1 Samuel 10 - Biblia Yanowamö

Isaeli ebä lija a bada cuobä Saulo a lä yaimaqueno wei tä a̦

¹ Ö̦jö däjä, täbä lä jölöcaö wejei toubä dabö besi fa dälönö, Saulo a fe löblalema. Ö̦jö däjä, a fa̦locolanö abenaja a cuma. —Isaeli ebä lija wa bada cuobä, Jeobaanö wa bada tablamaö lä cule. Jeobaa ebä lija wa nia läo. Bä nö lä nabämou wei bä bälöblawä fe ma fayoblai ma cui, cafänö wa bä nia bayeliblaö läo. ¿Ö̦jö tawä? Cama ebä lija wa bada cuobä, Jeobaanö wa bada tablamaö waiquia lä cule. Jeobaa ya wa̦no lä wäyäle, wa tä bejedi dablabä, ei ya wa̦ —a cuma—.

² Camiyä wale fa dacöfälönö, Selisa jamö wa̦lo bolacabö wa cöbä mö nia baamafälöö. Laquela a nomawä lä didiqueno wejei jamö, ö̦jamö wa cöbä mö nia baamaö, Bejamino ebä ulufibö jamö. Wa nowa taböö ja, abenaja cäcöbä nia cuu. “Afä bulo bä lä mojolulayono wei, bä damoa co̦laliyoma, wa bä dayäaö mö lä alayono wei bä lä cui. Faafänö fei däjä yalo ebä nofi jalujubou mlai ja, cafä wa nofi yai jalujubou majöblaa dicoa lä cule. ‘¿Wedi jamö u̦asimi wa culayoma da tawä?’, a bufi cublalou lä cule”, cäcöbä nia cuu.

³ ’Ö̦jö däjä, wa aa fa co̦lufälönö, co̦lufälönö, Dabolo tä jamö fii fi bada lä ublale ja, wa nia waloo —a cuma—. Ö̦ja wa fa waloicunö, Bedele jamö Yai Bada lija bä nö bayeli nacaodayobä, 3 bä lä fuu wei bä lija wa nia waloo. Ai anö shibo 3 bä nia lulubou. Ai anö nii 3 ji̦bä nia bou mö feduo. Ai a mö feduwä lä cuinö, yalo si ja nashiwä toubä nia ca̦i besibou mö feduo.

⁴ Ö̦jö bänö wa wa̦ nia wayomaö mö baoje. Cafä lija nii bolacabö ji̦cöbä nia dodobouje. Ö̦jö wa cöbä nia däaö.

⁵ ’Ö̦jö däjä, Cabaa tä shabono ajede jamö, Yai Bada tä jefu lä ublale jamö, wa nia waloo nomöjöodayou, filideo bä wayu lä bälöblaladi jamö —a cuma—. Cabaa tä shabono ja wa blacädayou däjä, Jeobaa a wa̦no wäyälewä bä dimöimabä jamö, wa bä mö nia baamaö. Amowa fibä shäö lä daö wejei bänö, fibä a̦ nia ca̦i balöoje. Ai bänö a̦sita bä ca̦i nia futäöje. Ai bänö täbä madofi nia shäda shädamaö mö feduoje. Ai bä showawänö täbä madofi nia ca̦i folaöje. Ö̦jö lä bä no jamö, Jeobaa a wa̦no wäyälewä bä a̦ falanö, bä nia dimöö nodiaimaö.

⁶ ’Ö̦jö däjä, Jeobaa a Bufinö cafä wa fe nia waloo —a cuma—. Tä Bufi yanöcöblaa lofotoa fa showadaicunö, yedu wa wa̦ nia bädou mö feduo. Ö̦jö däjä, wa nia shomiblaliyo.

⁷ ¿Ö̦jö tawä? Ya tä a̦fa bluca lä wäyäfe tä bejedi wawäblou waiquia ja, wa tä taö bufi lä doblao weinaja, tä taö da showadao. Yai Bada tänö wa ca̦i malä cule.

⁸ ’Bei —a cuma—. Jicala jamö wa nia balöfälöö. Wale nö dabolanö, 7 wa tä mö didi nia tablamaö. Cafä lija ya waloo juo wä, Jeobaa bäma tä nofi co̦camoabä. Yalo ya bä ö̦sho nia dodobou. Jeobaa ya wa̦ oquemabobä, ai ya bä nia yalo dodobou mö feduo showao. Ö̦jö däjä, wa nia yai lä cuaaö wei ya tä wawämaö wä —Samuel a cuma.

Saulo bada a lä tablaleno wejei tä a̦

⁹ Samuel a daafälöbä, a mö lä yabadole däjä, Yai Bada tänö Saulo a bufi shomiblamaö showadalayoma. Ö̦jö tä mö jalu showawä ja, Samuelnö tä a̦ bluca lä wäyänö wei tä bejedi wawäblou showadalayoma.

¹⁰ Cabaa jamö bä waloo däjä, Saulonö Jeobaa a wa̦no wäyälewä bä mö baamalema. Ö̦jö däjä, Jeobaa a Bufi yanöcöblaa lofotoa fa showadaicunö, ö̦jö bä lija Jeobaa a wa̦no wäyäbä, a wa̦ yädäblaliyoma.

¹¹ ¿Ö̦jö tawä? Jeobaa a wa̦no wäyälewä bä a̦ lä fano wei däjä, Saulo a wa̦ ca̦i bädou fa dalalöjenö, Saulo a jaba lä dano wejei, bä bufi wedinajamou fe balojooma. Abenaja bä nowa tayoma. —¿Bejedi lä, Jeobaa a wa̦no wäyälewä bä lija, ö̦jö bei a ca̦i yädäa cadidia da culanö? Sisi bä ijilubö, ¿wedinaja bei e li cuaaö majöblaa cule? —bä nowa tayoma.

¹² Ö̦jöteli ai a wa̦ fuo ja, abenaja a cuma. —Sisi bä ijilubö e ma cui, a cuaaö dao lä. Bä fö̦ö enö mlai, Yai Bada tänö a li taamaö —a cuma. Ö̦jö cudeenö abenaja bä showadi cuu cuaama. “Jeobaa a wa̦no wäyälewä bä lijamö, ¿Saulo bei a yädäblonomi daanö?”, bä cuma.

¹³ ¿Ö̦jö tawä? Saulonö Jeobaa a wa̦no wäyäö fa waiconö, tä ulufi lä ösöi jamö a dolecou co̦ofälöma.

¹⁴ Bei. Saulo bä fö̦ö ai e lä cuinö, Saulo a wa̦ fuamobä e sho cäcöbä daa fa co̦lalönö, cäcöbä wa̦lima. Abenaja a cuma. —¿Wedi jamö bei wafäcö li fuu dodijioma? Abenaja Saulo a cuma. —Bulo bä lä mojolulayono wei yafä bä dayäaö cublelei. Yafä bä dablaimi yalo, Samuel lijamö yafäcö fuu nomöjöoma —a cuma.

¹⁵ Bä fö̦ö abenaja e cuma. —Samuelnö wafäcö lä yömölano wei tä a̦ da wäba, ¿ö̦jö tawä?

¹⁶ Abenaja Saulo e cuma. —Yalo bä damoa lä co̦laliyono wei tä a̦fa wäyäö shalilioma —a cuma. Ö̦jö ma cui, Isaeli ebä lija a nia bada lä cuono wei tä a̦fa wäyänomi. Samuelnö ö̦jö tä a̦fa lä wäyäno wei a wa̦no tanomi dodijiwä.

¹⁷ Tä fe fa weyadalunö, Misiba jamö Samuelnö bä bluca yododamaö bufima, Jeobaa a nofi co̦camoabeje.

¹⁸ Bä fa yododomacönö, Isaeli ebä lija abenaja a cuma. —Jeobaa ya wa̦no taö lä cule, Isaeli wama ecö lija a bufiblamobä a lä cui. Ejido jamö wamacö cuo däjä wamacö co̦lema. Ejido jamö bä lä bälöono wei bänö wamacö nö ma bleaamano wejei ma cui, wamacö bayeliblaö läoma. Bluca bä bälöjöwä lä yaiblai bänö, wamacö nö lä bleaamano wejei jamö, showadi ö̦jönö wamacö bayeliblaö cuaama.

¹⁹ ’Ö̦jö ma cui, ö̦jö wama a yai bufiblabä wamacö ma cui, fei däjä wama a waii —a cuma—. Wamacö ma yabäcamou wei jamö ma cui, wamacö nö ma bleaaö wei jamö ma cui, ö̦jönö showadi wamacö bayeliblaö ma cui, wama a waibou. Abenaja wamacö cuu. “Ma, inaja mlai. Yamalecö yai nosiemabä, bada a yai da tablamalö”, wamacö cuu dicoo. ¿Ö̦jö tawä? ’Ja̦o —a cuma—. Ö̦jö waiquiwä. Jeobaa lija bä da ajedeiquiyo. Isaeli bä ijilubö 12 ebä lija wamacö yaiablalou lä nodiaö wei, wamacö yaiblou fa cadidilonö, afä wama bä ca̦i ajedoimabä. Afä wa bä ca̦i lä cule wa bä ca̦i yaio showaobä —a cuma.

²⁰ Ö̦jö däjä, Isaeli ebä yaiablalou lä nodiono wei, Samuelnö bä bluca fa ajedemacönö, a nia bada lä cublou wei a wawäblou mömaje. ¿Ö̦jö tawä? Bejamino ebä yaimoa balölayoma.

²¹ Ö̦jö däjä, Bejamino ebä bälöjöwä lä yaiblai bä ajedamaö fa nomöjöonö, ö̦jö bä lija Madili ebä yaimoa nomöjölayoma. Ö̦jö bä shi̦lo yai ajedamaö fa nomöjöonö, ö̦jö bä lija Sisi bä ijilubö Saulo a yaimoa shalililayoma. Ö̦jö ma cui, wawädowä a jimabeje a ma dayäano wejei ma cui a dablonomi.

²² A dablou fa mlacunö, Jeobaa a wa̦limaje. —Ö̦jö a lä cui, ¿eja a cua showaa da culanö? —bä cuma. —A cua —Jeobaa a cuma—. Madofi bä jamö a jitäa lä cule.

²³ Ö̦jö däjä, bä fa lälälöfälönö, a co̦lemaje. Bä lä co̦camono wei bä lija a fa damolalunö, a yaläjäwä dalalemaje. Saulo bei facocu jamö bä fe bluca wädöblamoma.

²⁴ Abenaja Samuel a cuma, bä bluca lä co̦camono wei bä lija. —¿Jeobaanö a lä yaiale wama a dablaö cule? —a cuma—. Cama a lä culenaja, Isaeli ai e cuami waiquiwä. Ö̦jö däjä, bä a̦ shi bluca dolayoma. —¡Bada fei a shi̦lo yai cudiobä! —bä shi jalimolanö bä cublaloma.

²⁵ Ö̦jö däjä, Samuelnö bä bluca yömölalema. Bada anö bä ca̦i nia bälöo dodijio cudeenö, bä nia lä cuaaö wei tä ja bä nowa bluca talema. Tä a̦ ca̦i bluca oniblaö showalayoma. Tä a̦ bluca fa oniblalönö, Jeobaa a lä cule jamö si nowamöobä, si didiquema. Ö̦jö däjä, cama bä yafibö jamö bä shimöa co̦abodayoma.

²⁶ Saulo a ma cui, Cabaa jamö a co̦a showalayoma. Bä bufi nö lä wa̦lojoono wei bä lä cui, Saulo lija bä yaua showalayofälöma, Yai Bada tänö bä bufi lä taamano wei bä lä cui.

²⁷ Ö̦jö ma cui, bä doblou lä mlai ai bä a̦ lämoma. —¿Wedi jamö tänö einö bämalecö nia li bayeliblaö? —bä cuma. A nofi fa wa̦libojenö, bada a showadi lä dobäö wejeinaja a taamanomije. Ö̦jö ma cui, Saulo a wa̦ faö mlai, wamicai a cudioma.