1 Reyes 17 - Biblia Yanowamö

Maa a nia queno lä mlai Elianö tä a̦fa lä wäyäno wei tä a̦

¹ Dibeteli Elia a wa̦fa lä cuono wei, Jeobaa a wa̦no wäyälewä a cuoma. Calaada tä ulufi jamö Dibeteli bä li bälöoma. Ö̦jö Elia a lä cui, Acaba a bada lija abenaja a cuma. —Cafä lija ya wa̦ wawädoo da showadao. Ya jolemou mlaicätä. Jeobaa a malä cule, Isaeli yama ecö lija a lä bufiblamou wei a lä cui. Ö̦jö ya nosie fuabä ya. Ei a lasha lä cule ma cui, ai a cublou co̦o däjä ma cui, camiyä ya wa̦ faö mlao däjä, maa a nia queimi fe balojowä. Jeu jeu bä ma cui, ya wa̦ faö mlalanö tä nia ca̦i jäläblou bädaomi —a cuma.

² Ö̦jö däjä, Elia lija Jeobaa a wa̦ wawälayoma. Abenaja a nowa tama.

³ —Ei tä ulufi tabi da feicöfälö. Motoca a lä faö wei tä mashi jamö wa fa culofälönö, Queli u jamö a da jo̦yaicudu, Jodana ai u mashi jamö, motoca a faö lä cuaaimaö wei jamö.

⁴ Ö̦jö u ja wa amishi nia co̦o fe yadio. Ö̦jamö wa iyamabeje, wa̦le sibä lija ya wa̦ faö waiquiwä —a nowa tama.

⁵ Ö̦jö cudeenö, inaja a cuaaö showaoma, Jeobaa a wa̦ faö ja, a lä cuno weinaja showawä. A fa alufälönö, Queli u ja a bälöblaquema, Jodana ai u mashi jamö.

⁶ Yalo bä ma cui, nii bä ma cui, wa̦le sibänö showadi ebä ca̦i fublaaö fenaomaje. Ebä weyadi ca̦i fublaaö co̦omaje. Ö̦jö u ja a amishi co̦oma.

⁷ Ya̦cumö, tä nö fa dedejedalunö, ö̦jö tä ulufi jamö maa quenomi yalo, u wejequema.

Saledateliyoma lija Elia a lä waloqueno wei tä a̦

⁸ Ö̦jö däjä, Jeobaa e a̦ wawälayoma. Abenaja e cuma.

⁹ —Bei. Wa fa jocädalunö, Sidono tä ulufi jamö wa fa alufälönö, Saledateli bä lijamö a bälöa da majöicu. Ö̦jamö wa iyamabä, a suwä lä yamiblaliyono wei a lija ya wa̦ faö waiquioma, ¿ö̦jö tawä? —Jeobaa e cuma.

¹⁰ Inaja a cuu ja, a fa jocädalunö, Saledateli bä lijamö a fulayoma. Bä alabö nacö jamö yoca lä joleono wei jamö a fa waloicunö, a suwä lä yamiblaliyono wei a dalalema.

¹¹ Fii fibä boco dayäama. Ö̦jö a wa̦lii ja, abenaja e cuma. —Mau wiisibö u befi ca̦i da boima, ya amishi co̦obä —e cuma. Mau ubä co̦aö mö fuu waiquiofälöö däjä, Elia e a̦ faö co̦o juoma. —Nii wiisibö ca̦i da boima, ¿ö̦jö tawä? —e cuma.

¹² Abenaja a suwä cuma. —Nii löbö ya taboimi. Ya jolemoimi. Jeobaa a malä cule, Isaeli wama ecö lija a lä bufiblamou wei a lä cui. Liyä ya ji̦bä wi̦isibö shi̦lo didibou, dabö dabö wiisibö ya ubä ca̦i besibou. Ö̦jö waiquiwä. Ö̦jö ya tä wai löbömabä, fii ya fibä boco jocaö cuaaö lä cule, ijiluyä sho moli yafäcö iyaö co̦obä. Ö̦jö däjä, yafäcö nia ofili bufi mlao —a suwä cuma.

¹³ Abenaja Elia e cuma. —Ma, a quili dijä. Wa lä cufenaja a cuaaö da showadao. Ö̦jö ma cui, ö̦jö ji̦bä ja, iba wiisibö wa tä wai löböblaö fa balölonö, tä da bälabayo. Ö̦jö däjä, ijilufä sho wafäcö nia lä iyaö wei, wa tä löböblaö nomöjöobä.

¹⁴ Isaeli yama ecö lija Jeobaa a lä bufiblamou wei, abenaja a malä cuu wei. Wa ji̦bä lä didibole ma cui, dabö dabö wa ubä lä besibole ma cui, Jeobaanö maa a quemaö showao mlao däjä, ö̦jö bä nia jo̦wa mlaimi. ¿Ö̦jö tawä? Ei ya wa̦ lä cui, Jeobaa ya wa̦no wäyäö lä cule—e cuma.

¹⁵ Inaja a suwä cuaaö showaoma, Elia a lä cuno weinaja showadawä. ¿Ö̦jö tawä? Ö̦jamö cama suwä a ma cui, bä ijilubö e ma cui, Elia a ma cui, bä bluca iyaö nö dedeaö fe yadioma.

¹⁶ Ji̦bä lä didibono wei ji̦bä mlanomi. Dabö dabö ubä lä besibono wei ubä ma cui, ubä ca̦i mlanomi, Jeobaa a wa̦no wäyäö ja, Elia a lä cuno weinaja showawä.

Ijilu a lä jalomaleno wei tä a̦

¹⁷ Ö̦jö tä cublou waiquilayono wei ja, a suwä lä yamiblono wei bä ijilubö e jaliliblaliyoma. A balaa fa dodijilönö, ya̦cumö möshöacö fanomi.

¹⁸ Abenaja Elia lija a bufi jalujolanö a suwä cuma. —Cafä Jeobaa wa e lä cuinö, ¿wedi tä nowa ja wale nö li bleaamaö, ijiluyä wa nomamabä? Ya doblou lä mlaono wei tä ja wale bufi nia fa jaducäblamanö, ¿bei wa li waloqueyoluma tawä? —a suwä cuma.

¹⁹ —Fäyämö ijilufä a da jibäba —e fa cunö, bä nöö enö a maobobä ja a dälema. Cama a miblaaö lä feyacaono wei yano jamö, a bälabejelayoma. Cama a malishi lä mio wei jamö, a maquebejelayoma.

²⁰ Ö̦jö däjä, Jeobaa lija a nö bayeli nacabä, a wa̦ i̦cali faö showadaoma. Abenaja e cuma. —Cafä Jeobaa bä lä bufiblale wanö, ei a suwä lä yamiblaliyono wei, ¿wedinaja wa li taamaö dicoa cule? Wale lä bälömabole a ma cui, ö̦jö wa nö ca̦i bleaamaö mö feduobä, ¿bä ijilubö wa e nomamaö daanö? —Elia bei e cuma.

²¹ Ö̦jö däjä, Jeobaa lija a wa̦ i̦cali falanö, ijilu a ja 3 a maqueblaö feyacaoma. Abenaja Jeobaa lija a cuma. —Cafä Jeobaa bä lä bufiblale wanö, ei a bufi ijilu shimöa da co̦lu —e cuma.

²² ¿Ö̦jö tawä? Jeobaanö Elia a wa̦ ji̦liledayoma. A wa̦ fa ji̦lilädunö, ijilu a bufi didia co̦quema. A jaloa co̦layoma.

²³ Elianö ijilu a maoa fa co̦länö, a yano lä feyacaono wei jamö culanö, a ca̦i i̦toa co̦layofälöma. Yano a jamö a ca̦i fa falönö, bä nöö e lija a demi co̦a co̦maquema. Abenaja e cuma. —Bei. A da mö. Ijilufä a demi co̦wä —e cuma.

²⁴ Abenaja Elia lija a suwä cuma. —Yai Bada wa e lä cui, fei däjä bä yai daö. Jeobaa wa wa̦no lä taö wei, fei däjä ya tä a̦ ca̦i bejedi daö —a cuma.