1 Samuel 8 - Biblia Yanowamö

Bada a lämabou lä bufiono wejei tä a̦

¹ Samuel a wa̦lobadao däjä, bä ijilubö ecöbä bada cuo nodiobä, cäcöbä tablamalema. Isaeli ebä doblou lä mlai bä jimaböbä, cäcöbä lämaboma.

² Jaba e lä cui, Joeli e a̦fa cuoma. Ö̦jö e nodi jamö e lä cui, Abiasi e a̦fa cuo mö feduoma. Beeseba jamö cäcöbä bada läoma, Isaeli ebä doblou lä mlai ebä jimaböbä.

³ Ö̦jö ma cui, Samuel a dodijaö lä cuaano weinaja, cäcöbä cuaanomi. Blada bä ja cäcöbä dobämou buobä, ai bä a̦fa jole wäyäböö cuaama. ¿Ö̦jö tawä? Bä bejedimolanö tä bluca cadejeblaböbä cäcöbä ma cuono wei ma cui, tä wa̦lidiblamaböö dicooma.

⁴ Ö̦jö däjä, Isaeli bada bä bluca fa yododoblalunö, Lamaateli bä lä bälöle jamö, Samuel lija bä bluca waloquema.

⁵ Abenaja a nowa tamaje. —Bei. Cafä wa wa̦lobada waiquiwä. ¿Ö̦jö tawä? Cafä wa lä cuaano weinaja, ijilufä cäcöbä cuaaimi. Ö̦jö cudeenö, camiyä yamacö bada a yai cuobä a da tablamalö, yamalecö nosiemabä. Bä bälöblawä lä yaiblai bä showadi lä cuaaö weinaja, yamacö cuaaö mö feduo showaobä —a nowa tamaje.

⁶ Ö̦jö ma cui, bada a tablamaö bufiije ja, Samuel a bufi wa̦lididaliyoma. Jeobaa a wa̦lima.

⁷ A fa wa̦linö, abenaja Jeobaanö a nowa tama. —Isaeli ebä lä cuinö, wa nowa bluca lä taö wejei, bä a̦ da fulä. Cafä wa waii malä mlajei. Camiyä wale li yai waibouje, camiyä Bada ya lä cui lija bä nosiemamou bufiomi waiquiwä ja.

⁸ Wale showadi inaja taamaöje. Ejido jamö ya bä lä co̦leno wei däjä ma cui, fei däjä showawä ma cui, wale a̦ ji̦liaö mladou si ijejeweje. Shomi täbä lä bufiblaö wejei täbä a̦ juaö bufi shi̦lo doblaoje. Cafä inaja showawä wa ca̦i taamaö mö feduoje.

⁹ ’¿Ö̦jö tawä? —a cuma—. Bei. Bä a̦ da fulä. Ö̦jö ma cui, wa bä nowa nia ca̦i taö fe balojoo. Cama bä lijamö a nia lä nosiemou wei a nia bada lä cuaaö wei tä ja, wa bä nia yömölaö —Jeobaa a cuma.

¹⁰ Ö̦jö cudeenö, bada a wa̦fa lä bono wejei bä lä cui bä lija, Samuelnö Jeobaa a wa̦no bluca wäyäö showaoma.

¹¹ Abenaja bä nowa taö ja a cuma. —Cafä wamacö lija a nia lä nosiemou wei, abenaja a nia bada cuaaö. A wa̦ fuamobä, ijilufä bä nia däaö. Bä ishobä jamö, cama läläamodima ebä fuwäbobeje, ai bä nia shimaö. Cama cabayo ebä jamö bä befi ca̦i läläabä, ai bä ca̦i. Cama a befi ca̦i läläabä jamö a wa̦no nia wäyäö lä balöablalou wejei, ai bä ca̦i.

¹² Cama wayu 1.000 ebä lijamö bä läobä, ai bä nia tablamaö. Wayu 50 ebä lijamö ai bä nia lämabou mö feduo, bä ca̦i fubeje. Cama ficali etäca jamö bä ojodamobä, ai bä nia shimaö. Cama nii ebä tablabeje, ai. Bä wayu fubä jamö täbä lä showabou wejei täbä tablabeje, ai cäbä. Cama läläamodima ebä tablabeje, ai cäbä. ’¿Ö̦jö tawä? —a cuma—.

¹³ Tääfä bä ma cui bä a̦fa nia ca̦i bou. Toubä nö lä cle̦deli wei toubä tablabeje, ai bä nia shimaö, nii bä nia lä löbömaö wejei ai, nii ji̦bä tabeje ai.

¹⁴ Wamacö ficalibö yai lä dodijidai täcabä ma cui, uba wama too tobä lä döbou wei wamacö ulufibö yai lä dodijidai tä ma cui, afä oliba fibä lä dodijidai fibä ma cui, bä nia däaö, a lä bayeliblaö wejei bä dobäbä.

¹⁵ Nii ji̦bä tabeje, wama mobä lä tabou wei mobä ma cui, cama emobä nia mashi doaö. Fe usucuwä, 10 mobä talö fa shedequeabodunö, ai moli mobä nia talö dädaö. Nashi wama toubä coabä, wama too tobä lä döbou wei täcabä ficali ma cui, inaja showawä a nia cuaaö, cama ebä dobäbä. Cama ebä lä lämabou wei bä lija, ö̦jö bä nia jibäö. A lä bayeliblaö wejei bä lija ca̦i.

¹⁶ ’Cafä wamacö a̦ fuamobä, wama bä suwä lä tabou wei bä ma cui, wama bä wa̦lo lä tabou wei bä ma cui, bä yai lä dodijaö wei bä fa dälönö, cama a yai bayeliblamobä bä nia tabou —a cuma—. Afä baca bä yai lä dodijidai bä ma cui, afä bulo bä lä dodijidai bä ma cui, inaja showawä.

¹⁷ Afä oweja bä ma cui, fe usucuwä 10 bä fa shedequeblalönö, ai moli bä fa dälönö, cama ebä nia tabou. Cafä wamacö ma cui, cama a wa̦ fuamobä wamacö nia ca̦i tabou.

¹⁸ ’Ö̦jö däjä, wamacö nö yai lä bleaaö wei däjä, Jeobaa lija wamacö nofi ojode nia fa tablamonö, wamacö ö̦cöö ja wamacö a̦ nia nacläaö —a cuma—. Bada a ja wamacö bufi lä yaimono wei tä nowa ja, wamacö nofi ojode nia ma tablamou wei ma cui, ö̦jö däjä Jeobaanö wamacö a̦ nia fuaimi —Samuel a cuma.

¹⁹ Ö̦jö ma cui, Samuel a wa̦ wailemaje. Abenaja bä cuma. —Ma. Bä a̦ nia ji̦liaimi —bä cuma—. Bada a lija yamacö nosiemamobä, yama a bada bufii waiquiwä.

²⁰ Bä bälöblawä lä yaiblai bä lä cuaaö weinaja, yamacö cuaaö mö feduobä. Ö̦jö lija yamacö yai fa nosiemamonö, yamacö ishobä jamö, ö̦jönö yamalecö lulubobä —bä cuma.

²¹ Samuelnö bä a̦ bluca fa ji̦lilänö, Jeobaa lija bä wa̦no taquema.

²² Abenaja Jeobaa a cuma, Samuel lija. —Bä a̦ da ji̦lilä. Cama e bada da tablalö, ö̦jö lija bä nosiemamobä —a cuma. Ö̦jö däjä, Isaeli ebä lija abenaja Samuel a cuu nomöjöoma. —Ja̦o. Bämacö a̦ ca̦i ji̦lilei a lä cufe. Cafä wamacö shabonobö jamö, fei däjä bä da co̦olalu.