1 Samuel 9 - Biblia Yanowamö

Saulonö bulo ebä dayäö lä cuaafälöno wei tä a̦

¹ Bei. Bejamino nodiwä ai e a̦fa Sisi cuoma. A nö bada madofiböoma. Cama bä jaba bada lä cuono wei einaja bä a̦fa cuoma. Bä fö̦ö Abiele e a̦fa cuoma. Abiele bä fö̦ö Selolo e a̦fa cuo mö feduoma. Selolo bä fö̦ö Becolada e a̦fa cuo mö feduo showaoma. Becolada bä fö̦ö Afia e a̦fa cuo mö feduo showaoma. Inaja Sisi bada bä a̦fa cuo balöoma.

² Ö̦jö Sisi a lä cui, bä ijilubö Saulo e cuoma. Liyäjäwä a fiya cuoma. Isaeli ai ebä fiya ma liyäjäono wei ma cui, ö̦jö a fiya yai dodijidao fe balojooma. A ca̦i yaläjäoma. Ai bä ma yaläjäono wei ma cui, Saulo bei facocu jamö ebä fe bluca wädöoma.

³ Bei. Saulo bä fö̦ö Sisi e a̦fa lä cui, cama bulo ai ebä mojolulayoma. Ö̦jö cudeenö, abenaja Sisi a cuma, bä ijilubö Saulo lija. —Bämacö a̦ fuamobä moli wa fa nacalänö, cäcöbä da fufälö. Bulo wafä bä dayäaö cuaafälöbä —a cuma.

⁴ Cäcöbä aa fa showalöfälönö, Eflaini ebä ulufibö lä jefubö wei jamö cäcöbä ma jayuquefälöno wei ma cui, Salisa jamö cäcöbä jayua ma nomöjöqueno wei ma cui, bä yalo dablabönomi. Ö̦jö däjä, Saalimi tä ulufi jamö cäcöbä jayua ma majöqueno wei ma cui, ö̦jamö ma cui bä yalo ca̦i cuonomi. Bejamino ebä ulufibö jamö cäcöbä jayua ma majöqueno wei ma cui, bä ca̦i dablaböö showaonomi.

⁵ Ö̦jö däjä, Sufu tä ulufi jamö cäcöbä fa waloicunö, abenaja Saulo a cuma, a wa̦ fuamobä e lija. —Bei. Bäfäcö cu̦jamö da co̦o. Bäfäcö nö dedeaö waiquia lä cule. Fayänö yalo ebä nofi jalujubou mlai ja, camiyä bäfälecö nofi yai jalujubou nodiblaa jäa dicoa lä cule —a cuma.

⁶ Ö̦jö ma cui, abenaja Saulo lija ö̦jö a cuma. —Ma, eja Yai Bada a wa̦no wäyälewä a bälöa, ¿ö̦jö tawä? “Bada a dodijiwä”, a nofi tabouje. Tä a̦ lä wäyäö wei showadi tä a̦ bejedi wawäblou. Ö̦jö lija bäfäcö da fu. Faafänö tä nabä lä shimöqueno wei tä ja, bäfälecö yömölaa bälei fa cui —a cuma.

⁷ Ö̦jö däjä, abenaja Saulo a cuma. —Ö̦jö ma cui, ö̦jamö bäfäcö fuu ja, ¿wedi jamö tä ja bada bäfä a li yai dobäbä? Nii bäfä ji̦bä besi lä bono wei ji̦bä waicoma. Yai Bada a wa̦no wäyälewä a lija ¿wedi bäfä etä nia jibäaö? —a cuma.

⁸ Saulo a wa̦ fuamobä a lä cui, abenaja e cuma. —Bei. Blada moli ya tabou. Yai Bada a wa̦no wäyälewä lija ya nia jibäaö, bäfäcö fubä jamö, bäfälecö cadidamafälöbä —a cuma.

⁹ ¿Ö̦jö tawä? Jaba däjä Isaeli ebä lä cuinö, Yai Bada tä wa̦limaö mö fuuje ja, abenaja bä nowa shi̦lo tayoma. “Cu̦jamö. Dalewä bäma a da wa̦lidu”, bä shi̦lo cuma. “Dalewä” bä jaba ma cuno wei ma cui, ö̦jö däjä “Yai Bada a wa̦no wäyälewä”, bä cuu majöoma.

¹⁰ Ö̦jö däjä, a wa̦ fuamobä lija abenaja Saulo a cuma. —Bejedi lä —a cuma—. Bei, jabo. Ö̦jamö bäfäcö da fu. Inaja a fa cunö, Yai Bada a wa̦no wäyälewä a lä bälöle jamö, cäcöbä fuu showaoma.

¹¹ Jefu jamö a shabono blaoma. Ö̦jamö cäcöbä yamofälöö däjä, mau ubä coabeje bä suwä moco lä funo wei bä mö bamabölema. Abenaja cäcöbä cuma. —¿Eja dalewä a cua showaa culawä?

¹² Bä a̦ fuo ja, abenaja bä suwä cuma. —Awei, wafäcö fuu mö lä cuaale jamö a cua ajedea. Fei däjä shabono jamö a waloquei lä cufe. Cäcöbä da lobaafälö. Fei däjä tä lä ösöladi jamö Samuelnö bä nia ca̦i fuu, yalo bä dodobodayobeje.

¹³ Shabono jamö wafäcö yafii däjä, ö̦ja wafä a nia dablaö—bä suwä cuma—. Bä ca̦i iyabä, tä lä ösöle jamö a fuu showaa mlai ja, wafä a möö balöobä. ’¿Ö̦jö tawä? —bä cuu co̦oma—. Yalo a dodobobeje jamö, Jeobaa lija Samuelnö bä nö nia bayeli nacaö cudeenö, cama a waloo showaa mlai ja, bä nia iyaö showadao malä mlai. Samuel a waloo däjä bä lä nacano wejei bä nia shi̦lo iyaö. ¡Bei, bei! Cäcöbä dolecou cuaaö da showadaofälö, wafä a möö showadaobä —bä cuma.

¹⁴ Ö̦jö cudeenö, shabono jamö cäcöbä yamoo co̦ofälöma. Cäcöbä yafilanö Samuel a mö bamabölema, tä lä ösöladi jamö a fuu däjä.

Samuelnö cäcöbä nö dabou lä ja̦toono wei tä a̦

¹⁵ ¿Ö̦jö tawä? Saulo a fuu showao mlao däjä, Jeobaanö Samuel a yömölaö balöoma, ö̦jö tä fena ja a nö daobä. Abenaja a cuma.

¹⁶ —Fena ja, einaja tä cuo däjä, cafä lija Bejamino ai ya e nia shimaö, iba Isaeli ebä lijamö ya bada nia lä tamabou wei. Bada a läobä, täbä lä jölöcaö wejei toubä dabönö wa fa jölöcölönö, wa nia yaiamaö. Filideo bänö iba bä nö ma bleaamaö wejei ma cui, ö̦jönö bä yai bayeliblaö läobä, a nia cuo. Iba bä nö lä bleaamalajei ya tä malä möle. Bä nofi ojode tablamobä bä a̦ lä nacläale, ya bä a̦ ji̦liaö —a Jeobaa cuma.

¹⁷ Samuelnö Saulo a dablaö däjä, Jeobaanö a yömölaö showadaoma. —Weyaja ya wa̦fa da wäyäblei, quiji a fuu lä cuimi, iba bä nosiemabä a nia bada lä cuo wei —a cuma.

¹⁸ Ö̦jö däjä, yoca lä jolale jamö Samuel a mini faö däjä, Saulo a icua mö baquema. Abenaja e cuma. —Bei. ¿Wedi jamö dalewä e yafi? —a cuma.

¹⁹ —Ei lä ya. Ya tä lä dale ya waiquiwä —Samuel a cuma—. Tä lä ösöi jamö a cuaaö da balöofälö. Fei däjä, camiyä lija wa nö nia malä liyo wei. Fena ja, wa bufi lä wedinajamodii wei tä ja, bä nia yömölaö cadido fenao.

²⁰ Afä bulo bä lä cui, ai tä weyaja bä lä mojolulayono wei, ö̦jö bä ja a bufi fo̦lia dijä. Bä damoa co̦laliyoma. Cafä lija abenaja ya ca̦i cuu. Isaeli ebä lija wamacö bufiblamobä wamacö. Cafä ma cui, faafänö bä ca̦i lä cule bä ma cui, wamacö bufiblabeje wamacö waiquiwä —Samuel a cuma.

²¹ Abenaja Saulo a cuma. —¿Wedi tabä inaja wale nowa li taö? Bejamino nodiwä yama ecö bolacami dodijiwä. Isaeli nodiwä ai ebä shi̦lo bluca ayawä. Fayä yama ecö lä cui, yamalecö bufiblabeje yamacö malä mlai —a cuma.

²² Tä lä ösöi jamö Samuelnö cäcöbä ca̦i lä waloquedayou wei, bä iyablaabä yafi jamö Saulo a lululema, a wa̦ fuamobä a ca̦i. Bä iyabä bä lä nacano wejei, jai 30 bä loo waiquioma. Ö̦jö däjä, bada bä yai lä loo wei jamö cäcöbä loa showadamaquema.

²³ Nii bä lä bamaö wei a lija Samuel a wa̦ fama. —Cafä lija ya tä yalo ayaamaö da bufiblei, fei däjä a yai da boima —a cuma.

²⁴ Inaja a cuma yalo, nii bä lä bamaö wei a lä cuinö, yalo comi wacu ca̦i fa fuimanö, Saulo lija a baquema. Ö̦jö däjä, Samuelnö a yömölaö showaoma. —¿Ö̦jö tawä? —a cuma—. Ya lä ayabono wei, cafä lija a baa waiquiquei lä cufe. A da iya. Wa iyabä, afä ya malä nowamano wei, ya bä bluca lä nacano wei bä sho wamacö iyabä —a cuma. Ö̦jö cudeenö Samuel lija, ö̦jö däjä Saulo a nö liyoma.

²⁵ Tä lä ösöi jamö bä dimöa fa co̦balufälönö, shabono jamö bä co̦blou fa co̦lonö, yafi feyaca jamö Saulo a mio fe jalubä, etä blaquema. Saulo a majalishi maquea showadaquema.

²⁶ Tä mö jaba jalublou däjä, Saulo a lä miodayono wei jamö, Samuelnö a nacaö fenaoma. —A da jocäblalu, wa nia lä fuu wei jamö, bä shimaö showadaobä —a cuma. Ö̦jö cudeenö Saulo a fa jocädalunö, Samuel lija a itoa co̦layofälöma. Bei yo jamö a co̦jamöö co̦obä, Samuel sho cäcöbä sibolayoma.

²⁷ Shabono sibo jamö cäcöbä mini lä faö wei jamö, abenaja Saulo a nowa tama. —Wa wa̦ fuamobä wa fa balömalönö, eja a da yanöcöblaicu, bä yömölabä. Cafä lija Yai Bada ya a̦no taö cadidiobä —a Samuel cuma.