1 Samuel 31 - Biblia Yanowamö

Saulo sho bä ijilubö ebä sho bä shäa lä jäalaleno wejei tä a̦

¹ Bei. Filideo bänö Isaeli ebä nabä fa quealujenö, Jiboa cäcö däjämö bä nö blemalalemaje. Filideo bä nö wa̦lojaö ayaoma cudeenö, ai bä bluca docuoquema.

² Bä docufälöbä jamö, filideo bänö bä nosi däa fa showalöfälöjenö, Saulo a ma cui, bä ijilubö ebä ma cui, ö̦jö bä nosi bluca fulilemaje. Saulo bä ijilubö ebä shäa showadaalalemaje, Jonadana, Abinadaba, Maquisua ebä a̦fa lä cuono wei.

³ ¿Ö̦jö tawä? Saulo a docufälöbä jamö, bä nabä queayoa dodijilayoma. Ya̦cumö shäläcawä bä ca̦i lä funo wejei bänö Saulo a nosi fa fulilöjenö, a niyablalemaje. A famia fe balojomalemaje.

⁴ A bufi jalili nö fa bleaanö, a ishobä etäbä madofi lä dämabono wei a lija a shämamou bufioma. —Sibalafä wa fa ucälönö, cafänö wale fe yai fablamabä, fei Jeobaa ebä lä mlai bä lä fuimi bä lija ya nö bleaamamou mlaobä. Cama bä sibala bänö wale nö waiblalajenö, wale fe fablamaö mlaobeje —a cuma. Inaja a ma cuno wei ma cui, a ishobä etäbä madofi lä dämabono wei a lä cui, a quilii fe fa balojoonö, a shänomi. A quilima cudeenö, Saulonö cama e sibala däa fa showadalänö, a fa i̦tadalänö, jai a quei a fa cublalunö, cama a diwäjamolayoma.

⁵ ¿Ö̦jö tawä? Saulo madofi etäbä lä däbono wei anö, a nomaa fa dalalönö, cama ma cui, inaja a shämoa cuo mö feduo showalayoma. Cama sibala e fa ucälönö, jai a wäcäö a fa cudalunö, a shämoa showalayoma.

⁶ ¿Ö̦jö tawä? Inaja a fa tablamolunö, Saulo a nomalayoma. Bä ijilubö 3 ebä ma cui, etäbä madofi lä dämabono wei e ma cui, cama wayu bluca ebä ma cui, ö̦jö tä mö jalu showawä ja, bä bluca nomaa mö fedua showadaolaliyoma.

⁷ Ö̦jö tä mashi jefu jamö Isaeli ebä lä bälöono wei bänö tä a̦ fa ji̦liläjenö, bä docuo showaolaliyoma. Jodana ai u mashi jamö bä lä bälöono wei, inaja showawä. Isaeli ebä a̦fa wayu docuu fa ji̦liläjenö, Saulo a wa̦fa nomawä ca̦i fa ji̦liläjenö, bä ijilubö ebä a̦fa nomawä ca̦i ji̦lia fa showaalöjenö, cama bä shabonobö daa fa showadacöfälöjenö bä docuo showaolaliyoma. Ö̦jamö filideo bä waloa fa jeicunö, cama bä bälöa majöquema.

⁸ Bei. Ö̦jö tä fena ja, filideo bänö nomawä etäbä madofi doaö mö walooje däjä, Jiboa cäcö däjämö Saulo a nomawä blaa dalalemaje. Bä ijilubö 3 ebä ca̦i.

⁹ Ö̦jö däjä showawä, Saulo fe bäblalemaje. A nia lä nowamöo wei etäbä ca̦i däalalemaje. Ö̦jö däjä, filideo bä lä bälöblai jamö, tä a̦ wäyäbeje ebä shimölemaje. ¿Ö̦jö tawä? Täbä lä bufiblaö wejei bä nofi co̦camoabeje yafi jamö ma cui, filideo bä lä cublamono wei jamö ma cui, bä bufi nia fa doblalamajenö tä a̦ wäyämaö blaucomaje.

¹⁰ Tä lä bufiblano wejei Adadei ai tä a̦fa jilabomaje. Ö̦jö tä nofi lä co̦camoaö wejei yafi jamö, Saulo etäbä madofi lucäaquemaje. Besanateli bä alabö nacö jamö, bei a yai sudimaquemaje.

¹¹ Ö̦jö ma cui, Calaada jamö Jabesiteli bä lä bälölenö, Saulo a lä taamano wejei tä a̦ ji̦liaöje däjä,

¹² bä lä waiteli wei bä didi aa showalayoma. Besanateli bä alabö nacö jamö, Saulo a nomawä lä shadimaqueno wejei, a co̦a ja̦toa fe jalulefälömaje. Bä ijilubö ebä nomawä shadimaö mö lä feduqueno wejei bä ma cui, inaja showawä. Jabesi jamö bä ca̦i fa waloicöjenö, ö̦jamö bä ö̦shömalemaje.

¹³ Ö̦jö däjä, Jabesi jamö fi tefi bada lä ublaono wei fi cotä jamö, bei ubä fa didicöjenö, iyaö mlai ja bä bufi wa̦lidiwä ca̦i jilaa showalanö, 7 tä mö didi tablamalemaje.