1 Samuel 12 - Biblia Yanowamö

Bä dodijaö juobä bä lä yömölano wei tä a̦

¹ Isaeli bluca ebä lija abenaja Samuel a cuma. —Bei. Wamale nowa lä tano wei bämacö a̦ bluca ji̦lilema. Wamacö nosiemabä, camiyä lija bada wama a yai tablamaö lä bufino wei, ya tablamalema.

² ¿Ö̦jö tawä? Bei. Wamacö nosiemabä, bada a bälöo lä dodijio weinö wamacö ca̦i cua lä cule. Camiyä ya wa̦lobada. Ya ca̦i iläbö waiquiwä. ¿Ö̦jö tawä? Cafä wamacö lija ijiluyä bä bälöa nomöjöa lä cule. Wamacö dodijabä, ya osheo däjä bämacö lä cadidamano weinaja, inaja ya cuaaö showawä.

³ ’Cafä wamacö lijamö ya ublaa lä cule —a cuma—. Wamale a̦fa wäyäbä tä cua ja, eja Jeobaa a lä cule jamö bä a̦ da fa. Cafä wamacö lija a bada läobä a lä yaileno wei a ca̦i malä cule, wamacö a̦ faö showadaobä. ¿Ö̦jö tawä? ¿Bei ya doblonomi? Baca a ma cui, bulo a ma cui, ¿wedi jamö a lä cui, bei ya e yalo däa lälema? ¿Wedi jamö bei ya mölamalema? ¿Wedi bei ya nö bleaamama? Ai ya bä a̦fa jole wäyäö buobä, ¿wedi lija bei ya e blada dälema? Wamale a̦fa wäyäö da showadaoje, ya bä däa lä lämono wei ya tä nowa bluca co̦amaö showadaobä —a cuma.

⁴ —Ma —bä cuma—. Yamalecö mölamanomi. Yamalecö nö ca̦i bleaamanomi. Moli ma cui, wa tä ca̦i madofi däaö läo bädaonomi —bä cuma.

⁵ —Ja̦o —Samuel a cuma—. Jeobaanö wamacö a̦ ji̦lilei lä cufe. Cafä wamacö lija a bada läobä a lä yaileno wei a ma cuinö wamacö a̦ ca̦i ji̦lilei lä cufe. Wamale dobloimi jimabä tä cuami waiquiwä —bei a cuma. —Bejedi lä —Isaeli ebä cuma—. Ö̦jö lija yamacö a̦ ca̦i ji̦liamou waiquia lä cule.

⁶ Ö̦jö däjä, Samuelnö bä bluca yömölaö ja, abenaja a cuma. —Ejido jamö wamacö nö badabö co̦abä, Jeobaa a lä cuinö, Moisesi, Aaloni cäcöbä yailema. Äyämö bä ca̦i cuaaö co̦imaböbä, bä co̦amaö bufima.

⁷ ¿Ö̦jö tawä? Eja Jeobaa a lä cule jamö, bämacö nowa nia lä taö wei, wamacö bufi yanöcölanö wamale a̦ da ji̦lilä, ö̦jö lä. Cafä wamacö nö badabö ma cui, cafä wamacö ma cui, Jeobaanö showadi wamacö bayeliblaö lä cuaafälöno wei tä ja, bämacö bufi nia jaducäblamaö co̦o.

⁸ ’Bei —a cuma—. Ejido jamö Jacobonö bä ca̦i lä waloqueno wei däjä, Ejidoteli bänö bä nö bleaamamaje. ¿Ö̦jö tawä? Bä nö fa bleaamajenö, Jeobaa lija bä nofi ojode tablamobä, bä a̦ nacläama. Ö̦jö däjä Moisesi, Aaloni sho, Jeobaanö cäcöbö shimölema, bä co̦amabä. Bä fa co̦malänö, eja bämalecö bälömabou nomöjöa lä culayoi —a cuma.

⁹ ’Ö̦jö ma cui, Jeobaa a bufiblabeje a ma cuono wei ma cui, a nofi mojodubomaje —a cuma—. A nofi mojodubomaje yalo, bä lä ishono wei däjä, bä noshi ö̦jödaboma. ¿Ö̦jö tawä? Sisalanö bä nö bleaamama. Ö̦jö a Sisala lä cui, Asoloteli a bada lija a yädäoma, Jabini a wa̦fa lä cule lija. Jabini ebä wayu luluboma. ¿Ö̦jö tawä? Filideo bä lija bä noshi ca̦i fa ö̦jödabonö, ö̦jö bänö bä nö ca̦i bleaamaö mö feduomaje. Moabateli a bada lija bä noshi ca̦i fa ö̦jödabonö, ö̦jönö ma cui, bä nö ca̦i bleaamaö mö feduo showaoma.

¹⁰ ’¿Ö̦jö tawä? —Samuel a cuma—. Bä nö lä bleaano wei däjä, Jeobaa lija bä nofi ojode tablamobä, bä a̦ shi̦lo nacläadima. Bä nö bayeli nacao ja, abenaja Jeobaa a nowa tamaje. “Yamacö dobloimi waiquiwä. Cafä Jeobaa bä bufiblaö fa mladalunö, bä lä bufiblalajei yama bä lämabou dicooma. Baala a ma cui, Adadei a ma cui, ö̦jö cäcöbä nö ijidubö lä cublai ja, yamacö nö bayeli nacao yalo yamacö dobloimi. Ö̦jö ma cui, bä nö lä nabämou wei bä lija, cafänö yamalecö bayeliblaö läo ja, cafä bä nosie fuaö cadidio weicätä”, a nowa shi̦lo tadimaje.

¹¹ ’¿Ö̦jö tawä? —a cuma—. Ö̦jö däjä, wamacö bayeliblaö läobeje, Jeobaanö bä shimama. Jedeoni a ma cui, Balaco a ma cui, Jedei a ma cui, ö̦jö bä bluca shimaö balöoma. Fei däjä camiyä Samuel ya ma cui, wale ca̦i shimaö nomöjöoma. Inaja a fa cuaanö, bä nö nabämou fe lä fa̦yoaö wei bä lija, Jeobaanö wamacö fa bayeliblanö, dodijidawä wamacö yanöcöwä bälöo majöoma.

¹² ’Fei däjä ma cui, inaja wamacö cuaaö showawä dicowä —a cuma—. Amonoteli a bada Naasa lä cui, wama a waitelimou dablaö däjä, camiyä lija abenaja wamacö cuma. “Ma, inaja mlai. Yamalecö ca̦i yai cuobä, bada wa yai läamabä”, wamacö cuu fe blacäjodii dicooma. Cafä wamacö lija, Jeobaa a nia lä blufiblamou wei a cua ma waiquio däjä ma cui, wamacö inaja cuma.

¹³ ’Ja̦o —a cuma—. Bada wama a wa̦fa lä bono wei, wama a tabou bufi doblao lä yaiono wei, fei a. Cafä wamacö lija a nosiemobä, Jeobaanö a lämaquei cublelei.

¹⁴ Jeobaa wama a nö quili taö ja, wama a wa̦ fuaö ja, dodijidawä wamacö nia cuo. Wama a wa̦ waibou mlai ja, tä nabä lä shimaö wei tä ja, wama a wa̦ yai ji̦liaö ja, tä nia dodijidao. ¿Ö̦jö tawä? Jeobaa wama a lä bufiblaö wei lija wamacö cadidou ja, wamacö ca̦i lä bälöo wei a ca̦i bada cadidou mö feduo ja, tä nia bluca dodijidao.

¹⁵ Ö̦jö ma cui, Jeobaa wama a wa̦ yai ji̦liblaimi ja, tä tamaö lä bufii wei wama tä taimi ja, wamacö nö nia bleaamaö. Cafä wamacö ma cui, badafä a ma cui, wamacö nö nia bluca bleaamaö.

¹⁶ ’¿Ö̦jö tawä?—Samuel a cuma—. Ö̦jö cudeenö wamacö fa yanöcöicönö, ei tä da möje. Cafä wamacö mamo showao däjä, Jeobaa a nö nia quiliaö.

¹⁷ Bei. Nii bä tamobä tä cua waiquia lä cule. Maa a fei däjä quebä tä cuami. Ö̦jö ma cui, a quei fe yadiobä, Jeobaa lija ya nia nacou. Maa a bada quemaö fe lä yadio wei tänö, ya̦lu a wa̦ famaö fe lä yadio wei tänö, wamacö doblou lä mlai wamacö bufi nö nia ö̦jöböamou. Jeobaa a cua ma cule, “Camiyä yamacö lija bada a yai läobä”, wamacö lä cuno wei, Jeobaanö wamacö nofi dobloimi tabou —a cuma.

¹⁸ Ö̦jö cudeenö Jeobaa lija Samuel a nacoma. A fa naconö, maa a bada quea showamalema. Ya̦lu a wa̦ ca̦i famaö showadaoma. Ö̦jö tä cublou däjä, Jeobaa a nö quili talemaje, Samuel a ca̦i.

¹⁹ Isaeli ebä bluca lä cui, abenaja bä cuma, Samuel lija. —Jeobaa lija yamalecö da bayelima, yamacö nomaö mlaobä. Cafä wa wa̦ fuamobä yamacö. Yamacö showadi dobloimi ma cui, fei däjä, “Bada a yai läobä”, yamacö cuu nofi jushuaö ja, bejedi lä yama tä balamaö mada cublei —bä cuma.

²⁰ —Bä quili dijä —Samuelnö bä nowa tama—. Bejedi lä, wamacö doblono ma mlai ma cui, bä bufi uomo dijä. Jeobaa lija wamacö cadidou fe fa yadionö, bei wamacö bufi yainö Jeobaa a wa̦ da fuaje.

²¹ Shomi täbä jole lä bufiblamou wei täbä lija, bä bufi cuaaö ja̦loa dijä. Ö̦jö täbä lä bufiblaö wejei täbä ja, bä bayeliblamoimi. Bä nö lä nabämou wei bä lija bä fucäamoimi. Nö bleaamamodima ö̦jö täbä waiquiwä malä cui.

²² Jeobaa a lä doblale, a wa̦fa tamou nofi fo̦lio cudeenö, cama ebä nia joyaö showadao malä mlai. Cama wama ecö cuobä, wamacö tabou bufi malä doblao wei.

²³ ’¿Ö̦jö tawä? —a cuma—. Camiyä ya ma cuinö, bämacö bayelimaö mladobä ya malä mlai. Bämacö bayelimaö mladou fa cunoja, Jeobaa lija ya nö dodijabö mlai. Ma, bämacö nia yai yömölaö, Jeobaa lija wamacö cadidou fe yadiobä. Dodijidawä wamacö cuobä.

²⁴ Ö̦jö ma cui, Jeobaa a nö shi̦lo yai quili da taje. Wamacö bufi yainö a wa̦ shi̦lo da fuaje. ¿Ö̦jö tawä? Wamacö showadi bayeliblaö fe lä balojoo wei tä ja, bä bufi da daeo.

²⁵ Ö̦jö ma cui, wa̦lidiwä tä ja wamacö shijilodoimi ja, bä nö lä nabämou wei bä lija wamacö noshi nia ö̦jödabou. Ö̦jö däjä, cafä wamacö ma cui, badafä a ma cui, shomi täbä lija wamacö nö nia bleaamamou showadao —a Samuel cuma.