Elianö sicö lä lucäbono wei sicö fa dälönö, u shäquema. U shälanö abenaja a cudaliyoma. —¿Wedi jamö cafä Jeobaa wa li, Elia lija wa lä bufiblamou wei? A da wawälö—a cudaliyoma. Ö̦jö däjä, mau u fa shäcönö, u bada obisi fa yacläafälönö, Eliseo a bucadua co̦quefälöma.