1 Reyes 18 - Biblia Yanowamö

Bada tä Acaba lija Elia a dablamou lä co̦ono wei tä a̦

¹ Tä nö fa dedelönö, maa a quei showao mlao däjä, lasha 3 a faö co̦oma. Ö̦jö däjä, Elia lija Jeobaa a wa̦ wawäa co̦layoma. Abenaja Elia lija a cuma. —Bei. Ei tä lä cui däjä, Acaba a bada lija a da wawälö. Maa ya shimaö bufijou co̦a lä cule —a cuma.

² Ö̦jö cudeenö, Acaba lija Elia a nia fa wawäblonö, a aa showalayoma. ¿Ö̦jö tawä? Nii bä cuami ja, Samalia jamö, bejedi lä bä nö yai bleaaö fe balojooma.

³ Acaba a bada lä cuinö, cama e yafi jamö a bada lä lämabono wei a nacalema. Abadia a wa̦fa cuoma. ¿Ö̦jö tawä? Abadia a lä cuinö, Jeobaa a nö quili taö dodijioma.

⁴ Ö̦jö Abadia a lä cui, Acaba bä suwäbö Jesabela e nofi lä jushuano wei däjä, ö̦jö a läblou ja̦tolayoma. Ö̦jö a suwänö Jeobaa a wa̦no wäyälewä bä lä shämano wei däjä, 100 ai bä co̦a fa ja̦toalalönö, Abadianö bä jo̦yamaboma. Maa ai maca ja, 50 bä didimaboma. Ai maca mö feduwä jamö, ai bä 50 didimabou mö feduo showaoma. Ö̦jamö bä jo̦yamabolanö bä iyamaö ja̦tomoma, bä amishi ca̦i co̦amaö ja̦tomoma.

⁵ Ö̦jö Abadia a lä cui lija abenaja Acaba a bada cuma. —Ei tä ulufi blaucuwä jamö wa fuu fa cuaanö, mau u fe lä jojoblai jamö ma cui, tä jödödöwä lä yalöi jamö ma cui, moimoima a cua da mö. Cabayo bä ma cui, bulo bä ma cui, bäma bä demi tamabou fe yadiobä. Yalo ai bäma bä nomamaö mlaobä, bäma a moimoima daa bälalei fa cui —a bada cuma.

⁶ Ö̦jö cudeenö, tä ulufi bluca jayuyaböö cuaafälöbä, tä jimaö mö feduduoma. Ai tä mashi jamö Acaba a bada yami jayuaö cuaafälöma. Ai tä mashi mö feduwä jamö, Abadia yami a jayuyou cuaaö mö feduo showaofälöma.

⁷ ¿Ö̦jö tawä? Abadia a lä cuaaimadi jamö, yedu Elia a mö bamalema. Abadianö a nö ö̦jöböa fa showadalönö, mashita jamö yedu a möfe boaliyoma. Abenaja Abadia e cuma. —¿Cafä Elia bei wa, bada tä? —e cuma.

⁸ —Ö̦jö ya —Elia e cudou mö fedulayoma—. Afä bada a da yömöladu. Eja ya lä cule wale a̦fa wäyädayobä —Elia e cuma.

⁹ —Shädayai —Abadia e cuma—. ¿Wedi tä ja ya doblou fa mlacunö, Acaba lija wale nia shämaö dicoo? Cafä wa nosie fuamobä cä ya. ¿Wedi tabä ö̦jö lija wale noshi ö̦jödabou dicoa cule?

¹⁰ Jödödöwä bä bälöjou lä yaiblai bä lijamö ma cui, bada bä blucanö bä ca̦i lä culajei bä lijamö ma cui, cafä wa dayämaö jödödou bufii waiquia lä cudi, Acaba a badanö. Wa wa̦fa cuami taöje ja, bä a̦ nö wäamaö nö quiliama. Ya jolemoimi. Jeobaa a malä cule, cafä lija a lä bufiblamou wei a lä cui.

¹¹ Ö̦jö ma cui, “Afä bada a da yömöladu”, wale nowa taö dicoo lä cufe, eja wa lä cule wa wa̦fa wäamodayobä.

¹² ’¿Ö̦jö tawä? —a cuma—. Ya fulayono wei ja, Jeobaa a Bufinö wa nia shomi jamö bälaö juo ja̦too, “Quijamö daanö”, ya bufi nö cubö lä mlai jamö. Inaja tä fa cuonö, Acaba a bada lija cafä bä a̦fa wäyäö ja, eja wa nia ma dayäaö wei ma cui, wa dablaimi tä nowa ja, wale nia shäö. ¿Ö̦jö tawä? Cafä bä nosie fuamobä ya lä cuinö, ya fiyao däjä Jeobaa ya nö quili lä tano weinaja ya cua lä showale däjä ma cui, wale nia shämaö —e cuma.

¹³ ’¿Ö̦jö tawä? —Abadia e cuu co̦oma—. Jesabelanö Jeobaa a wa̦no wäyälewä bä lä shäleno wei däjä, camiyä ya lä cuaano wei, ¿cafä bä nofi lä badabou wei wa lija, wale a̦fa wäyänomi sijewä? Jeobaa a wa̦no wäyälewä 100 ai ya bä fa co̦alalönö, ya bä jitäboma. Maa ai maca jamö 50 ya bä jo̦yamaboma. Ai maca jamö ai ya bä 50 jo̦yamabou mö feduo showaoma. Ö̦jamö bä cuo däjä ya bä bluca iyamama, ya bä amishi ca̦i co̦amama.

¹⁴ Ö̦jö ma cui, ya ma dodijano wei ma cui, “Afä bada a da yömöladu”, wa cuu dicoo lä cufe, eja wa lä cule wa wa̦fa wäamodayobä. Wale nia shäö dicoo —e cuma.

¹⁵ Abenaja Elia e cuu mö feduoma. —Ma –e cuma—. Acaba lija, fei däjä ya nia yai dablamou. Ya jolemoimi. Jeobaa a lofote lä ayai a malä cule, ya nosie lä fuaö wei a lä cui —e cuma.

¹⁶ Ö̦jö cudeenö, Acaba a mö bada baamadayobä, Abadia a fua showalayoma. A fa yömöladunö, Elia a möbä, ö̦jamö Acaba a fua majölayoma.

¹⁷ Elia a yai dablaö däjä, abenaja Acaba e cuma. —¿Cafä bei wa, Isaeli nodiwä wa ebä lä yabäcale? —e cuma.

¹⁸ Abenaja Elianö a nowa taö mö feduoma. —Camiyänö Isaeli ya ebä yabäcaimi. Cafänö wa bä li yai yabäcaö. Jeobaanö tä tamaö lä bufii wei wama tä a̦ joyaö dicoo ja, Baala a nö ijidubö bluca jamö, wamacö bufi fa yauicunö, faafä wama ecö blucanö Isaeli wama ebä yai li yabäcaö lä cule.

¹⁹ ’Bei —Elia a cuma—. Camela cäcö jamö, Isaeli ebä bluca dolecofälöbä, bä da nacaabodu. Ö̦jamö camiyä lijamö bä waloyolubä. Baala a jole lä bufiblaö wejei, ö̦jö a wa̦no wäyälewä 450 bä ca̦i, Asela a jole bufiblaö mö lä feduo wejei, ö̦jö tä a̦no wäyälewä 400 bä ca̦i, Jesabelanö bä showadi lä iyamadii wei —a cuma.

Elianö Baala ebä lä wabano wei tä a̦

²⁰ Ö̦jö cudeenö, Acabanö cama ebä fa shimöabodunö, Isaeli ebä bluca nacaamalalema. Täbä jole lä bufiblamou wei bä a̦no wäyälewä bä ca̦i bluca yododadayoma, Camela cäcö jamö.

²¹ Ö̦jö däjä, bä bluca lä co̦camono wei bä lija, Elia a icua fa ajedeicunö, abenaja e cuma. —Bei. ¿Wamacö bufi nia shedecou shi wa̦lii waiquiwä daanö? Jeobaa ö̦jö a bufiblamobä a waiquiwä ja, ö̦jö lija bä bufi mö shi̦lo da blucaicu. Ö̦jö ma cui, “Ma, a yai bufiblamobä, ö̦jö Baala a waiquiwä”, wamacö bufi cuu dicoo ja, ö̦jö lija waiquiwä —a cuma. A cuma ma cui, bä a̦ fuonomi dodijiwä.

²² Ö̦jö däjä, abenaja Elianö bä nowa tama. —Camiyä Jeobaa ya wa̦no wäyälewä ya lä cui, ö̦jö cä lä, ei ya lä feiblaliyono wei ya waiquiwä. Tä jole lä bufiblamou wei a wa̦no wäyälewä 450 bä bluca cua ayaa.

²³ ¿Ö̦jö tawä? Camiyä yamacö lija, baca bolacabö wama cäcöbä nia jibäayoluu. Baala a wa̦no wäyälewä bä lä cuinö, cama e baca fa yailöjenö, e nia janööje. A fa janölalöjenö, co̦wa a̦yobä lä jilale jamö, bä nia maquecaö ma cujei, cowa wacä nia taimije. ’Ai a baca mö feduwä lä cui, inaja showawä camiyänö ya nia ca̦i taamaö mö feduo —a cuma—. Iba a̦yobä jilaa mö lä fedule jamö, ya bä nia maquecaö mö feduo, cowa wacä cua mlai ja.

²⁴ Ö̦jö däjä, afä wama a lä bufiblale a lä cui lija, wamacö nö bayeli nacao däjä, Jeobaa lija ya nö nia bayeli nacao mö feduo. ¿Ö̦jö tawä? A wa̦ yai lä fuo wei a lä cui, cowa wacä shimaö ja, ö̦jö a nia shi̦lo yai bufiblamou —Elia a cuma. —Awei, inaja lä tä yai cuobä. Wa wa̦ cadidou —bä bluca cuma.

²⁵ Ö̦jö däjä, Baala a jole lä bufiblamou wei a wa̦no wäyälewä bä lija, abenaja Elia a cuu nomöjöoma. —Bei. Cafä wamacö balöwä, wamacö malä blucale. Baca wama a fa yailönö, a da janölalöje. Ö̦jö däjä, wama a lä bufiblaö wei lija, wamacö nö bayeli nia nacao ma cui, cowa wama wacäbä nia taimi —a cuma.

²⁶ Ö̦jö däjä, cama e baca lä jibäqueno wejei a fa fuwälöjenö, a taamaö fa showadaojenö, a jole lä bufiblano wejei a Baala lija, bä nö bayeli nacaoma. Bä nö bayeli nacao ma fenaono wei ma cui, motoca a yo̦loloblou däjä ma cui bä a̦ faö showaoma. —¡Cafä bä lä bufiblale wanö, yamacö a̦ da fulä! —bä cuu ja bä a̦ nö bleaama ma cui, a wa̦ ca̦i ji̦lionomi. Bä a̦ fuanomi waiquiwä. Yalo bä nia lä dodoblamou wei bä maqueblamobä täcö jamö, bä blaö blaömou shoquebladii buoma.

²⁷ Motoca a yo̦loloblodayou däjä, Elianö bä a̦ nö waiblaö ja, abenaja bä nowa tama. —¡Bä a̦ da nacläa! A bufiblamobä a malä cui. Shomi tä jamö a bufi daeo ja̦toa. Cuwi, casö jamö a fuadalou bäa fa cule. Cuwi, blajai jamö a aa ja̦tolayoma. Cuwi, a mia bädaa ja, wama a la̦mabä —a cuma.

²⁸ Bä a̦ nacläaö showalanö, a jole lä bufiblano wejei a lija bä nofi nia ojode fa tablamonö, cama bä janömamoma, bä showadi lä cuaano weinaja showawä. Sibala sibä bada ma cuinö, wiisibö täbä wai lä namo wei täbä ca̦i ma cuinö, cama bä janömamou nö fa quilianö, bä i̦yäbö bläshäblamoma.

²⁹ ¿Ö̦jö tawä? Motoca a jaba caöblou däjä bä cuaaö showai, bä a̦ nacläaö fe weyaama. Isaeli ebä lä cuinö, yalo bä weyadi lä dodobou wei tä ma cublou däjä ma cui, bä a̦ faö showaoma. Ö̦jö ma cui, a jole lä bufiblano wejei a wa̦ ji̦lionomi. Bä a̦ fuanomi waiquiwä. Bä a̦ ji̦lianomi.

³⁰ Ö̦jö däjä, abenaja Elianö bä nowa bluca tama. —Jabo. Camiyä lija bä da ajedeiquiyo —bä nowa tama. Inaja bä nowa taö ja, bä ajedeblaleyoluma. Ö̦jö däjä, Jeobaa lija bä yalo dodoblamobä täcö lä wa̦liano wejei, täcö cadejeblaö co̦layoma.

³¹ Elianö maa 12 mabä dälema. Jacobo bä ijilubö 12 ebä lijamö bä yaiablalou lä nodiano wei, bä lä cudaono weinaja bä cuwänö, mabä däa talema. ¿Ö̦jö tawä? Jeobaa a wa̦ bädou ja a wa̦fa nia Isaeli cuo lä nomöjöono wei a Jacobo showawä lä cui.

³² Ö̦jö maa 12 mabä ja, Jeobaa lija bä yalo dodoblamobä täcö i̦taquema. Ö̦jamö lä mau uca duyäö fe fa̦yoaö showadaoma. Blowäjäjäwä uca cuoma. Ö̦jö uca ja, yono mobä fe nia lajoblaö fa cunoje ja, wöö bolacabö cäcö ja, yono mobä fe nö lajoblamolayobö wei.

³³ Ö̦jö däjä, dodijidawä co̦wa a̦yobä fa maquequeacönö, baca e fa janölalönö, ö̦jö a̦yobä jamö bä maqueblaö feyacalayoma. Abenaja bä nowa taö nomöjöoma. —Bei. Mau 4 wama ubä fe lajowä fa dälänö, yalo bä ma cui jamö, co̦wa a̦yobä ma cui jamö, ubä da löaquiyoje —bä nowa tama.

³⁴ Ö̦jö däjä, ubä taamaö co̦o fa bufinö, ai ubä löa co̦queyolumaje. Ö̦jö däjä, Elianö ubä liyäyaö co̦o fa bufinö, 3 ubä löa co̦quemaje.

³⁵ Ubä löa fa co̦cöjenö, yalo bä lä maqueono wei täcö jamö mau ubä caläö fe fa̦yoama. Mau uca ja ma cui, ubä fe lajoama.

³⁶ ¿Ö̦jö tawä? Isaeli ebä lä cuinö, yalo bä weyade lä dodobou wejei tä cublou däjä, Jeobaa a wa̦no wäyälewä Elia a ajedeblaliyoma. Jeobaa lija abenaja a cuma. —Jeobaa wa tä. Ablaamö a ma cui lija, Isaacö a ma cui lija, Isaeli a ma cui lija cafä wa lä bufiblamou wei wa. A da damolalu, Isaeli bluca ebä lija wa bufiblamobä wa lä cui, wa fei däjä dabeje. Cafä wa nosie fuamobä wale lä lämabou wei tä ca̦i daö showaobeje. Camiyä ya lä cuaale, cafä wa wa̦ ja, ya tä bluca lä taö wei tä ca̦i.

³⁷ ’¡Jeobaa, wale a̦ da fulä! —a cuma—. Wale a̦ fa fulänö, fei bä lä ublale bä bufi jaducäblobä. Wa bufiblamobä wa lä cui, wa dabeje. Cafänö wa bä bufi mö yabajadamaö lä co̦le, tä nö ca̦i ö̦jöböabeje —a cuma.

³⁸ Ö̦jö däjä, Jeobaanö cowa e wacä quea showadamalema. Wacä fa quelunö, yalo bä lä dodobono wei bä ma cui, co̦wa a̦yobä ma cui, maa mabä ma cui, coshi coshi bä lä jilaono wei bä ma cui, bä mö bluca watäa showadaquema. Mau uca ma cui, uca ca̦i wejea showadaquema.

³⁹ Ö̦jö tä dablaöje däjä, mashita jamö yedu bä möfe bluca boo showaolaliyoma. Abenaja bä cudoma. —¡Joo yai! Jeobaa a lä cui, ¡ö̦jö a yai bufiblamobä a! Jeobaa a lä cui, ¡ö̦jö a shi̦lo yai bufiblamobä a! —bei bä cudoma.

⁴⁰ Elia a wa̦ faö showadaoma. —¡Bei, bei, bei! Baala a jole lä bufiblamou wei a wa̦no wäyälewä bä bluca da fuwäalalöje. Moli ma cui a documa dijejä —bä nowa tama. Bä fuwäa fa showadaalalöjenö, Elianö bä ca̦i fa dimöbalufälönö, Sisono u casö jamö bä bluca shäalaledayoma.

Maa a quei co̦obä Elia a lä nacono wei tä a̦

⁴¹ Ö̦jö däjä, Acaba a bada lija abenaja Elia a cuma. —Wa iyadayobä a da alufälö. Maa comi a bada jo̦wa quei lä cule —a cuma.

⁴² Ö̦jö cudeenö, Acaba a iyabä a fa alufälönö, Camela cäcö bololo jamö, Elia a fuu mö feduodayoma. Ö̦jamö a culanö mashita jamö a möfe fa boalunö, bei wacucu balöcö jamö, a fe lucälayoma.

⁴³ Ö̦jö däjä, Elia a nosie fuamobä e lä cui lija a wa̦ fama. —Bei. A da alufälö, modu u lä cule jamö, wa tä möbä —a cuma. Ö̦jamö a fa alufälönö, tä möma ma cui, tä jo̦wa dablanomi. Elia a wa̦ faö co̦o ja, abenaja a cuma. —Ö̦jamö a fua da co̦lufälö. Wa fuu nosi blacäcou ja, 7 wa nia fuu cuo —e cuma.

⁴⁴ A fuu nosi fa blacäcofälönö, 7 a fuu däjä, abenaja a cuu co̦joloma. —Modu u jamö culanö jai yanowamö imicö cuwä, öjölashi a wai fa falönö, a ösölayou culoi —a cuma. Abenaja Elia e cuu nomöjöoma. —Bei. A da alufälö, Acaba wa bada yömölabä. A befi ca̦i läläabä a blacämaö da bufi, a befi ca̦i dömöö co̦o showaofälöbä, maa anö a shi wa̦lia dicoicu —e cuma.

⁴⁵ Tä nö dedejedou mlai ja, öjölashi anö tä mö bluca fa luwäblalunö, maa comi a bada quei showadaoma. Jeselele jamö, Acaba a befi ca̦i bada läläaö showaoma.

⁴⁶ Elia a ma cui, a lä didio wei sicö ja a fa ja̦loicunö, lobe a ca̦i dömöa mö fedubaliyofälöma. Jeobaanö a nö fa wa̦lojodamalönö, lobe a läläa fa co̦balöfälönö, Acaba a befi ca̦i bada nojablamalema. Jeseleleteli bä shabonobö jamö bä lä fablaaö wei jamö, Acaba a befi ca̦i waloo showao mlao däjä, Elia a waloa balöblaquema.