2 Reyes 17 - Biblia Yanowamö

Wayu bänö Samaliateli bä lä däalalefälöno wejei tä a̦

¹ Judawä ebä lija Acasa a bada läo showao däjä, lasha 12 a fa famalönö, Isaeli ai ebä mö feduwä lä cui bä lija, Osea a bada läa mö fedualiyoma. Ela bä ijilubö Osea e cuoma. Samalia jamö a bada läo däjä, lasha 9 a famalema.

² Jeobaanö tä tamaö nofi lä wa̦libou wei, Oseanö tä tama. Wa̦lidiwä tä ma tadino wei ma cui, Isaeli ebä lijamö ai bä bada läo lä balöono wei bä lä cuaano weinaja mlai. Ö̦jö bä yai li doblonomi dodijiwä.

³ Osea lija Asiliateli a badanö a nabä quealiyoma, Samanasala a wa̦fa lä culenö. A nabä fa quealunö Osea a nö wa̦loblonomi. Samanasala a nö shi̦lo wa̦lojaö fa ayaonö, ö̦jö a bada lija Osea a co̦cablou majölayoma. Bada bä dobäö lä cuaaö wejeinaja a tamamou fa majöonö, Samanasala a bada lija blada ebä showadi jibäblaama.

⁴ Ö̦jö ma cui, Oseanö a nia lä nomojolimaö wei, Asiliateli bada anö etä dablama. ¿Ö̦jö tawä? A nomojolimaö bufio cudeenö, Ejidoteli a wa̦fa bada So lä cui lija, a wa̦no wäyämobä bä malä shimöleno wei. Asiliateli bada a lija, blada ebä ca̦i shimaö malä mladaliyono wei. ¿Ö̦jö tawä? Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, ebä jaba ma shimadino wei ma cui, ebä shimanomi majöwä. Ö̦jö cudeenö Osea a fa fuwälönö, wa̦lidiwä talewä bä fe lä labou wejei jamö a fe laquema.

⁵ Ö̦jö däjä, Asiliateli bada anö bä ca̦i fa funö, Isaeli ebä ulufibö nabä jödödöwä waloquemaje. Samalia jamö bä nabä ca̦i fa blacälöjenö, bä fe fa̦yobodii showaoje däjä, lasha 3 a famalemaje.

⁶ Isaeli ebä lijamö Osea a bada läo showao däjä, lasha 9 a fa famalönö, Asiliateli a badanö Samaliateli bä shabonobö däa cadidia lälema. Ö̦jö däjä, Isaeli ebä fa däalalöfälöjenö, Asilia jamö bä bluca öböamalalefälömaje. Abola tä ulufi jamö bä ca̦i fa waloicujenö, Ala jamö ai bä bälömabomaje, Cosana u sibo jamö. Ai bä lä cui, medo bä shabonobö lä cublai jamö, bä bälömabou cuaaö mö feduoma.

⁷ ¿Ö̦jö tawä? Jeobaa a wa̦ ji̦liblaö fa mlacujenö, bä li inaja taamama. Yedu jamö, Ejidoteli bada anö Isaeli ebä nö lä bleaamano wei däjä, Jeobaanö bä ma co̦leno wei ma cui, a wa̦ ji̦liblanomi majöweje. A lä bufiblano wejei a lä cui lija, bä doblonomi. Shomi täbä lä bujiblamou wei täbä nö quili taö majöomaje.

⁸ Täbä bälöjöwä lä yaiblamono wei bä owämaö dicoomaje, Isaeli ebä fuimaö däjä Jeobaanö bä yashublaö lä baläläono wei bä lä cui. Isaeli ebä lijamö bä bada lä läono wei bä ma cui, ö̦jö bä bufi lä shominajaano wei bä ca̦i owämaö dicoomaje.

⁹ ¿Ö̦jö tawä? Jeobaa a lä bufiblano wejei a lija, Isaeli ebä dodijaö mlai ja, wa̦lidiwä tä ja bä yabäcäo ja̦tomoma. Shomi täbä lija bä nö bayeli nacaobä, täbä ca̦i taabodayomaje. Ala nabä jamö bä shabono bada lä cublamono wei jamö ma cui, tä möö cuaabeje tä yafi ösöwä i̦tabou lä cuaano wejei jamö ma cui, täbä cublamou jödödöoma.

¹⁰ Bä jefu lä ösöblai jamö ma cui, fii fi boco lä blaucui fibä cotä jamö ma cui, ö̦jamö cama etäbä lija bä nö bayeli nacaobä, maa mabä i̦tamaö cuaamaje. Asela a jole lä bufiblamou wei a nö ca̦i ijidubö cublamobä, tefibä i̦tamamaje.

¹¹ Ö̦jö bä jefu lä ösöblai jamö, täbä wa̦queshi nö li̦yoli lä u̦cucamaö wejei bä ö̦shöblaamamaje, täbä bälöblawä lä yaiblai bä lä cuaano weinaja showawä, Isaeli ebä fuimaö däjä, Jeobaanö bä yashublaö lä baläläono wei bä lä cui. Jeobaanö tä tamaö nofi lä wa̦libou wei tä bluca taö dicomaje yalo, a jushuo lulubomaje.

¹² Bä nö ijidubö lä bufiblaö wejei bä lija, bä nö ca̦i bayeli nacaoma. “Inaja tä taö dicoo dijejä”, Jeobaanö bä nowa ma tano wei ma cui, tä taö fe yadiomaje.

¹³ Ö̦jö ma cui, Jeobaanö Judawä ebä wasöablalaö fe yadio showaoma, Isaeli ai ebä mö feduwä lä cui bä ca̦i. Cama a wa̦no wäyälewä bä bluca ma cui lija, dalewä bä bluca ma cui lija, a wa̦no wäyämou lä bufio wei däjä, abenaja a Jeobaa showadi cuma. —Wa̦lidiwä tä ja wamacö bufi lä cuaablalou wei, bä bufi mö da yabajadalu. Ya tä nabä yai lä shimaö wei tä ja, bä yai da cadido. Wamacö cuaaö nodiablalobä ya tä tamaö lä bufino wei, wamale a̦ nofi da jaducälä. Cafä bämacö nö badabö nowa lä tano wei däjä, ya tä a̦ bluca lä wäyäno wei wama tä a̦ nofi bluca cadidibobä. Ya nosie fuamobä iba ai bä lija ya wa̦no ca̦i wäyämou lä bufino wei wama bä a̦ nofi ca̦i bluca cadidibou mö feduo showaobä —a Jeobaa cuma.

¹⁴ Inaja a ma cuno wei ma cui, a wa̦ ji̦liblaö mlajei, bä fö̦ö ebä owämaö yauaö dicoofälömaje. ¿Ö̦jö tawä? Bä fö̦ö ebä lija, Jeobaa a bufiblamobä e ma cuono wei ma cui, a wa̦ bejedi bufibonomije. Ö̦jö bä fe ou lä cuono weinaja, cama ebä fe ou cuo nomöjöoma.

¹⁵ Bä cuaaö nodiablalobä tä tamaö lä bufino wei, tä taö nofi wa̦libomaje. Bä nö badabö nowa jaba lä tano wei tä ma cui, bä showadi lä wasöno wei tä ma cui, ö̦jö tä nofi bluca ca̦i wa̦libou mö feduo showaomaje. Täbä nö ijidubö lä bufiblaö wejei täbä bejedi lä mlai täbä ja, bä bufi fa shedequeblalunö, bä bejedimou doblonomi. Täbä bälöjöwä lä yaiblamono wei bä lä cui, Jeobaanö bä owämaö ma wasöno wei ma cui, bä owämaö fe yadiomaje.

¹⁶ Cama bä lija a bufiblamobä a Jeobaa lä cui, ö̦jönö tä tamaö lä bufii wei tä a̦ bluca fa joyalöjenö, madofi bä ja bä möfe boo majöoma. ¿Ö̦jö tawä? Duo shibä fa däalalöjenö, cowa wacä ja bä äbäjäa fa balömalalöjenö, bä co̦cablalemaje. Ö̦jö däjä, ö̦jö a madofinö, baca ocalo cäcöbä nö ijidubö tablaö bolacalayomaje. Asela a jole lä bufiblamono wei a lija bä möfe boobä, tefi ca̦i tablaö mö fedua showalayomaje. Fedu jamö bä bluca lä cublai bä lija bä möfe bolanö, bä a̦fa bada doblao tamaje. Baala a ca̦i jole bufiblamou mö lä feduono wei, tä a̦ ca̦i fuamaje.

¹⁷ ¿Ö̦jö tawä? Bä dodobobeje, bä ijilubö ebä ma cui, bä tääbö ebä ma cui, bä ö̦shömamaje. Tä nia lä cublou wei tä nia daö fa showadaojenö, fecula bä lija bä mölama. Fecula bä lija täbä ca̦i wajäblamamaje. Jeobaanö tä tamaö nofi lä wa̦libou wei tä ja, bä noshi ö̦jödaoma. Inaja bä fa cuaanö, Jeobaa a jushuo lulubou fe balojoomaje.

¹⁸ Ö̦jö cudeenö, Isaeli ebä lija Jeobaa a jushuo fe fa balojoonö, ö̦jamö lä bä dablou co̦o mlaobä, bä shomi jamö taa showadaquema. Judawä ebä shi̦lo feiblaliyoma.

¹⁹ Ö̦jö ma cui, Jeobaa lija Judawä ebä dodijaö ayaonomi. Cama bä lija a bufiblamobä a Jeobaa lä cuinö, tä tamaö lä bufii wei tä a̦ nofi cadidibonomije. Isaeli ai ebä bufi lä shominajaano wei bä owämamaje.

²⁰ Ö̦jö däjä, Jeobaanö Isaeli ebä nodiwä waia jödödölema. Bä nö blemalalema. Shomi etäbä lä läaö wejei bä lija, bä noshi ö̦jödaboma. Ya̦cumö ö̦jamö lä bä dablou co̦o mlaobä, bä shomi jamö joyaa showalema.

²¹ ¿Ö̦jö tawä? Inaja lä a cuaama. David ebä nodiwä lija, Isaeli ai ebä jödödöwä ja̦ia lä showadaaleno wei däjä, bä lä casömaleno wei bä lija a bada läobä, Jeloboama a bada tablalemaje, Nabado bä ijilubö e lä cui. Jeobaa lijamö bä yauo mlaobä, ö̦jö Jeloboama a bada lä cuinö, Isaeli ebä bluca yaclämalema. Tä wa̦lidiwä balaa fe balojomalema.

^22-23 Jeloboama a lä cuinö tä wa̦lidiwä bluca lä tano wei, Isaeli ebä bluca ma cuinö tä bluca taö jödödou mö feduo showaomaje. Bä ca̦i fujeblou bädaonomi. Ö̦jamö lä bä dablou co̦o mlaobä, Jeobaanö bä shomi jamö lä taqueno wei däjä, bä shi̦lo fujeblaliyoma. Bä nia shomi jamö lä tano wei, cama a wa̦no wäyälewä bä bluca lija tä a̦fa wäyäö balöoma, a nosie lä fuano wejei bä lä cui lija. Inaja showawä bä ya̦cumö taamama. Ö̦jö cudeenö, cama bä ulufibö cadidiwä jamö bä fa joyamolunö, Asiliateli bä ulufibö jamö bä cublawä showawä.

²⁴ Isaeli ebä ulufibö jamö, Asiliateli bada anö shomi bä bälöjömabou majöoma. Babiloniateli ai bä ma cui, Cudateli ai bä ma cui, Abateli ai bä ma cui, Amadateli ai bä ma cui, Sefabaiteli ai bä ma cui, ö̦jamö ö̦jö bä luluboma. Samalia jamö bä shabono lä cublamono wei bä jamö, Isaeli ebä mlai, ö̦jö bä shi̦lo yai bälöa majömaquema. Ö̦jö däjä, ö̦jö shomi bänö Samalia tä ulufi lofotobou fa showaojenö, ö̦jö bä shabono lä cublamono wei jamö bä bälödio majöoma.