1 Samuel 2 - Biblia Yanowamö

Jeobaa lija Ana a wa̦ lä bädono wei tä a̦

¹ Jeobaa lija Ana a wa̦ faö ja, abenaja a cuma. —Bejedi lä, cafä Jeobaa wa lija ya bufi doblalou. Cafä wa lofotenö ya lofotoa lä cule. Cafänö wale lä bayeliblano wei tä ja, ya bufi doblalou ja, wale nofi lä wa̦libolajei bä lija ya casö shi̦lo wadeadalou bädao.

² ’Cafä Jeobaa yami wa yaia —a cuma—. Cafä wa lä culenaja, ai a cuami dodijiwä. Cafä moli wa Bada cua ayaa. Yamacö nowamöobä, ai a cuami, cafä bä lä bufiblaö wei, ö̦jö moli wa waiquiwä.

³ Yanowamö täbä nofi yai doablamobä tä cuami. Cama bä jimöobä mlai. Cafä Jeobaa wa lä bufiblamou wei wanö, wa tä daö jödödöwä. Bä ma dodijaö wei bä ma cui, bä doblou lä mlai bä ma cui, ö̦jö wa bä jimabä, cafä wa.

⁴ ’Bä wayu lä fuu wei jamö, bä nö jaba lä wa̦lojaö wei, wa bä fa̦dobö nafi fa wa̦lianö, bä dobloimi majöo —a cuma—. Ö̦jö ma cui, bä nö jaba a̦fusi lä bleaaö wei, wa bä fa lofoteblamanö, bä li dodijaö majöo.

⁵ Bä jaba dodijidawä lä bälöo wei bä ofäö fa majöonö, shomi täbä lija bä nosiemamou majöo. Ö̦jö ma cui, bä nö jaba ofili lä bleaaö wei bä iyaö majöo. Bä ijilubö ebä jaba cublou lä mlaono wei bänö, bä ijilubö 7 ebä tabou majöoje. Ö̦jö ma cui, bä ijilubö ebä jaba lä blucao wei bä lä cui, bä bufi nö bleaaö nomöjöo.

⁶ ’Cafä Jeobaa wanö wa täbä shäö —a cuma—. Cafä wa showawänö, wa täbä ca̦i demidamaö. Täbä lä nomaö wei täbä cuobä jamö, wa täbä ma shimaö wei ma cui, cafä wa showawänö, wa täbä demi ca̦i jocädamaö co̦o.

⁷ Cafä Jeobaa wanö, wa täbä fo̦liblamaö. Ö̦jö wa showawänö, wa täbä nö ca̦i madofiböblamaö. Täbä bada ma bälöo wei ma cui, cafänö wa täbä joyamaö. Täbä nia läo lä majöo wei, wa täbä ca̦i bada tablamaö.

⁸ Tabä nö jaba beblalou lä waiquidi, dodijidawä wa täbä tamabou majöo. Täbä nö jaba fo̦lili lä bleaano wei, wa täbä fa bayeliblanö, bada täbä lijamö wa täbä lomabou ajedeo majöo, wawädowä wa täbä nö bada ö̦jöböamaö majöobä. ’Cafä Jeobaa wanö, wa täbä bluca tablalema yalo, wa li cuaaö —a cuma—. Jödödöwä wa täbä taa lä waiquiabodayono weinaja, täbä cuaaö malä showai.

⁹ Afä bä lä cadidou wei, wa bä nia yai nowamöbou cuaaö. Ö̦jö ma cui, bä doblou lä mlai wa bä waicaö däjä, mö didi jamö wa bä nia tamabou. Yanowamö cama bä lofotenö bä nö nia wa̦lojaö malä mlai.

¹⁰ ’Jeobaa wa nofi lä wa̦libou wejei bä nia shäblamou shi wa̦lijio —a cuma—. Wa bä a̦fa wäaö ja, ya̦lu a wa̦ bada taimodou däjä a wa̦ nö quiliblou lä cuaaö weinaja, fedu jamö wa culanö wa wa̦ nia bädou no quilidodayou. Jödödöwä bä lä bälöblai, Jeobaa wanö wa bä nia jimaö. Cafänö bada wa bälömabobä, wa lä yaileno wei a lä cui, wa nö nia wa̦lojomabou. Bada wa nö nia ö̦jöböamaö fe balojoo —Ana a cuma.

¹¹ Ö̦jö däjä, Lamaa jamö, Elecananö cama ebä ca̦i co̦a ma co̦layono wei ma cui, Jeobaa lija a ojodamobä, nofi bäyäalewä Eli lija bä ijilubö e damamou juoma.

Eli bä ijilubö ecöbä cuaaö lä dicoono wei tä a̦

¹² Bei. Eli bä ijilubö ecöbä doblonomi dicowä. Jeobaa a nö quili tabönomi.

¹³ Jeobaa lija yalo a dodobobeje a ca̦i walooje däjä, abenaja cäcöbä showadi cuaaö mö bablao dicooma. Yalo a nia lä dodobou wejei a fa shämalöjenö, bä jalii showaoje däjä, cäcöbä a̦ fuamobä e lä cui, e showadi waloblaamaböma. Yalo bä lä ji̦imamou wei täcö fa dälönö,

¹⁴ jaboca jamö täcö fa lucämalönö, a yalo ji̦ia lälema. Yalo a ji̦ia lä bädale a däa showalema. Silo jamö Isaeli ebä lä cuinö bä yalo ca̦i lä funo wejei, inaja bä showadi taamaböö dicooma.

¹⁵ Inaja bädawä mlai, abenaja cäcöbä ca̦i cuaaö dicooma. Yalo bei bä daböbö ö̦shömaö showao mlaoje däjä, nofi bäyäalewä cäcöbä a̦ fuamobä e fa shimabönö, yalo a lä dodobono wejei bä lija a nacou balömou dicooma. Abenaja a shi̦lo cudima. —Nofi bäyäalewänö a yaabä, yalo e da jibäbaje. Cafä wamacö lija yalo löbö a nia däaimi. Liyä a bufii —a shi̦lo cudima.

¹⁶ Ai bä a̦ lämou ma cui, a wa̦ fe shi̦lo blacäjoma. Abenaja ai bä cuma. —Waija. Bei bä daböbö ö̦shömaö balöobeje, Moisesi tä a̦ lä cuu weinaja showawä. Ö̦jö däjä, wa bä lä bufii wei, wa bä bluca däabä —ai bä cuma ma cui, a wa̦ fe shi̦lo blacäjou fe yadioma. —Ma —a shi̦lo cudou nofi jushuoma—. Fei däjä bä jibäa da showadabaje. Wama bä jibäaimi ja, ya bä nia däablaö fe yadio —a showadi cuma.

¹⁷ Inaja cäcöbä fiya cuaama cudeenö, Jeobaanö etä nowa tabou dodijioma. Jeobaa a dobämobä tä ma cuono wei ma cui, jai tä nowa cuami, cäcöbä cuaaö malä dicoono wei.

Jeobaa a lä cule jamö Samuel a lä yawäfälöno wei tä a̦

¹⁸ Ö̦jö ma cui, Jeobaa a lä cule jamö, Samuel dodijidawä a li ojodamou showaoma. Ijilu oshe a cuo showaoma ma cui, nofi bäyäalewä bänö sibä lä jalebou wejei si jaleboma, shuducaje au ubä yai lä dodijidai ubä ja, sibä lä diyäblamou wei si lä cui.

¹⁹ Bä nöö enö, Samuel esibä ca̦i showadi diyädima. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, Jeobaa lija yalo a dodobobä, Elecananö cama ebä ca̦i fuu däjä, Samuel bä nöö enö, labe e sicö wai showadi ca̦i fuu mö feduoma.

²⁰ Ö̦jö däjä, nofi bäyäalewä Eli a lä cuinö, Elecana, bä suwäbö sho cäcöbä showadi bayeliblamaö bufima. Abenaja a showadi cuma. —Ijilu bä ja, Jeobaanö suwäböfä a dobäö co̦obä. Jeobaa e cuo cadidiobä, bä ijilubö e lä majöleno wei tä nowa ja, ai ebä jibäaö co̦obä —a cuma. Ö̦jö däjä, cama bä yafibö jamö bä showadi co̦o co̦oma.

²¹ ¿Ö̦jö tawä? Jeobaanö Ana a bayeliblaö fa co̦onö, a shibänaböa co̦layoma. Bä ijilubö 3 ebä tablaö co̦layoma. Bä tää bolacabö ecöbä. Bä ijilubö Samuel e lä cui, Jeobaa a lä cule jamö e yawäfälöma.

Elinö bä ijilubö ecöbä lä wasöleno wei tä a̦

²² Bei. Eli a wa̦lobadaoma ma cui, bä ijilubö ecöbä nofi lä jushuano wei tä ja, a moyawäoma. Isaeli ebä bluca lä taamaböno wei, showadi cäcöbä a̦fa ji̦liama. Jeobaa e yano jamö täbä lä fablaaö wei ja, bä suwä lä ojodamono wei bä sho, cäcöbä jo̦wa ca̦i yacaoma.

²³ Abenaja cäcöbä nowa tama. —¿Wedi tabä wafäcö inaja li cuaaö dicoo? Wafäcö doblou lä mlai, bluca bänö camiyä lija showadi wafäcö a̦fa wäyäöje.

²⁴ ¡Inaja dicoo mlai, ijiluyä wafäcö! Jeobaa ebä lä cuinö wafäcö a̦fa lä wäyädujei, tä doblaami. ¿Ö̦jö tawä?

²⁵ Yanowamö a mö feduwä lija wa nofi jushuaö ja, Yai Bada tänö wa nofi nia bäyäbou ma cui, Jeobaa lija wa nofi yai jushuaö dicoo ja, ¿wedi a wa̦ nia läblou majöo? —cäcöbä nowa tama. Ö̦jö ma cui, bä fö̦ö a wa̦ ji̦liabönomi. Jeobaanö cäcöbä shämaö bufio waiquiwä ja, a wa̦ ji̦liabönomi.

²⁶ Bei. Ijilu Samuel a lä badafälöno wei däjä, Jeobaa a bufi doblalamaö balafälöma. Yanowamö täbä ma cui, ö̦jö bä bufi ca̦i doblalamaö balaö mö feduo showaoma.

Eli ebä nö nia bluca lä bleaano wei tä a̦

²⁷ Ö̦jö däjä, Jeobaa a wa̦no wäyälewä ai anö, Eli a fe waloyoluma. Abenaja a nowa tayoluma. —Jeobaa ya wa̦no wäyäö lä cule. Ejido tä ulufi jamö wamacö nö badabö cuo balöo däjä, Ejidoteli bada a lija bä nosiemamoma. Ö̦jö a bada lija bä nosiemamou däjä, Aaloni a ma cui lija, cama ebä ma cui lija, Jeobaa a damolaliyoma.

²⁸ ’Isaeli bä ijilubö nodiwä ebä yaiablalou lä nodiaö wei bä bluca lija, Aaloni a yaia cadidilema —a cuma—. Jeobaa lija a ojodamobä a yailema, täbä nofi bäyäbobä. Cama ebänö täbä nofi ca̦i bäyäbou nodiablalou showaobeje. Yalo bä lä dodoblamou wei bä maqueblamobä täcö jamö, bä ajedoyolubä. Täbä wa̦queshi ni cle̦deli lä u̦cucamou wei täbä ca̦i ö̦shömabeje. Jeobaa a lä cule jamö, nofi bäyäalewä bänö sibä showadi lä jalebou wejei, sibä ca̦i jalebobeje. ¿Ö̦jö tawä? Inaja afä bä cuo lä balöono wei bä taamama. Isaeli ebä lä cuinö, yalo bä lä ö̦shömaö wejei bä mashi wabeje, tä nabä ca̦i shimöquema.

²⁹ ’¿Ö̦jö tawä? —a cuma—. Inaja wamacö ma taamano wei ma cui, ¿wedi tabä cama Jeobaa lija bä yalo lä jibäö wejei bä ja, wamacö mamo li showaablalou dicoo? Cama a dobäbeje, tä nabä ma shimano wei ma cui, ¿wedi tabä wamacö li inaja cuaadii? Cama wa wa̦ shi̦lo ji̦liaö mlai, ijilufä cäcöbä lija wa bufi mö blucawä dicowä. Isaeli ebä lä cui, Jeobaa ebä li. Cama lija bä yalo jibäöje däjä, ¿wedi tabä bä yalo yai lä dodijidai bä ja, cafä wamacö li blebä, wama bä yalo däaö läo bädao?

³⁰ ’Inaja wamacö cuaaö dicoo ja, Isaeli ebä lija Jeobaa a lä bufiblamou wei a lä cui, a wa̦ faö co̦a lä cule —a cuma—. Faafä ebä ma cui, cafä wa cadidiwä ma cui, Jeobaa etä yafi jamö showadi wamacö ojodamou nodiobä a wa̦ nö wäo ma balöono wei ma cui, fei däjä a wa̦ nö wäo co̦a lä cule. Inaja wamacö nia jo̦wa taamaimi majöo. ¿Ö̦jö tawä? Dodijidawä a nofi lä tabou wejei bä lä cui, ö̦jö dodijidawä bä nia wawädowä tamabou. A nofi lä wa̦libou wejei bä lä cui, bä nofi nia taboimi.

³¹ Wa tä möbä, ö̦jö lä. Afä bä ma cui, faafä ebä bluca ma cui, wamacö nö nia bleaaö. Wamacö nö lä wa̦lojole tä nia mladou. Bä wa̦lobadano mlai ja, afä bä fiyao showao däjä bä nia shämou. Cafä wamacö lä cui lija, moli ma cui bä nia wa̦lobadaimi.

³² ’Isaeli fei ebä nia bluca bayeliblamou —a cuma—. Dodijidawä bä nia tamabou. Cafä wamacö nö bleaalanö wama bä dodijidawä dablaö däjä, wamacö bufi nia waiyou. ¿Ö̦jö tawä? Obi ma cui, cafä wamacö lija a lä wa̦lobada wei, moli ma cui wama a nia dablaimi.

³³ Yalo bä dodoblamobä täcö jamö täbä nofi lä bäyäbou wejei, ai a ma feiblamaö wei ma cui, a nö bleaabä a nia feio buo. Ai bä dodijidawä cuo ayao ja, a bufi nia wa̦lidiwä ca̦i ö̦cöö. A bufi nö nia beblalou. ¿Ö̦jö tawä? Afä bä bluca lä nodiblou wei, wayu bänö bä nia shäöje.

³⁴ ’Ijilufä bolacabö cäcöbä nia lä taamaö wei tänö, ei Jeobaa ya wa̦no lä wäyäle wa wa̦no nia bejedi dablaö —a cuma—. Ijilufä Ofini a ma cui, Finesi a ma cui, moli tä jalu ja, cäcöbä nia nomaö bolacao showadao.

³⁵ Nofi bäyäalewä a nia yai lä bejedimou wei, ai a nia tablamaö majöo, Jeobaanö tä tamaö lä bufii weinaja, a cuaaö bufi lä doblao wei. Tä nabä yai lä shimaö wei tä ja, a lä cadidou wei. Cama ebä nia yai lofotomabou nodio shi wa̦lii. Bada a yai cuobä Jeobaanö a lä yaileno wei a lä cui, ö̦jö bänö a wa̦ nia yai fuaöje.

³⁶ ’Ö̦jö däjä, afä bä shee lä cui bä möfe bolanö, ö̦jö nofi bäyäalewä a lija bä nia nacoyoluu. Abenaja bä nia cuu. “Nofi bäyäalewä bä läobä jamö, yale da shimöco, ö̦jamö ya yädälanö ya bufi fudädäwä ca̦i cuo fe yadiobä”, bä nia cuu —a cuma. ¿Ö̦jö tawä? Jeobaa a wa̦no wäyälewä a lä cuinö, einaja Eli a nowa taö ja a cuma.