1 Samuel 11 - Biblia Yanowamö

Saulonö Amonoteli bä nö lä bleaamano wei tä a̦

¹ Bei. Amonoteli a bada Naasa lä cuinö, Calaada jamö cama ebä wayu ca̦i fa alufälönö, Jabesiteli bä shabonobö fe fa̦yoblalemaje. Naasa a wa̦ nö quiliaö ja, Jabesiteli bä lä cui, abenaja bä cuma. —¡Ushu! ¡Inaja dicowä mlai, bämacö a̦ shi̦lo yai da wayo! Wamalecö nowa taö ja, bä a̦ ji̦liaö weicätä. Bä a̦ fuaö weicätä —bä cuma.

² Ö̦jö ma cui, abenaja Amonoteli a bada Naasa cuma. —Bei wamacö mamo yai balöwä —a cuu dicooma—. Dodijidawä wamacö boco jamö bämacö mamo nia ucäamaö balöo, Isaeli bluca wama ecö shi a̦fa flecowä tamobä. Ö̦jö däjä, bämacö nowa taö shalilio weicätä —a cuma.

³ Abenaja Jabesiteli bada bänö a nowa tamaje. —Yamalecö nö bleaamaö showadao mlai ja, bä yanöcöblaa da balöicu. ¿Ö̦jö tawä? 7 wama tä mö didi tablamaö däjä, Isaeli ebä lä bälöblai jamö yamalecö wa̦no wäyäbeje, yama bä shimaö cuaaö balöobä. Yamalecö bayeliblabeje bä cuami waiquiwä ja, cafä wamacö lija yamacö noshi ö̦jödao weicätä —a nowa tamaje.

⁴ Bä wa̦no wäyäbeje bä lä shimöleno wejei, Cabaa jamö bä waloquema, Saulo a lä bälöono wei jamö. Ö̦jamö bä fa waloicunö, bä bluca yömölamaje. Tä a̦ fa ji̦liläjenö, bä bufi bluca jaluaö ja, bä a̦ nö bleaama.

⁵ Bei. Saulo ficali ca jamö a ojodamoma. Ö̦jamö culanö a co̦blou ajedou co̦o däjä, abenaja a li cuma. —¿Wedinaja bä fa cuaanö, fei bä a̦ li dedea cubiyei? —a fa cunö, Jabesiteli bä wa̦no wäyämaje.

⁶ Ö̦jö bä a̦ fa ji̦lilänö, cama lija Jeobaa a Bufi fa yanöcöblaicunö, a bufi lofotomaboma. A jushudou fe balojolayoma.

⁷ Cama baca bolacabö ecöbä fa dälänö, cäcöbä baliquilalema. Cama a wa̦no wäyäbeje bä lija bä yalo balicama fa jibäcönö, Isaeli ebä lä bälöblai jamö bä ca̦i shimöabodayoma. Saulo a wa̦no wäyäöje ja, abenaja bä cuu cuaama. —Saulo lija bä yauo lä mlai, Samuel lija bä ca̦i yauo lä mlai, inaja showawä cama ebä baca nia jo̦wa tablamaöje —bä cuma. Ö̦jö däjä, Jeobaanö bä fa quilimalalönö, bä quilia fe balojolaliyoma. Saulo lija bä bluca icua nö mlaa showadaquema.

⁸ Beseque jamö Saulonö bä toujublamalema. Judawä nodiwä 30.000 ebä cuoma. Isaeli ai ebä mö feduwä lä cui, 300.000 bä cuo mö feduoma.

⁹ Jabesiteli bä wa̦no lä wäyäno wejei, abenaja bä nowa tamaje. —Afä Jabesiteli bä lija wamacö a̦ nö wäa co̦icu. Fena ja, motoca a yo̦loloblou showao mlao däjä, wamacö nia bayeliblamou showadao. Einaja wama bä nowa ta —bä nowa tamaje. Cama bä co̦blou fa co̦lonö, Jabesiteli bä yömölaö co̦ojolouje ja, bä bufi doblaloma.

¹⁰ Ö̦jö cudeenö Amonoteli bä lija abenaja bä jole cuma. —Cafä wamacö lija fenaja yamacö noshi nia ö̦jödao. Wamalecö taamaö bufi lä doblao weinaja wamalecö taamabä —bä nomojoli cuma.

¹¹ Ö̦jö tä fena ja, Saulo lija bä lä yauono wei bä lä cui, 3 bei bä shedequeblamalema. Bä lämou lä yaimou wei jamö culanö, Amonoteli bä lä bälöblaqueno wei jamö bä nabä faö fenablaomaje. Bä shäö showaoje däjä, motoca a yo̦loloblaliyoma. Amonoteli bä lä feiblaliyono wei bä läläjou fa shedequeomobodunö, bolacabö bä cudonomi.

Saulo a nö wa̦lojaö dablaöje ja bä shi lä jalimono wei tä a̦

¹² Ö̦jö däjä, Samuel lija abenaja bä cuma. —Saulo a nofi da wa̦liboblejei, “¿Wedi jamö tänö einö yamalecö nia li bayeliblaö?”, bä da cublei, ¿wedi jamö ö̦jö bei bä li? Eja bä ca̦i fuu showadaobeje, yama bä shäö showadaobä —bä cuma.

¹³ Ö̦jö ma cui, Samuel a wa̦ läoma. —Mlaicätä. Fei däjä, moli ma cui a nia shämoimi. Fei däjä Jeobaa a lä cuinö, Isaeli wama ecö yai bayeliblaö lälayoma —a cuma.

¹⁴ Ö̦jö däjä, abenaja Samuel a cuma, bluca bä lija. —Jicala jamö bämacö da fu. Ö̦jamö Saulo bäma a nia bada bälömabou lä dodijio wei tä ja, bämacö a̦ nö wäo co̦obä. Bämacö a̦ nö jaba da wäobleinaja showawä —a cuma.

¹⁵ Ö̦jö cudeenö Jicala jamö bä bluca fuu showadaoma. Jeobaa a lä cule jamö, wawädowä Saulo bada a tablalemaje. Jeobaa a wa̦ oquemabobeje, yalo bä ca̦i dodobomaje. Bä bufi doblalolanö Saulo, Isaeli ebä sho bä bluca iyama.