1 Pedro 4 - Biblia Yanowamö

Bämacö nia lä bejedimou wei tä a̦

¹ Cristo a lä cui yanowamö a cuo däjä, a nö nini li bleaaö balöoma. Inaja a cuaaö ojodaoma yalo, cafä wamacö ma cui, inaja showawä bä nö ca̦i bleaaö ojodao cuo mö da feduo. Jesucristo a nowa ja bä nö bleaaö lä ojode wei bä lä cui, wa̦lidiwä tä ja bä yabäcamou si ijejeo malä mlai.

² ¿Ö̦jö tawä? Eja wamacö demi cuo showao däjä, yanowamö täbä showadi lä cuaaö wei tä ja bä luluamo dijä, ö̦jö lä. Yai Bada tänö wamacö nosiemaö ja, a lä cuu weinaja etä shino yai da taje.

³ Yai Bada tä daö lä mlajei bä lä cuaaö weinaja wamacö jaba cuaaö mö feduoma. Wamacö nofi beshili jushuama. Wamacö bufi ca̦i waiyoma. Wamacö shi ca̦i walimamoma. Wamacö bufi nia jole jole fa dobladonö, showadi wamacö iyaö ca̦i co̦camoma. Nö idubö täbä bädawä ma cui, ö̦jö wama täbä ca̦i bufiblaö nofi jushuaö dicooma. Fei däjä inaja bä cuaaö co̦daa dijä. Wamacö jaba cuaaö lä waiquiono weinaja, inaja lä waiquiwä.

⁴ Ö̦jö bä sho wamacö jaba lä cuono wei bä lä cui, fei däjä cafä wamacö nija bä bufi wedinajamou nomöjöa. Bä bufi lämou mlai ja, bä nofi showadi jushuabä jamö wamacö fei däjä yädäomi ja, wamacö nö waiblaö nomöjöoje.

⁵ Ö̦jö ma cui, Yai Bada tänö bä a̦ nö nia wäamaö, täbä jödödöwä nia lä jömaö wei a lä cuinö. Bä demi lä showai bä ma cui, bä lä nomaö wei bä ma cui, bä jödödöwä jömabä a läa waiquia.

⁶ ¿Ö̦jö tawä? Bä nomaa lä waiquilayono wei bä ma cui nija, Yai Bada dodijidawä etä a̦ wäyämamou balöoma. Yanowamö bämacö dobloimi tä nowa ja, bämacö bluca lä nomaö weinaja bä cublou ma cule, tä a̦ bejedi fa bufijenö, Yai Bada a ba̦limi lä culenaja bä bufi cuo mö feduobä.

⁷ Ei tä a̦ jamö, bä bufi mojoduo dijä. Yai Bada tänö täbä nia lä jömaö wei tä cublou ajedou waiquia. Ö̦jö cudeenö bä bufi da wasöo. Bä bufi ca̦i da moyaweicu, wamacö nö bayeli lä nacao wei tä ja wamacö jujeblou dicoo mlaobä.

⁸ Showadi bä ca̦i shino yai da nofimayo. Ö̦jö däjä ai a doblou ma mlai ma cui, wamacö bufi nofio cudeenö wama tä nowa nia taboimi.

⁹ Abinaja ca̦i. Bufi lämou mlai ja, dodijidawä bä iyaö ca̦i da loablalamayo. Ai bä waloquei däjä, dodijidawä bä ca̦i da bälömaboje.

¹⁰ Wamacö bayeliblayobä, Yai Bada tänö wamacö bluca dobäö cuaaö waiquiwä. ¿Ö̦jö tawä? Camanö wamacö nö bluca wa̦lojamaö yalo, dodijidawä bä da bayeliblayo.

¹¹ Wama bä yömölabä wamacö waiquiwä ja, Yai Bada etä a̦ ja bä shino da yömölaje. Wama bä bayeliblabä wamacö waiquiwä ja, Yai Bada tänö wamacö nö lä wa̦lojomabou wei wama a bufibolanö, bä da bayeliblaje. Inaja Jesucristo wama ecö bluca cuaaö ja, wama tä taö lä bädao wei tä ma cui ja, Yai Bada tä nia doblao dablamou. Ö̦jö a wa̦fa doblao tamou shi wa̦libä a waiquiwä. A nia Bada läo shi wa̦lii. ¿Ö̦jö tawä? Inaja lä tä cuobä.

¹² Iba bämacö lä nofimaö wei wamacö. Wamacö nö lä bleaamaö wejei tä ja, bä bufi shädayaimou fe balojoo dijä. Tä shomimi. Inaja bämacö taamamobä bämacö waiquiwä. Bämacö bufi wabamobä cätä.

¹³ ¿Ö̦jö tawä? Wamacö bufi cuaablalou mlai ja, wamacö bufi yai doblalobä. Cristo a ma cui a nö bleaamaö malä balöono wejei. Ö̦jö wama a owämaö yalo wamacö bufi yai doblalobä wamacö. Fei däjä wamacö bufi doblalou fe yadio yalo, obi wamacö bufi nia shino yai doblalou fe balojoo, Cristo a doblao dablamou däjä.

¹⁴ Cristo wama a bufibou yalo wamacö nö waiblaöje ja, wamacö bufi doblalobä wamacö waiquiwä. Yai Bada bei tä Bufi lä doblalenö wamacö malä bayelibou wei.

¹⁵ Ö̦jö ma cui abinaja ya cuu. Yanowamö wama a fa shälönö wamacö nö bleaamaöje ja, ö̦jö shomi tä li. Ö̦jö ya tä a̦fa taimi. Wamacö fa tomömonö wamacö taamaöje ja, cafä wamacö mayo. Wamacö doblou dicoo fa mlacunö wamacö taamamou ja, inaja showawä. Wamacö a̦ faö bashio bädao däjä wamacö taamamou ja, cafä wamacö mayo li.

¹⁶ Ö̦jö ma cui, Jesucristo bufilewä wamacö yalo wamacö nö bleaamaöje ja, bä bufi quilijo dijä. Wamacö bufi quilijou mlai ja, Cristo wama ecö a̦fa jilaöje yalo Yai Bada tä nofi shino yai da doablaje.

¹⁷ Yai Bada tänö täbä nia bluca lä jömaö wei tä cuaaö waiquia lä cuimadi. Cama bäma ecö lä cui, bämacö nia jömamou lä balöblao wei bämacö. Bämacö fei däjä lä wabamou wei, ö̦jö tä li waiquiwä. ¿Ö̦jö tawä? Camiyä bämacö jömamou balöblao ja lä, Jesucristo dodijidawä etä a̦ juaö lä mlajei bä lä cui, ö̦jö bei bä nia yai jömamou dodijio.

¹⁸ Yedu jamö abinaja Yai Bada tä a̦ cuu balöo showaoma. Bä lä cadidou wei bä lä cui, nö bleaaö mlai ja bä bayeliblamoimi waiquiwä yalo, Yai Bada tä daö lä mlajei bä lä cui, ¿wedinaja ö̦jö bei bä nia li taamamou dodijio, wa̦lidiwä talewä bä lä cui? Einaja tä a̦ cuu balöo showaoma.

¹⁹ ¿Ö̦jö tawä? Ö̦jö cudeenö, wamacö nö lä bleaamaö wejei wamacö lä cui, inaja Yai Bada tänö wamacö taamaö bufio waiquia ja, bä dodijaö fe da yadio. Wamacö lä tablaleno wei a lä cui a nofi shino yai da mölaboje, wamacö bufi bayelibobä. Öjö a wa̦ cadidou malä waiquii.