1 Reyes 19 - Biblia Yanowamö

Olebe cäcö jamö Elia a lä doculayono wei tä a̦

¹ Elia a lä cuaano wei, Acabanö tä a̦ bluca wäyäö co̦joloma, bä suwäbö e lija. Baala a wa̦no wäyälewä bä bluca lä shäalaleno wei tä a̦ ca̦i.

² Ö̦jö däjä, Elia lija Jesabela a wa̦no wäyämobä, ai e fa shimölönö, abenaja e cuma. —Jesabela ya wa̦no wäyäö lä cule. Baala a wa̦no wäyälewä wa bä lä taamano weinaja, fena ja ei nashomi tä cublou co̦o showaa mlai ja, inaja showawä cafä wa nia jo̦wa taamaö nomöjöo. Bejedi lä, a wa̦ nö quiliama —a cuma.

³ Ö̦jö a wa̦no fa ji̦lilänö, Elia a quililaliyoma. A quilili docua fa showadalunö, Beeseba jamö a jayuquefälöma, Judawä nodiwä ai ebä lä bälöono wei jamö. A nosie fuamobä e lä cui, ö̦jamö a daquefälöma.

⁴ Ö̦jö däjä, ulufi bloque jamö a fe doleblou fa showadalonö, fii tefi cotä ja a weyade loaliyoma. A fa loalunö, a bufi mlao showadaobä, Jeobaa lija a nacoma. Abenaja a cuma. —Jeobaa wa tä. Fei däjä, inaja lä waiquiwä. Bei. Wale bufi da co̦lö. Iba bada bä jaba lä cuono wei bä doblou lä mlaono weinaja, inaja showawä ya cuwä mö malä fedui —a cuma.

⁵ Ö̦jamö, fii tefi cotä jamö a fa blaalunö, a mialiyoma. Ö̦jamö a mio ca̦i blao däjä, a̦jele tä fa wawäblalunö a jushulema. —A da jocäblalu, wa iyabä —e cuma.

⁶ Elia a fa la̦lönö, täbä möö cuaama. Bei fe lä blaono wei tä ajede jamö, maa mabä yoblinö nii e fa löböblalönö, e blaoma. Mau u besi ca̦i i̦tao yädäo mö feduo showaoma. A fa iyalönö, a amishi fa co̦alunö, a blaa co̦aliyoma.

⁷ Ö̦jö däjä, Jeobaa etä a̦jele wawäblou fa co̦lonö, a jushua fa co̦lunö, abenaja e cuma. —A jocäblou da co̦lu. A da iya. Wa nia lä fuu wei jamö, wa nö wa̦loblou mlaa dicoicu —e cuma.

⁸ Elia a jocäblou fa showadalonö, a iyama. A amishi co̦o co̦oma. A lä iyano wei tänö a fa lofotoblalunö, Olebe cäcö jamö a aa showalayoma, Yai Bada etäcö balöcö jamö. A fuu showai ja, 40 a fe didi cublaliyofälöma ma cui, ö̦jö bä nii lofote showawänö, a nö blajawä wa̦lojaö fe yadiofälöma.

Elia lija Jeobaa a lä wawäblaliyono wei tä a̦

⁹ Ö̦jamö maa maca jamö a fa waloicudunö, a bälöblaquema. Ö̦jamö a culanö, cama lija Jeobaa a wa̦ bädaliyoma. Abenaja e cuma. —Elia. Eja ¿wedi wa tä taö cuboyoi? —e cuma.

¹⁰ Abenaja Elia e cuma. —Isaeli ebä lä cuaaö wei tä nowa ja, cafä Jeobaa bä nofi jalujubou dodijiwä, wa shi̦lo lofote lä ayai wa lä cui. Wa bä nowa lä tano wei tä a̦ joyalemaje. Cafä lija yalo bä lä dodoblamou wei bä maqueblamobä, täbä ca̦i wa̦lialalemaje. Sibala sibänö wa wa̦no wäyälewä bä ca̦i shäalalemaje. Camiyä yami ya feiquia lä cule. ¿Ö̦jö tawä? Camiyä ma cui wale ca̦i dayäaöje, wale shäbeje —e cuma.

¹¹ Abenaja Jeobaanö a nowa tama. —A da falö. Bei cäcö jamö a da wawäblaliyo, camiyä Jeobaa ya lä cule jamö, a da ublaicu —a nowa tama. Inaja a nowa fa tanö, Jeobaa a jayuquema. A lä jayuano wei jamö, wadoli a bada lofotenö, macö bada wa̦lioa nö quililaliyoma. Jeobaa a lä cuono wei jamö, mabä ca̦i ma co̦jijilaliyono wei ma cui, wadoli a jamö Jeobaa a wawäblonomi. Wadoli a nodi jamö, cäcö bada löda lödamou nö quiliaö nomöjöoma ma cui, ö̦jamö ma cui, Jeobaa a ca̦i wawäblonomi.

¹² Tä ulufi lä löda lödamono wei tä nodi jamö, cowa wacä bada wawäö nomöjölayoma ma cui, ö̦jö tä ma cui jamö, Jeobaa a ca̦i wawäblonomi showawä. Cowa wacä nodi jamö, a wa̦ shi̦lo wai wajadou bädou nomöjölayoma.

¹³ Elianö a wa̦ ji̦liaö däjä, sicö lä lucäbono wei sicönö a mö fa jo̦yaicunö, a siboa co̦layoma. Maa maca jamö bä lä lucäblou wei jamö, a ublaquema. Ö̦jö däjä, cama lija a wa̦ bädaliyoma. —Elia. Eja ¿wedi wa tä taö cuboyoi? —e cuma.

¹⁴ Abenaja Elia a cuu co̦oma. —Isaeli ebä lä cuaaö wei tä nowa ja, cafä Jeobaa wa lä cui lija, ya bufi wajäaö a lä cule, cafä wa shi̦lo lofote lä ayai wa lä cui lija. Wa bä nowa lä tano wei tä a̦ joyalemaje. Cafä lija yalo bä lä dodoblamou wei bä maqueblamobä, täbä ca̦i wa̦lialalemaje. Sibala sibänö wa wa̦no wäyälewä bä ca̦i shäalalemaje. Camiyä yami ya feiquia lä cule. ¿Ö̦jö tawä? Camiyä ma cui, wale ca̦i dayäaöje, wale shäbeje —e cuma.

¹⁵ Abenaja Jeobaanö a nowa tama. —Bei. A mö yabaa da co̦lufälö, Damaco tä ulufi bloque jamö. Wa waloo däjä, Silia tä ulufi jamö Asaeli a nia bada läo lä majöo wei a lä cui, täbä lä jölöcamou wei toubä dabönö wa nia jölöcöblaö.

¹⁶ ’Inaja showawä, Isaeli ebä ulufibö jamö Jeu a nia bada läo mö feduo lä majöo wei a lä cui, ö̦jö wa nia ca̦i jölöcöblaö mö feduo showao, Nimisi bä ijilubö e lä cui —a cuma—. Inaja showawä, cafänö wale a̦no wäyäö lä cuaalenaja a cuaaö juo majöobä, Eliseo wa nia ca̦i jölöcöblaö, Abemeolateli Safada bä ijilubö e lä cui.

¹⁷ ’Asaelinö sibala a ca̦i nö bada waiteli quiliaö däjä, bä lä documaö wei bä lä cui, Jeunö bä nia shäö —a cuma—. Jeunö sibala a ca̦i bada waitelimou däjä, bä lä documaö wei bä lä cui, Eliseonö bä nia shäö.

¹⁸ ¿Ö̦jö tawä? Isaeli ebä lijamö iba 7.000 ya bä nia feiquibou fe yadio, Baala a jole lä bufiblamou wei a nö ijidubö cotä jamö bä möfe boo lä mlai, ö̦jö mamocacö buicaö lä mlajei —Jeobaanö a nowa tama.

Eliseo a lä yaimaqueno wei tä a̦

¹⁹ Ö̦jö cudeenö, Elia a aa showalayofälöma. Safada bä ijilubö Eliseo a dablaö däjä, ficali eca jamö a ojodamoma. Nii ebä faö dodijidaobä, mashita a mö jaduaö cuaama, madofi a bada namo fudenö. Baca 24 ebä lija a shaimaboma. ¿Ö̦jö tawä? Baca bei olafi jamö fii efibä bada fa maqueabodunö, shaliliwä bä o̦cadaö bolacadama. Cäcöbä lä coloono wei cäcöbä no jamö, Eliseonö a madofi fuwäbolanö a colooma. ¿Ö̦jö tawä? Elia a jayuaö däjä, sicö lä lucäbono wei sicö fa jayulänö, Eliseo lija sicö shäyäblaa jayuquefälöma, a nia fa nocamabonö.

²⁰ Yedu baca ebä daa fa showadaacöfälönö, Elia lijamö a läläa yaua jälayofälöma. Abenaja e cuma. —Fayä, nayä, ö̦jö ya cöbä nofimaö balöobä, ya nia co̦o co̦o balöofälöö. ¿Ö̦jö tawä? Ö̦jö däjä, cafä lija ya nia nocao —e cuma. —Ja̦o. Wa co̦obä lä —Elia e cuma—. Bä wasöö malä mlai.

²¹ Elia sho cäcöbä lä funo wei jamö culanö a fa co̦lunö, baca bolacabö ecöbä fa fuwälönö, cäcöbä shälema. Bei olafi jamö fii efi bada lä maquemabono wei, ö̦jö tefi wacä showawä ja, baca bei ya̦jibä löbölalema. Ö̦jö bä löbö ja cama ebä fa iyamalöfälönö, ö̦jö däjä Elia lijamö a fua cadidia showalayofälöma. Elia lijamö a yaua fa showadalofälönö, a bayelibladii cuaama.