2 Pedro 3 - Biblia Yanowamö

Jesucristo a wa̦fa juu co̦o lä wäyäno wei tä a̦

¹ Iba bämacö lä nofimale wamacö. Cafä wamacö nijamö, ai ya tä a̦ oni shömöa balölema, fei däjä ei ya tä a̦ shömaö co̦a lä cule. Jaba ya tä a̦ oni da shömölii tä a̦ ma cui, ei ya tä a̦ oni shömaö lä cole tä a̦ ma cui, wama tä a̦ daö lä waiquile tä a̦. Ö̦jö tä a̦ showawä ja bämacö bufi jaducublamabä ya tä a̦ li shömaö. Wamacö lä bejedimou wei wamacö bufi yai dayäobä.

² ¿Ö̦jö tawä? Yai Bada a wa̦no wäyälewä bä lä cuinö, tä a̦ wäyäö lä balöono wejei wama tä a̦ nofi mojodubou mlaobä, ya tä a̦ oni shömaö. Bada tä Jesucristonö täbä taamaö lä bufino wei tä a̦ ca̦i. Bämalecö lä jucäaö wei, ö̦jö a Bada waiquiwä. ¿Ö̦jö tawä? Cafä wamacö nija yama a wa̦no wäyäö cuaabä, yamalecö malä shömöleno wei. Ö̦jö wama tä a̦ nofi jaducubobä ya wa̦.

³ Bei. Ei ya wa̦ lä cui, wamale a̦ da ji̦lilä. Yai Bada tänö täbä nia lä jömaö wei tä cublou ajedou däjä, a nö nia lä waiblaö wejei täbä nia wawäblou. Cama bä cuaaö bufi lä doblao wei tä ja bä nia shino cadidou.

⁴ Abinaja bä nia cuu. —A wa̦fa juu co̦o lä wäyämono wei, ¿wedi jamö bei a li, ö̦jö lä? Bada bä jaba lä cuono wei bä nomaa ma waiquilaliyono wei ma cui, ulifi tä jaba cuo lä showadaono weinaja, ¡tä ulifi nofi cua lä showai! Einaja bä nia cuu.

⁵ Einaja bä mojodi cudalou bufi fa doblaonö bä li cuu. Tä a̦ lojode ma cui, tä a̦ nofi mojodubou bufi doblao dicooje. Bäma tä a̦ lojode daö waiquia, ¿ö̦jö tawä? Judu mösö ma cui, bita a ma cui, Yai Bada tä a̦nö täbä bluca bädaliyoma. Judu mösö fa lelemacödunö, mau ubä shedequeblamalema. Bäfätä jamö u lä cuono wei u fa co̦camomalönö, mashita wejediwä a wawäblamalema.

⁶ ¿Ö̦jö tawä? Ö̦jö däjä, Yai Bada tä a̦ lojodenö tä bluca wa̦lia majölema. Ö̦jö lä mau u showawänö, tä ulifi jaba lä cuono wei tä fe fa baoblamalönö, täbä mö bluca watäblamalema.

⁷ Fei däjä ma cui, Yai Bada tä a̦ lojode showawänö bämacö cua showaa lä cule. Judu mösö ma cui, bita a ma cui, Yai Bada tänö bä tabou balöa showaa. Täbä bluca jömabä etä cublou däjä, Yai Bada tä daö lä mlajei bä mö nia watäblaö. Ö̦jö lä däjä, cowa wacönö jödödöwä tä nia bluca ö̦shömaö. Tä a̦ lojode. Ö̦jö ma cui, tä a̦ nö lä waiblaö wejei bä lä cuinö, tä a̦ nofi mojodubou bufi doblaoje.

⁸ Ö̦jö ma cui, bämacö lä nofimale wamacö. Ei ya wa̦ lä cui tä a̦ nofi mojodubou dicoo dijejä. Camiyä yanowamö bämacö lä cuinö bäma tä nö a̦fa dedewä lä taö weinaja, inaja Yai Bada tänö tä nofi taboimi. Moli a fe nia ma didi wei ma cui, lasha 1.000 a nia ma faö wei ma cui, inaja showawä Yai Bada tänö tä nofi tabou fe usucuwä.

⁹ Bada tänö tä a̦fa lä wäqueno wei tä taö jaöomi ja, ai bä bufi ma uomodou wei ma cui, a bufi li asio cudeenö tä li taimi showawä. Wamacö nofi yai asibou. Täbä mö ca̦i watäblamaö bufiomi. Täbä bufi mö shino yai yabajadamaö bufi doblao cudeenö, tä li taimi showawä.

¹⁰ Ö̦jö ma cui, Bada tä juu co̦obä tä mö nofi jalu tabou waiquia. Bämacö bufi cuu mlao däjä tä nia juu co̦o, täbä lä tomömou wei täbä ja̦tomou lä cuaaö weinaja showawä. Ö̦jö däjä tä a̦ ca̦i nacli ji̦liamolanö, judu mösö nia mladou. Ö̦jamö bä bluca lä shadiladi bä ma cui, cowa wacönö bä mö nia jödödöwä watäblaö. Bita a ma cui, bluca täbä lä cublai täbä ma cui, täbä nia ca̦i jödödöwä ö̦shömaö. Täbä nia bluca mladou, a lä cuno weinaja showawä.

¹¹ Inaja täbä nia bluca mladamaö cuaaö cudeenö, bämacö yai da bejedimo. ¿Ö̦jö tawä? Täbä nia malä mladou wei. Yai Bada bäma ecö lä cui, dodijidawä bäma ecö shino yai cuobä. Bämalecö taamaö lä bufii wei tä ja, bämacö yai da cadido.

¹² Yai Bada tänö täbä nia bluca obi lä waicaö wei tä lä cui, bämacö shi jalimolanö bäma tä nö dabobä. Bäma tä nö dabou bädao mlai, bäma tä yai wawäblamaö bufibä. Ö̦jö lä tä wawäblou däjä, judu mösö fa ö̦shölönö mösö nia mladou. Cowa wacönö bä bluca lä shadiladi bä fa ö̦shölönö, bä nia yo̦licou.

¹³ Ö̦jö ma cui, judu dude bäma mösö nö dabou, mashita a ca̦i, Yai Bada tä a̦ nö wäo ja a lä cuno weinaja showawä. Ö̦jamö lä täbä nia shino yai cadidou.

¹⁴ Ö̦jö cudeenö, bämacö lä nofimale wamacö. Ö̦jö wama tä nö dabou waiquia ja lä, bä bufi nö shino da wa̦lojoicu. Wamacö bufi nö shino fa wa̦lojoicunö, Yai Bada nija dodijidawä wamaco dablamobä. Wa̦lidiwä tä cua mlai ja, wamacö a̦fa ca̦i tamobä tä cua mlai ja, wamacö bufi ca̦i yanöcöwä cudiobä.

¹⁵ Bada tä bufi asia lä showale däjä, “Bämacö bluca jucäamobä a bufi asio malä cui”, a nofi shino yai da taboje. ¿Ö̦jö tawä? A jolemobä ami. Pablo a ma cui, bäma a yai lä nofimaö wei a lä cuinö, inaja showawä wamacö nowa ca̦i taö balöoma. Tanomi mlai. Pablo a ma cui, tä a̦ oni lä shömöleno wei däjä, inaja showawä a cama cuma. Yai Bada tänö, ö̦jö a bufi jaducublamaö yalo a wa̦ li cuoma.

¹⁶ Showadi ö̦jö tä a̦fa shino wäyäö mö feduo talei, tä a̦ oni lä shömaö wei sibä jamö. ¿Ö̦jö tawä? Pablo ai etä a̦ oni doamamou si ijejewä ma cui, ai etä a̦ jamö täbä bufi jaducublou si ijejeomi. Etä a̦ doamamou walalao showadao fa mlacunö, bä bufi lä mojodi wei bä lä cuinö tä a̦ shomiblamaö si ijejeweje. Showadi etä a̦ shomiamaöje, bä bufi shalilou lä mlai bä lä cuinö. ¿Ö̦jö tawä? Pablo etä a̦ oni bädawä mlai, Yai Bada ai etä a̦ oni mö feduwä ma cui, inaja showadi etä a̦ ca̦i taamaö mö feduoje, ö̦jö bänö. Etä a̦ shomiablalamaö majöo dicooje ja, bä mö nia watäblamou.

¹⁷ ¿Ö̦jö tawä, bämacö lä nofimale wamacö? Ö̦jö wama tä daö waiquiwä yalo bä da moyaweicu. Tä a̦ lä shomiamaö wejei bä a̦ ja wamacö mölaö fa dicoonö, ö̦jö wa̦lidiwä talewä bä nija wamacö luluamou dicoo mlaobä. Wamacö bufi shaliloimi majöa dicoicu.

¹⁸ Ö̦jö ma cui, Jesucristo nija wamacö bayeliblamou lä waiquio wei wama ecö lä cui, bä yai bayeliblamou fe da balojolu. Wama a daö lä waiquile wamacönö, a yai daö da shalilioje. Bada tänö bämalecö yai bayelibou. Ö̦jö cudeenö, fei däjä ma cui, obi ma cui, ö̦jö bäma a nofi shino yai da doabla. Inaja lä tä cuobä.