1 Pedro 5 - Biblia Yanowamö

Dodijidawä bä nia bada lä cuo wei tä a̦

¹ Jesucristo wama ebä ca̦i lä yododaö wei wamacö lä cui nija ya wa̦ nia faö nomöjöo, camiyänö iba ya bä ca̦i yododaö mö lä feduo wei ya lä cui. Jesucristo ya nö bleaaö lä dalaleno wei cä ya. Fedu jamö a lä doblaladi tä wawäblou däjä, camiyä ma cui ya nia doblao cuo mö feduo. ¿Ö̦jö tawä? Ö̦jö lä ya lä cuinö, abinaja bämacö nowa taö lä cule.

² Cama ebä nija Yai Bada tänö wamacö li lämabou, wama ebä yai nowamabä. Ebä da nowamaje, ö̦jö lä. Wamacö mojilanö mlai, bufi ojode wamacö culanö wama ebä yai nowamabä. Yanowamö täbä nija wamacö dobämou bufi lä doblao we tänö mlai, wama ebä nia lä nowamaö wei tä ja wamacö bufi yai shaliliobä.

³ ¿Ö̦jö tawä? Wama bä nosiemaö fe blacäjou mlai ja, dodijidawä wama bä yai nia lulubou. Wamacö dodijaö fa möjenö wamacö owämabeje wamacö yai cuobä.

⁴ Ö̦jö däjä, bämalecö yai lä nowamöbole a Bada bädou däjä, wamacö nia dobämodayou. ¿Ö̦jö tawä? Wamacö nö wa̦lojaö fe yadioma yalo, doblao tä yai lä cui ja wamacö nia dobädayou, ba̦limi tä ja. Einaja bada bämacö nowa taö lä cule.

Dodijidawä bämacö a̦ nia bluca lä juayou wei tä a̦

⁵ Fiya wamacö lä cuinö, bada wama bä a̦ ca̦i nia juaö. ¿Ö̦jö tawä? Bluca wamacö ma cui, wamacö a̦ dodijidawä juayobä wamacö. Cafä wamacö jömöo mlai, ai wama bä a̦ shino ji̦liabä. Abinaja tä a̦ malä cuu wei. Cama bä lä jömöo wei bä lä cui nija, Yai Bada a bufi lämou. Ö̦jö ma cui, bä jömöo lä mlai bä lä cui bä nofi yai ojodabou. ¿Ö̦jö tawä? Einaja tä a̦ cuu.

⁶ Bä jömöo dijä, ö̦jö lä. Wamacö jömöo mlai ja, Yai Bada tä lojode lä ayai nija, bä bufi yai shino da ojodao. Wamacö jömöomi ja, wawädowä wamacö nofi nia obi tabou, cama a bufi lä cuu wei däjä.

⁷ Wamacö bufi lä jalujou wei, Yai Bada nija tä a̦ bluca ca̦i da wäaje. Wamacö nofi malä jalujubou wei.

⁸ Bä da moyaweicu, ö̦jö lä. Bä nö ca̦i da daicu. Wamacö nofi lä wa̦libou wei a fecula bada lä cuinö, wamacö nabä queobä wamacö nofi taö malä cuaaö wei, öla bä waiteli lämou lä cuaaö weinaja showawä.

⁹ Bä nö yai da wa̦lojoicu. Jesucristo wama a nofi lä mölabou wei tä ja, bufi lojode bä yai da cuicu. Sadanasinö Jesucristo ebä bluca lä yabäcaö wei wama tä daö malä waiquii, cafä wamacö shino ayawä mlai. Cafä wamacö nö bleaaö lä culenaja, aifä bä bluca lä bälöblai bä ma cui, ö̦jö bä nö bleaaö mö feduwä malä cui.

¹⁰ Fei däjä wamacö nö ma bleaaö wei ma cui, tä nö nia dedeaimi. Wanonowä wamacö nö bleaaö fa balöonö, cama Yai Bada tä showawänö dodijidawä wamacö nia tabou fe yadio. Wamacö bufi ca̦i nö nia wa̦lojomabou, wamacö bufi shominajablou si ijejeo mlaobä. Wamacö bufi ca̦i nia lojodomabou. ¿Ö̦jö tawä? Yedu ja ma cui bämalecö daö showadaoma. Cristo bäma ecö cuobä bämalecö nacalema, cama ba̦limi a doblao lä culadi jamö, ba̦limi bämacö doblao cuo mö feduodayobä. Showadi bämalecö bayelibou. No mlai ja bämalecö nofi bluca ojodabou talei.

¹¹ Täbä nia bluca juwäbou shi lä wa̦lii wei, ö̦jö Yai Bada cätä waiquiwä. Inaja lä tä cuobä.

Jödödö tä a̦

¹² Ei ya tä a̦ wai jolodowä shömabä, Sibano nija ya tä a̦ oniblamaö lä cule, iba aiyä a lä cui nija. Jesucristo ya e cadidiwä nofi tabou. ¿Ö̦jö tawä? Cafä bämacö nowa tabä ya tä a̦ oniblaö lä cule. Yai Bada tänö, no mlai ja bämalecö nofi yai lä ojodabou wei wama tä a̦ bejedi dablabä, bämacö nowa taö. Ö̦jö wama tä a̦ nofi mölabolanö, bä bufi yai da lojodoicu.

¹³ Babiloniateliyoma a lä cui, Jesucristonö a yaia mö lä feduleno wei a suwä lä cui, cafä wamacö nija a wa̦fa wäyämamou bufi doblaa lä cule. U̦asimi Marcos a ca̦i.

¹⁴ Jesucristo wama ecö yalo, wamacö mö fedudayou ja bä yai da nofimayo. Bei. Cristo a lä cuinö, showadi wamacö bayeliblabä. Ö̦jö nija wamacö lä cule, wamacö bufi bluca yanöcömabobä.