1 Samuel 27 - Biblia Yanowamö

Filideo bä lijamö David a docua lä yaclälayono wei tä a̦

¹ Bei bufi jamö, abenaja David a bufi cuma. “Obi ma cui, ya̦cumö Saulonö wale nia shäö fe yadio. Filideo bä lijamö ya li docuu showadao mlai, ya demi cuobä. Inaja ya fa cuaanö, Isaeli ebä lä bälöjöi jamö Saulonö wale nia ma dayäaö wei ma cui, ya̦cumö a nia modaaö. Ö̦jö däjä, jai ya fucäblaliyoma ya nia shi̦lo demi cudio”, a bufi cuma.

² Inaja David a bufi cuma yalo, cama 600 ebä ca̦i lä cuono wei bä lulua showalefälöma. Filideo bä ulufibö jamö bä fa waloicudunö, Maoco ijilubö Aquisi a nabä icua fe dolequemaje. Ö̦jö Aquisi lä cui, Cadateli bä lija a bada lä läono wei bei a cuoma.

³ Aquisi lija bä ca̦i bälöa ajedea showadaquema. David a ma cui, bä ca̦i lä funo wei bä ma cui, ö̦jö ebä ca̦i bluca mö feduo showawä ma cui, Cada jamö bä bluca bälöquema. David bä suwäbö ecöbö ca̦i cuoma. Jeseleleteliyoma a lä cui, Ainoama e a̦fa suwä cuoma. Camelateliyoma a mö feduwä lä cui, Abicai e a̦fa cuo mö feduoma. Ö̦jö a suwä lä cui, Nabala bä suwäbö e jaba li cuoma ma cui a yamiblaliyoma.

⁴ Cadateli bä lijamö David a lä doculayono wei tä a̦ ji̦lia fa jälänö, Saulo a fujeblaliyoma.

⁵ Ö̦jö däjä, Aquisi lija abenaja David a cuma. —Bei. Cafä bä bufi dodijidawä tamabou waiquiwä ja, iba ya bä ca̦i bälöo yaiobä a shabono da jimöbayo. ¿Ö̦jö tawä? Cafä bada bä a̦ fuaabä ya. Bada showadi wamacö yai bälöo lä dodijio wei jamö ya cudio bashiobä, ya malä mlai —a cuma.

⁶ Inaja a cuu ja, Aquisinö a wa̦ fua showadalema. Ö̦jö tä jalu showawä ja, David lija Siclaca a wa̦fa shabono lä jilabono wejei, a shabono jibäa cadidia showaquema. Fei däjä ma cui, Judawä ebä bada lä cuinö, ö̦jö a shabono lofotobou showaaje.

⁷ Filideo bä ulufibö jamö David a cuo showao däjä, belibo 16 bä famalema.