1 Samuel 1 - Biblia Yanowamö

Samuel a oshe lä cublaliyono wei tä a̦

¹ Eflaini ebä lijamö, Lamaateli a bälöoma, tä ulufi lä jefubö wei jamö. Elecana a wa̦fa wa̦lo cuoma. Ö̦jö Elecana a lä cui, Eflaini nodiwä e cuoma. Bä fö̦ö Jeloama e a̦fa cuoma. Jeloama bä fö̦ö Eliu e a̦fa cuoma. Eliu bä fö̦ö Dou e a̦fa cuoma. Dou bä fö̦ö Sufu e a̦fa cuoma.

² Ö̦jö Elecana a lä cuinö bä suwäbö ecöbä bolacaboma. Ai e lä cui, Ana e a̦fa cuoma. Ai e mö feduwä lä cui, Benina e a̦fa cuo mö feduoma. ¿Ö̦jö tawä? Benina bä ijilubö ebä shi̦lo cuoma. Ana bä ijilubö cuonomi.

³ Ö̦jö a wa̦lo lä cui, abenaja a showadi cuaama. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, Silo jamö a shi̦lo fublaadima, ö̦jamö lä a möfe bolanö, Jeobaa a wa̦fa Bada doblao tabä. Yalo a fa shämalönö a ca̦i dodoblaadima, Jeobaa a nö shi̦lo wa̦lojaö lä ayai lija. ¿Ö̦jö tawä? Ö̦jamö nofi bäyäalewä Eli bä ijilubö ecöbä ojodamoma, Jeobaa lija. Täbä nofi bäyäaböma. Ai a lä cui, Ofini e a̦fa cuoma. Ai e mö feduwä lä cui, Finesi e a̦fa cuo mö feduoma.

⁴ ¿Ö̦jö tawä? Elecananö yalo a lä dodobono wei a shämaö däjä, showadi ebä mashi shelelaö showaoma, cama ebä iyabä. Bä suwäbö Benina e sho, ö̦jö bä ijilubö ebä sho, bä tää ebä sho bä bluca iyabä ebä jibäama.

⁵ Bä suwäbö Ana a ma nofimano wei ma cui, moli ebä shi̦lo yalo jibädama. Ijilu bä ja, Jeobaanö a dobäö fa mlacunö, moli bä shi̦lo taama.

⁶ Elecana bä suwäbö ai e lä cuinö, Benina a wa̦fa lä cuono wei a lä cuinö, Ana a yabäcadima. Cama a ijilubö cua ayaa ja, Ana a nö waiblama.

⁷ Inaja a showadi cuaaö dicooma. Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, Jeobaa etä yano jamö bä fuu lä co̦ono wei däjä, inaja showawä Ana a showadi yabäcaö co̦oma. Inaja a cuaama cudeenö, ya̦cumö Ana a öcölayoma. A iyanomi.

⁸ Bä fe̦yalobö Elecananö a wa̦lii ja, abenaja a cuma. —Ana. ¿Wedi tabä wa li ö̦cöö cule? ¿Wedi tabä wa ca̦i iyaimi? Wa bufi nö bleaabä tämi. Ijilufä 10 wa bä tabobä bä cuami ma cui, camiyä ya malä cule. Cafä lija ya bufi mö lä blucale, ¿tä nowa cuami tawä? —a cuma.

⁹ Ai däjä, Silo jamö bä fuu fa co̦onö, bä iyama. Bä iyaö fa waiconö, Ana a jocädou fa showadalonö, Jeobaa etä yano jamö a icuquema. Ö̦ja yoca lä jolale jamö, nofi bäyäalewä Eli a looma. ¿Ö̦jö tawä?

¹⁰ Ana a bufi nö bleaalanö, Jeobaa lija a nö bayeli nacaoma. A mö ö̦cödima.

¹¹ Jeobaa lija a wa̦ nö wäo ja, abenaja a cuma. —Cafä Jeobaa wa nö wa̦lojaö lä ayai lija, ya wa̦ faö lä cule. Ya shi̦loco nö lä bleaale, wale nofi da ojodadalö. Cafä wa wa̦ fuamobä ya. ¿Ö̦jö tawä? Wale nofi da jaducälä. Cafä bä a̦ fuabä ya lä cui, wale nofi mojodubou mlai ja, ijilu a ja wale da bayeliblaliyo. Inaja wale taamaö ja, cafä Jeobaa wa lija ya nia coamaö mö yabao co̦o. A demöo showai ja, afä a cudiobä ya nia yaimabou. *Afä a nö ö̦jöböamobä, obi ma cui ya möcö nia bäblamaimi —Ana a cuma.

¹² Jeobaa lija Ana a wa̦ faö showao däjä, Elinö caficö mödima.

¹³ Bei bufi yainö Ana a bayeliblamou bufioma cudeenö, bei caficö qui̦da qui̦damou buoma. A wa̦ yai ji̦lionomi. Ö̦jö cudeenö, “Shi wa̦limamodima toubänö, a shi nofi wa̦lii yai a lä cule”, Elinö a nofi taboma.

¹⁴ Ö̦jö däjä, Elinö a nowa taö showadaoma. —Inaja wa shi wa̦lii ja, ¿bei wa nia cuaadii? Nashiwä toubä coaö co̦daa dijä —e cuma.

¹⁵ Ö̦jö ma cui, Ana a wa̦ fuo ja, abenaja a cuma. —Ma, bada tä. Nashiwä ya toubä coanomi. Täbä shi lä wa̦limamou wei ai toubä ma cui, ya toubä ca̦i coaö bädaonomi. Bei ya bufi nö lä bleaale, Jeobaa lija ya tä a̦ bluca wäyäö lä cufe.

¹⁶ “A nofi dobloimi yai”, wale nofi tabou dicoo dijä. Cafä wa wa̦ fuamobä ya. Ya bufi fo̦lijou fe balojoo cudeenö, ya bufi ca̦i yabäcamou cudeenö, ya nö bayeli nacao lä cufe —Ana a cuma.

¹⁷ Ö̦jö däjä, Eli a wa̦ fuo ja, abenaja a cuma. —Joo. Inaja waiquiwä. A bufi yanöcöwä ca̦i da co̦jamö. Isaeli bäma ecö lija a lä bufiblamou wei a lä cuinö, wa nö bayeli lä nacaofe tä a̦ fa ji̦lilänö, wa yai bayeliblabä —a cuma.

¹⁸ —Awei, inaja lä —Ana a cuma—. Cafä bada bä a̦ fuabä ya lä cui, dodijidawä wale nofi tabobä —a cuma. Ö̦jö däjä, Ana a aa co̦layoma. A iyaö co̦oma. A mömou liyäjäblou co̦layoma.

¹⁹ Ö̦jö däjä, bä jocäblou fa fenalunö, Jeobaa e yano jamö, bä icua fenaquema. Bä möfe bolanö, a wa̦fa Bada doblao taö fenablaomaje. Ö̦jö däjä, cama bä yafibö jamö, bä co̦a co̦layoma, Lamaa tä ulufi jamö. Ö̦jamö bä co̦a fa co̦lunö, Elecana bä suwäbö Ana sho cäcöbä yacao co̦oma. Jeobaanö Ana a nofi fa jaducäbonö

²⁰ a shibänabölayoma. Bä ijilubö e tablalema. A fa tablalönö, e a̦fa jilaquema. Ijilu a lä cui ja, Jeobaanö a dobälema yalo, Samuel e a̦fa jilaa showadaquema.

Jeobaa lija Samuel a oshe lä yaimaqueno wei tä a̦

²¹ Bei. Lasha a faö lä co̦le däjä, Jeobaa etä yano jamö Elecananö cama ebä ca̦i bluca showadi lä funo wei tä cublou co̦o däjä, cama ebä ca̦i fuu co̦oma, Jeobaa lija yalo bä ö̦shö dodobou co̦obä. A wa̦ nö lä wäono wei tä ja, Jeobaa a nia ca̦i dobäma.

²² Ö̦jö ma cui, Ana a funomi. Bä fe̦yalobö lija abenaja a shi̦lo cuma. —Ijiluyä aca jayoblou däjä, ya nia ca̦i shi̦lo fuu, Jeobaa a lä cule jamö a cudalobä. Ö̦jamö a cudio shi wa̦libä —a cuma.

²³ Abenaja bä fe̦yalobö Elecana a cuu mö feduoma. —Ja̦o. Wa bufi lä cuu weinaja, a ca̦i da cuaa. Ijilu aca nia lä jayoblou wei tä ja, wa nö dao balöobä. Jeobaa lija wa bayeliblamou bufio ja, wa wa̦ nö lä wäqueno wei tä bejedi cublobä —a cuma. Ö̦jö cudeenö bä ijilubö e aca jayoblou showao mlao däjä, bä nöö enö a ca̦i cudio balöoma.

²⁴ Aca jayoblou däjä, Silo jamö a ca̦i fuma, Jeobaa etä yano jamö. Lasha 3 a lä famaleno wei a baca lulubomaje. Nii ji̦bä ca̦i bada besi bälaö showaomaje. Yalo si ja, nashiwä toubä befi ca̦i showawä. ¿Ö̦jö tawä? A ijilu osheo showaoma.

²⁵ Ö̦jö däjä, baca a shälejelomaje. Nofi bäyäalewä Eli a lä cui lijamö, ijilu a ca̦i fumaje.

²⁶ Ö̦jö lija abenaja Ana a cuma. —Bada tä. Camiyä cä ya. ¿Ö̦jö tawä? Cafä badayä wa lija ya da ublaoblei, Jeobaa lija ya nö bayeli da nacaoblei, ö̦jö ya showawä. Bejedi lä ya wa̦.

²⁷ Ei a ijilu lä cui ya nacama. ¿Ö̦jö tawä? Jeobaa lija ya fa naconö, wale dobälema.

²⁸ Ö̦jö cudeenö, Jeobaa ya e co̦amaö lä cule. A demöo showao däjä, Jeobaa e cuo cadidiobä, ya e majöaö lä cule —a cuma. Ö̦jö däjä, bä möfe bolanö, Jeobaa a wa̦fa Bada doblao tamaje.