2 Juan 1 - Biblia Yanowamö

Colo tä a̦ lä wäyäno wei tä a̦

¹ Mijamö Jesucristo wama ecö lä yaile wamacö nija ya tä a̦ oni shömaö, wamacö bluca lä yododaö wei wamacö nija. Eja Jesucristo ya ebä ca̦i lä yododaö wei ya. Bejedi lä bämacö nofimaö dodijiwä. Bejedi tä a̦ lä daö wejei bä bluca ma cuinö wamacö ca̦i nofimaöje.

² Camiyä bämacö nija, bejedi tä a̦ yanöcöwä cudia yalo, bämacö nofimayou. Ö̦jö bäma tä a̦ tabou shi wa̦lii waiquia.

³ Bei. Fayä Yai Bada nija bämacö shino da bayeliblamo, bä Ijilubö Jesucristo nija ca̦i. Showadi bämalecö nofi nia ojodaboböö. Bämalecö nofi nia ca̦i asiboböö. Bämacö bufi ca̦i yanöcöo cuobä. Bejedi bäma tä a̦ nofi cadidibolanö, bämacö ca̦i nofimayolanö, bämacö nia yai bayeliblamou.

Bä lä moyawäblamaö wei tä a̦

⁴ Bämacö lä Fö̦ömou wei a lä cuinö bämalecö taamaö lä bufii wei tä ja, afä ai bä jo̦wa cadidou yalo, ya bufi doblalou fe balojoo. Bä jo̦wa bejedimou.

⁵ Wamale a̦ da ji̦lilä, ¿ö̦jö tawä? Bämacö yai da nofimayo, Jesús bäma a jaba bufiblaö däjä, bämalecö taamaö lä bufino weinaja showawä. Tä a̦ dudemi.

⁶ Yai Bada tänö tä tamaö lä bufii wei bäma tä taö ja, bäma a yai nofimaö. Showadi wamacö nofimayobä, Jesús wama a jaba bufiblaö däjä wamacö nowa lä tano wejeinaja showawä.

⁷ Yanowamö täbä nijamö, täbä lä mölamaö wejei bä bluca jublou cuaaö waiquia lä cudi. Jesucristo a ma yanowamöblaleyoluno wei ma cui bä a̦ lämou. Tä a̦fa jole taö dicooje. Inaja bä lä cuu wei bänö täbä yai mölamaöje. Jesucristo a nofi yai lä wa̦libou wei a owämaöje, täbä lä mölamaö wei a lä cui. Inaja showawä a cama ca̦i cuu.

⁸ Bä da moyaweicu, ö̦jö lä. Yai Bada lija wamacö lä ojodamou wei, ö̦jö lä bänö tä wa̦liaö nomöjöo mlaobeje. Wamacö nowa nia ojode lä co̦amamou wei tä bolacamiblou nomöjöo mlaobä.

⁹ Jesucristonö tä a̦ lä wäyäno wei tä a̦ jamö, shomi tä a̦ coyocobou lä dicoo wejei bänö Yai Bada tä taboimije. Jesucristonö tä a̦ yai lä wäyäno wei tä a̦ jamö bä lä cadidou wei bä lä cuinö, bä Fö̦ö e ma cui, bä Ijilubö e ma cui, ö̦jö lä cäcöbö tabou bolacaaje.

¹⁰ Cafä Jesucristo wama ecö nija tä a̦ nia fa wäyänö, ai a waloo bädao ja, Jesucristonö tä a̦ yai lä wäyäno wei tä a̦ ja a cadidoimi ja, a co̦blama dijejä. A nofi ca̦i ayä ayäa dijejä.

¹¹ Shomi tä a̦ lä wäyäö wei tä wa̦lidiwä waiquiwä. Wama a nofi doaö mö lä bao wei tänö, jai ö̦jö lä wa̦lidiwä etä jamö wamacö yädäa wamacö cuaaö dicoo.

Jödödö tä a̦

¹² Cafä wamacö nija ya tä a̦ oni shömabä ya tä a̦ bluca tabou ma cule, inaja lä balöwä. Ya tä a̦ oni shömaö mlai, bämacö fe walobä ya nö shino daa lä cule. Bämacö möyou däjä bämacö a̦ yai wayobä, bämacö bufi yai doblamayobä.

¹³ Eja Jesucristo ebä lä yaile bä lä cui, cafä wamacö nija bä a̦fa wäyämamou bufi doblaa lä cule, eja bä yododaö mö lä feduo wei bä lä cui.