1 Samuel 13 - Biblia Yanowamö

Saulonö Jeobaa a wa̦ fuaö shaliliono lä mlai tä a̦

¹ Bufi dao a fiya cuo waiquio däjä, Isaeli ebä lija Saulo a jaba bada cuoma. A bada läo waiquio däjä, lasha 42 a famalema.

² Bei. Isaeli ebä ishou lä dao wei, Saulonö 3.000 bä yaialalema. 2.000 bä lä cui bä fa sheleleblamalönö, Mimasa jamö ai bä tamaboma. Bedele tä ulufi lä jefubö wei jamö, ai bä tamabou mö feduoma. Bä ijilubö Jonadana e lija, ai bä li 1.000 cuo mö feduoma. ¿Ö̦jö tawä? Cabaa jamö Jonadananö bä ca̦i cuoma, Bejamino ebä lä bälöblamono wei jamö. Ai bä cuo lä showaono wei bä lä cui, cama bä yafibö jamö, Saulonö bä bluca shimöa co̦lema.

³ Bei. Cabaa jamö filideo bä wayu lä bälöblaono wei, Jonadananö bä nö fa blemalalönö, cama filideo bä blucanö tä a̦ ji̦lilemaje. Ö̦jö däjä, Isaeli ebä bluca lä bälöjöi bä moyawämabä, täbä lä folaö wejei, Saulonö täbä a̦ folamaö bufima.

⁴ Cama Isaeli ebä blucanö, wa̦no wa̦no a wa̦ ji̦lia showadalemaje. “Filideo bä wayu lä bälöblaono wei, Saulonö bä jo̦wa shäalalema. ¡Fei däjä filideo bä yai jushuo fe balojowä!”, bä lä cuu wei tä a̦ ji̦lilemaje. ¿Ö̦jö tawä? Saulo lija bä co̦camoyolubä, Jicala jamö bä nacaa showadaalalemaje.

⁵ Filideo bä wayu toujou mö feduo showadaoma, Isaeli ebä nabä queobeje. Läläamodima bä ja, wayu bä befi ca̦i läläabä, filideo 30.000 ebä cuoma. Cabayo bä jamö, ai bä wayu befi ca̦i läläaö mö feduobä, 6.000 bä cuo mö feduoma. Bei bä mamicö jamö bä wayu lä funo wei, ö̦jö bei bä yai li blucao dodijioma. Modu u casö jamö mlaca mlaca bä nö wabamobimi lä culenaja, ö̦jö bä cuo mö feduoma. Ö̦jö däjä, filideo bä wayu fa itolufälönö, Mimasa tä ajede jamö bä nabä bälöaleyoluma. Bedabenateli bä lä bälöle tä mashi jamö bä wayu cuquema, motoca a faö lä cuaaimaö wei tä mashi jamö.

⁶ “Bämacö nö doblobimi waiquiwä”, Isaeli ebä bufi cuu däjä, bä quilili docuo mö baomobodayoma. Maa maca cabä jamö ma cui, ulufi jamö täcabä lä cublai jamö ma cui, bä quilili lucäolaliyoma. Maa mabä jamö ma cui, ai bä jo̦yablamou cuaama. Nomawä bä lä didiblai jamö ma cui, mau ubä lä bablai jamö ma cui, ai bä jitäblamou mö feduo showaoma.

⁷ Jodana u ja bä lä bucadublaaö wei jamö, ai bä bucadua fa showadabalunö, Cadö ebä ulufibö jamö ai bä doculayoma, Calaada tä ulufi jamö, ai. Jicala jamö Saulonö cama ebä ca̦i bluca cuo juo fe yadioma. Bä nö quilili bleaalanö, cama lija bä co̦cao fe yadio showaoma.

⁸ Samuel a nö dabou showao däjä, Saulonö 7 tä mö didi tablamalema, Samuel a lä cuno weinaja showawä. Ö̦jö ma cui a walonomi. Cama ebä wayu ca̦i lä cuono wei bä lä cui, bä quilili docublou ja̦toa yalo, bä mlaafälöma.

⁹ Ya̦cumö, abenaja Saulo a cudaliyoma. —Bä yalo nia ö̦shö lä dodobou wejei, äyämö bä ca̦i da fuimaje, Jeobaa bäma a wa̦ nia lä oquemaö wei bä ca̦i yalo showawä —a cuma. Bä yalo ca̦i fa waloicujenö, Saulonö bä ö̦shö dodoboma.

¹⁰ Bä yalo ö̦shö dodobou waiquiono wei ja, ö̦jö däjä showawä, Samuel a waloa jäquema. A wa̦ wayomaö mö baobä, Saulo a falayoma.

¹¹ —¿Wedi wa tä li taö dicooma? —Samuel a cuu mö baoma. Abenaja Saulo a cuma. —Iba bä quilili sheleleblaliyoma —a cuma—. Cafä wa nia ma waloono wei ma cui wa waloblonomi. Mimasa jamö filideo bä co̦camoa waiquilayoma. ¿Ö̦jö tawä? Ö̦jö ya tä bluca fa dalalönö,

¹² abenaja ya cuma. “Fei däjä, Jicala jamö filideo bänö wale nabä ma fuuje däjä ma cui, ¿wedi tabä Jeobaa lija ya nö bayeli nacaoimi?”, ya fa cudalunö, camiyä ma cuinö ya tä taö fe yadio cublei. Yalo ya bä ö̦shö dodoboma —Saulo a cuma.

¹³ Abenaja Saulo a nowa tama. —¡Wa bufi dao lä mlai! Jeobaa wa lä bufiblaö wei a lä cuinö, cafä lija tä tamaö lä bufii wei wa tä taö fa cunoja, wa nö bayeliblaö shi wa̦libö wei ma cui, wa tä tanomi. Isaeli ebä lija, dodijidawä wa bälöo shi wa̦libä, wa nö ma tabobö wei ma cui,

¹⁴ fei däjä ö̦jö tä nia cuomi. Afä bä nia bada läo nodiomi. Ai a nia bada läo majöo, Jeobaa a bufi nia lä doblamabou wei a lä cui. A nofi cadidibou waiquia lä cule. Cafä lija Jeobaanö tä tamaö lä bufino wei wa tä tanomi yalo, cama ebä lija ö̦jö a nia bada lämabou majöo —Samuel a cuma.