1 Samuel 4 - Biblia Yanowamö

¹ Isaeli ebä bluca lija Samuel a wa̦ ji̦limou blaucomobodayoma. Bei. Filideo bä nabä fubeje, Ebenese jamö Isaeli ebä bluca co̦camolayoma. Afeque jamö filideo bä toujou mö feduo showadaoma.

Filideo bänö Jeobaa e tefi ca lä däleno wejei tä a̦

² Filideo bänö bä nabä fa quealujenö, bä yai shäyou balafälöö däjä, ö̦jö bä nö shi̦lo wa̦lojaö ayaoma. Isaeli ebä nö shi̦lo yai bleaamamaje. Bä lä ishono wei jamö, jai 4.000 bä shäa talemaje.

³ Bä lä bälöblaono wei jamö, Isaeli ebä waloa fa co̦icunö, bada bä a̦ wayoma. —¿Wedi tä nowa ja, filideo bä lija Jeobaanö bämalecö nö bleaamaö ayao dicooma? —bä nowa fa tayonö, abenaja bä cuma. —Wedi tä nowa ja mlai. Bei. Jeobaa a wa̦no oni lä didile, bäma tefi ca da bälaamayo. Silo jamö bäma tefi ca fa co̦länö, Jeobaanö bämalecö ca̦i cuobä. Ö̦jönö bämalecö bayeliblaö fa läonö, bä nö lä nabämou wei bä lija bämacö nö wa̦lojaö fe yadiobä—bä nowa tayoma.

⁴ Ö̦jö cudeenö, Silo jamö ai bä fa shimölöjenö, tefi ca co̦malemaje, Jeobaa a shi̦lo lofote lä ayai a wa̦no oni lä didile tefi ca lä cui. Ö̦jö tefi ca tä feyaca lä cui jamö, yai waiteli täcöbä nö ijidubö basuoma, täcöbä majecö lä cule. Ö̦jö täcöbä fedu jamö Jeobaa a culanö, a läo ajedeoma. ¿Ö̦jö tawä? Eli bä ijilubö Ofini, Finesi ecöbänö tefi ca ca̦i fuböma.

⁵ Isaeli ebä lä bälöblaono wei jamö, tefi ca ca̦i lä waloqueno wejei däjä, bä a̦ shi bluca dolayoma. I̦cali bä a̦ shi dou ja, ulufi a bada dölöcoma.

⁶ Filideo bänö bä a̦ fa ji̦liläjälujenö, abenaja bä cuma. —Ebleo bä lä bälöblale jamö, ¿wedi tä nowa ja bä a̦ shi li dodii? —bä cuma. Ö̦jö däjä, Jeobaa e tefi ca ca̦i lä waloqueyoluno wejei tä a̦ fa ji̦liläjenö,

⁷ filideo bä quilia fe balojolaliyoma. Abenaja bä nowa tayoma. —¡Shädayai! Bä wayu lä bälöblale jamö, tä lä bufiblamou wei tä jo̦wa ca̦i waloquei lä cufajei. Fei däjä, ¡bämacö nö nia yai bleaaö fe balojoo! Inaja tä jaba cuono malä mlai.

⁸ Fei däjä, ¡bämacö nö nia yai bleaaö dodijio! Fei täbä lä bufiblalajei täbä nö jo̦wa yai wa̦lojaö talei. Bämalecö bayeliblaö läobä, tä cuami waiquiwä. Ejidoteli bä nö lä bleaamano wejei, ö̦jö täbä li showawä. Tä ulufi lä bloque wei jamö, wayu täbä blucanö bä nö lä bleaamano wejei.

⁹ ’Inaja buo —bä cuu nomöjöoma—. Bämacö bufi shi̦lo da lofotoblo, filideo bämacö. Bämacö nö wa̦lojaö fe da yadio, bämacö nosie fuamobä, ebleo bäma bä tabou da cuobleinaja, bämalecö taamaö nomöjöo dicoo mlaobeje. Bei, bei, bei. Bä quili dijä. Bämacö shi̦lo yai ishobä —bä nowa tayoma.

¹⁰ Ö̦jö cudeenö, filideo bänö bä nabä quea co̦a fa showadaicujenö, Isaeli ebä nö bleaamaö co̦o ayaomaje. Cama bä yanobö jamö bä yashua taa co̦aquemaje. Bluca bä shäalalemaje. Bei mamicö jamö bä wayu lä funo wei bä lä cui, 30.000 bä nomamalemaje.

¹¹ Yai Bada tä a̦no oni lä didile tefi ca ma cui, tefi ca ca̦i däa jämalemaje. ¿Ö̦jö tawä? Eli bä ijilubö Ofini, Finesi ecöbä ca̦i shälemaje.

¹² Bä lä ishono wei jamö culanö, Bejamino nodiwä ai e fa doculunö, Silo jamö a waloa showaquema. ¿Ö̦jö tawä? A bufi nö bleaama. A nö nia wajäwä fa ö̦jöböamonö, a lä didio wei si cacablalema. Lebesi si ja a didilanö a waloquema. Fe ca̦i libuböoma.

¹³ Shabono ja a waloo däjä, Eli a nö dao showaoma. Bei yo casö jamö a diclädalodii showaoma. Yai Bada a wa̦no oni lä didile tefi ca nofi jalujubou yalo, a bufi nö bleaalanö a nö daoma. ¿Ö̦jö tawä? Bejamino ai e fa yafiblalönö, tä a̦ fa wäbajalonö, bä a̦ shi bluca dolayoma.

¹⁴ Elinö bä a̦ ji̦liaö ja, bä wa̦lima. —Fei bä a̦ shi lä dobiyei, ¿wedinaja bä jo̦wa li cuaaö yaia cubiyei? —a cuma. Ö̦jö däjä, Bejamino e lä cuinö, Eli lobe a yömölaleyoluma.

¹⁵ ¿Ö̦jö tawä? Lasha 98 a faa fa waiquimalönö, Eli a wa̦lobadaoma. A jubäböoma.

¹⁶ Eli lija abenaja a cuma. —Yamacö lä ishono wei jamö, yale fa yashublalöjenö, ya wajäwä ca̦i waloquei lä cufe —a cuma. Abenaja Eli a cuma. —U̦asi, ¿wedinaja bei wamacö cuaaö cufe?

¹⁷ Tä a̦ wäyäyolubä a lä waloqueno wei a wa̦ fuo showaoma. Abenaja a cuma. —Filideo bänö Isaeli yama ecö bluca yashulemaje. Bluca yamalecö shäalalemaje. Ijilufä cäcöbä ma cui, Ofini, Finesi cäcöbä cuami waiquiwä. Yai Bada a wa̦no oni lä didile tefi ca ca̦i dälemaje —a cuma.

¹⁸ Yai Bada a wa̦no oni lä didile tefi ca a̦fa jayumaö däjä, bä fablaabä yoca lä cule jamö, a lä dicläono wei jamö, Eli a wäcädou showalayoma. A wa̦lobada waiquioma cudeenö, a ca̦i fa fudäonö, a lä quelayono wei jamö, olafi fa dicujublalunö, a nomaa showadaaliyoma. ¿Ö̦jö tawä? Isaeli ebä dobloimi jimaö cadidio showao däjä, lasha 40 a fa famalönö a nomalayoma.

¹⁹ Eli bä tatä e shibönaböoma, Finesinö a lä bono wei. ¿Ö̦jö tawä? Maca bada a cuoma. Yai Bada a wa̦no oni lä didile tefi ca lä däleno wejei tä a̦ fa ji̦lilänö, bä shö̦ö, bä fe̦yalobö ecöbä a̦fa ca̦i nomaö fa ji̦lilänö, ö̦jö däjä a nini bädou showadalayoma. A fa ninimolunö, bä ijilubö e tablalema.

²⁰ A nomabä a lä ujudulayono wei däjä, a lä bayeliblano wejei bä suwänö, abenaja a nowa tamaje. —A quili dijä. Afä ijilufä wa tablaö waiquilayou lä cufe —a nowa ma tano wejei ma cui, a wa̦ fuonomi. Jai bä a̦ ji̦liblaimi a cuaama.

²¹ A nomaö showao mlao däjä, a bufi wa̦lidilanö bä ijilubö Icabodo e a̦fa jilaquema. Yai Bada a wa̦no oni lä didile tefi ca dälemaje tä nowa ja, a bufi wa̦lidioma. Bä shö̦ö, bä fe̦yalobö cäcöbä nowa ja ca̦i. Abenaja a cuma. —Isaeli bäma ecö lija, showadi Yai Bada tä shi̦i da dablamodiblei tä shi̦i cuami majöwä —a cuma.

²² Ö̦jö däjä, abenaja a cuma. —Yai Bada a wa̦no oni lä didile tefi ca däa dicoblamalemaje cudeenö, Isaeli bäma ecö lija showadi Yai Bada tä shi̦i da dablamodiblei tä shi̦i cuami majöwä —a cuma.