1 Samuel 17 - Biblia Yanowamö

Filideo a bada Coliado lä wawälayono wei tä a̦

¹ Bei. Soco jamö filideo bä wayu co̦camolayoma, Judawä ebä ulufibö jamö. Soco jamö, Asecateli bä lä bälöle tä möamo ja, bä bälöaleyoluma, Efedami tä ulufi ja.

² Saulonö Isaeli ebä ca̦i toujou mö fa feduonö, Ela tä yalö lä möamobe jamö, bä ca̦i co̦camoa mö fedulayoma. Ö̦jö däjä, bä nia lä ishou wei jamö, bä wayu ublao shaliliolaliyoma.

³ ¿Ö̦jö tawä? Jefu ai jamö, filideo bä wayu ublajaoma. Ö̦jö tä mashi jefu ja, Isaeli ebä wayu ublajaa mö fedulayoma. Tä fe lä yalöbe tä möamomabomaje.

⁴ Ö̦jö däjä, filideo bä lijamö, Cadateli a wa̦fa wayu Coliado lä cui, a bada wawäblaliyoma. A bada yaläjäo fe balojooma.

⁵ Tä lä yojobono wei, duo shibä ja tä tablalemaje tä bada cuoma. A lä didiono wei, inaja showawä etäbä ca̦i fa cuonö, etäbä bada fudäo fe balojooma.

⁶ Bei matacö ma cui, duo shibänö matacö ca̦i nowamöoma. Täbä diquiamobä a wai madofi namo lä jalebono wei, duo shibä showawänö ö̦jö a ca̦i tablamoa mö fedua showalayoma.

⁷ ¿Ö̦jö tawä? Täbä blajawä niyablamobä, blewä tä bada ca̦i madofi taboma. Ö̦jö bei namo tä lä cui, duo fude shibänö tä tablalemaje yalo, ö̦jö etä ca̦i fudäo fe balojooma. A famii mlaobä etä bada lä läbono wei, tä ca̦i bada balömaboma.

⁸ Ö̦jö däjä, Coliado a fa yanöcödalunö, Isaeli ebä ublao mö lä feduono wei bä lija a wa̦ i̦cali fama. —¿Wedi tabä wayu wamacö bluca ublajoo cudi? Afä moli wama a fa yailönö, camiyä lija a wayu waloyolubä, ö̦jö lä. Camiyä filideo ya malä cui, cafä Saulo wama a wa̦ lä fuaö wei wamacö malä cui.

⁹ Camiyä yafäcö shi̦lo shäyobä. Camiyä yale shäö ayao ja, cafä wamacö nosie fuamobä, afä yamacö nia bluca cublou. Ö̦jö ma cui, afä a lä cui ya shäö ja, camiyä yamacö nosie fuamobä, bämacö nia bluca tabou —a Coliado cuma.

¹⁰ Ö̦jö däjä, abenaja filideo a bada cuu co̦oma. —Bei. Fei däjä, Isaeli bäma ecö wabaö bufi doblao. Camiyä sho yafäcö shäyobä, afä moli a noshi da ö̦jödaboje —a bada cuma.

¹¹ Saulo a ma cuinö, Isaeli bluca ebä ma cuinö, ö̦jö filideo a wa̦ ja, bä bufi nö bleaama. Bä quilii fe balojooma.

David a lä waloqueno wei tä a̦

¹² Bei. David bä fö̦ö Isai a wa̦fa lä cule, Efladateli bei a cuoma. Belenateli bä shabonobö jamö a bälöoma, Judawä bä ulufibö jamö. Saulo a bada lä läono wei däjä, Isai a wa̦lobadao waiquioma. Bä ijilubö 8 ebä cuoma.

¹³ ¿Ö̦jö tawä? Isai bä ijilubö 3 bä jaba lä cublono wei, Saulo ebä ishobä jamö, bä wayu yädablou waiquilayoma. Abenaja ö̦jö bä a̦fa cublamoma. Jaba a lä cui, Eliaba a wa̦fa cuoma. Ö̦jö no jamö, Abinadaba. Ö̦jö no jamö, Sama.

¹⁴ David a lä cui, oshe bei a cuoma. Saulo lija, ö̦jö bada bä 3 lä cui bä ma yädäblono wei ma cui,

¹⁵ ö̦jamö David a yanöcöonomi. Saulonö cama ebä ca̦i wayu lä bälöqueno wei jamö a fublaama ma cui, Belena jamö bä fö̦ö oweja ebä nowamabä, a mö shi̦lo yabablaadima. ¿Ö̦jö tawä? Filideo a bada Coliado lä cui, Isaeli ebä nowa tabä showadi a shi̦lo bada wawäaö nö quiliadima.

¹⁶ Fena däjä a wa̦ bada wawäö fa fenablaonö, weyade a wa̦ bada wawäaö co̦oma. Inaja a cuaaö showai ja, 40 tä mö didi tablamalema.

¹⁷ Bei. David bä fö̦ö Isai a lä cuinö, abenaja bä ijilubö e nowa tama. —A̦iyäfä bä wayu lä bälöblale jamö, ei yaama mobä lä cui, nii 10 ji̦bä mö fedua lä cui, lobe etäbä da bälacudu.

¹⁸ Wayu ai cä a badanö bä ca̦i lä cule, wa e dobäö mö feduobä, ei queso 10 ebä. A̦iyäfä wa bä dodijidawä fa mönö, cama wa etä wai madofi fa dälänö, wa etä ca̦i co̦o co̦imabä, ya etä möbä —a nowa tama, bä nia demi cua showaa fa mönö.

¹⁹ ¿Ö̦jö tawä? Saulo a ma cui, David bä a̦iyäbö ebä ma cui, Isaeli ebä wayu bluca ma cui, filideo bä sho, Ela tä lä yaläle jamö bä ishobä, bä wayu bälödio showaoma.

²⁰ David a jocäblou fa fenablalonö, bä nia oweja nowamaö lä juo wei bä lija bä yalo fa dacöfälönö, a aa showalayofälöma. Isainö nii ebä ca̦i shimaö bufi lä doblaono wei, ebä ca̦i fua showadaaliyoma. Bä wayu lä bälöblale jamö David a blacäyoluu däjä, Isaeli ebä a̦ shi dolanö, bä nia lä ishou wei jamö bä bayäcäwä blacäö cuaama.

²¹ Isaeli ebä lä toujono wei bä ma cui, filideo bä co̦cao mö lä feduono wei bä ma cui, bä nia lä shäyono wei jamö, bä ublajao shaliliolaliyoma.

²² Madofi bä nowamabä a lija Davidnö etä bluca fa dacöfälönö, bä wayu lä ublajaono wei jamö, a läläa showalayofälöma. Bä a̦iyäbö ebä dodijidawä daa fa co̦lalönö,

²³ bä a̦ wayou showao däjä, filideo a bada wawäa co̦layoma, Cadateli a wa̦fa wayu Coliado lä cui. A wa̦ nö lä quiliadino weinaja a cuu lä co̦ono wei, Davidnö a wa̦ ji̦lilema.

²⁴ Coliado a dablaöje däjä, Isaeli ebä bluca docua co̦layoma. Bä quilii fe balojooma.

²⁵ Abenaja bä nowa showadi tayoma. —Filideo a lä wawäaö wei, ¿bei wama a möma daanö, bämalecö jo̦wa wabaö bufi lä doblao wei? Isaeli bämalecö nowa tabä a shi̦lo malä wawäadii wei. Ö̦jö a lä shäö wei, bada tänö a nö nia jo̦wa madofiböblamaö fe balojoo. A tääbö nia jo̦wa ca̦i jibäamou. ¿Ö̦jö tawä? Bada bä befi bä blada showadi lä nacamou wei, Coliado a lä shäö wei lija bä nia jo̦wa nacamou co̦daaimi. Bä fö̦ö e ma cui lija, bä fö̦ö enö bä ca̦i lä cule bä ma cui lija, bä nia jo̦wa nacamou co̦daaimi —bä nowa showadi tayoma.

²⁶ ¿Ö̦jö tawä? Bä ublajao lä ajedeono wei bä lija abenaja David a cuma. —Isaeli bäma ecö nö lä waiblalajei tä mladobä, quiji filideo a shäbä, ¿wedinaja a nia jo̦wa yai bayeliblamou cuo? Quiji filideo a lä cui, Jeobaa e lä mlai, ¿wedinaja cama a bufi li yai fa cunö, Yai Bada tä demi cua shi lä wa̦lile ebä wayu li wabaö bufi doblaa bashia cule? —David a cuma.

²⁷ Cama bä nowa showadi lä tayono weinaja, inaja showawä David a nowa tamaje. Coliado a lä shäö wei a nia jo̦wa bayeliblamou lä cuo wei tä a̦fa wäyämaje.

²⁸ ¿Ö̦jö tawä? Davidnö bä wa̦lii ja, Eliaba a yömöca daoma, bä a̦iyäbö bada e lä cui. David a wa̦ ja, a jushuo fe balojooma. Abenaja a nowa tama. —¿Wedi tabä eja wa li waloa bashiqueyoluu cufe? Ö̦jö oweja wa cöbä bolacadabö lä nowamaö wei, ¿wedi lija tä ulufi lä wa̦lidiono wei jamö wa cöbä li wa̦li daquei cufe? Cafä wa jimöo bufi lä doblao wei bä daö. Bei wa bufi cuaablalou lä ja̦too wei bä ca̦i daö. Täbä shäyobä jamö wa täbä nö daaö bädaobä, wa malä waloicufe —a jushuolanö a cuma.

²⁹ —Uo —David a cuma—. ¿Wedinaja ya lä cuaaö wei tä ja, wale a̦fa li lafujaö cule? Ya bä a̦ wayomaö bädao malä cui —a cuma.

³⁰ Ö̦jö däjä, ai bä lijamö a mö jadublou fa nomöjölonö, ö̦jö bä a̦ wayomaö nomöjöoma. Bä jaba wa̦lii däjä, a lä cuno weinaja, inaja showawä bä cuu co̦oma. A jaba lä yömölano wejei bä lä cuno weinaja, inaja showawä ebä ca̦i cuu mö feduo showaoma.

Saulonö David a lä wa̦lino wei tä a̦

³¹ David a wa̦ fa ji̦liläjenö, Saulo lija a wa̦no wäyämaje. Ö̦jö däjä, Saulo a lä cuinö a nacamaö bufima.

³² Saulo lijamö David a fa waloicunö, abenaja e cuma. —Bada tä. Coliado lija bä bufi nö bleaabä tämi. Wa wa̦ fuamobä ya waiquiwä. Quiji filideo a bada lä cubiyei lija, yafäcö shäyobä ya icuo weicätä —a David cuma.

³³ Abenaja Saulo a cuma. —Ma, quiji filideo a bada lija wa ishobä wami. Wa nö wa̦loblou mlaicätä. Yedu jamö a fiya osheo däjä a ishou daö showaoma a. Cafä wa oshe —Saulo a cuma.

^34-35 Ö̦jö ma cui, Saulo lija David abenaja a cuu mö feduoma. —Bada tä. Jaba däjä, fayä oweja ya ebä showadi nowamama. Yalo bä yai lä waiteli wei bä lija ya wabäoma. ¿Ö̦jö tawä? Oweja bä nabä fa queicujenö ai a weibofälööje däjä, ya bä nabä läläo showadaoma. Ya bä nosi fuliaö däjä, yalo ya bä fa shäablaanö, oweja a ma weibouje däjä ya bä fucäablaö co̦oma. Camiyä lija bä waitelimou mö feduo ja, bei bä caweicö ja ya bä fa fuwäablanö, ya bä shäablaö showadaoma. Öla bä bada ma cui, oso bä blewä ma cui, inaja ya bä taamama.

³⁶ ’¿Ö̦jö tawä, bada tä? —a cuma—. Öla ya bä shäö daö. Oso ya bä ca̦i shäö daö. Ö̦jö ya bä yalo lä taamano weinaja, quiji filideo Jeobaa e lä mlai, inaja showawä ya nia tablaö. Yai Bada tä demi cua shi lä wa̦lile ebä wayu wabaö bufi doblao bashiblao yalo, a nia shämou.

³⁷ Öla bä ja, Jeobaanö wale nowamama. Oso bä ma cui ja, inaja showawä. ¿Ö̦jö tawä? Inaja showawä quiji filideo a lä cui lija wale nia nowamaö cuo —a fa cunö, —Ja̦o. —Saulo a cuma—. A da isho. Jeobaanö wa ca̦i fa cuonö, wa bayeliblamou dodijiobä —a cuma.

³⁸ Ö̦jö däjä, Saulo a ishou däjä, a showadi lä nowamöono wei shibä ja, David a lucämalema, a famii mlaobä. Duo shibä ja, bä madofi lä tablamono wei täbä bada madofi ja. ¿Ö̦jö tawä? Saulonö tä showadi lä yojobono wei, David lija tä yojoquema, duo shibä ja tä bada lä tablamono wei. Inaja showawä Saulo a showadi lä didiono wei shibä ja, David a lucäa majömalema.

³⁹ Ö̦jö däjä, duo shibä ja a didia waiquilanö, Davidnö sibala a befi ca̦i ya̦bou feyacaobä a ma wabano wei ma cui, duo shibä bada fa fudäonö, a fuu doblonomi. Ö̦jö madofi bä ja, a didilanö a jaba wabäono malä mlai. Saulo lija abenaja a cuma. —Ei shibä ja ya didilanö ya fua doblou mlaicätä. Einaja ya cuaabä, ya jaba wabäono malä mlai —a fa cunö, shibä jayua co̦lalema.

⁴⁰ Cama fii efi shi̦lo fa dälänö, a alayoma. Mau boco u jamö, maa 5 mabä si cobejewä wai däa fa jayualalöfälönö, mabä wai didilefälöma. Mabä lä shäyäjamou wei tä däbou showalanö, filideo a bada lija a blacäö showaimama.

Coliado a lä shäleno wei tä a̦

⁴¹ Ö̦jö filideo a lä cui, David lijamö a ca̦i blacäö showadao mö feduimama. A famii mlaobä etä bada lä läbono wei, tä ca̦i bada balömaboma.

⁴² Filideo anö, David a yai möö däjä, “Fei sho yafäcö shäyobä”, a nofi tabonomi. Fiya oshe a malä cuono wei. A mömou liyäjäo showaoma. ¿Ö̦jö tawä? Dodijidawä a fiya mömou cuoma.

⁴³ Ö̦jö däjä, abenaja David a nowa tama. —¿Ji̦ima bei ya daanö, fii finö wale shäblalabä? Inaja a fa cunö, David a wajäblama. Cama ebä lä bufiblale ebä lija, a nabä shimöa showadaquema.

⁴⁴ Ö̦jö däjä, abenaja David lija a cuma. —Jabo, ö̦jö lä. Bä fa shälönö, yalo bä lija bä ya̦jicö wamabä. Bä lä yäö wei bä ma cuinö, bä ulufi jamö lä fuu wei bä ma cuinö, wa ya̦jicö wabeje —a cuma.

⁴⁵ Filideo a lija, abenaja David a cuu mö feduoma. —Sibala a ma cui, täbä blajawä niyablamobä tä bada ma cui, täbä diquiamobä tä wai ma cui, ö̦jö wa bä showabolanö wale nabä ma fuimi ma cui, Jeobaa a shi̦lo lofote lä ayai ya nofi mölabolanö, cafä bä nabä blacäö mö fedua lä cule. Ö̦jö wa wabaö bufi lä doblaofe a lä cui, Isaeli yama ecö wayunö yama a lä bufiblaö wei a.

⁴⁶ ’Bei —David a cuu co̦oma—. Camiyä lija, fei däjä Jeobaanö wa noshi nia ö̦jödabou. Bä nia shäö. Bä fe nia bäblaö. Filideo bä wayu lä cui, yalo bä lija ya bä ya̦jicö nia yai wamaö ayao. Bä lä yäö wei bä ma cui lija, bä ulufi jamö lä fuu wei bä ma cui lija, ya bä nia wamaö, jödödöwä bä lä bälöblai bä bufi jaducäblobä. Yai Bada tänö Isaeli yama ecö ca̦i lä cuo wei tä dablabeje.

⁴⁷ Jeobaanö täbä lä fucäaö wei tä ja, fei bä bluca lä yododale bä bufi ca̦i jaducäblou mö feduobä. ’¿Ö̦jö tawä? —a cuma—. Sibala a showabou ma mlajei ma cui, täbä blajawä niyablamobä tä bada showabou ma mlajei ma cui, Jeobaanö täbä yai bayelibou. Yamacö ishobä, Jeobaa a linö yamalecö nö wa̦lojomabou. Ö̦jö a linö camiyä yamacö lija wamacö noshi nia ö̦jödabou —David a cuma.

⁴⁸ Filideo anö David a nabä yai blacäimaö däjä, David yedu a nabä didädäaliyoma.

⁴⁹ Maa mabä lä didibono wei tä jamö, David imicö fa lucälönö ma dälema. Cama etä madofi ja ma fa tacönö, ma befi ca̦i fa ya̦wedomanö, filideo a lija ma shäyäa cadidia showadaquema. Bei wäyäcu ja, ema quea shalilia fa showadamacönö, ema daloa showalayoma. A bada quea mö lejeblaa showadaaquema.

⁵⁰ ¿Ö̦jö tawä? Maa ma bädawä ma cuinö, mabä shäyäjabä tä ca̦i bädawä ma cuinö, David a nö wa̦lojaö ayaoma. Sibala a tabou ma mlai ma cui, filideo a shäa showadaalema.

⁵¹ Ö̦jö däjä, filideo a lä quelayono wei ja, David a läläa fa nocaicunö, bei balöcö ja a fa lelequeicunö, e sibala ucälema. Cama e sibala yainö a shäa cadidilema. A fe bäblalema. Filideo bänö cama e nomaö fa dalalöjenö, bä bluca docuo showadalayofälöma.

⁵² Judawä ebä ma cui, Isaeli ai ebä ma cui, ö̦jö bä shi bluca doa fa showadaalunö, bä nosi dälefälömaje. Bä nosi lä boimadujei jamö bä shäö showaofälööje däjä, Cadöteli bä lä bälöle jamö, bä wayu waloquedayoma. Eclonoteli bä yafibö jamö bä lä fablaaö wei jamö ma cui, ö̦jamö bä wayu ca̦i waloquema. ¿Ö̦jö tawä? Cadateli bä bälöa lä blajale jamö ma cui, Eclonoteli bä bälöa blajawä mö lä fedule jamö ma cui, Salaimi yo jamö bä filideo lä shäfälöno wejei bä nomawä bluca yabucamaö cuaafälömaje.

⁵³ Isaeli ebä lä cuinö bä nosi fa dacöjenö, bä co̦o co̦imalanö, filideo bä wayu lä miblaono wei jamö bä madofibö bluca doaö jayuaö co̦ojolomaje.

⁵⁴ ¿Ö̦jö tawä? Davidnö filideo a bada lä shäleno wei fe ca̦i däa showalefälöma. Coliado a ishou däjä a lä nowamöono wei etäbä madofi ca̦i. Ya̦cumö Jelusale jamö fe bälamaquema. Ö̦jö ma cui, cama e yafi ja, etäbä madofi tabou showaoma, a nowamöobä etäbä bluca lä däleno wei.

⁵⁵ ¿Ö̦jö tawä? Davidnö filideo a nabä jaba lä blacäno wei däjä, Saulo a mamo showaoma. A waiteli dablaö ja, bada a lä yädämabono wei a wa̦lima, Anelo a wa̦fa lä cule. —Anelo. Quiji a fiyanö a nabä lä blacäle, ¿wedi bei ijilubö bei e? —a cuma. —Cuwi, bada tä —Anelo a cuma—. ¿Wedi e ijilu mada tawä? Quiji ya fiya daimi dodijiwä.

⁵⁶ Ö̦jö däjä, abenaja bada tä cuma. —Ö̦jö fiya bä fö̦ö e a̦ da wa̦li, ö̦jö lä —a cuma.

⁵⁷ Davidnö filideo a fa shälönö, fe ca̦i co̦imabä jamö, Anelonö a nacaa mö balema. Fe bou showalanö, Saulo lija fe ca̦i falayoma.

⁵⁸ Ö̦jö däjä, abenaja Saulo e cuma. —Fiya tä. ¿Wei bei ijilubö bei wa e? —a cuma. Abenaja David a cuu mö feduoma. —Belenateli Isai a wa̦fa lä cule, cafä wa wa̦ fuamobä a lä cui, ö̦jö bei ijilubö ya e —a cuma.