1 Samuel 3 - Biblia Yanowamö

Samuel lija Jeobaa a lä wawälayono wei tä a̦

¹ Ijilu Samuel a lä cui, Eli lija a fa damamonö, Jeobaa lija a ojodamoma. ¿Ö̦jö tawä? Ö̦jö lä däjä Jeobaa a wa̦ ononoblaoma. Tabi tä ma cui ja, a dablamou fe diböanomi.

² Bei. Eli a fa wa̦lobadaimadunö, a fubäbö fe balojafälöma. Täbä möö mlalaliyoma. Ö̦jö däjä, abenaja etä cublaliyoma. Eli a lä mio wei jamö a maqueo fe lä jaluno wei däjä,

³ Jeobaa etä yano jamö, Samuel a maqueo mö feduoma, a wa̦no oni lä didile tefi ca lä cule yano jamö. ¿Ö̦jö tawä? Jeobaa etä yano jamö wacä shi̦i lublonomi showawä.

⁴ Ö̦jö däjä, Jeobaa e a̦ bädou fe jalulayoma. —¡Samuel! —a cuma—. ¡Samuel! —Aö —a cuolanö,

⁵ Eli a lä mile jamö a läläquema. —¿Wedi bei tä? Wale lä nacafe —Eli lija a cuyoluma. Ö̦jö ma cui, abenaja Eli a cuma. —Ma, bä nacanomi. A blaa da co̦icudu —a cuma. Ö̦jö cudeenö, Samuel a lä maqueono wei jamö a cua co̦layoma.

⁶ Ö̦jö däjä, Jeobaa a wa̦ bädou co̦oma. —¡Samuel! Samuel a jocädou fa co̦lonö, Eli lijamö a icua co̦quema. Abenaja e cuma. —¿Wedi bei tä? Wale lä nacafe. Ö̦jö ma cui, abenaja Eli a cuu co̦oma. —U̦asi, bä nacanomi. A blaa da co̦icudu.

⁷ ¿Ö̦jö tawä? Samuelnö Jeobaa a daö cadidionomi showawä. Cama lija Jeobaa a wa̦ jaba fano ma mlai ma cui, ö̦jö däjä a wa̦ jaba bädaliyoma.

⁸ Ö̦jö däjä, Samuel lija Jeobaa 3 a wa̦ faö co̦o däjä, Samuel a fa jocädalunö, Eli lijamö a faa co̦layoma. —¿Wedi bei tä? Wale lä nacafe —a cuu co̦oma. Ö̦jö däjä, ijilu a lä cui lija, Jeobaa a wa̦ yai lä fano wei tä ja, Eli a bufi möblaliyoma.

⁹ Ö̦jö cudeenö abenaja Samuel a nowa tama. —Wa fua fa co̦lufälönö, a blaa da co̦icudu. Bä tä a̦ faö co̦o ja, wa wa̦ fuobä. Abenaja wa e cubä. “A wa̦ da fa. Cafä Jeobaa bä a̦ fuabä cä ya lä cuinö bä a̦ ji̦liaö lä cule.” ¿Ö̦jö tawä? —Elinö a nowa tama—. Einaja wa e cubä. Ö̦jö cudeenö Samuel a aa fa co̦lufälönö, a lä miono wei jamö a blaa co̦quema.

¹⁰ Ö̦jö däjä, Jeobaa a ublaa fa ajedeblaliyonö, Samuel lija a wa̦ faö co̦oma, a wa̦ jaba faö ja, a lä cuno weinaja showawä. —¡Samuel! —a cuma— ¡Samuel! Ö̦jö däjä, Samuel a wa̦ fuoma. —A wa̦ da fa. Cafä bä a̦ fuabä ya lä cuinö bä a̦ ji̦liaö lä cule —a cuma.

¹¹ Ö̦jö däjä, abenaja Jeobaa a cuma, Samuel lija. —Bei. Isaeli bäma ecö nia lä taamaö wei tä ja, ya nö nia quiliaö. Ya nia lä cuaaö wei tä a̦ ji̦liaöje ja, bä bufi nö nia quilili bleaaö.

¹² Inaja ya yai lä cuaaö wei däjä, ei ya wa̦ lä cui, tä nia bejedi wawäblou. Eli a ma cui, cama ebä ma cui, ö̦jö ya bä nö nia lä bleaamano wei, ya tä nia jödödöblaö showadao.

¹³ ’Ya nowa taö waiquia lä cule —a cuma—. Bä ijilubö ecöbänö wale nö ma waiblaböno wei ma cui, cäcöbä wasöbonomi. Tä ma dano wei ma cui, cäcöbä wasöbou fa mlacunö, fei däjä cama ebä ca̦i bluca lä cui, ya bä nö nia bleaamaö shi wa̦lii.

¹⁴ Cäcöbä wasöbonomi cudeenö, Eli cama ebä ca̦i bluca lija ya wa̦ nö wäo lä cule. Cama bä lija etä wa̦lidiwä lä cule, etä nowa nia mlaimi. Obi ma cui, yalo bä ma dodobou wejei ma cui, Jeobaa wale ma dobäö wejei ma cui, tä nowa nia cudalou shi wa̦lii —a Jeobaa cuma.

¹⁵ Ö̦jamö Samuel a bladio fe jaluu showaoma. Tä mö jalublou däjä, Jeobaa etä yano jamö, yoca caloblaö fenablalayoma. Jeobaa a lä wawälayono wei, Eli lija tä a̦ wäaö quilima.

¹⁶ A quilima ma cui, Elinö a nacama. —¡U̦asi, Samuel! —a cuma. —Aö —Samuel a cuma.

¹⁷ Ö̦jö däjä, abenaja Eli a cuma. —¿Wedinaja wa nowa taö cufawä? Wale mojodumabou mlai ja, tä a̦ bluca da wäba. Ai wa tä a̦ jitäbou showaa dicoa ja, Yai Bada tänö cafä wa nö bleaamabä ya wa̦ —a cuma.

¹⁸ Ö̦jö cudeenö, Eli lija ai tä a̦ jitäbou mlai ja, Samuelnö tä a̦ bluca wäa showadaquema. Ö̦jö däjä, abenaja Eli a cuma. —Jeobaa a malä cui. Cama a yai cuaaö bufi lä doblao wei tä ja, a yai cuaabä —a cuma.

¹⁹ Bei. Samuel a yawäfälöma. Jeobaanö a ca̦i fa cuonö, a bejedimoma. A wa̦ lä faö wei tä bejedi cublobä, Jeobaanö tä bluca wawämaö nocamoma.

²⁰ ¿Ö̦jö tawä? “Jeobaa a wa̦no wäyälewä, ö̦jö a dodijiwä”, Isaeli ebä blucanö a nofi tabomaje. Dani ebä ulufibö blajawä lä blaono wei tä ma cui, Beesebateli bä ulufibö blajawä blao mö lä feduono wei tä ma cui, tä ulufi lä möamöono wei tä ma cui, inaja a nofi tabou blaucuomobodayomaje.

²¹ ¿Ö̦jö tawä? Silo jamö Jeobaa a wawäö co̦oma. Ö̦jamö Samuel lija a wa̦fa wäyämou ja, a Jeobaa malä dablamono wei.