1 Samuel 18 - Biblia Yanowamö

Jonadana sho David sho cäcöbä nofi lä tamayono wei tä a̦

¹ Saulo lija David a wa̦ wayoa fa jödödölönö, ö̦jö däjä Saulo bä ijilubö e lä cuinö, David a nofia dodijilema, Jonadana a lä cuinö. David lija a bufi mö fa blucaonö, a nofimaö fe balojooma.

² Saulo a ma cuinö, ö̦jö lä däjä showawä, a tabou ajedeobä David a däa shalililema. Bä fö̦ö e lijamö a shimaö co̦daanomi.

³ ¿Ö̦jö tawä? Jonadana cama a nofi jalujuo lä culenaja, David a nofi tabolanö a nofimaö dodijioma. A nofimaö dodijioma yalo, cäcöbö yömölayoma. Cäcöbö nia nofimayou shi lä wa̦lii wei tä ja, cäcöbö nowa tayoma.

⁴ Ö̦jö däjä, Jonadana cama a lä didile sicö labe fa jayublalönö, David lija sicö jibäa showadaquema. Sicö lä u̦eshibou wei sicö ma cui, ö̦jö sicö ca̦i fa jayublalönö, sicö jibäa bolacaa showadaquema. Sibala a ma cui, fa̦do nafi ma cui, sicö acadafu lä ya̦bono wei sicö ma cui, ö̦jö ebä bluca ca̦i jibäa showadaquema, David lija.

⁵ Saulo lija David a nosiemamou ja, a shimaö lä bädaono wei jamö ma cui, a showadi dodijama. A dodijaö cudeenö, sodado bä lija a bada läobä, a tablamalema. ¿Ö̦jö tawä? Inaja Saulonö a taamaö ja, Isaeli ebä bufi bluca doblaloma. Saulo lija bä lä yädäono wei bä ma cui, ö̦jö bä bufi bluca ca̦i doblalou mö feduo showadaoma.

Saulo a nofi lä jalujumobono wei tä a̦

⁶ Davidnö filideo a bada lä shäleno wei däjä, bä wayu co̦imaö däjä, Saulo a dodijidawä nia fa jayuamajenö, suwä bä bluca wawäö cuaaö mö baama. Isaeli ebä lä bälöblai jamö culanö, amowa dodijidawä tä a̦ talajenö, bä bufi doblalou ca̦i wawäö cuaama. Amowa ai efibä shälajenö, ai efibä a̦ famaö mö fa feduojenö, bä a̦ ca̦i blaö blaöablaloma.

⁷ Bä bufi ca̦i doblalou lä cuaablalou wei, Saulo, David sho cäcöbä lä cui lija, amowa tä a̦ yädämaquemaje. Cäcöbä nofi doaöje ja, abenaja bä amowabö a̦ cuma. ¡Ayäyai! ¡Saulonö 1.000 ebä bluca shäalalema! ¡Davidnö 10.000 ebä bluca shäa mö fedualalema! Amowa tä a̦ taöje ja, einaja bä bufi doblalou ca̦i cublaloma.

⁸ ¿Ö̦jö tawä? Saulonö täbä a̦ fa ji̦lilänö, a jushudou fe balojolayoma. Bä a̦ nofi wa̦liboma. Abenaja a cuma. —David 10.000 ebä a̦fa ma wäyäö wejei ma cui, iba 1.000 bä a̦fa shi̦lo taö bädaoje. ¿Wedinaja a nofi li tabou culajei? “Bada ö̦jö a cuobä”, bä nia cuu fa majöblaonö bä a̦ —a cuma.

⁹ Ö̦jö däjä, a nofi wa̦libou cudeenö, David lija a mamo fa showaalunö, a mödima.

¹⁰ Ö̦jö tä fena ja, fecula a ja, Yai Bada tänö Saulo yedu a nabä shimöa fa showadacönö, cama e yafi jamö a bufi dao mlai ja, a wa̦ ca̦i faablalou cuaaö bädaoma. Ö̦jamö lä Davidnö amowa e tefi showadi lä shädino weinaja, fi ma taamadino wei ma cui, a ononoblonomi. ¿Ö̦jö tawä? Täbä blajawä lä niyablaö wejei tä lä cui, Saulonö cama etä bada fa showalänö,

¹¹ yedu David a befi niyaquema. “Yano jamö David ya nia disuaö showadao”, a bufi cuu ja, a befi ma niyaqueno wei ma cui, David a fa moyawäblalunö, etä madofi bada nodia bolacamaquema.

¹² Saulonö David a nö quili tama. Wedi tabä mlai. Jeobaa a lä cuinö, Saulo a tabi ma feiqueno wei ma cui, David a shi̦lo ca̦i cuo ayaoma yalo, a quililaliyoma.

¹³ A nö quili tama cudeenö, cama wayu 1.000 ebä lulubobä, a bada fa tablamalönö, shomi jamö a shimölema. Ö̦jamö lä Davidnö bä shi̦lo wayu ca̦i fublaadima.

¹⁴ Jeobaanö a ca̦i cuoma yalo, a fuu lä bädao wei jamö ma cui, showadi a nö wa̦lojoablaloma.

¹⁵ ¿Ö̦jö tawä? A nö showadi lä wa̦lojoablalou wei Saulonö a fa dablanö, a nö quili yai taö fe balojooma.

¹⁶ Ö̦jö ma cui, bä lä ishono wei jamö, bä showadi ca̦i fuaadima cudeenö, bä ca̦i dodijidawä co̦blaama cudeenö, Judawä ebä bluca lä cuinö a nofiablaö dodijiomaje. Isaeli ai ebä bluca mö feduwä ma cuinö, inaja showawä a nofiablaö dodijiomaje.

¹⁷ Ö̦jö däjä, Saulo a lä cuinö, abenaja David a nowa tama. —Bei. Cafä lija tääyä jaba a lä cui, Melaba ya nia jibäaö. ¿Ö̦jö tawä? Jeobaanö bä shämaö lä bufii wei jamö, wa bä ca̦i wayu fa funö wale bayeliblabä. Bä lä shimaö wei däjä, a nö da wa̦loja, ö̦jö lä —a cuma. Einaja a cuma. ¿Ö̦jö tawä? “Camiyänö ya shäö mlai, filideo bä lija ya yai li shämabä”, a bufi malä cuno wei.

¹⁸ Abenaja David a cuma, Saulo lija. —Cafä bada wa lija inaja ya cuaabä yami. Camiyä yamacö ma cui, fayä ebä bluca ma cui, Isaeli ebä lä cuinö yamalecö nofi inaja taboimije —a cuma.

¹⁹ Ö̦jö ma cui, David lija bä tää Melaba a nia lä jibäano wei tä cublou däjä, shomi lija a jibäa yacläquema. Meolateli Adieli lija a däa yaclämalema.

²⁰ Bei. Saulo bä tää Micala ai e lä cuinö, David a nofilema. Saulonö ö̦jö tä a̦ fa ji̦lilänö, a bufi doblaoma.

²¹ Abenaja Saulo a bufi cuma. “Awei, tääyä ya jibäabä lä. Camiyä ya wa̦nö, ö̦jönö a nomojolimaö ja, filideo bä lija ya̦cumö a shämou cuquei”, a bufi cuma. Ö̦jö cudeenö, abenaja Saulo a cuma, David lija. —Fei däjä, bä nofi nia yai fecamamaö —a cuma.

²² Saulo a wa̦ lä fuaano wejei bä lija abenaja a cuma. —Ai bä cuo ajeo mlao däjä, abenaja David wama a nowa taö ja̦toobä. “Bei. Bada wa tä bufi doblamabou waiquiwä. Bada ebä bluca lä yädämabole bä ma cuinö, wa ca̦i nofimaöje. ¿Ö̦jö tawä? Bä tää e da dälö, ö̦jö lä, bada wa tä nofi shöömabä.” Einaja wama a nowa tabä —Saulo a cuma.

²³ Inaja showawä David a nowa taö fa ja̦toojenö, abenaja David a cuma. —¿Bada bä tääbö lä däamou wei bä nowa cuami daanö? Wa e däamaö ma bufii wei ma cui, bada tä lija ¿wedi tänö bä tää ya e nowa nia li coamaö? Ya malä fo̦li wei. Camiyä wale nofi mölabobeje yami —David a cuma.

²⁴ Saulo a wa̦ fuaabeje bä lä cuinö, David a wa̦no wäyäö showadao co̦ojolomaje.

²⁵ Ö̦jö däjä, abenaja Saulo a cuma. —Ei ya wa̦ lä cui, David lija wale a̦no da wäyäje. Tääyä a däabä, madofi ya bä nia nacaimi. Bä nö lä nabämou wei bä lija wale nö yuaö ja, ö̦jö waiquiwä. ¿Ö̦jö tawä? Filideo 100 bä fa shäalalönö, bä mosi sicö fa janöalalönö, camiyä lija bä mosi sicö dodobobä. Camiyä lija 100 bä mosi sicö mömayoluu ja, tääya a nia däaö. Inaja David wama a nowa tabä —Saulo a cuma. Filideo bä lija David a shämaö bufi doblaoma yalo, bei a wa̦ cuoma.

²⁶ Saulo a nosie lä fuaano wejei bänö, David lija a wa̦no wäyäöje däjä, bada bä tää e däaö bufi doblaoma. A nowa co̦amabä tä cublou showao mlao däjä,

²⁷ cama wayu ebä fa nacalänö, bä ca̦i fuma. Filideo 200 bä fa shäalalöjenö, bä mosi sicö bluca janöalalemaje. Davidnö bä mosi sicö ca̦i waloa fa co̦icunö, bada tä lija bä mosi sicö mömajaloma, bä tää e däabä. Ö̦jö däjä, Saulonö bä tää Micala e jibäa cadidiquema.

²⁸ Ö̦jö ma cui, Jeobaanö David a ca̦i lä cuono wei tä möö wawädoo däjä, Isaeli ebä blucanö a lä nofimano wejei tä ca̦i dablaö wawädoo däjä,

²⁹ David a nö quili yai talema. Ö̦jö cudeenö, David lija Saulo showadi a nö shi̦lo nabämodima.

³⁰ Bä ishobä, filideo bada bänö wayu showadi ebä lulubou co̦oma ma cujei, bä nö bleaaö bädaoma. Saulo a wa̦ lä fuaano wejei bä nö bluca wa̦lojama ma cui, David a nö shi̦lo yai wa̦lojaö ayaoma cudeenö, ö̦jö a wa̦fa shi̦lo jayubladimaje.