2 Pedro 1 - Biblia Yanowamö

Pedro a wa̦fa lä wäyämou wei tä a̦

¹ Jesucristonö wale lä shömöleno wei, ei camiyä Simón Pedro cä ya, ya nosie juabä ya e lä cui. Jesucristo yama a nofi mölabou lä culenaja, wama a nofi mölabou cuo mö lä fedule wamacö nija, ei ya tä a̦ oni shömaö lä cule. Bäma a bufiblabä, ö̦jö Jesucristo a waiquiwä, bämalecö lä jucäaö wei a lä cui. Bämalecö lä bayelibou wei tä nowa yai bluca dodijiwä. ¿Ö̦jö tawä? Jesucristo a cadejewä cudeenö, cafä wamacö ma cui, camiyä yamacö ma cui, bämalecö bufi bluca taamaö fe usucuwä, bäma a nofi mölabobä. ¿Ö̦jö tawä? Cama wama ecö mö feduwä yalo, cafä wamacö nija ei ya tä a̦ oni shömaö.

² Bei. Yai Bada wama a daö yalo, Bada tä Jesús wama a ca̦i daö yalo, bä shino bayeliblamou da dodijio. Ö̦jö lä cäcöbönö wamacö nofi shino ojodaboböbä. Wamacö bufi shino ca̦i yanöcömaboböbä.

Bämalecö bufi lä bayeliblamou wei tä a̦

³ Yai Bada bäma a daö yalo, cama etä lojodenö bämalecö bufi showadi bayelibou. Eja dodijidawä bämalecö tamabou fe yadio, bäma a bufi yai doblamabobä. Cama a lä doblalenaja bämacö dodijidawä cuo mö feduobä, bämalecö nacalema.

⁴ Yai Bada a doblao cudeenö, a dodijidawä yalo, ¡bejedi lä bämalecö bayelibou! A wa̦ nö wäo ja bämalecö a̦fa bayeliblamou wäyäö lä balöono weinaja showawä. Bämalecö nia jo̦wa lä bayelibono wei tä a̦ nowa yai bluca fe balojowä. Tä a̦ liyäjäwä dodijiwä. Yanowamö täbä bufi showadi lä waiyou wei tänö bämacö wa̦lidiblou mlaobä, bämalecö nia bayelibou showaoma, cama a lä culenaja bämacö ca̦i cuo mö feduobä.

⁵ ¿Ö̦jö tawä? Wamacö nia jo̦wa lä bayelibono wei tä a̦fa wäa waiquiquema cudeenö, bä bufi nö da wa̦lojoicu. Jesucristo wama a nofi yai mölabolanö, bä yai da dodija. Wamacö dodijaö waiquilanö, bufi dao bä da cuo.

⁶ Bufi dao wamacö culanö, bä bufi ca̦i da wasöo. Wamacö bufi wasöolanö, bufi yanöcöwä bä ca̦i da cuo. Bufi yanöcöwä wamacö culanö, Yai Bada nija bufi shaliliwä bä ca̦i da cuicu.

⁷ Yai Bada nija bufi shaliliwä wamacö culanö, cama bä mashi nofimayou lä culenaja bä da taamayo. Inaja wamacö cuaaö waiquiwä ja, bei bä bufi yai da nofio.

⁸ Einaja wamacö yai cuaabä. ¿Ö̦jö tawä? Bada tä Jesucristo wama a yai daö ja, inaja wamacö bufi nia cuaaö lojodoo. Ö̦jö däjä wamacö doblou lä mlai tä ma läle ma cui wamacö nia doblou fe yadio. Wamacö ca̦i nia yai dodijaö.

⁹ Inaja bä cuaaö lä mlai bä lä cui, jai täbä möö blajabloimije bä cuwä. Jai bä jubäbö bä cuwä. Bä jaba lä cuaano wei tä ja, Yai Bada tänö bä aublaö ma waiquilayono wei ma cui, ö̦jö tä nofi mojodubou co̦o majöo dicooje. Ö̦jö ma cui cafä wamacö lä cui, inaja bä cuaa dijä. Dodijidawä tä shino yai da balamalöje.

¹⁰ ¿Ö̦jö tawä, iba wamacö? Ö̦jö cudeenö wamacö yai dodijabä, bä bufi nö shino da wa̦lojoicu, Yai Bada tänö wamacö lä nacaleno wei wama tä dablamabä. Wamacö lä yaileno wei tä ca̦i. Cama wama ecö cuobä wamacö malä yaileno wei. Inaja wamacö cuaaö ja, wamacö dodijaö cuquei. Obi ma cui wamacö bufi nia shomiblou majöomi.

¹¹ Ö̦jö däjä bufi doblalanö Yai Bada tänö wamacö nia waloamadayou. Bufi lämou mlai ja dodijidawä wamacö nia waloamadayou, Jesucristo a dodijidawä bälöa shi lä wa̦liladi jamö. Bämalecö yai lä jucäaö wei, ö̦jö Bada tä Jesucristo waiquiwä.

¹² Ö̦jö cudeenö bejedi wama tä a̦ lä ji̦lileno wei, wama tä a̦ lojodobou ma waiquile ma cui, showadi ya tä a̦ nia wäaö mö yabao co̦o. Wama tä a̦ daö ma waiquio wei ma cui, showadi bämacö bufi nia jaducublamaö co̦o.

¹³ ¿Ö̦jö tawä? Ya demöo showao däjä, cafä wamacö nija ö̦jö showadi ya tä a̦ nia wäyädii, wamacö bufi dayäobä. “Inaja yai”, ya bufi cuu a lä cule.

¹⁴ Eja ya nia cudio malä mlai. Wale nia lä shäö wejei tä ajedewä malä waiquii, Bada tä Jesucristonö wale yömölaö ja wale nowa lä tano weinaja showawä.

¹⁵ Ö̦jö cudeenö, ya nomalayono wei ja wama tä a̦ nofi showadi jaducubou juo showaobä, ya nö wa̦lojaö showaa lä cule.

Jesucristo a doblao lä dalaleno wejei tä a̦

¹⁶ Cafä bämacö yömölaö däjä yamacö bejedimoma. Inaja wamalecö nofi tabobä ya wa̦. Yanowamö täbä mölamabeje täbä jole lä cuu weinaja yama bä a̦ owäblalanomi. Ma. “Bäma bä joleblamabä, abinaja bämacö yai cubä”, yamacö nowa ca̦i tayonomi. Bada tä Jesucristo lä cui, bejedi lä yama etä doblao dalalema. A waloo däjä, a nö yai wa̦lojayoluma, cafä wamacö nija yamacö da cubleinaja showawä.

¹⁷ Yai Bada tänö wawädowä a nö malä ö̦jöbömaleno wei. A wa̦fa doblao ca̦i wäyäma, bäma a nofi lä Fö̦ömaö wei a lä cuinö. A shino Bada doblaa lä ayaladi a lä cui, abinaja a cuma. Ijiluyä ya nofimaö lä dodijio wei, ei a. Cama nija ya bufi yai shino doblalou dodijiwä. Einaja a cuma.

¹⁸ Fedu jamö a culanö a wa̦ bada fa bädonö, yama a wa̦ ji̦lilema. Cama Yai Bada etä balöcö jamö yamalecö ca̦i malä cuodayono wei.

¹⁹ ¿Ö̦jö tawä? Tä a̦ yai bufiblamobä cä tä a̦. Yai Bada a wa̦no wäyälewä bä a̦ faö balöoma. Ö̦jö cudeenö, bei cä yamacö mamocunö yama tä dablaö däjä, yama bä a̦ bejedi yai bufibou dodijioma. Ö̦jö wama bä a̦ yai shino bejedi bufiblabä, ö̦jö lä, tä mö dödöo däjä, cowa wacöbä bufiblamou lä culenaja showawä. Inaja wama bä a̦ bufibou cuo showao däjä, Jesucristo a nia juu co̦imaö, tä mö jaluimaö däjä, shidicali a faö lä fenablao weinaja showawä. Ö̦jö däjä wamacö bufi nia yai wacacamabou. ¿Ö̦jö tawä?

²⁰ Ei ya wa̦ lä cui wamale a̦ da ji̦lilä. Yai Bada a wa̦no wäyälewä bä lä cuinö, a wa̦no lä wäyäno wejei tä a̦ bluca ca̦i oniblaö showadalayomaje, Yai Bada a wa̦no oni jamö tä a̦ oni lä cule. Cama bä bufi cuu lä buono wei tä a̦mi.

²¹ Ma, Yai Bada a wa̦no lä wäyämono wei tä a̦ lä cui, yanowamö täbä bufi cuu lä bädao wei tä a̦ cuonomi. Yai Bada bei tä Bufinö cama bä nijamö tä a̦ wäyäö fa shalilionö, yanowamö täbä nija tä a̦no wäyäö shalilio nomöjöomaje.